1-4. (a) Oshike sha li sha ningwa po sho Pilatus a gandja Jesus kongundu yaantu ya geya ndjoka ya li ya gongala kondje yombala ye? (b) Jesus okwa li i inyenge ngiini sho ta shekwa nokuhepekwa, naashika otashi pendutha omapulo ga simana geni?

 SHO omupangeli Omuroma Pontius Pilatus a gandja Jesus kongundu yaantu ndjoka ya li ya thikama pondje yombala ye mo 33 E.N. mesiku lyOpaasa, okwa ti: “Taleni, omuntu oye ngu.” (Johannes 19:5) Konima owala yomasiku omashona, Jesus okwa li a hambelelwa kongundu yaantu muJerusalem e li Omukwaniilwa omusindani ngoka a langekwa po kuKalunga. Ihe ongulohi ndjoka aantu oya li ya geya nokaya li ye mu tala ko we e li Omukwaniilwa.

² Aantu oya li ya zaleke Jesus onguwo ontiliganembwilili ya fa ndjoka hayi zalwa kaambala noye mu zaleke oshishani shomakwega komutse gwe. Iinima mbyoka ine yi zalekwa molwaashoka ye mu simaneka, ihe oye shi ningi opo ye mu sheke. Ombinzi oya li tayi pononoka okuza komutse nomombunda ye ndjoka ya dhengwa. Aasaaseri aakuluntu oya li ya hwahwameke aantu ya kale ye mu sa uunye sho a li a thikamekwa komeho gawo. Aasaaseri oyi igidha ya ti: “Mu alela!” Molwaashoka aantu nayo oya li ya hala Jesus a dhipagwe, oyi igidha ya ti: “Oye oku na okusa.” — Johannes 19:1-7.

³ Jesus okwa li e na uulaadhi okwiidhidhimikila omasheko nomahepeko nopwaahe na okungongota. * Okwa li i  ilongekidhila thiluthilu okusa. Mesiku olyo tuu ndyoka lyOpaasa, okwa li i iyamba a se eso tali uvitha omwenyo omutoye komuti gwomahepeko. — Johannes 19:17, 18, 30.

⁴ Sho a gandja omwenyo gwe, Jesus oku ulike shili kutya oku li kuume kaalongwa ye. Okwa ti: “Ohole onenenene omuntu ta vulu okukala e yi na yokuhola ookuume ke, oyo okugandja omwenyo gwe omolwawo.” (Johannes 15:13) Shoka otashi pendutha omapulo gamwe ga simana. Mbela osha li ngaa sha pumbiwa opo Jesus a hepekwe nokudhipagwa? Omolwashike a li e na ehalo oku shi ninga? Ongiini tatu vulu okulandula oshiholelwa she, tu li “ookuume ke” naalanduli ye?

5. Oshe ende ngiini opo Jesus a tseye shoka ta ka ningilwa?

⁵ E li Mesiasa ngoka u uvanekwa, Jesus okwa li a tseya shoka ta ka ningilwa. Okwa li e shi nawa Omanyolo gOshihebeli ngoka ga hunganeka kutya Mesiasa ota ka hepekwa nokudhipagwa. (Jesaja 53:3-7, 12; Daniel 9:26) Okwa li a lombwele aalongwa ye iikando yontumba yi ilongekidhile shoka tashi ke mu ningilwa. (Markus 8:31; 9:31) Mondjila yokuya kuJerusalem oku ka dhana Opaasa ye yahugunina, okwa lombwele aayapostoli ye shoka tashi ke mu adha a ti: ‘Omuna gwOmuntu ota ka gandjwa miikaha yaayambi aakuluntu noyaalongimpango, notaye mu pangulile eso. Oyo otaye ke mu gandja ishewe kaapagani, mboka taye mu sheke, taye mu hiyile omayeye, taye mu dhenge e taye mu dhipaga.’ (Markus 10:33, 34) Oohapu ndhoka odha li dha gwanithwa shili. Ngaashi twe shi mona, Jesus okwa li a shekwa, a hiyilwa omayele, a dhengwa nokudhipagwa.

6. Omolwashike sha li sha pumbiwa opo Jesus a hepekwe nokudhipagwa?

⁶ Omolwashike sha li sha pumbiwa opo Jesus a hepekwe noku dhipagwe? Omolwomatompelo ogendji ga simanenena. Lyotango, ngele okwa kala omudhiginini, ota ka ambidhidha  uunamapangelo waJehova. Satana okwa lundile aantu kutya ohaya longele Kalunga owala molwaashoka he ya ningile uuwanawa. (Job 2:1-5) Jesus okwa gandja eyamukulo lya dhenga mbanda kelundilo lyaSatana, sho a kala omudhiginini sigo “omeso [lyokomuti gwomahepeko, NW].” (Aafilippi 2:8; Omayeletumbulo 27:11) Etiyali, aantu otaya vulu okudhiminwa po oondjo dhawo omolweso nokumona iihuna kwaMesiasa. (Jesaja 53:5, 10; Daniel 9:24) Jesus okwa gandja “omwenyo gwe, a hupithe oyendji” opo tu kale nekwatathano ewanawa naKalunga. (Mateus 20:28) Etitatu, sho i idhidhimikile oonkalo oondhigu dhi ili nodhi ili nokumona iihuna, okwa ‘makelwa miinima ayihe ngashika tse.’ Oku li Omuyambi Omukuluntu ngoka ta vulu ‘okuuvila uunkundi wetu olukeno.’ — Aahebeli 2:17, 18; 4:15.

7. Jesus okwa ningi eiyambo li thike peni sho e ya kombanda yevi?

⁷ Opo tu uve ko nawa shoka Jesus a li a ningi, natu dhiladhile kwaashika: Mbela opu na ngaa omuntu ta ka thiga po uukwanegumbo we negumbo lye e ta yi koshilongo shi ili ngele oku shi kutya aakalimo yamo itaye ke mu taamba ko notaye ke mu sheka noku mu hepeka nolwahugunina otaye ke mu dhipaga? Ngashingeyi natu tale shoka Jesus a ningi. Omanga inee ya kombanda yevi, okwa li e na ondondo ya simana megulu puHe. Ihe okwa li e na ehalo okuza megulu e te ya kombanda yevi e li omuntu. Okwe shi ningi, nonando okwa li e shi kutya oyendji itaye ke mu itaala notaye ke mu sheka noku mu hepeka nonyanya noku mu uvitha omwenyo omutoye sho taye mu dhipaga. (Aafilippi 2:5-7) Oshike shi inyengitha Jesus a ninge eiyambo li thike mpono?

8, 9. Oshike sha li shi inyengitha Jesus a gandje omwenyo gwe?

⁸ Ohole yokuhola He oyo unene yi inyengitha Jesus e ye kombanda yevi. Okwa li i idhidhimikile omaupyakadhi agehe molwaashoka oku hole Jehova. Ohole ndjoka oya li ye mu  inyengitha a kale ti ipula unene nedhina lyaHe nosho wo esimano lyalyo. (Mateus 6:9; Johannes 17:1-6, 26) Jesus okwa li a hala unene okuyelitha edhina lyaHe ndyoka lya nyatekwa niifundja yaa fele oyindji. Okwa li e shi tala ko shi li uuthembahenda uunene okuhepekwa omolwuuyuuki, molwaashoka okwa li e shi kutya uudhiginini we otawu ka simanekitha edhina lyaHe. — 1 Ondjalulo 29:13.

⁹ Jesus okwa li wo e hole aantu noonkondo, naashoka oshe mu inyengitha a gandje omwenyo gwe. Ohole ndjika oya za nalenale okuza petameko lyondjokonona yaantu. Ombiimbeli otayi holola nkene Jesus a li u uvite omanga inee ya kombanda yevi tayi ti: “Nenyanyu lyandje olya li okunyanyukilwa aana yaantu.” (Omayeletumbulo 8:30, 31) Ohole ye oya li yi iwetikile sho a li kombanda yevi. Moontopolwa ndatu dha tetekele otwi ilonga mo kutya Jesus okwa li e hole aantu ayehe, unene tuu aalanduli ye. Ihe mo 14 Nisan 33 E.N., okwa li a gandja omwenyo gwe gu li ekuliloyambo. (Johannes 10:11) Osha yela kutya kapu na we omukalo gumwe okuulika ohole gu vulithe pwaangoka. Mbela natse otu na oku mu holela? Eeno, otwa lombwelwa tu shi ninge.

10, 11. Oshipango oshipe shoka Jesus a pe aalanduli ye oshini, osha kwatela mo shike, nomolwashike sha simana tu shi tule miilonga?

¹⁰ Jesus okwa lombwele aalongwa ye muusiku mboka wa tetekele eso lye a ti: “Oshipango oshipe otandi shi mú pe, mu holathane. Ngashika naanaa [ngame] nda kala ndi mú hole, osho nane wo mu na okuholathana. Ngele omu holathane, nena aantu ayehe otaa ka dhimbulula kutya one aalongwa yandje.” (Johannes 13:34, 35) Omolwashike taku tiwa kutya oshipango ‘holathaneni’ oshi li “oshipe”? Omolwaashoka Ompango yaMoses oya popya nale tayi ti: ‘Hola mukweni, ngaashi wi ihole mwene.’ (Levitikus 19:18) Ihe oshipango oshipe otashi pula tu kale tu holathane tagu pu mo, shoka otashi tu inyengitha tu gandjele yalwe oomwenyo dhetu. Jesus  okwe shi popi sha yela sho a ti: “Oshipango shandje osho shika: Holathaneni, ngashika naanaa ngame ndi mú hole. Ohole onenenene omuntu ta vulu okukala e yi na yokuhola ookuume ke, oyo okugandja omwenyo gwe omolwawo.” (Johannes 15:12, 13) Oshipango oshipe otashi ti lela: ‘Hola mukweni shi vulithe pohole ndjoka wi ihole nayo.’ Jesus oku ulika ohole ya tya ngaaka mokukalamwenyo kwe nosho wo okupitila meso lye.

¹¹ Omolwashike sha simana tu vulike koshipango shoka oshipe? Jesus okwa ti: “Ngele [omu na ohole yokwiiyamba] ayehe otaa ka dhimbulula kutya one aalongwa yandje.” Ohole yokwiiyamba ohayi tu ndhindhilikitha kutya tse Aakriste yashili. Otatu vulu oku yi yelekanitha nuukalata mboka Oonzapo dhaJehova hadhi kala dha zala piigongi yadho yokomumvo. Okakalata hoka ohaka ndhindhilikitha mo ngoka e ka zala kutya oye lye negongalo hoka a za. Ohole yokwiiyambela yalwe oyi li “okakalata” hoka haka ndhindhilikitha mo Aakriste yashili. Niitya yimwe, ohole ndjoka hatu ulukile yamwe oyi na okukala yi iwetikile ngaashi endhindhiliko nenge okakalata hoka haku ulukile aatali nomeho kutya tse otu li aalanduli yashili yaKristus. Oshi li nawa opo kehe gumwe i ipule ta ti: ‘Mbela “okakalata” kohole yokwiiyamba oki iwetikile ngaa monkalamwenyo yandje?’

12, 13. (a) Otu na okwiiyamba shi thike peni opo tu ulike shili kutya otu holathane? (b) Okwiiyamba mwene otashi ti shike?

¹² Tu li aalanduli yaJesus, otwa pumbwa okukala tu holathane, ngaashi ye e tu hole. Shika osha kwatela mo okukala nehalo lyokwiiyambela ooitaali ooyakwetu. Otu na okwiiyambela ooitaali ooyakwetu shi thike peni? Ombiimbeli otayi ti: “Ohole otwe yi tseya kutya oyo oshike. Oyo ndjika kutya Kristus okwa si peha lyetu. Ano natse wo otu na okuhupula oomwenyo dhetu omolwooyakwetu.” (1 Johannes 3:16) Otu na okukala nehalo lyokusila ooitaali ooyakwetu  mpoka sha pumbiwa, ngaashi Jesus. Uuna tatu hepekwa, oshi li hwepo okuyamba po oomwenyo dhetu yene pehala lyokukengelela aamwatate nokutulitha oomwenyo dhawo moshiponga. Miilongo moka mu na okakombo noludhi omolwuukwamuhoko nenge uukwashigwana, otatu ka tula oomwenyo dhetu moshiponga tu gamene aamwatate nopwaahe na okutala komuhoko nenge keputuko lyawo. Uuna iigwana tayi kondjithathana, otatu ki igandja tu tulwe moondholongo nenge nokuli tu dhipagwe, pehala lyokukuthila ooitaali ooyakwetu nenge omuntu kehe omatati. — Johannes 17:14, 16; 1 Johannes 3:10-12.

¹³ Kakele kokwiiyamba tu sile aamwatate, otatu vulu okuulika ombepo yokwiiyamba momikalo dhilwe ishewe. Ihe oshili oyo kutya aashona owala yomutse tatu ka pulwa tu ninge eiyambo ndyoka. Ngele otu hole aamwatate shili, otatu ka ninga omaiyambo opo tu ya kwathele ngashingeyi. Okwiiyamba otashi ti okugandja po shoka tu na omolwuuwanawa wayalwe. Otatu ka pititha komeho uuwanawa wawo noompumbwe dhawo komeho gaandhoka dhetu kutya nduno otashi pula shike. (1 Aakorinto 10:24) Omomikalo dhini tadhi longo tatu ku ulika ohole yokwiiyamba?

14. (a) Aakuluntugongalo oya tegelelwa ya ninge omaiyambo geni? (b) Mbela owu uvite ngiini kombinga yaakuluntugongalo mboka haya longo nuudhiginini megongalo lyeni?

¹⁴ Aakuluntugongalo ohaya ningi omaiyambo ogendji opo ya ‘tonatele oshigunda.’ (1 Petrus 5:2, 3) Kakele owala kokusila oshimpwiyu omaukwanegumbo gawo, ohaya longitha ethimbo lyawo yene tashi vulika kongulohi nenge momahuliloshiwike opo ya gandje eitulomo kiinima ya pamba egongalo, ngaashi okwiilongekidhila iipopiwa, okuninga omatalelopo guusita nokuungaunga niipotha. Ohayi iyamba wo okulonga piigongi yopashikandjo noyopashitopolwa, yamwe oye li iilyo yOokomitiye dhokukwatathana nIipangelo,  yOongundu dhOkutalela po Aavu noyOokomitiye dhOkutunga dhOmoshitopolwa. Sho tamu longitha ethimbo lyeni noonkondo dheni okulitha oshigunda, oshi li euliko kutya ne aanahole notamu longo nehalo ewanawa lyokwiiyamba. (2 Aakorinto 12:15) Jehova haye owala ha pandula oonkambadhala dheni, ihe negongalo ndyoka tamu tonatele ohali mu pandula wo. — Aafilippi 2:29; Aahebeli 6:10.

15. (a) Aakulukadhi yaakuluntugongalo ohaya ningi omaiyambo geni? (b) Owu uvite ngiini kombinga yaakulukadhi mboka haya ambidhidha aasamane yawo opo ya kwathele egongalo lyeni?

¹⁵ Mbela aakulukadhi yaakuluntugongalo nayo ohaya ningi omaiyambo opo aasamane yawo ya vule okusila oshimpwiyu oshigunda? Eeno, otashi pula eiyambo komukulukadhi uuna omusamane gwe ta longitha ethimbo lye ndyoka a li e na okukala nuukwanegumbo miinakugwanithwa yegongalo. Dhiladhila owala komaiyambo ngoka haga ningwa kaakulukadhi yaatonateli aayendi okuya pamwe naasamane yawo uuna taya talele po omagongalo gi ili nogi ili niikandjo ya yoolokathana. Oya thiga po omagumbo gawo notashi vulika haya lala koombete dhi ili nodhi ili oshiwike kehe. Aakulukadhi mboka haya pititha komeho oompumbwe dhegongalo nehalo ewanawa oye shi okupupulwa kombunda omolwomaiyambo gawo gopahole. — Aafilippi 2:3, 4.

16. Aavali Aakriste ohayi iyambele oyana momikalo dhini?

¹⁶ Ongiini tatu vulu okuulika ohole yeiyambo muukwanegumbo? Aavali ohaya ningi omaiyambo ogendji opo ya sile oshimpwiyu oyana, oku ya putudha noku ya ‘kumagidha pauKriste.’ (Aaefeso 6:4) Otashi vulika haya longo oowili odhindji iilonga tayi vulitha opo ya kongele oyana omboloto, oonguwo nehala lyokukala. Otashi vulika yi imange epaya opo ya sile oshimpwiyu oyana palutu. Ohaya ningi wo oonkambadhala dha mana mo ya konakone noyana, ya ye nayo kokugongala kwopaKriste nokulonga pamwe nayo muukalele. (Deuteronomium 6:6, 7) Omaiyambo goye gopahole otaga nyanyudha  Omutoti gwuukwanegumbo notaga ti omwenyo gwaaluhe kaamwoye. — Omayeletumbulo 22:6; Aaefeso 3:14, 15.

17. Aasamane Aakriste otaya vulu ngiini okuholela iikala yaJesus yokwaaihola mwene?

¹⁷ Ongiini aasamane taya vulu okuholela Jesus mokuulika ohole yokwiiyamba? Ombiimbeli otayi yamukula tayi ti: “Aalumentu, holeni aakiintu yeni, naanaa ngashika Kristus e hole egongalo lye nokwi igandja meso omolwalyo.” (Aaefeso 5:25) Ngaashi twe shi mona, Jesus oku hole aalanduli ye unene nomolwaashoka e ya sila. Omusamane Omukriste oha holele iikala yaJesus ngoka ini “iyopalela ye mwene.” (Aaroma 15:3) Omusamane Omukriste oha kala e na ko nasha noompumbwe dhomukadhi, pehala lyokukala ti ipula owala noompumbwe dhe. Iha kala owala ta thiminike kehe shimwe shi ningwe ngaashi a hala, ihe oha tifuka ngele shoka omukadhi ta pula itashi yono omakotampango gopamanyolo. Ngele omusamane ohu ulike ohole yeiyambo, ota ka kala a hokiwa kuJehova nokukala e holike nokwa simanekwa komukadhi nokoyana.

18. Oshike hashi tu inyengitha tu landule oshipango oshipe shokukala tu holathane?

¹⁸ Okuvulika koshipango oshipe tu kale tu holathane kashi shi oshinima oshipu, ihe otu na etompelo lya kola oku shi ninga. Paulus okwa nyola a ti: “Oshoka ohole yaKristus otayi tu pangele, sho twa dhimbulukwa kutya omuntu gumwe okwa sile aantu ayehe, . . . mboka ye na omwenyo kaaya ikalele we yo yene, ihe ya kalele nguka a si molwawo nokwa yumudhwa molwawo.” (2 Aakorinto 5:14, 15) Mbela katu na okuvulika kuJesus molwaashoka oye e tu sila? Otatu vulu oku shi ninga mokulandula oshiholelwa she shohole yokwiiyamba.

19, 20. Jehova okwe tu pa omagano dhingi geni, nongiini tatu vulu okuulika kutya otwe ga pandula?

¹⁹ Jesus ka li ta gwedhele sho a ti: “Ohole onenenene omuntu  ta vulu okukala e yi na yokuhola ookuume ke, oyo okugandja omwenyo gwe omolwawo.” (Johannes 15:13) Sho a gandja omwenyo gwe nehalo ewanawa omolwetu, oshi li euliko enenenene kutya oku tu hole. Ihe opu na ngoka e tu hole shili noonkondo. Jesus okwa ti: “Osho ngeyi Kalunga a kala e hole uuyuni, oye a gandja Omwana awike, opo shaa ngoka [e na eitaalo tali longo muye, NW], kaa kane, ihe a kale e na omwenyo gwaaluhe.” (Johannes 3:16) Kalunga oku tu hole unene, onkee okwa gandja Omwana ekuliloyambo opo tu hupithwe muulunde nomeso. (Aaefeso 1:7) Eeno, ekulilo oli li omagano dhingi ga za kuJehova, ihe iha thiminike omuntu e ga taambe.

²⁰ Otse yene tu na okuhogolola ngele otatu taamba ko omagano ngoka. Ngiini mbela? Omokukala ‘neitaalo tali longo’ mOmwana. Inashi gwana owala okutya otu na eitaalo. Ihe iilonga yetu nokukalamwenyo kwetu okwo ku na oku shi ulika. (Jakob 2:26) Ohatu ulike kutya otwi itaala muJesus Kristus moku mu landula esiku nesiku. Ngele tatu shi ningi, otatu ka mona omayambeko ogendji ngashingeyi nomonakuyiwa, nontopolwa yahugunina yembo ndika otayi ke ga kundathana.