1-3. (a) Jesus okwi i inyenge ngiini sho aaheheli aaposi ye mu pula e ya kwathele? (b) Uutumbulilo “okwe ya sile ohenda” owa hala okutya shike? (Tala enyolo lyopevi.)

 POOHA dhondjila popepi naJeriko, opwa li hapu kala pwa kuutumba aaposi yaali. Oya li haye ya mpoka molwaashoka ohapu ende aantu oyendji esiku kehe opo ya vule oku ya hehela iimaliwa. Ihe esiku limwe oya li ya ningilwa oshinima tashi kumitha unene shoka sha lundulula onkalamwenyo yawo ayihe.

² Opo ye li po, aaheheli oyu uvu ombuyagano yaantu. Molwaashoka kaye wete kutya oshike tashi ningwa, gumwe gwomuyo okwa pula kutya aantu oya nyanyukwa koshike ano? Okwa lombwelwa kutya “oJesus Omunasareti te ende po.” Jesus okwa li u uka kuJerusalem oshikando she shahugunina. Ihe ka li oye awike, oongundu dhaantu odha li dhe mu landula. Sho aaheheli yu uvu kutya oJesus te ende po, oyi igidha mokule ya ti: “Omuwa, Omuna gwaDavid, tu sila ohenda!” Aantu oye ya ganda ya mwene molwaashoka oya li ye wete taye ya ningile nayi, ihe aaposi inaya shuna nando omutse miipeta. Oya tsikile nokwiigidha.

³ Nonando engathithi lyaantu olya li enene, Jesus okwa li u uvite sho omawi gaalumentu mboka taga uyagana. Okwa ningi po shike? Okwa li ti ipula niinima oyindji momutima gwe. Okwa li e li pokudhipagwa. Okwa li e shi kutya ota ka monithwa iihuna muJerusalem nokuhepekwa sigo omeso. Ihe nonando ongaaka, ini ipwililikila aalumentu mboka taya pula ekwatho kuye. Jesus okwa kankama e ta pula  aantu ye ete kuye aalumentu mboka tayi igidha. Oye mu indile ya ti: “Omuwa, otwa hala, omeho getu ga tonatithwe.” Jesus “okwe ya sile ohenda” nokwa gumu omeho gawo noya tameke okumona ko. * Oye mu landula nopwaahe na okwoongaonga. — Lukas 18:35-43; Mateus 20:29-34.

4. Jesus okwa gwanitha po ngiini ehunganeko ndyoka tali ti kutya ota ‘sile oshimbembe olukeno’?

⁴ Shika hasho owala oshikando shotango Jesus tu ulike olukeno. Okwa li e shi ningi poompito odhindji nomoonkalo dha yoolokathana. Ombiimbeli oya hunganeka kutya ye ota ‘sile oshimbembe olukeno.’ (Episalomi 72:13) Osha yela kutya Jesus okwa li ha yaalele yalwe. Okwa li ha katuka oonkatu a kwathele aantu. Omolwolukeno lwe okwe yu uvithile. Oohapu dhohenda dhaJesus niilonga ye yolukeno oya popiwa mOmavaangeli. Ngashingeyi otatu ka tala shoka Omavaangeli taga popi, nonkene tatu vulu oku mu holela.

5, 6. Iiholelwa yini tayi ulike kutya Jesus okwa li e na olukeno shili?

⁵ Jesus okwa li e na olukeno shili. Okwa li hu uvu ko mboka taya mono iihuna noku ya kwathela. Nonando ka li moonkalo dha fa dhawo, okwa li a hendwa komutima. (Aahebeli 4:15) Sho a aludha omukiintu ngoka a li a ala etiko lyombinzi uule womimvo 12, Jesus okwa popi kutya oku na ‘uuvu wa kwata miiti,’ shoka tashi holola kutya omukiintu ngoka okwa li a lulilwa kuuvu mboka nowa li tawu mu hepeke. (Markus 5:25-34) Jesus okwa li a hendwa komwenyo sho a mono Maria naamboka ye li puye taya lili Lasarus.  Nonando okwa li e shi kutya ota ka yumudha Lasarus, Jesus okwa lili. — Johannes 11:33, 35.

⁶ Oshikando shimwe omunashilundu okwe ya kuJesus e te mu hehela ta ti: “Ngele owa hala okwaaludha ndje, oto shi vulu.” Jesus okwa li i inyenge ngiini? Nonando ye okwa gwanenena noine ehama nando onale, okwa li u ‘uvitile omunashilundu olukeno.’ (Markus 1:40-42) Opo nduno okwa ningi oshinima shoka aantu ya li inaaya tegelela. Okwa li e shi shi kutya Ompango oyi indika aanashilundu ya kale mokati kaantu. (Levitikus 13:45, 46) Jesus okwa li ta vulu okwaaludha omulumentu ngoka nopwaahe na oku mu guma kolutu. (Mateus 8:5-13) Ihe okwa kwata omunashilundu e ta ti: “Onda hala, yela!” Nziya omunashilundu okwa yela. Jesus ka li tuu u ulike olukeno shili!

7. Oshike tashi ke tu kwathela tu kokeke olukeno, nongiini tatu vulu okuulika uukwatya mbuka?

⁷ Tu li Aakriste otu na okuulukila aantu olukeno ngaashi naanaa Jesus. Ombiimbeli otayi tu kumagidha tu ulike “uukwawo wanankali.” * (1 Petrus 3:8, NW) Otashi vulika shi kale oshidhigu kutse okuuva ko kutya mboka ye na uuvu woshinamenena naamboka ya polimana ohaya kala yu uvite ngiini, unene tuu ngele inatu pita moonkalo ndhoka. Ihe katu na owala okuulika uukwawo wanankali ngele natse otwa li monkalo ya faathana. Jesus okwa li a kenukile mboka taye ehama, nonando ye shi valelwe e ehame. Ongiini tatu vulu okuulika olukeno? Omokupulakena neitulomo ngele mboka taya mono iihuna taye tu lombwele nkene yu uvite. Otatu vulu okwiipula tatu ti: ‘Ando onda li monkalo ndjoka, ando ondu uvite ngiini?’ (1 Aakorinto 12:26) Ngele otwa kala tu na ko nasha nomaiyuvo gayalwe, otatu ka vula ‘okuhekeleka ayehe mboka taa lili.’ (Jesaja 61:2) Kakele owala kokupopya, omathimbo gamwe uukwawo wanankali  otawu vulu wo okuulikwa nomahodhi. Aaroma 12:15 otaya ti: “Lileni pamwe naamboka taa lili.”

8, 9. Jesus okwa li e shi ulike ngiini kutya oku na ko nasha nomaiyuvo gayalwe?

⁸ Jesus okwa li ha yaalele yalwe nokwa li e na ko nasha nomaiyuvo gawo. Oshikando shimwe puye opwa li pwe etwa omulumentu ombolo ye iha popi. Sho a dhimbulula kutya omulumentu ngoka oku na ohoni, Jesus okwa ningi oshinima shoka inaa ninga nando onale uuna ta aludha aantu: “Okwe mu kutha maantu ye ki ikalele.” Sho ya yi, okwe mu aludha omanga ye li oyo ayeke. — Markus 7:31-35.

⁹ Jesus okwa li i inyenge momukalo gwa faathana sho aantu ye mu etele omulumentu omuposi noku mu pula e mu aludhe. Okwa “kwata omuposi mokwaako nokwe mu fala kokule nomagumbo.” Opo nduno okwe mu aludha kashona nakashona. Otashi vulika a li e shi ningi opo a kwathele omulumentu ngoka omeho ge gi igilile uuyelele wa tsa woonte dhetango nosho wo omalupe giinima mbyoka yi li momudhingoloko. (Markus 8:22-26) Jesus oku ulike shili kutya ye oku na ko nasha naantu.

10. Omomikalo dhini tatu vulu okuulika kutya otu na ko nasha nomaiyuvo gayalwe?

¹⁰ Otu na okukala hatu kenukile yalwe ngele otu li aalanduli yaKristus. Onkee ano, otu na okukala twa kotokela elaka lyetu molwaashoka ngele hasho, nena otatu ke ehameka yalwe. (Omayeletumbulo 12:18; 18:21) Aakriste mboka ye na ko nasha nomaiyuvo gayalwe, kaye na okulongitha elaka lya honga, oohapu dhomasheko nokuula yalwe nayi.  (Aaefeso 4:31) Ongiini aakuluntugongalo taya vulu okuulika kutya oye na ko nasha nomaiyuvo gayalwe? Omokupopya nelaka etalala lyombili uuna taya gandja omayele, shoka tashi ka ningitha ngoka ta popiwa naye a kale u uvite a simanekwa. (Aagalati 6:1) Ongiini aavali taya vulu okuulika kutya oye na ko nasha nomaiyuvo goyana? Omoku ya putudha momukalo ngoka itaagu sitha oyana ohoni. — Aakolossa 3:21.

11, 12. Omahokololo gOmbiimbeli geni tagu ulike kutya Jesus ka li ha tege a pulwe opo u ulike olukeno?

¹¹ Jesus okwa li ha kenukile yalwe nonando inaye mu pula e ya kwathele. Olukeno ohalu inyengitha omuntu i iyile mo ye mwene a kwathele yalwe. Itashi kumitha sho Jesus a li a katuka oonkatu e shi ninge. Pashiholelwa, sho ongundu onene yaantu ya kala puye omasiku gatatu, kapu na ngoka e mu lombwele a ninge po sha sho aantu ya li ya sa ondjala. Ehokololo otali ti: “Jesus okwi ithana aalongwa ye kuye e ta ti kuyo: ‘Aantu mbaka ondi ya uvitile olukeno, oshoka oya menekele pungame omasiku gatatu yo kaye na shoka taa li. Ngame inandi hala oku ya laleka nondjala, opo yaa loloke mondjila.’” Okwe ya kutitha pashikumithalonga nehalo ewanawa. — Mateus 15:32-38.

¹² Tala ishewe kehokololo lilwe. Mo 31 E.N., Jesus okwa li a mono oshinima shinikitha oluhodhi popepi noshilando Nain. Okwa tsakaneke ongundu yaantu tayi zi moshilando, tashi vulika yu uka pomayendo gopopepi kefumviko “lyomumati a valwa awike kuyina, omuselekadhi.” Mbela owu shi kutya omuselekadhi ngoka okwa li uvite uuwehame wu thike peni? Ka li e na omusamane e mu hekeleke, ye omwanamati gwe oye ishewe ta ka fumvikwa. Jesus sho a “mono omuselekadhi” ngoka mongundu yaantu, ‘okwa li e mu uvitile olukeno’ shili. Kapu na ngoka a li e mu pula a yumudhe omumati, ihe olukeno olo lwe mu inyengitha a  ninge po sha. Okwa “hedha popepi nokwa gumu ontala” e ta yumudha omumati. Oshike sha ningwa po? Jesus ina lombwela omumati e mu landule pamwe nongundu yaantu ndjoka a li nayo. Pehala lyaashono, okwe mu pe yina ta ti: “Omumwoye oye ngu.” Kungeyi okwa li a hanganitha ishewe uukwanegumbo mboka nokushilipaleka omuselekadhi ngoka kutya ota ka silwa oshimpwiyu. — Lukas 7:11-15.

13. Ongiini tatu vulu okuholela Jesus mokukatuka oonkatu tu kwathele yalwe?

¹³ Ongiini tatu vulu okulandula oshiholelwa shaJesus? Odhoshili kutya itatu vulu okukutitha aantu pashikumithalonga nenge oku ya yumudha. Kakele kaashono, otatu vulu okukwathela mboka ya pumbwa ekwatho. Omwiitaali omukwetu otashi vulika a kanithe iiniwe ye nenge iilonga ye. (1 Johannes 3:17) Egumbo lyomuselekadhi otashi vulika lya pumbwa okwoopalekululwa. (Jakob 1:27) Otashi vulika tu shi uukwanegumbo mboka wa silwa nenge wa pumbwa ekwatho lyontumba. (1 Aatessalonika 5:11) Ngele otu wete gumwe a pumbwa sha, katu na okukala hatu tegelele tu pulwe tango opo tu mu kwathele nawa. (Omayeletumbulo 3:27) Olukeno otalu ke tu inyengitha tu katuke oonkatu tu mu kwathele, shi thike poonkondo dhetu. Inatu dhimbwa kutya otatu vulu okuhekeleka yamwe niilonga yetu yohole nenge noohapu oonshona tadhi zi komutima. — Aakolossa 3:12.

14. Omolwashike Jesus a li a lenga okuuvitha onkundana ombwaanawa?

¹⁴ Oshitopolwa oshitiyali membo ndika oshe tu kwathela tu landule oshiholelwa kamana shaJesus shokuuvitha onkundana ombwaanawa. Okwa ti: “Ondi na okuuvithila iilando yimwe wo evaangeli lyUukwaniilwa waKalunga, oshoka olyo tuu ndika nde li tuminwa.” (Lukas 4:43, KB) Omolwashike a li a lenga okuuvitha? Omolwohole ye onene yokuhola Kalunga. Ihe okwa li wo e na etompelo lilwe.  Olukeno olo lwa li lwe mu inyengitha a kwathele mboka ye na ompumbwe yopambepo. Momikalo adhihe ndhoka a li u ulike olukeno, okuuvithila yalwe okwo kwa li kwa simana ku vulithe ayihe. Ngashingeyi natu ka taleni omikalo mbali nkene Jesus a li a tala ko aantu mboka tu uvithile. Shoka otashi ke tu kwathela tu talulule omainyengotompelo getu kutya omolwashike hatu kutha ombinga muukalele.

15, 16. Hokolola iiningwanima iyali mbyoka tayi holola nkene Jesus a li a tala ko aantu mboka u uvithile.

¹⁵ Mo 31 E.N., konima yomimvo mbali sho Jesus a kala ta longo nuulaadhi muukalele, okwa ningi oonkambadhala dha mana mo e “ende miilando ayihe nomomikunda adhihe” dhaGalilea. Shoka a mono osha gumu omutima gwe. Omuyapostoli Mateus okwa ti: “Sho a tala oongundu dhaantu, okwa li e ya uvitile ohenda, oshoka oya li ya hepekwa noya loloka ya fa oonzi dhaa na omusita.” (Mateus 9:35, 36) Jesus okwa li e na ko nasha naantu mboka ya li ya dhinika. Okwa li e shi kutya oya sa ondjala pambepo. Okwa li e shi kutya aawiliki yelongelokalunga mboka andola ya li ye na okukala aasita yawo, oya li ye ya ekelahi nokaye na ko nasha nayo. Omolwolukeno lwe, Jesus okwa li i  idhipagele po opo a adhe aantu ayehe netumwalaka ndyoka tali ya pe etegameno. Aantu oya li ya pumbwa unene okuuva onkundana ombwaanawa yUukwaniilwa.

¹⁶ Oshinima sha faathana osha li sha ningwa konima yoomwedhi dhontumba mo 32 E.N., sho Opaasa ya li pokudhanwa. Pompito ndjika Jesus naayapostoli ye oya li ya yi mowato noya taaguluka efuta lyaGalilea ya ka vululukwe po. Ihe sho ongundu yaantu ye shi mono oye ya tete komeho noyo ya thiki tango, nokuli omanga owato inaayi thika. Jesus okwi inyenge ngiini? “Okwa zi mo mowato nokwa mono ongundu onene yaantu. Oye okwa li e ya uvitile olukeno, oshoka oya li ya fa oonzi dhaa na omusita. Oye nokwa tameke oku ya longa iinima oyindji.” (Markus 6:31-34) Natango, Jesus okwa li e yu “uvitile olukeno” molwaashoka oya li ya sa ondjala pambepo. Oya li ye ekelwahi ngaashi “oonzi dhaa na omusita” noya li taya si ondjala pambepo. Olukeno olwi inyengitha Jesus e yu uvithile.

17, 18. (a) Oshike hashi tu inyengitha tu kuthe ombinga muukalele? (b) Ongiini tatu vulu okuulukila yalwe olukeno?

¹⁷ Ngaashi twe shi mono mOntopolwa onti-9, tu li aalanduli yaJesus otwa pewa oshilonga shokuuvitha nokuninga aantu aalongwa. (Mateus 28:19, 20; 1 Aakorinto 9:16) Oshike hashi tu inyengitha tu kuthe ombinga muukalele? Ihatu shi ningi owala molwaashoka tu uvite kutya otu na oku shi ninga. Ihe ohole yokuhola Kalunga oyo hayi tu inyengitha unene tu uvithe onkundana ombwaanawa yUukwaniilwa. Ohatu shi ningi wo molwaashoka otu nine olukeno mboka kaaye shi yeitaalo lyetu. (Markus 12:28-31) Ihe ongiini tatu vulu okuulukila yalwe olukeno?

¹⁸ Aantu nokunena “oya loloka ya fa oonzi dhaa na omusita” notu na oku ya tala ko ngaashi Jesus. Natu tye nduno owi itsu onzi ya kana. Otashi vulika yi kale ya sa ondjala nenota molwaashoka kapu na omusita ngoka te yi fala mpoka pu na omwiidhi nomeya. Mbela ito ke yi kenukila? Ito ke yi  hugila mbela noku yi hingila mpoka pu na omwiidhi? Aantu oyendji mboka inaaya tseya onkundana ombwaanawa oya fa owala onzi ndjoka. Aantu mboka oye ekelwahi kaasita yomalongelokalunga giifundja noya sa ondjala nenota lyopambepo nokaye na etegameno lyasha lyonakuyiwa. Tse otu na shoka ya pumbwa: iikulya yopambepo nomeya taga talaleke goshili yOohapu dhaKalunga, iinima mbyoka tayi ya palutha pambepo. (Jesaja 55:1, 2) Ohashi gumu omitima dhetu uuna tatu dhiladhila oompumbwe dhopambepo dhaantu mboka ye tu dhingoloka. Ohatu ya etele ohenda ngaashi Jesus, nohatu ningi ngaashi tatu vulu tu ya uvithile shoka Uukwaniilwa tawu ka ninga.

19. Oshike tatu vulu okuninga tu ladhipike aakonakonimbiimbeli yetu mboka ya gwana okuya muukalele?

¹⁹ Ongiini tatu vulu okukwathela yalwe ya landule oshiholelwa shaJesus? Natu tye nduno otwa hala okuladhipika omukonakonimbiimbeli ngoka a gwana a tameke okukutha ombinga muukalele. Nenge otwa hala okukwathela ngoka ini ipyakidhila we a kale ha kutha ombinga muukalele pandjigilile. Ongiini tatu vulu okukwathela aantu mboka? Otu na okwaadha omitima dhawo. Dhimbulukwa kutya tango Jesus okwa li ‘u uvitile aantu olukeno’ nopo nduno okwa tameke oku ya longa. (Markus 6:34) Ngele natse otatu ya longo nkene ye na okukenukila yalwe, otashi vulika shi ke ya inyengithe yu uvithile yalwe onkundana ombwaanawa ngaashi Jesus. Otatu vulu oku ya pula tatu ti: “Etumwalaka lyUukwaniilwa olya hwepopaleka ngiini onkalamwenyo  yoye? Ongiini kombinga yaamboka inaaya uva etumwalaka ndika, mbela sho to tala nayo oya pumbwa oku li uva? Oshike to vulu okuninga po wu ya kwathele?” Osha yela kutya owu na okuya muukalele molwaashoka to inyengithwa kohole yokuhola Kalunga nehalo lyoku mu longela.

20. (a) Okukala omulanduli gwaJesus osha kwatela mo shike? (b) Oshike tatu ka kundathana montopolwa tayi landula?

²⁰ Okukala omulongwa gwaJesus kashi shi owala okulonga yamwe oohapu dhe nokuholela iilonga ye. Otu na okukokeka “omadhiladhilo” ga fa ge. (Aafilippi 2:5, KB) Katu na tuu olupandu sho Ombiimbeli tayi tu lombwele omadhiladhilo nomaiyuvo ngoka Jesus a li e na! Ngele otu na “omadhiladhilo gOmuwa,” sha hala kutya, ga fa gaKristus, otatu ka kenukila yamwe shili nomutima aguhe nokungawo otatu ungaunga naantu twa fa Jesus. (1 Aakorinto 2:16) Montopolwa tayi landula otatu ka kundathana omikalo dhi ili nodhi ili nkene Jesus a li u ulukile yalwe ohole, unene tuu aalanduli ye.