1, 2. Jesus okwa li a ningi shike muusiku wahugunina naayapostoli ye, nomolwashike ompito ndjoka yahugunina ya li ya simanenena kuye?

 SHO Jesus a li a gongala naayapostoli ye megumbo limwe mongulu yopombanda muJerusalem, okwa li e shi kutya mboka owo uusiku we wahugunina okukala pamwe nayo. Ethimbo olya li lya thikana a shune kuHe. Jesus okwa li e li pokukwatwa neitaalo lye olya li tali ka makelwa noonkondo shi vulithe nale. Nonando okwa li e shi kutya ota ka sa, okwa li e na oshimpwiyu naayapostoli ye.

² Jesus okwa adhika a lombwela nale aayapostoli ye kutya ote ke ya thiga po, ihe okwa li e na natango oshindji okutya opo ya vule okwiidhidhimika. Okwa longitha ompito ndjoka yahugunina e ya longe iiyilongomwa ya simanenena mbyoka tayi vulu oku ya kwathela ya kale aadhiginini. Oohapu dhe odha li tadhi zi komutima nodha li tadhi hekeleke aayapostoli ye shi vulithe nale. Omolwashike Jesus a li ti ipula unene shi na ko nasha nayo shi vulithe ye mwene? Omolwashike ethimbo ndyoka a li nayo hugunina lya simanenena kuye? Olya simanenena molwaashoka oya li ompito ye yahugunina okuulika kutya oku ya hole shili.

3. Otu shi shi ngiini kutya Jesus ina tegelela sigo okomunute gwahugunina u ulike kutya oku hole aalanduli ye?

³ Konima yomimvo omilongo sho Jesus a si, omuyapostoli Johannes okwa li a nwethwa mo a nyole iiningwanima mbyoka ya ningwa uusiku mboka. Okwa nyola a ti: ‘Olya li esiku lya tetekela Opaasa. Jesus okwa li e shi kutya ethimbo lye olya thikana okuthiga po uuyuni mbuka, a ye kuHe. Oye ngaashi a kala e hole mboka ye ya li muuyuni, okwa li e ya hole sigo opehulilo.’ (Johannes 13:1) Jesus ina tegelela uusiku mboka opo e yu ulukile ohole ye. Muukalele we, okwa li u  ulike kutya oku hole aalongwa ye momikalo dhi ili nodhi ili. Osha simana kutse tu konakone omikalo moka a li e shi ningi, molwaashoka ngele otwe shi ningi, nena otatu ulike lela kutya tse aalongwa ye yashili.

4, 5. (a) Omolwashike Jesus a li a pumbwa eidhidhimiko sho tu ungaunga naayapostoli ye? (b) Jesus okwa li i inyenge ngiini sho a adha aayapostoli ye yatatu ya kotha moshikunino shaGetsemane?

⁴ Ohole neidhidhimiko oya pambathana. Aakorinto yotango 13:4 otaya ti: “Ohole ohayi idhidhimikile ayihe.” Eidhidhimiko olya kwatela mo okuungaunga nayalwe nengungumano. Mbela Jesus okwa li a pumbwa eidhidhimiko sho tu ungaunga naalongwa ye? Eeno, osho lela. Ngaashi twe shi mono mOntopolwa onti-3, aayapostoli oya li taya kakadhala okukokeka eifupipiko. Oya kala nokupatana lwiikando kutya olye omukuluntu mokati kawo. Jesus okwa li i inyenge ngiini? Mbela okwa li e ya geela nenge a kale e ya nine? Aawe, okwa li a tompathana nayo i itegelela nokuli naasho ya li taya ‘tsu oompata’ kutya olye omukuluntu e vule yakwawo ongulohi yahugunina ndjoka a li pamwe nayo. — Lukas 22:24-30, KB; Mateus 20:20-28; Markus 9:33-37.

⁵ Ongulohi oyo tuu ndjoka Jesus okwa li e na okwiidhidhimikila aayapostoli ye 11 aadhiginini moshikunino shaGetsemane. Sho ya thiki nkoka, okwa kutha Petrus, Jakob naJohannes e ta yi pamwe nayo mokati koshikunino, ihe aayapostoli yahetatu oya thigala po. Okwa ti kuyo: “Ondi na oluhodhi momwenyo gwandje sigo okusa. Kaleni mpaka, mu tonate pamwe nangame.” Okwa zi po puyo okanano okafupi e ta tameke okugalikana a mana mo. Sho a galikana ethimbo ele, okwa shuna kaayapostoli ye yatatu. Okwe ya adha taya ningi shike? Oya li ya pwila moomposi, nonando oye shi kutya Jesus ota ka makelwa. Mbela okwe ya nyenyetele sho ya nyengwa okukala ya tonata? Aawe, okwa li e ya tsu omukumo. Oohapu dhe dhohenda odhu ulike kutya oku uvite ko onkalo  yawo nomaunkundi gawo. * Okwa ti: “Ombepo yomuntu oya hala, ihe onyama onkundi.” Jesus okwa li i idhidhimikile aalongwa ye ongulohi ndjoka, nonando okwe ya adha ya pwila moomposi sho a galukile kuyo lwiikando ya konda pwiiyali. — Mateus 26:36-46.

6. Ongiini tatu vulu okuholela Jesus uuna tatu ungaunga nayalwe?

⁶ Otashi tsu omukumo okutala nkene Jesus a li i idhidhimikile aayapostoli ye. Lwahugunina, eidhidhimiko lye olye eta iizemo iiwanawa, molwaashoka aalumentu mboka aadhiginini oyi ilongo kutya eifupipiko nokukala ya tonata oshinima sha simana. (1 Petrus 3:8; 4:7) Ongiini tatu vulu okuholela Jesus uuna tatu ungaunga nayalwe? Omuuvithi otashi vulika e ye komukuluntugongalo te mu lombwele uupyakadhi we, ihe omukuluntugongalo ngoka naye otashi vulika a kale a vulwa nenge a lulilwa kiimpwiyu ye. Omathimbo gamwe mboka taya pewa omayele ohashi vulika ya kale taya kakadhala oku ga tula miilonga. Onkee ano, aakuluntugongalo oye na okukala lela hayi idhidhimike. Omolweidhidhimiko lyawo aakuluntugongalo ohaya ungaunga noshigunda “nombili” nosho wo ‘nohenda.’ (2 Timoteus 2:24, 25; Iilonga 20:28, 29) Aavali nayo oya pumbwa okuholela eidhidhimiko lyaJesus, molwaashoka omathimbo gamwe oyana ohaye ende kashona okutula miilonga omayele nenge omapukululo ngoka taya pewa. Ohole neidhidhimiko otayi ka kwathela aavali ya tsikile oku ya putudha. Eidhidhimiko lyawo otali ke ya etela iizemo yinyanyudha. — Episalomi 127:3.

7. Omomikalo dhini Jesus a li a sile oshimpwiyu aalongwa ye palutu?

⁷ Omuntu ngoka e hole ooyakwawo ohe ya longele uuwanawa. (1 Johannes 3:17, 18) Ohole “ihayi kongo shayo yene.” (1 Aakorinto 13:5) Ohole oyo yi inyengitha Jesus a sile oshimpwiyu aalongwa ye palutu. Olundji okwa li he ya kwathele  omanga nokuli inaaya popya shoka ya pumbwa. Sho a mono kutya oya li ya vulwa, okwe ya lombwele ya ye ‘ye ki ikalele ya vululukwe po kashona.’ (Markus 6:31) Sho a dhimbulula kutya oya sa ondjala, okwe ya pe iikulya pamwe nengathithi lyaantu omayuvi mboka ye ya okupulakena kuye. — Mateus 14:19, 20; 15:35-37.

8, 9. (a) Oshike tashi ulike kutya Jesus okwa li a gwanitha po oompumbwe dhopambepo dhaalongwa ye? (b) Sho Jesus a li komuti gwomahepeko, oku ulike ngiini kutya oku na ko nasha nayina?

⁸ Jesus okwa li e shi oompumbwe dhopambepo dhaalongwa ye nokwa li he dhi gwanitha po. (Mateus 4:4; 5:3) Olundji okwa li he ya pe eitulomo lyi ikalekelwa uuna te ya longo. Elalakano lyEuvitho lyokOndundu olya li unene tuu oku ya kwathela. (Mateus 5:1, 2, 13-16) Okwa li ha fatululile ‘aalongwa ye uuna ye li oyo ayeke’ omaudhi ngoka a longo aantu. (Markus 4:34) Omanga inaa shuna megulu, Jesus okwa langeke po “omupiya omudhiginini nomunandunge” opo a sile oshimpwiyu pambepo aalanduli ye. Ongundu yomupiya oya thikama po maamwahe yaJesus aagwayekwa nombepo mboka  ye li kombanda yevi taya longo nuudhiginini oku tu pa “iikulya pethimbo” okuza methelemumvo lyotango E.N., sigo okunena. — Mateus 24:45.

⁹ Esiku Jesus a dhipagwa okwe shi ulike kutya oku na ko nasha nuupambepo waamboka e hole. Kala ando wa fa wu mu wete sho e li komuti gwomahepeko u uvite uuwehame uunene. Opo a fudhe, okwa li e na okuyelula olutu lwe noompadhi dhe, ihe okwa li ta luluma noonkondo omolwoomboha ndhoka dha mbambangelwa koompadhi dhe naasho ombunda ye ndjoka ya dhengwa tayi iwegenyene koshiti. Osha li oshidhigu kuye notashi mu ehameke sho ta popi nokufudha. Ihe manga inaa sa, okwa popi oohapu ndhoka tadhi holola kutya oku hole unene yina, Maria. Jesus sho a mono yina nomuyapostoli Johannes ya thikama popepi naye, okwa popi newi lyopombanda a ti: “Meme, omumwoye oye ngo!” Opo ihe okwa lombwele Johannes a ti: “Nyoko oye ngo!” (Johannes 19:26, 27) Jesus okwa li e shi kutya omuyapostoli ngoka omudhiginini ota ka sila oshimpwiyu Maria palutu nopambepo. *

10. Ongiini aavali taya vulu okuholela Jesus uuna taya sile oshimpwiyu oyana?

 ¹⁰ Aavali mboka ye na ko nasha noyana ohaya landula oshiholelwa shaJesus. Omusamane ngoka e hole uukwanegumbo we ohe wu sile oshimpwiyu palutu. (1 Timoteus 5:8) Iilyo yomaukwanegumbo oya pumbwa okwiinyanyudha nokuvululukwa po. Osha simanenena opo aavali Aakriste ya kale haya sile oyana oshimpwiyu pambepo. Ngiini mbela? Omokuninga ekonakonombiimbeli lyuukwanegumbo pandjigilile momukalo tagu tungu notagu nyanyudha oyana. (Deuteronomium 6:6, 7) Aavali ohaya longo oyana okupitila moohapu nomiiholelwa yawo kutya uukalele, okwiilongekidhila okugongala nokukala puko oshinima sha simanenena, shoka oyana ye na okuninga pandjigilile. — Aahebeli 10:24, 25.

11. Jesus okwa longo shike aalanduli ye kombinga yokudhimina po?

¹¹ Omuntu omunahole oha dhimine po ooyakwawo. (Aakolossa 3:13, 14) Aakorinto yotango 13:5 otaya ti: “Ohole ihayi dhimbulukwa uuwinayi ye u ningilwa.” Jesus okwa li a lombwele aalanduli ye iikando niikando esimano lyoku shi ninga. Okwe ya lombwele kutya kaye na okudhimina po owala ‘luheyali, aawe, olwomilongo heyali luheyali,’ shoka tashi ti kutya otu na okukala hatu dhimine po yalwe aluhe. (Mateus 18:21, 22) Okwe ya longo wo kutya ngoka a yona oku na okudhiminwa po uuna i iyela ombedhi. (Lukas 17:3, 4) Jesus ka li a fa Aafarisayi aafudhime mboka ya li haya popi owala oohapu, ihe ihaya tula miilonga shoka taya longo aantu. (Mateus 23:2-4) Ngashingeyi natu tale nkene Jesus a dhimine po kuume ke kopothingo ngoka a li e mu yemateke.

12, 13. (a) Ongulohi ndjoka Jesus a kwatwa, Petrus okwa li a ningi shike shoka sha yemateke Jesus? (b) Konima yeyumuko lye, Jesus oku ulike ngiini kutya oha dhimine po ngaashi a longo aantu?

¹² Jesus okwa li e na ekwatathano ewanawa naPetrus omulumentu ngoka omathimbo gamwe a li ha ningi omatokolo  nziya. Okwa li a pe Petrus uuthembahenda wi ikalekelwa omolwomaukwatya omawanawa ngoka a li e na. Petrus, Jakob naJohannes oya li ya mono iikumithalonga yontumba mbyoka aayapostoli ooyakwawo inaaya mona. (Mateus 17:1, 2; Lukas 8:49-55) Ngaashi sha popiwa nale, Petrus oye gumwe gwomaayapostoli mboka ya li ya yi naJesus mokati koshikunino shaGetsemane ongulohi manga inaa kwatwa. Ihe ongulohi oyo tuu ndjoka sho Jesus a kengelelwa e ta kwatwa, Petrus naayapostoli ooyakwawo oya yi ontuku e taye mu thigi po. Ihe konima yethimbo Petrus okwi ikumike opo a ka tale nkene Jesus ngoka inaa yona nando osha, ta pangulwa. Petrus okwa li a kwatwa kuumbanda e ti idhimbike Jesus lwiikando itatu, oshinima shoka sha li sha puka noonkondo. (Mateus 26:69-75) Jesus okwa li i inyenge ngiini? Ando ongoye wa ningilwa ngaaka kukuume koye kopothingo, andola owi inyenge ngiini?

¹³ Jesus okwa li a dhimine po Petrus nehalo ewanawa. Okwa li e shi kutya Petrus okwi iyela ombedhi shili. Konima yaashoka, omuyapostoli ngoka i iyela ombedhi ‘okwi ihata po e ta lili.’ (Markus 14:72) Sho a yumuka, Jesus okwi ihololele Petrus tashi vulika opo e mu hekeleke noku mu shilipaleka kutya okwe mu dhimina po. (Lukas 24:34; 1 Aakorinto 15:5) Konima yoomwedhi mbali lwaampono, Jesus okwa li a tumbaleke Petrus sho e mu pe oshinakugwanithwa a kwatele komeho iilonga yokuuvithila engathithi lyaantu mesiku lyaPentekoste muJerusalem. (Iilonga 2:14-40) Jesus ka li e nine aayapostoli ye ayehe sho ye mu yi ontuku. Ihe konima yeyumuko lye, okwa tsikile noku yi ithana ‘aamwahe.’ (Mateus 28:10) Osha yela kutya Jesus ina longa owala aantu ya kale haya dhimine po, ihe ye mwene okwa li he ya dhimine po.

14. Omolwashike tu na okwiilonga okudhimina po yalwe, nongiini tatu ku ulika kutya otwi ilongekidha oku shi ninga?

¹⁴ Tu li aalanduli yaKristus, otu na okwiilonga okukala hatu dhimine po yalwe. Omolwashike mbela? Omolwaashoka inatu gwanenena nohatu yono ngaashi mboka haya  yono kutse. Omathimbo nomathimbo ohatu puka moohapu nomiilonga. (Aaroma 3:23; Jakob 3:2) Uuna tatu dhimine po yalwe, Jehova naye ote ke tu dhimina po. (Markus 11:25) Ongiini tatu ku ulika kutya otwi ilongekidha okudhimina po mboka ya yona kutse? Olundji ohole oyo hayi tu kwathele twaaha kale nokukonenena uupuko nomayono gayalwe. (1 Peter 4:8) Ngele mboka ya yona kutse oyi iyela ombedhi shili ngaashi naanaa Petrus a li a ningi, otu na oku ya dhimina po nehalo ewanawa twa fa Jesus. Pehala lyoku ya kwatela onkone, otu na oku ya dhimina po nombili. (Aaefeso 4:32) Ngele tatu shi ningi, otatu humitha komeho ombili yegongalo notatu ka kala tu na ombili yokomutima noyopamadhiladhilo. — 1 Petrus 3:11.

15. Omolwashike Jesus a li i inekela aayapostoli ye, nonando oya li inaaya gwanenena?

¹⁵ Ohole neinekelo ohayi endele pamwe. Ohole “otayi itaale ayihe.” * (1 Aakorinto 13:7, KB) Ohole oya li yi inyengitha Jesus a kale i inekela aalongwa ye, nonando oya li inaaya gwanenena. Okwa li e yi inekela noku shi kutya oye hole lela Jehova noya hala okulonga ehalo lye. Jesus ka li ha kala e ya limbililwa omolwomapuko ngoka haya ningi. Pashiholelwa, sho Jakob naJohannes ya yi kuyina noku mu lombwela a pule Jesus e ya pe oondondo dhopombanda mUukwaniilwa we, Jesus ka li e ya limbililwa nenge e ya kuthe oondondo dhuuyapostoli. — Mateus 20:20-28.

16, 17. Jesus okwi inekelela aalongwa ye iinakugwanithwa yini?

¹⁶ Opo Jesus u ulike kutya okwi inekela aalongwa ye, okwe ya pe iinakugwanithwa ya yoolokathana. Okwa li e yi inekelele oshinakugwanithwa shokutopola iikulya iikando  iyali sho a kutitha oongundu dhaantu pashikumithalonga. (Mateus 14:19; 15:36) Okwa tumu Petrus naJohannes ya ye kuJerusalem ya ka longekidhe Opaasa ye yahugunina. Oya si oshimpwiyu opo pu kale onzigona, omaviinu, oshikwiila inaashi ya efulika, iigwanga iilulu niipumbiwa iikwawo. Iilonga mbyoka kaya li ya nathangwa, molwaashoka Opaasa oya li yi na okulongekidhwa ngaashi naanaa Ompango yaMoses tayi ti, na Jesus okwa li e na okugwanitha po Ompango ndjoka. Kakele kaashono, Jesus okwa li a longitha omaviinu noshikwiila inaashi ya efulika ongulohi ndjoka yi li omandhindhiliko ga simana sho a dhiki po Edhimbuluko lyeso lye. — Mateus 26:17-19; Lukas 22:8, 13.

¹⁷ Jesus okwa li e wete kutya oshe eleka okwi inekelela aalongwa ye iinakugwanithwa iinene. Okwi inekelela aalanduli ye aagwayekwa kombanda yevi oshinakugwanithwa sha simana shokulongekidha nokupa aapiya ooyakwawo iikulya yopambepo, ngaashi twe shi mono metetekelo. (Lukas 12:42-44) Oshilonga oshinene shokuuvitha nokuninga aantu aalongwa nasho okwe shi inekelela aalongwa ye. (Mateus 28:18-20) Nonando katu mu wete ngashingeyi, oku li ta pangele megulu nokwi inekela ‘omagano ngoka ge li aantu’ ga sile oshimpwiyu pambepo egongalo lye lyokombanda yevi. — Aaefeso 4:8, 11, 12.

18-20. (a) Ongiini tatu vulu okuulika kutya otwi inekela ooitaali ooyakwetu? (b) Ongiini tatu vulu okuholela Jesus mokugandja iinakugwanithwa nehalo ewanawa? (c) Oshike tashi ka kundathanwa montopolwa tayi landula?

¹⁸ Ongiini tatu vulu okuholela Jesus uuna tatu ungaunga nayalwe? Okukala twi inekela ooitaali ooyakwetu otashi ulike kutya otu ya hole. Ohole ohayi tu ningitha tu tale omaukwatya omawanawa gayalwe, ihe hamapuko gawo. Uuna tu uvithwa nayi kuyalwe, oshinima shoka hashi ningwa iikando oyindji, ohole otayi ke tu kwathela opo twaahe ya pangule nonyanya. (Mateus 7:1, 2) Ngele otu na etaloko ewanawa, otatu ka ungaunga nooitaali ooyakwetu momukalo  ngoka tagu tungu pehala lyoku ya teya. — 1 Aatessalonika 5:11.

¹⁹ Otatu vulu okulandula oshiholelwa shaJesus shokupa yamwe iinakugwanithwa nehalo ewanawa. Oshi li nawa kwaamboka ye na iinakugwanithwa megongalo ya kale haye yi gandja nehalo ewanawa kuyalwe mboka taya vulu oku yi longa nokukala ye ya inekela kutya otaye ke yi gwanitha po shi thike pokuvula kwawo. Aakuluntugongalo mboka ye na owino otaya vulu okudheula aalumentu aagundjuka mboka ya hala “oshilonga oshiwanawalela” shokukwathela megongalo. (1 Timoteus 3:1; 2 Timoteus 2:2) Edheulo ndyoka olya simanenena. Sho Jehova ta tsikile nokweendelelitha iilonga yUukwaniilwa, osha pumbiwa opo pu dheulwe aalumentu mboka ya pyokoka ya sile oshimpwiyu pambepo aantu oyendji mboka taye ya moshili. — Jesaja 60:22.

²⁰ Jesus okwe tu tulila po oshiholelwa oshiwanawa shokuulukila yalwe ohole. Ohole oyo ya simana unene momikalo adhihe ndhoka tatu vulu oku mu holela. Montopolwa tayi landula otatu ka kundathana kombinga yohole ye onene ndjoka e tu hole nayo sho a gandja omwenyo gwe nehalo ewanawa.