1-3. (a) Omomukalo guni Jesus a thigi po aayapostoli ye, notu shi shi ngiini kutya ekwatathano lye nayo inali hulila mpoka? (b) Omolwashike tu na okwiilonga kombinga yonkalamwenyo yaJesus sho a shuna megulu?

 JESUS okwa li a tsakanene lwahugunina naayapostoli ye 11 kOndundu yOomono. Aayapostoli oya li ye mu hole noonkondo noye mu simaneka. Nonando okwa li nolutu lwopanyama, Jesus omuyumudhwa okwa ninga nale omwana gwaJehova gwopambepo, oshishitwa oshinankondo shi vule iishitwa ayihe.

² Sho Jesus a li kondundu ndjoka yi li kuuzilo wesilu lyaKidron ndyoka li li pokati kondundu ndjoka naJerusalem, okwa li a dhimbulukwa iinima oyindji. Mesilu lyondundu ndjoka omo mu na ondoolopa Betania, moka mwa li hamu kala Lasarus ngoka a li a yumudhwa kuJesus. Iiwike iishona yowala ya piti po, Jesus okwa li e ya muJerusalem nondjila ndjoka ya za kuBetfage shoka shi li popepi naJerusalem. Oshikunino shaGetsemane moka Jesus a li a nika oluhodhi ongulohi ndjoka manga inaa kwatwa po, otashi vulika wo shi li popepi nOndundu yOomono. Jesus okwa li a topoka naalanduli ye mboka ya li ookuume ke kopothingo pOndundu oyo tuu ndjoka. Okwa li a popi oohapu dhohenda sho ta topoka nayo. Opo ihe okwa tameke okuyeluka po pevi. Aayapostoli oya li ya thikama taya tongolola sho Omuwa gwawo ngoka ye hole ta londo ta yi megulu. Lwahugunina, oshikogo oshe ya kwidhidhike noinaya vula we oku mu mona. — Iilonga 1:6-12.

³ Mbela sho Jesus a thigi po aayapostoli ye otashi ti kutya ita ka kala we e na ekwatathano nayo? Hasho nando. Aayengeli yaali oya li ye ya holokele noku ya dhimbulukitha kutya Jesus ota ka kala e na ekwatathano nayo. (Iilonga 1:10, 11) Okuya kwe megulu okwa li owala etameko lyokukala e na ekwatathano  naalongwa ye. Oohapu dhaKalunga otadhi tu lombwele shoka sha li sha ningilwa Jesus. Osha simana tu ilonge kombinga yaashoka a ka longa sho a yi megulu. Omolwashike mbela? Dhimbulukwa oohapu ndhoka Jesus a lombwele Petrus a ti: “Landula ndje.” (Johannes 21:19, 22) Atuheni otwa pumbwa okuvulika koshipango shoka monkalamwenyo yetu ayihe. Opo tu shi ninge, otu na okukala tu shi shoka Omuwa gwetu ta ningi ngashingeyi nosho wo oshilonga shoka a pewa sho e li megulu.

4. Ombiimbeli oya holola ngiini komeho yethimbo shoka Jesus ta ka ninga ngele a shuna megulu?

⁴ Ombiimbeli inayi popya kutya sho Jesus a thiki megulu oshike sha ningwa po naasho a hangana naHe. Ihe oya popya nale kutya oshike tashi ka ningwa ngele Jesus a shuna megulu. Aajuda oya kala ye na ondjigilile yokudhana oshituthi oshiyapuki uule womathelemimvo ge vulithe 15. Omusaaseri omukuluntu okwa li ha yi mUuyapukielela wotempeli esiku limwe momumvo kehe opo a shashamine ombinzi komeho yoshikethahangano ndjoka ya yambwa mEsiku lyEkwatakanitho. Mesiku ndyoka, omusaaseri omukuluntu okwa li ha kala ta thaneke Mesiasa. Jesus okwa gwanitha po lumwe aluke eityo lyehunganeko lyoshituthi shoka sho a shuna megulu. Okwa li a yi muuyapuki wo wenewene waJehova megulu, ehala eyapukielela meshito alihe nokugandja kuHe ongushu yekuliloyambo lye. (Aahebeli 9:11, 12, 24) Mbela Jehova okwa li ngaa a taamba ko ongushu yeyambo ndyoka?

5, 6. (a) Oshike tashi ulike kutya Jehova okwa taamba ko ekuliloyambo lyaKristus? (b) Oolye haya mono uuwanawa mekuliloyambo, nongiini?

⁵ Eyamukulo kepulo ndyoka otatu li mono owala mokutala shoka sha ningwa po konima sho Jesus a yi megulu. Ongundu onshona yAakriste ye li 120 lwaampono oya li ya gongala mongulu yimwe yopombanda muJerusalem nohaluka oyu uvu oshihomo oshinene shoka shu udhitha ehala moka ya li. Oya li ya lambelwa komalaka ga fa omulilo komitse dhawo, noyu  udhithwa ombepo ondjapuki e taya tameke okupopya omalaka gi ili nogi ili. (Iilonga 2:1-4) Oshiningwanima shika otashi ulike kutya opwa valwa oshigwana oshipe, Israeli shopambepo, shoka shi li “ezimo [epe lyaKalunga] lya hogololwa, aayambi yOmukwaniilwa” mboka taya ka longa ehalo lye kombanda yevi. (1 Petrus 2:9) Shika osha yela kutya Jehova okwa hokwa nokwa taamba ko ekuliloyambo lyaKristus. Etililo ndyoka lyombepo ondjapuki oli li limwe lyomomayambeko gwotango ngoka ga ningwa omolwekuliloyambo.

⁶ Okuza mpoka ekuliloyambo lyaKristus olya kala nokweetela aalanduli ye ayehe uuwanawa muuyuni. Ohatu mono uuwanawa mboka kutya nduno otu li “oshingunda oshishona,” shoka sha thikama po maantu mboka taya ka pangela pamwe naKristus megulu, nenge otu li ‘oonzi dhilwe,’ aantu mboka taya ka kala kombanda yevi kohi yepangelo lye. (Lukas 12:32; Johannes 10:16) Omolwekuliloyambo ndyoka, otu na etegameno lyonakuyiwa notatu vulu okudhiminwa po oondjo dhetu. Ngele otwi ‘itaala’ mekuliloyambo nokulandula Jesus esiku nesiku, otatu ka kala tu na eiyuvo lya yela netegameno lya tsa lyonakuyiwa. — Johannes 3:16.

7. Sho Jesus a shuna megulu, okwa pewa oonkondopangelo dhini, nongiini to vulu okuulika kutya owa gama kombinga ye?

⁷ Okuza sho Jesus a shuna megulu sigo okunena, oku li mo ta longo shike? Okwa pewa oonkondopangelo oonene. (Mateus 28:18) Jehova okwe mu ningi omukwaniilwa gwegongalo lyopaKriste, oshilonga shoka a kala ta gwanitha po pauyuuki note shi ningi pahole. (Aakolossa 1:13) Ngaashi sha hunganekwa, Jesus okwa pa aalumentu oshinakugwanithwa ya sile oshimpwiyu oompumbwe dhoshigunda she. (Aaefeso 4:8) Pashiholelwa, okwa hogolola Paulus a kale “omuyapostoli gwaapagani” e te mu tumu a taandelithe onkundana ombwaanawa kiilongo yokokule. (Aaroma 11:13, KB; 1 Timoteus 2:7) Lwopehulilo lyethelemumvo lyotango, Jesus okwa li a gandja etumwalaka lyolupandu, lyo otali kumagidha nokupukulula omagongalo gaheyali muAsia shoka sha li oshitopolwa shaRoma. (Ehololo ontopolwa 2-3) Mbela owu shi wete nokutya Kristus  oye Omutse gwegongalo lyopaKriste? (Aaefeso 5:23) Ngele owa hala okutsikila okukala omulanduli gwe, owu na okuvulika nokukokeka ombepo yuukumwe megongalo lyeni.

8, 9. Jesus okwa li a pewa oonkondopangelo dhini mo 1914, naashika osha guma ngiini omatokolo ngoka hatu ningi?

⁸ Mo 1914 Jesus okwa pewa ishewe oonkondopangelo dha gwedhwa po. Momumvo moka okwa langekwa po e li Omukwaniilwa gwUukwaniilwa waJehova wopaMesiasa. Sho Jesus a tameke okupangela, “megulu omwa tukuluka olugodhi.” Olye a li a sindana molugodhi? Satana noompwidhuli dhe oyu umbilwa kombanda yevi shoka sha ningitha onkalo yi kale ya yaga kegonga. Iita, omiyonena, uukulo, omikithi, omakakamo gevi noondjala oyi indjipala noya kala tayi tyakaleke, shoka shi li euliko kutya Jesus ota pangele ngashingeyi megulu. Satana oye “omupangeli guuyuni mbuka” tu li noku na ko “ashike okathimbo okafupi.” (Ehololo 12:7-12; Johannes 12:31; Mateus 24:3-7; Lukas 21:11) Ihe Jesus okwa gandja ompito kaantu muuyuni ya taambe ko Epangelo lye.

⁹ Osha simanenena tu kale twa gama kombinga yUukwaniilwa wopaMesiasa. Otu na okuninga omatokolo ge li metsokumwe nehalo lye esiku nesiku, pehala lyokulandula iikala yuuyuni mbuka wa yonana. Sho “Omukwaniilwa gwaakwaniilwa nOmuwa gwaawa,” ta konakona aantu ayehe, omutima gwe ogwa hwama kondjahi nopethimbo tuu mpoka otagu hunga kenyanyu. (Ehololo 19:16) Omolwashike mbela?

10. Jesus oku na uukwatya wuni, noshike hashi mu geyitha noonkondo?

¹⁰ Jesus omunyanyukwi a fa He. (1 Timoteus 1:11, NW) Jesus sho a li kombanda yevi, ka li ha thindile aantu kongudhi nenge a kale a lulika oshipala. Ihe opu na iinima oyindji tayi ningwa kombanda yevi kunena mbyoka tayi mu geyitha shili. Okwa yematela noonkondo omalongelokalunga ngoka haga fundju kutya otagu uvitha medhina lye. Okwa hunganeka ta ti: “Hakehe ngoka ti ithana ndje ‘Omuwa, Omuwa’, ta yi  mOshilongo shegulu, aawe, oye tuu ngoka ta gwanitha ehalo lyaTate yomegulu. Mesiku ndyoka oyendji otaa ka lombwela ndje taa ti: ‘Omuwa, Omuwa! Hatse tuu mboka [twa] longo iilongankondo oyindji medhina lyoye?’ Nena ongame tandi ya lombwele: ‘Kandi mú shi noshitonale. Zii po pungame, one aakolokoshi!’” — Mateus 7:21-23.

11-13. Omolwashike yamwe mboka haya longo ‘iilongankondo’ medhina lyaJesus haya kala ya limbililwa oohapu dhe ndhoka dhi li muMateus 7:21-23, nomolwashike Jesus inee ya hokwa? Gandja ethaneko.

¹¹ Oohapu ndhoka otashi vulika dhi kale tadhi limbililike mboka hayi iti kutya yo Aakriste. Mbela omolwashike Jesus e na okuula nayi aantu mboka ya kala haya longo “iilongankondo oyindji” medhina lye? Oongeleka dhUukwakriste odha kala nokugandja iikwatha oyindji nokwaambidhidha oohepele, odha tunga wo iipangelo, oosikola nodha longa wo iilonga oyindji. Opo tu mone kutya omolwashike Jesus e dhi geela, natu tale kethaneko.

¹² Natu tye nduno omusamane nomukulukadhi gwe otaya yi ya ka talele po. Ihe itaya vulu okuya noyana, onkee oya li ye na oku ya thigila gumwe ngoka te ya tonatele. Oya lombwele omuntu ngoka taya ti: “Takamitha aanona yetu. Ya pa iikulya, ya yoga noku ya tonatela kaaya mone oshiponga.” Ihe aavali sho ya galuka oya adha oyana ya nkanyishila kondjala shoka sha li she ya halutha. Oya adha aanona ya luudha, taye ehama nokaye na ombili. Oya adha wo taya lili, ihe ngoka a thigilwa e ya takamithe ke na ko nasha. Ota ningi shike mbela? Okwa li a londa kompani to opaleke omakende gegumbo. Aavali oya li ya thita po kondjahi noye mu pula kutya omolwashike inaa sila oyana oshimpwiyu. Ihe okwa yamukula a ti: “Taleni sho ndo opaleka omakende gegumbo nenge mbela inaga yela? Onda li wo tandi mu opalekele egumbo lyeni.” Mbela shoka otashi ka mbilipaleka aavali mboka? Aawe nando. Inaye mu pula nando a longe iilonga mbyoka, ihe oye mu pula owala a sile oshimpwiyu oyana. Aavali oya li ya geya unene molwaashoka ina ninga shoka ye mu lombwele.

¹³ Oongeleka dhUukwakriste odha ninga naanaa oshinima  sha faathana. Jesus okwa gandja elombwelo kaakalelipo ye ya sile oshimpwiyu pambepo oonzi dhe, moku dhi longa oshili yOohapu dhaKalunga noku dhi kwathela dhi kale dha yogoka pambepo. (Johannes 21:15-17) Ihe Oongeleka inadhi vulika kelombwelo lye. Aantu yawo oya nkanyishila kondjala yopambepo noya tompakana komalongo giifundja, yo inaya longwa oshili yopetameko yOmbiimbeli. (Jesaja 65:13; Amos 8:11) Onkee ano, oonkambadhala ndhoka Oongeleka dha ninga okuhwepopaleka oonkalo dhuuyuni mbuka itadhi vulu okukala eipopilo sho inaadhi vulika kelombwelo lyaJesus. Shimwe ishewe, uuyuni mbuka owa fa owala egumbo ndyoka lya tegelela okuhanagulwa po. Ombiimbeli oye shi popya sha yela kutya uuyuni waSatana mbuka tu li masiku owu li pokuhula po. — 1 Johannes 2:15-17.

14. Iilonga yini tayi nyanyudha Jesus kunena, nomolwashike?

¹⁴ Jesus oha kala a nyanyukwa sho e wete kutya aantu omamiliyona kombanda yevi otaya gwanitha po oshilonga shoka a thigile aalanduli ye shokuninga aantu aalongwa. (Mateus 28:19, 20) Kashi li tuu uuthembahenda uunene okunyanyudha Omukwaniilwa gwopaMesiasa! Otu na okukala twa tokola toko opo tu tsikile nokwaambidhidha “omupiya omudhiginini nomunandunge.” (Mateus 24:45, KB) Ongundu yAakriste aagwayekwa oya kala nokuwilika iilonga yokuuvitha nokupalutha oonzi dhaKristus, inayi fa nando aawiliki yUukwakriste.

15, 16. (a) Jesus oku uvitile ngiini okwaahenohole hoka ku li apuhe kunena, naashika otu shi shi ngiini? (b) Omolwashike Uukwakriste wa gwana shili okugeelwa kuJesus?

¹⁵ Osha yela kutya Omukwaniilwa Jesus oha kala a yemata sho ta tala okwaahenohole hoka ku li apuhe kunena. Otatu dhimbulukwa sho Aafarisayi ya li taye mu pe uusama sho a aludha omuntu mEsabati. Oya li ye na omitima omikukutu noya tangalala noya li ya kukutila euvoko lyawo lya penga kombinga yOmpango yaMoses nosho wo oompango dhawo yene ndhoka ya tota po hadhi lombwelwathanwa kokana nokana. Iikumithalonga mbyoka Jesus a li a longo oye etele aantu uuwanawa oundji. Ihe nonando iikumithalonga mbyoka oya  nyanyudha aantu noku ya etela epepelelo e tayi koleke eitaalo lyawo, Aafarisayi kaya li ye yi hokwa. Jesus okwa li e yu uvitile ngiini? Okwe ya tala “noshipala sha lula ye a nika oluhodhi omolwokwaavulika kwawo.” — Markus 3:5.

¹⁶ Kunena, Jesus oku wete wo iinima mbyoka tayi mu ‘nikitha oluhodhi’ noonkondo. Aawiliki yomalongelokalunga gUukwakriste oya posipalekwa komithigululwakalo nokomalongo gawo yene ngoka itaaga tsu kumwe nOmanyolo. Ohaya geyithwa wo konkundana ombwaanawa yUukwaniilwa waKalunga ndjoka tayi uvithwa. Aawiliki yomalongelokalunga miitopolwa oyindji muuyuni ohaya hwahwameke aantu opo ya kale ye tonde Aakriste yashili mboka tayu uvitha etumwalaka ndyoka Jesus a li u uvitha. (Johannes 16:2; Ehololo 18:4, 24) Olundji aasita yoongeleka mboka ohaya ladhipike iilyo yawo yi ye kiita nokudhipaga ooyakwawo, nohaya kala taya dhiladhila kutya shoka taya ningi otashi nyanyudha Jesus Kristus.

17. Aalanduli yaJesus yashili ohaya nyanyudha ngiini omutima gwe?

¹⁷ Mepingathano naashoka, aalanduli yashili yaJesus ohayu ulukile aantu ooyakwawo ohole. Ohayu uvithile “aantu ayehe” onkundana ombwaanawa, ngaashi owala Jesus a li a ningi nonando okwa li ta patanekwa. (1 Timoteus 2:4) Ohole ndjoka ye ninathane onene noonkondo, molwaashoka oyo hayi ya ndhindhilikitha kutya yo aalanduli yaKristus. (Johannes 13:34, 35) Yo aalanduli yashili ye molwaashoka ohayu ungaunga nohole nonesimaneko nAakriste ooyakwawo nohaye ya tumbaleke, shoka hashi nyanyudha Omukwaniilwa gwawo, gwopaMesiasa.

18. Mwene gwetu oku tonde shike, ihe ongiini tatu vulu oku mu nyanyudha?

¹⁸ Otu na okukala tu shi kutya Mwene gwetu oha kala a yemata ngele aalanduli ye itayi idhidhimike notaye etha ohole yawo yokuhola Jehova yi talale nosho wo ngele taye etha oku mu longela. (Ehololo 2:4, 5) Ihe Jesus okwa panda mboka tayi idhidhimike sigo ehulilo. (Mateus 24:13) Onkee ano, natu kaleke momadhiladhilo oshipango shaKristus shoka tashi ti: “Landula ndje.” (Johannes 21:19) Ngashingeyi otatu ka tala komayambeko  gamwe ngoka Omukwaniilwa gwopaMesiasa ta ka pa mboka tayi idhidhimike sigo ehulilo.

19, 20. (a) Okulandula Jesus otaku tu etele omayambeko geni ngashingeyi? (b) Otatu ka mona shike ngele otwa taamba ko Jesus e li “He yomuukwaaluhe”?

¹⁹ Okulandula Jesus oko owala taku tu etele onkalamwenyo yi na elago ngashingeyi. Ngele otwa taamba ko Kristus e li Mwene gwetu e tatu landula ewiliko lye noshiholelwa she, otatu ki ilikolela eliko ndyoka aantu muuyuni tayi ihepeke nokukonga ihe kaye li wete. Otatu ka kala tu na iilonga mbyoka tayi ti sha lela noyi na elalakano nokukala twa hangana nooitaali ooyakwetu mboka tu holathane nayo shili. Otatu ka kala wo tu na eiyuvo lya yela nombili yopamadhiladhilo. Niitya yimwe, otatu ka kala nonkalamwenyo tayi shambula notwa gwanenwa. Kakele kaashono, otatu ka mona wo uuwanawa oundji.

²⁰ Jehova okwa langeka po Jesus a ninge “He yomuukwaaluhe” gwaamboka ye na etegameno lyoku ka kala nomwenyo gwaaluhe kombanda yevi. Jesus okwa pingene po Adam, he yaantu ayehe ngoka e ekelehi thiluthilu oluvalo lwe aluhe. (Jesaja 9:6, 7) Otatu ka kala tu na etegameno lyomwenyo gwaaluhe ngele otwa taamba ko Jesus e li “He yomuukwaaluhe” nokukala neitaalo tali longo muye. Natango, oku shi ninga otashi ke tu hedhitha popepi naJehova Kalunga. Okulandula oshiholelwa shaJesus esiku nesiku, ogwo omukalo dhingi gwokuvulika koshipango shaKalunga shoka tashi ti: “Kambadhaleni ano okuholela Kalunga, oshoka one oyana aaholike.” — Aaefeso 5:1.

21. Uuyelele waalanduli yaKristus otawu minikile ngiini muuyuni mbuka wu li momilema?

²¹ Otatu ka kala nuuthembahenda wi ikalekelwa sho tatu holele Jesus naHe, Jehova. Ngele tatu shi ningi, uuyelele wetu otawu ka adhima. Tu li aalanduli yaKristus, otatu gandja uuyelele wa tsa woshili yOmbiimbeli nomaukwatya omawanawa gwopaKriste, enyanyu lyashili, ombili tayi kalelele, ohole yashili  muuyuni mbuka aantu oyendji ya kwidhidhikwa komilema dhopambepo noya pukithwa kuSatana notaya holele iikala ye. Elalakano lyetu enene okuhedha popepielela naJehova, naantu oyendji mboka ye li iishitwa ye iinandunge osho taya lalakanene.

22, 23. (a) Aalanduli yaJesus aadhiginini otaya ka pewa omayambeko geni monakuyiwa? (b) Otu na okukala twa tokola toko okuninga shike?

²² Dhiladhila owala kwaashoka Jehova a hala oku ku ningila monakuyiwa okupitila mUukwaniilwa wopaMesiasa. Masiku Omukwaniilwa ngoka ota ka kondja iita yi li pauyuuki opo a hanagule po uuyuni mbuka tawu pangelwa kuSatana. Jesus ota ka sindana shili. (Ehololo 19:11-15) Konima yiita mbyoka, Jesus ota ka tameka okupangela ombanda yevi  uule wOmimvo Eyuvi. Epangelo lye lyomegulu otali ke etela aantu ayehe aadhiginini uuwanawa okupitila mekuliloyambo lye sigo ya thiki megwaneneno. Dhiladhila owala wu na uukolele, ngoye omugundjuka nowu na oonkondo noto longo nombili pamwe naantu ooyakweni mwa hangana tamu opaleke evi li ninge oparadisa. Pehulilo lyEyuvimumvo, Jesus ota ka gandja epangelo alihe kuHe. (1 Aakorinto 15:24) Ngele oto tsikile nokulandula Kristus, oto ka nyanyukilwa ‘emanguluko neadhimo lyaana yaKalunga,’ oshinima shoka shi li eyambeko tali kumitha noonkondo. (Aaroma 8:21) Otatu ka mona shili omayambeko agehe ngoka Adam naEva ya kanitha. Tu li aamati naakadhona yaJehova yokombanda yevi, itatu ka kala we tu na okapethili kasha omolwuulunde waAdam. Eeno, oshoshili kutya ‘itaku ka kala we eso.’ — Ehololo 21:4.

²³ Dhimbulukwa omulumentu omugundjuka, ye omuyamba ngoka twa kundathana mOntopolwa yo-1. Okwa tindi sho Jesus e mu hiya a ti: ‘Ila u landule ndje.’ (Markus 10:17-22) Inatu hala tu ninge epuko lya fa lye. Ehiyo ndyoka twa pewa kuJesus natu li taambe ko nomaako agehe. Kala wa tokola toko okwiidhidhimika nokutsikila nuulaadhi okulandula Omusita Omwaanawa esiku nesiku, omumvo nomumvo opo wu ka mone nkene ta ka gwanitha po omauvaneko gaJehova agehe omakumithi.