1, 2. Omuyapostoli Johannes okwa popi shike shi na ko nasha nuusiku wahugunina mboka Jesus a li pamwe naayapostoli ye?

 JOHANNES oye omuyapostoli gwaJesus Kristus ngoka a kala nomwenyo ethimbo ele kombanda yevi. Sho e na omimvo 100 lwaampono, okwa li natango ta vulu okudhimbulukwa nawa iinima mbyoka ya ningwa nale. Okwa li a nyola kombinga yoshiningwanima shoka sha ningwa pwa pita omimvo 70 lwaampo. Kekwatho lyombepo ondjapuki, Johannes okwa li ta vulu okudhimbulukwa iinima nawa natango nokwa nyola kombinga yokanima kehe. Okwa nyola shoka sha li sha ningwa po sho ye naayapostoli ooyakwawo ya li pamwe mongulohi ndjoka ya tetekele eso lyaJesus.

² Uusiku mboka, Jesus okwe shi popi sha yela kutya oku li popepi nokudhipagwa. Johannes oye owala a popya kutya omolwashike Jesus a li a ti kutya ota ka sa eso linyanyalitha. Jesus okwa ti: ‘Uuyuni ou na okutseya kutya ngame ondi hole Tate. Onkee otandi longo ayihe, ngashika Tate a lombwele ndje. Thikameni, tu zeni po mpaka.’ — Johannes 14:31.

3. Jesus oku ulike ngiini kutya oku hole He?

³ Jesus okwa ti: “Ngame ondi hole Tate.” Okwa li e hole He noonkondo adhihe. Ihe ina kala nokweendulula uutumbulilo mboka aluhe. MOmbiimbeli ayihe, Jesus okwa popya owala muJohannes 14:31 shu ukilila kutya oku hole He. Okwe shi ulike monkalamwenyo ye kutya shoka a popi oshoshili. Ohole ye yokuhola Jehova oya li yi iwetikile esiku kehe. Uulaadhi we, okuvulika kwe nosho wo eidhidhimiko lye oyu ulike kutya oku hole Kalunga shili. Ohole ndjoka oyo ye mu inyengitha a gwanithe po uukalele we.

4, 5. Ombiimbeli otayi popi ohole yini, noshike tatu vulu okutya shi na ko nasha nohole yaJesus yokuhola Jehova?

 ⁴ Oyendji kunena ohaya dhiladhila kutya ngele omuntu oku hole aantu nena okwa mbatha. Otashi vulika ya dhiladhile kohole ndjoka hayi popiwa miiteyo nomomaimbilo nenge komaiyuvo gopakathimbo ngoka aantu yuukashike kookantu wa yoolokathana haya kala ye ninathane. Ombiimbeli otayi popi kombinga yohole yaantu yuukashike kookantu wa yoolokathana momukalo gwesimaneko, ihe haangashi shi li kunena. (Omayeletumbulo 5:15-21) Oohapu dhaKalunga otadhi popi unene ohole yoludhi lumwe lwi ili. Ohole ndjoka kayi shi omaiyuvo gowala nenge oshinima shopakathimbo, yo kayi shi ohole yokambweenga. Ihe oya kwatela mo omaiyuvo gokomutima nogopamadhiladhilo. Ohole ndjoka ohayi zi komutima. Ohayi wilikwa noyi li metsokumwe nomithikampango dha dhenga mbanda nohayi ulikwa momukalo tagu tungu. Kayi shi oshinima shopakathimbo. Oohapu dhaKalunga otadhi ti: “Ohole itayi hulu po.” — 1 Aakorinto 13:8.

⁵ Maantu ayehe mboka ya li kombanda yevi kapu na ngoka a li e hole Jehova e vulithe Jesus. Jesus oye owala a li a gwanitha po oohapu ndhoka a ti kutya odhi li oshipango oshinene tadhi ti: “Hola Omuwa Kalunga koye komutima gwoye aguhe nokomwenyo gwoye aguhe nokomadhiladhilo goye agehe nonoonkondo dhoye adhihe.” (Markus 12:30) Jesus okwa kokeke ngiini ohole ndjoka? Sho a li kombanda yevi, oshike she mu kwathele a kale e hole Kalunga noonkondo? Ongiini tatu vulu oku mu holela?

6, 7. Otu shi shi ngiini kutya Omayeletumbulo 8:22-31 otaga popi Omwana gwaKalunga, ihe hawino yo yeneyene?

⁶ Mbela owa longa nale nakuume koye oshilonga shasha e tamu tseyathana nawanawa nokukala mu na uukuume washili? Ngele osho, shoka otashi ke ku kwathela wu uve ko ohole ndjoka yi li pokati kaJehova nOmwana awike. Omayeletumbulo  8:30 oga holoka lwiikando membo ndika, ihe ngashingeyi natu yelekanithe ovelise ndjoka pamwe noonkwawo ndhoka dhi li montopolwa ndjika. Movelise 22 sigo 31 otamu popiwa owino nenge uunongo, ihe otawu popiwa wa fa wu li omuntu. Otu shi shi ngiini kutya Oohapu ndhika otadhi popi Omwana gwaKalunga?

⁷ Movelise 22, owino otayi popi tayi ti: “OMUWA okwa shiti ndje omutango gwiilonga ye, okuza konalenale.” Osha yela kutya ovelise ndjika itayi popi owino yo yeneyene, molwaashoka uukwatya mboka kawu na etameko. Jehova ngoka e na owino oko a kala nale. (Episalomi 90:2) Ihe Omwana gwe oye “omutango gwiishitwa ayihe.” Oku na etameko molwaashoka oye a shitwa tangotango kuJehova. (Aakolossa 1:15) Ngaashi sha popiwa mOmayeletumbulo, Omwana okwa kala ko nalenale omanga evi negulu inaayi shitwa. Jehova oku ulike owino ye nenge uunongo we wa gwanenena okupitila mOmwana e li Ohapu nenge Omupopikalelipo gwe. — Johannes 1:14.

8. Jesus okwa li e na ondondo yini manga inee ya kombanda yevi, notatu vulu okudhiladhila shike uuna twa kuminwa eshito?

⁸ Omanga Jesus inee ya kombanda yevi, okwa kala ta longo shike megulu uule wethimbo olindjilindji ndyoka a kala mo? Ovelise 30 otayi mu popi e li “engomba” a tegama naKalunga. Shoka osha hala okutya shike? Aakolossa 1:16 otaya yelitha taya ti: “Kalunga okwa shititha Kristus iinima ayihe yomegulu noyokombanda yevi, [ayihe oya shitilwa muye noye mu shitilwa, KB].” Jehova Kalunga oye Omushiti gwiinima ayihe, ihe okwa longitha Omwana, engomba mokushita iinima mbyoka kutya nduno iishitwa yopambepo mbyoka ihaatu mono yi li megulu, ewangandjo enenenene, evi nosho wo iimeno niinamwenyo yi ili noyi ili tayi kumitha mbyoka yi li ko, mwa kwatelwa aantu mboka ye li iishitwa ya dhenga mbanda. Otatu vulu okufaathanitha ekwatathano ndyoka li li pokati kaJehova nOmwana naandyoka hali kala pokati komuthaneki gwomatungo (omusindi) nomutungi ngoka  ha tungu naanaa a landula momisinda dhomuthaneki. Kehe shimwe shoka tashi tu kumitha meshito, nena otatu tanga Omusindi Omunene. (Episalomi 19:1) Onkee ano, Omushiti nOmwana gwe “engomba” oya kala ye na ekwatathano tali shambula ethimbo ele.

9, 10. (a) Omolwashike Jehova nOmwana ye na ekwatathano lya kola? (b) Oshike hashi koleke ekwatathano lyetu naTate yetu gwomegulu?

⁹ Uuna aantu yaali inaaya gwanenena taya longo pamwe, omathimbo gamwe ihaya tsu ya thithe. Ihe Jehova nOmwana oya li yu uvitathane. Omwana okwa kala ta longo pamwe naHe uule wethimbo ele noonkondo ‘naaluhe okwa dhanene koshipala She.’ (Omayeletumbulo 8:30) Jehova nOmwana oya li shili ya nyanyukilwa okukala pamwe. Omwana sho a koko okwa li a fa He, molwaashoka okwa li ha holele omaukwatya gaHe. Shoka osho sha koleke ekwatathano lyawo. Onkee ano, ekwatathano nohole pokati kawo oya za nalenale.

¹⁰ Shoka otashi ti shike kutse? Otashi vulika wu ipule kutya ku na siku wu ka kale wu na ekwatathano lya tya ngaaka naJehova. Odhoshili kutya kapu na omuntu ngoka e na ondondo ya tumbala ngaashi Omwana gwaKalunga. Ihe Kalunga okwe tu pa uuthembahenda wa dhenga mbanda. Jesus oku na ekwatathano lyopothingo naHe, molwaashoka ohaya longo ye li pamwe. Omolwohole ye, Jehova okwe tu pa ompito tu ninge “aalongi pamwe” naye. (1 Aakorinto 3:9) Sho tatu landula oshiholelwa shaJesus muukalele, natu kale aluhe tu shi kutya otatu longo pamwe naKalunga. Shoka ohashi koleke ohole ndjoka yi li pokati ketu naJehova noshi li uuthembahenda dhingi.

11-13. (a) Omolwashike tu na okukala hatu tekele ohole ndjoka yi li momitima dhetu, noshike sha li sha kwathele Jesus a kale e hole He unene? (b) Jesus okwa li u ulike ngiini kutya oku na ohokwe okwiilonga kombinga yaHe sho a li megulu naasho e ya kombanda yevi?

¹¹ Ohole ndjoka tu na momitima dhetu otu na okukala hatu  yi tekele opo yi koke. Ngaashi owala hatu tula uuhoho piimeno noku yi tekela yi koke nawa, otu na wo okuninga sha faathana nohole yetu opo yi koke noyi kale ya kola. Ngele itatu shi ningi, otayi ka lemba e tayi si. Sho Jesus a li kombanda yevi, ina kwata ohole ndjoka ya li pokati ke naHe okahetengi. Okwa kala noku yi tekela opo yi koke noyi kale ya kola. Natu tale nkene a li e shi ningi.

¹² Sho Jesus a li omugundjuka, okwa li a popi motempeli muJerusalem kombinga yekwatathano lye naHe. Okwa lombwele aavali ye mboka ya li ya nika uuthigwa a ti: “Omwa kongele ndje shike? Kamu shi shi nani kutya ngame ondi na okukala mumbika yaTate?” (Lukas 2:49) Osha yela kutya sho Jesus a li okamatyona ka li ta vulu okudhimbulukwa onkalamwenyo ye yomegulu. Ihe nonando ongaaka, okwa li e hole He, Jehova unene noonkondo. Okwa li e shi kutya ohole ndjoka oku na oku yi ulika mokulongela He. Sho Jesus a li kombanda yevi, okwa li a lenga egumbo lyaHe ndyoka li li ehala lyelongelokalunga lya yela. Okwa li e hole okukala mo noka li ha kala a hala okuza mo. Ka li he ya owala okutala shoka tashi ningwa mo. Manga inaa gwanitha omimvo 12, okwa li e na ehalo okwiilonga nokupopya shoka e shi kombinga yaJehova nokwa tsikile oku shi ninga monkalamwenyo ye ayihe.

¹³ Omwana okwa li e hole okulongwa kuHe, omanga inee ya kombanda yevi. Ehunganeko ndyoka li li muJesaja 50:4-6 otali ulike kutya Jehova okwa li a pe Omwana elongo lyi ikalekelwa li na ko nasha nonkandangala ndjoka ta dhana e li Mesiasa. Omwana okwa taamba ko elongo ndyoka nehalo ewanawa, nonando olya li lya kwatela mo omaudhigu ngoka ta ka tsakaneka e li Omugwayekwa gwaJehova. Sho Jesus e ya kombanda yevi e ta koko, okwa li e hole okuya kongulu yaHe nokukutha ombinga melongelokalunga nokuhumitha komeho elongo ndyoka Jehova a hala li longwe aantu mongulu ye. Ombiimbeli otayi popi kutya Jesus ka li ha faula okuya kotempeli nokosinagoga. (Lukas 4:16; 19:47) Ngele otwa hala ohole yetu yokuhola Jehova yi koke nokukala  ya hwama, katu na okufaula okugongala kwopaKriste mpoka hatu longele Jehova noku mu pandula nokumona ontseyo yomuule kombinga ye.

14, 15. (a) Omolwashike Jesus a li ha kongo ethimbo i ikalele? (b) Jesus okwa li e shi ulike ngiini momagalikano ge kutya oku na ekwatathano lyopothingo naHe nokwe mu simaneka?

¹⁴ Ohole yaJesus yokuhola Jehova oya li ya kola molwaashoka okwa li e na ondjigilile yokugalikana. Nonando okwa li e hole aantu nokuyola pamwe nayo, okwa li ha kongo ethimbo opo i ikalele. Pashiholelwa, Lukas 5:16 ota ti: “Okwa yi komahala gaa na aantu nokwa galikana.” Mateus 14:23 ota ti wo: “Sho e ya laleke, okwa londo kondundu oye awike, opo a galikane. Oye okwa kala ko awike sigo ongulohi.” Sho Jesus a yi e ki ikalele oye awike, itashi ti kutya okwa li e hole okwiikalela noku tonde aantu, ihe okwa li e shi ningi opo a popye a manguluka oye awike naHe, Jehova okupitila megalikano.

¹⁵ Jesus okwa li ha longitha uutumbulilo ‘Abba, Tate,’ omathimbo gamwe ngele ta galikana. (Markus 14:36, KB) Pethimbo lyaJesus, oshitya “Abba” osha li uutumbulilo wopahole mboka hawu longithwa megumbo uuna omuntu ti ithana “he.” Aanona mboka tayi ilongo okupopya, olundji ohaya tumbula tango oshitya shoka tashi ulike esimaneko. Nonando uutumbulilo mboka otawu holola ekwatathano lyopothingo ndyoka li li pokati kOmwana naHe, otawu ulike wo kutya Omwana okwa simaneka shili oonkondopangelo dhaHe, Jehova. Jesus okwe shi ulike momagalikano ge kutya oku hole He nokwe mu simaneka. Pashiholelwa, omuyapostoli Johannes okwa nyola muJohannes ontopolwa 17 egalikano ele lyaJesus notali zi komutima ndyoka a li a galikana ongulohi ye yahugunina ndjoka ya tetekele eso lye. Otashi hokitha noonkondo okukonakona egalikano ndyoka nosha simanenena tu li holele. Ihe shoka itashi ti kutya otu na okweendulula iitya mbyoka Jesus a li a popi. Pehala lyaashoka, otali ke tu kwathela tu kale aluhe hatu popi naTate yetu yomegulu tashi  zi komutima. Ngele tatu shi ningi, ohole yetu yoku mu hola otayi ka kala ya hwama noya kola.

16, 17. (a) Ongiini Jesus a li u ulike kutya oku hole He mokupopya kwe? (b) Jesus okwa li a longitha oshiholelwa shini u ulike kutya He oha gandja nehalo ewanawa?

¹⁶ Ngaashi twe shi mona metetekelo, Jesus ina kala nokweendulula oohapu ndhoka tadhi ti: “Ngame ondi hole Tate.” Ihe okwe shi ulike iikando oyindji mokupopya kwe. Ngiini mbela? Okwa ti: ‘Otandi ku hambelele, Tate, Omuwa gwegulu nogwevi.’ (Mateus 11:25) Okwa li e hole okutanga He nokukwathela aantu ye Mu tseye, ngaashi twe shi mono moshitopolwa oshi-2. Pashiholelwa, Jesus okwa li a faathanitha Jehova nahe gwopantu ngoka a li a halelela okudhimina po omwanamati omunashipotha. Omusamane okwa li a tegelela omwanamati a galukile kegumbo. Sho he e mu mono ta zi kokule, okwa matuka e ke mu tsakaneke noku mu papatela. (Lukas 15:20) Itashi gumu tuu omitima dhetu ngele tatu lesha ehokololo lyaJesus moka tu ulike nkene Jehova e hole aantu nonkene he ya dhimine po!

¹⁷ Olundji Jesus okwa li a tanga He molwaashoka oha gandja nehalo ewanawa. Opo u ulike kutya He ote ke tu pa ombepo ondjapuki uuna tatu yi pula, okwa longitha oshiholelwa shaavali inaaya gwanenena mboka haya pe oyana omagano omawanawa. (Lukas 11:13) Okwa popi wo kombinga yetegameno ndyoka He a gandja kaantu nehalo ewanawa. Jesus okwa li a popi nondjuulukwe kombinga yetegameno lye lyokukala megulu pamwe naHe. (Johannes 14:28; 17:5) Okwa lombwele aalanduli ye kombinga yetegameno ndyoka Jehova a pa “oshigunda oshishona” shaKristus, shoka tashi ka kala naye megulu nokupangela pamwe naye mUukwaniilwa wopaMesiasa. (Lukas 12:32; Johannes 14:2) Okwa li a hekeleke omukolokoshi ngoka a alelwa pamwe naye kutya ota ka kala nomwenyo mOparadisa. (Lukas 23:43) Sho Jesus a li a popi omikalo ndhoka nkene He ha gandja nehalo ewanawa, osha li she mu kwathele a kale e hole Jehova unene. Aalanduli yaKristus  oyendji oye shi mona kutya okupopya kombinga yaJehova nosho wo yetegameno ndyoka a pa mboka ye mu hole, ohashi koleke eitaalo lyawo nohole yawo yoku mu hola.

18. Omukalo dhingi gwokulandula Jesus oguni, nomolwashike?

¹⁸ Otu na okukala tu hole Jehova nomutima aguhe, nomadhiladhilo agehe nonoonkondo dhetu adhihe, molwaashoka ngoka ogwo omukalo dhingi gwokulandula Jesus. (Lukas 10:27) Ohole ya tya ngaaka ohayi ulikwa owala miilonga, ihe hamokupopya. Jesus ka li owala a gwanenwa kokukala u uvite kutya oku hole He nenge kokupopya kutya “ngame ondi hole Tate.” Okwa ti: ‘Uuyuni ou na okutseya kutya ngame ondi hole Tate. Onkee otandi longo ayihe, ngashika a lombwele ndje.’ (Johannes 14:31) Satana okwa ti kutya aantu ohaya longele owala Jehova molwaashoka ohe ya ningile uuwanawa. (Job 2:4, 5) Opo Jesus u ulike kutya Satana omulundili kamana, okwa katuka onkatu nuulaadhi u ulukile uuyuni kutya oku hole He shi thike peni. Jesus okwa vulika sigo omeso. Mbela nangoye osho to ka ninga? Mbela oto ku ulukila uuyuni kutya owu hole shili Jehova Kalunga?

19, 20. (a) Omolwashike sha simana tu kale aluhe pokugongala kwopaKriste? (b) Ekonakono lyopaumwene, okutedhatedha nokugalikana otu na oku yi tala ko ngiini?

¹⁹ Otu na lela okuulika ohole ndjoka. Jehova okwa tula po omalongekidho gopambepo tu mu longele momukalo ngoka tagu humitha komeho nokukoleka ohole yetu yoku mu hola. Uuna wu li pokugongala, dhimbulukwa kutya owe ya okulongela Kalunga, shoka osha kwatela mo okupulakena kegalikano, okwiimba omaimbilo gehambelelo, okupulakena neitulomo nokukutha ombinga muko ngele tashi vulika. Oto vulu wo okuladhipika Aakriste ooyakweni pokugongala. (Aahebeli 10:24, 25) Ohole yoye yokuhola Kalunga otayi kolo owala ngele oho kala aluhe pokugongala kwopaKriste.

²⁰ Natango, ekonakono lyopaumwene, okutedhatedha nokugalikana ohayi kokeke wo ohole ndjoka. Ngele to shi ningi,  nena oto kundathana paumwene naJehova. Sho to konakona Oohapu dhe nokutedhatedha kudho, oto ka mona nkene ha tala ko iinima. Sho to galikana, oto mu egululile omutima gwoye. Dhimbulukwa kutya katu na owala okugalikana uuna twa hala Kalunga e tu ningile oshinima shontumba. Otu na wo oku mu pandula sho e tu yambeka nokutanga iilongankondo ye iikumithi. (Episalomi 146:1) Omukalo gulwe omwaanawa oku mu pandula nokuulika kutya owu mu hole, ogwo oku mu tanga montaneho nenyanyu nonuupenda.

21. Okukala tu hole Kalunga osha simana shi thike peni, noshike tatu ka konakona moontopolwa tadhi landula?

²¹ Ohole yokuhola Kalunga oya simanenena opo tu kale nelago tali kalelele. Adam naEva oya li ya pumbwa okuulika ohole ndjoka opo ya pondole, ihe inaye shi ninga. Osha simana okukala tu hole Kalunga opo tu kale neitaalo lya kola, tu sinde omamakelo nokwiidhidhimikila eyeleko kehe. Ngele otu li aalanduli yaJesus, osho tu na okuninga. Ohole yokuhola Kalunga oya pambathana nohole yokuhola aantu ooyakwetu. (1 Johannes 4:20) Otatu ka tala nkene Jesus a li u ulike kutya oku hole aantu moontopolwa tadhi landula. Mundjoka tayi landula ko otatu ka tala kutya omolwashike sha li oshipu kaantu okuhedha kuJesus.