1-3. (a) Omunepya okwa li a ningi po shike sho a mono kutya iikunomwa ye oyindji oku yi likola oye awike? (b) Jesus okwa li a taalela eshongo lini pothinge yomo 33 E.N., nokwa li a ningi po shike?

 OMUNEPYA okwa pulula epya lye pethimbo e te li kunu. Okwa kala nokutala sho oombuto dhe tadhi piti, naasho tadhi koko oshe mu nyanyudha. Omunepya okwa mono iilikolomwa oyindji omolwiilonga ye yuudhiginini. Ihe uupyakadhi mboka a li e na owo kutya iilikolomwa ye oyindji unene noita vulu oku yi mana oye awike. Opo a kandule po omukundu, okwa li a kutu aaniilonga noku ya tuma kepya lye. Ihe oku na ethimbo lya ngambekwa opo a mane okulikola iikunomwa ye.

² Sho Jesus a yumudhwa okwa li a taalela eshongo lya faathana, pothinge mo 33 E.N. Okwa li a kunu oombuto  dhoshili pethimbo lyuukalele we kombanda yevi. Ihe omanga inaaya megulu okwa li e na okulikola iikunomwa ye mbyoka ya li oyindji. Oyendji mboka ya taamba ko etumwalaka lye oya li ye na okuningwa aalongwa ye. (Johannes 4:35-38) Jesus okwa li ta ka ninga po shike? Sho a li kondundu muGalilea, omanga inaa ya megulu okwa lombwele aalongwa ye ya konge aaniilonga oyendji, sho a ti: “Indeni ano, ka ningeni aantu ayehe aalongwa yandje, mu ya [ninginithe, NW] . . .  ne mu ya longe okudhiginina ayihe mbyoka nde yi mú lombwele.” — Mateus 28:19, 20.

³ Omuntu ota vulu owala okwiithanwa kutya ye omulanduli gwashili gwaKristus ngele ta gwanitha po oshilonga shoka. Natu konakoneni omapulo gatatu taga landula. Omolwashike Jesus a li a gandja elombwelo lyokukonga aaniilonga oyendji? Ongiini a li a dheula a longwa ye ya kale noku ya konga? Tse otwa kwatelwa mo ngiini moshilonga shika?

4, 5. Omolwashike Jesus inaa mana iilonga mbyoka a tameke, noolye ya li ye na okutsikila niilonga mbyoka ngele a shuna megulu?

⁴ Sho Jesus a tameke uukalele we mo 29 E.N., okwa li e shi kutya oshilonga shoka oshinene noite ke shi mana oye awike. Ka li a vulu okumana ko oshitopolwa ashihe nokupopya naantu ayehe kombinga yetumwalaka lyUukwaniilwa, molwaashoka ethimbo lye lyokukala kombanda yevi olya li lya ngambekwa. Oku uvithile Aajuda naamboka kaaye shi Aajuda, ihe unene tuu ‘oonzi ndhoka dha kana dhomAaisraeli.’ (Mateus 15:24) ‘Oonzi ndhoka dha kana’ odha li dhi ihanena muIsraeli ashihe, oshilando shoka sha li shi na uule wookilometa omayuvi. Kakele kaashono, uuyuni auhe otawu ku uvithilwa onkundana ombwanawa konahiya. — Mateus 13:38; 24:14.

⁵ Jesus okwa li a tseya kutya iilonga oyindji otayi ka longwa konima yeso lye sho a shuna megulu. Okwa lombwele aayapostoli ye 11 aadhiginini a ti: “Ngame otandi mú lombwele  oshili: Kehe ngoka i itaala ndje, oye ta ka longa wo iilonga mbyoka tandi yi longo. Eeno, oye ota ka longa nokuli iilonga iinene yi vule mbika, oshoka ngame otandi yi kuTate.” (Johannes 14:12) Molwaashoka Jesus okwa li ta ka shuna megulu, aalanduli ye oyo ya li taya ka tsikila ko niilonga yokuuvitha noyokuninga aantu aalongwa. Iilonga mbyoka oya li tayi ka longwa kaayapostoli ye nokaalongwa ye yomonakuyiwa. (Johannes 17:20) Jesus okwa li a zimine neifupipiko kutya iilonga yawo otayi ka kala “iinene yi vule” ye. Ngiini mbela? Omomikalo ndatu.

6, 7. (a) Omomikalo dhini iilonga yaJesus yi vulike kwaambyoka yaalongwa ye? (b) Ongiini tatu vulu okuulika kutya Jesus ina ninga epuko sho e tu inekelela uukalele?

⁶ Omukalo gwotango, aalanduli yaJesus oya li taya ka longa oshitopolwa oshinene. Onkundana ombwaanawa ngashingeyi oya thika kooha dhuuyuni, kokulekule niilando mpoka Jesus a li u uvitha. Omutiyali, oya li yu uvithile aantu oyendji. Ongundu onshona yaalongwa mboka Jesus a thigi po sho a yi megulu oyi indjipala meendelelo e taya ningi omayovi ogendji. (Iilonga 2:41; 4:4) Ngashingeyi oye li omamiliyona, naantu omayovi omathele ohaya ninginithwa omumvo kehe. Omutitatu, oya li taya ka uvitha ethimbo ele, uule womimvo 2 000 konyala konima yuukalele waJesus woomvula ndatu netata, sigo okunena otaya uvitha.

⁷ Jesus okwa li i inekela aalanduli ye sho a ti kutya otaya ka longa “iilonga iinene yi vule mbika.” Okwa li e ya pe iilonga ya simanenena yokulonga aantu noyokuuvitha “evaangeli lyuukwaniilwa waKalunga.” (Lukas 4:43, KB) Okwa li e na einekelo kutya otaya ka gwanitha po oshilonga shoka. Shika otashi ti shike kutse kunena? Ngele otwa kala hatu kutha ombinga nuulaadhi muukalele nohatu shi ningi nomutima aguhe, otatu ulike kutya Jesus ina ninga epuko moku tu inekelela oshilonga shoka. Mbela shika kashi shi tuu uuthembahenda unene? — Lukas 13:24.

8, 9. Jesus okwa tula po oshiholelwa shini muukalele, nongiini tatu vulu oku shi landula?

⁸ Jesus okwa li a dheulile aalongwa ye iilonga yuukalele. Okwe ya tulile po tango oshiholelwa sha gwanenena.  (Lukas 6:40) Montopolwa ya tetekele, otwi ilongo nkene a li a tala ko uukalele. Dhiladhila kaalongwa ye mboka a li he ende nayo ngele te ku uvitha. Oya li ye shi mono kutya ohu uvithile aantu kehe mpoka e ya adha, ngaashi pominkulofuta, kiikulundundu, miilando, pomalandithilo nosho wo momagumbo gawo. (Mateus 5:1, 2; Lukas 5:1-3; 8:1; 19:5, 6) Oya li ye shi kutya oha longo nuudhiginini, okuza pepito lyetango sigo okongulohi. Ka li owala ha yi muukalele esiku a hala. (Lukas 21:37, 38; Johannes 5:17) Aalongwa ye oya li ye shi mono kutya ohole ye yashili yokuhola aantu oyo ya li ye mu inyengitha e yu uvithile. Shika oye shi mono molukeno ndoka a li u ulike talu zi komutima. (Markus 6:34) Oshiholelwa shaJesus osha li sha nwetha mo ngiini aalongwa ye? Mbela ngoye oshe ku nwetha mo ngiini?

⁹ Tu li aalanduli yaKristus, otu na okulandula oshiholelwa she shuukalele. Onkee ano, ngele tatu “uvithile aantu ayehe” ihatu thigi emanya lya londa kekwawo. (Iilonga 10:42) Ohatu uvithile aantu momagumbo gawo, ngaashi Jesus a li a ningi. (Iilonga 5:42) Ohatu lundulula shi ikolelela koonkalo opo tu ye kuyo omathimbo ngoka haya kala unene momagumbo. Ohatu uvithile wo aantu mpoka taya adhika ngaashi pomahala gaayehe, momapandaanda, mooparka, poositola nopomahala giilonga. Ngele tu li muukalele, ohatu ‘kondjo nohatu wu ihepekele’ twa mana mo molwaashoka owa simanenena kutse. (1 Timoteus 4:10) Molwaashoka otu hole aantu shili ohashi tu inyengitha tu konge oompito opo tu ya uvithile ethimbo kehe noshaampoka tatu ya adha. — 1 Aatessalonika 2:8.

10-12. Iinima ya simana yini Jesus a lombwele aalongwa ye omanga inee ya tuma ye ku uvithe?

¹⁰ Omukalo gumwe moka Jesus a li a dheula aalongwa ye, omo ku ya pa omalombwelo nkene ye na okuuvitha. Omanga inaa tuma aayapostoli ye 12 nosho wo aalongwa 70 ye ku uvithe, okwa li e ya pe omalombwelo gokondandalunde nkene ye na okuuvitha. (Mateus 10:1-15; Lukas  10:1-12) Oya li ye shi enditha nawa muukalele omolwedheulo ndyoka. Lukas 10:17 ota ti: “Ihe mbeya 70 ya galuka nenyanyu, KB.” Natu taleni kiinima iyali ya simana mbyoka Jesus a longo aantu, nokukaleka momadhiladhilo kutya oohapu dhe odha li tadhi ti shike kAajuda yopethimbo lyOmbiimbeli mboka ya li yi itaala momithigululwakalo dhawo.

¹¹ Jesus okwa lombwele aalongwa ye ya kale yi inekela muJehova. Okwa ti: “Inamu humbata [momakwamo geni, KB] iimaliwa yoshingoli nenge yoshisiliveri nenge yoshikushu; hampunda yokweenda nayo, hahema mbali, hangaku koompadhi nenge ondhimbo. Oshoka omulongi okwi ilongela okupewa iipalutha ye.” (Mateus 10:9, 10) Aantu nale ngele taya yi molweendo oya li haya zala ekwamo moka haya tula iimaliwa. Oya li wo haya humbata oompunda moka haya tula iikulya nosho wo epando limwe ishewe lyoongaku. * Sho Jesus a lombwele aalongwa ye yaaha kale tayi ipula niinima mbyoka, okwa li ta ti: “Kaleni mwi inekela Jehova thiluthilu, molwaashoka ye ote ke mu sila oshimpwiyu.” Jehova ote ke ya sila oshimpwiyu mokwiinyengitha mboka taya pulakene onkundana ombwaanawa ye ya yakule nawa, ngaashi sha li ohedhi muIsraeli. — Lukas 22:35.

¹² Jesus okwa lombwele aalongwa ye ya angale iinima  mbyoka tayi mana po ethimbo. Okwa ti: “Inamu mana po ethimbo nokukunda aantu mondjila.” (Lukas 10:4) Mbela Jesus okwa li te ya lombwele ya kale kaaye na eyego nomuntu? Hasho nando. Pethimbo lyOmbiimbeli, okupopitha owala omuntu to ti: “Mu uhala po” inashi gwana. Owu na okuninga iinima yontumba nokupopya ethimbo ele. Omulongwantu gumwe gwOmbiimbeli okwa ti: “Aantu yomiilongo yokuuzilo ihayi ipopitha owala ngaashi tse mba hatu tifula nenge twi iminike, yo ohayi ipapatele iikando oyindji, nokukala taya sizimana olundji nokwiinyongamena pevi. Okwiikunda kwa tya ngawo ohaku mana po ethimbo olindji.” Sho Jesus a lombwele aalongwa ye kutya inaya popitha omuntu, okwa li a hala okutya: “Naya longithe ethimbo nawa, molwaashoka etumwalaka ndyoka ye na olye endelela” nokaye na okumana po ethimbo nomapopithathano ngoka. *

13. Ongiini tatu vulu okuulika kutya ohatu tula miilonga omalombwelo gaJesus ngoka a pe aalongwa ye yomethelemumvo lyotango?

¹³ Otu na okutula miilonga omalombwelo gaJesus ngoka a pe aalongwa ye yomethelemumvo lyotango. Opo tu tsikile nuukalele wetu, otu na okukala twi inekela thiluthilu muJehova. (Omayeletumbulo 3:5, 6) Otu shi kutya itatu ka kala twa pumbwa nando iipumbiwa yokukalamwenyo ngele otwa ‘kongo tango Uukwaniilwa waKalunga.’ (Mateus 6:33, KB) Aauvithi yUukwaniilwa yethimbo lyu udha muuyuni auhe otaya vulu oku shi koleka kutya Jehova ohe ya kwathele momathimbo omadhigu. (Episalomi 37:25) Otu na okuyanda iinima mbyoka hayi mana po ethimbo. Ngele  inatu kotoka, otatu vulu okuyulwa nuupu kiinima yuuyuni mbuka. (Lukas 21:34-36) Ndika halyo ethimbo lyokukala twi itula miinima yuuyuni, molwaashoka otu na etumwalaka lye endelela noomwenyo odhindji odhi li moshiponga. (Aaroma 10:13-15) Itatu ka falwafalwa kiinima yuuyuni mbuka mbyoka hayi mana po ethimbo lyetu noonkondo dhetu ndhoka tu na okulongitha muukalele ngele otwa kaleke momadhiladhilo getu kutya ethimbo olye endelela. Dhimbulukwa kutya ethimbo lya hupa ko efupi, ihe iilya mbyoka yi na okuteywa oyindji. — Mateus 9:37, 38.

14. Oshike tashi ulike kutya oshilonga shoka sha nyolwa muMateus 28:18-20 osha kwatela mo aalanduli ayehe yaKristus? (Tala enyolo lyopevi.)

¹⁴ Jesus sho a yumudhwa okwa pe aalanduli ye oshinakugwanithwa oshinene a ti: “Indeni . . . ka ningeni aantu ayehe aalongwa.” Sho a popi oohapu ndhoka ka li owala ta lombwele aalongwa ye mboka a li nayo esiku ndyoka kondundu muGalilea. * Iilonga mbyoka e ya pe oya kwatela mo okulonga “aantu ayehe” notayi tsikile “sigo ehulilo lyuuyuni.” Elombwelo ndika olya kwatela mo aalanduli ayehe yaKristus, natse kunena. Natu taleni nawa oohapu dhaJesus ndhoka dhi li muMateus 28:18-20.

15. Omolwashike shi li pandunge tu vulike kelombwelo lyaJesus lyokuninga aantu aalongwa?

¹⁵ Omanga inee ya pa oshilonga shokuuvitha, Jesus okwa ti: “Ongame nda pewa epangelo alihe megulu nokombanda yevi.” (Ovelise 18) Mbela Jesus okwa li ngaa e na oonkondopangelo oonene ndhoka? Eeno, osho lela. Oye omuyengelimukuluntu, ngoka ha wilike aayengeli omamiliyona ogendjigendji. (1 Aatessalonika 4:16; Ehololo 12:7) E li “omutse  gwegongalo,” oku na oonkondopangelo okuwilika aalanduli ye ayehe kombanda yevi. (Aaefeso 5:23, KB) Okwa tameke okupangela e li Omukwaniilwa gopaMesiasa megulu, okuza mo 1914. (Ehololo 11:15) Oku na nokuli oonkondo dhokuyumudha aasi. (Johannes 5:26-28) Sho Jesus a popi tango kutya okwa pewa oonkondopangelo oonene, oku ulike kutya oohapu ndhoka ta ka landulitha ko movelise 19 no 20 kadhi shi eetopo, ihe elombwelo. Onkee ano, oshi li pandunge okuvulika kelombwelo lye, molwaashoka haye mwene i ipa oonkondopangelo, ihe okwe dhi pewa kuKalunga. — 1 Aakorinto 15:27.

16. Jesus okwa hala tu ninge shike sho a ti kutya “indeni,” nongiini tatu vulu okugwanitha po oshilonga shoka?

¹⁶ Konima sho Jesus e ya lombwele oonkondopangelo ndhoka a pewa, okwe ya pe oshilonga sho a ti: ‘Indeni.’ (Ovelise 19) Kungeyi, ote tu pula tu katuke oonkatu opo tu lombwele yalwe etumwalaka lyUukwaniilwa. Otatu vulu okulongitha omikalo dha yoolokathana mokugwanitha po oshilonga shika. Omukalo dhingi okuuvithila aantu pauhandimwe ogwo okweenda egumbo negumbo. (Iilonga 20:20) Ohatu gandja wo uunzapo wontukuluka, ohatu kala twa hala okupopya kombinga yonkundana ombwaanawa nayalwe mpoka tashi opalele esiku nesiku. Omikalo dhetu dhokuuvitha ohashi vulika dhi kale dha yooloka shi ikolelela koompumbwe nokoonkalo dhaantu momudhingoloko. Otu na okuvulika kelombwelo ndyoka “indeni” nokukonga mboka ya gwana. — Mateus 10:11.

17. Ongiini hatu ‘ningi aantu aalongwa’?

¹⁷ Jesus okwe ya yelithile kutya elalakano lyoshilonga shoka olyo ‘okuninga aantu ayehe aalongwa.’ (Ovelise 19) Ongiini hatu ‘ningi aantu aalongwa’? Omoku ya longa. Ihe oku ya ninga aalongwa inashi kwatela mo owala oku ya pa ontseyo. Ngele tatu konakona Ombiimbeli naamboka ye na ohokwe, elalakano lyetu oku ya kwathela ya ninge aalanduli yaKristus. Mpoka tashi wapa, ohatu ya kwathele ya landule  Jesus ngoka e li Omulongi nOshiholelwa shawo noya kale nonkalamwenyo ya fa ye noya longe iilonga mbyoka a li a longo. — Johannes 13:15.

18. Omolwashike sha simanenena komulongwa a ninginithwe?

¹⁸ Oshitopolwa sha simanenena shoshilonga shoka Jesus okwe shi popi sho a ti: “[Ya ninginitheni, NW] medhina lyaHe nolyOmwana nolyOmbepo Ondjapuki.” (Ovelise 19) Eninginitho olyo oshinima sha simana monkalamwenyo yomulongwa molwaashoka oli li endhindhiliko kutya okwiiyapulila Kalunga nomutima aguhe. Olya simanenena omolwehupitho. (1 Petrus 3:21) Ngele omulongwa ngoka opo a ninginithwa ota tsikile okulongela Jehova shi thike pokuvula kwe, ota ka mona omayambeko gaaluhe muuyuni uupe tawu ya. Mbela owa kwathela nale gumwe a ninge omulongwa gwaKristus a ninginithwa? Oshinima shoka ohashi tu etele enyanyu enene kaaku na we. — 3 Johannes 4.

19. Mboka aape ohatu ya longo shike, nomolwashike elongo ndyoka li na okutsikila konima yeninginitho lyawo?

¹⁹ Jesus okwa yelitha oshitopolwa sha landula ko shoshilonga sho a ti: ‘Ya longeni okudhiginina ayihe mbyoka nde yi mú lombwele.’ (Ovelise 20) Ohatu lombwele yalwe ya pulakene komalombwelo gaJesus mwa kwatelwa okuhola Kalunga naantu ooyakwetu noku ya ninga aalongwa. (Mateus 22: 37-39) Ohatu tsikile oku ya longa opo ya vule okuyelitha ooshili dhOmbiimbeli nokupopila eitaalo lyawo. Ngele ya ningi aauvithi, ohatu longo pamwe nayo noku ya longa nkene ye na okupopya nonkene ye na oku shi enda opo uukalele wawo wu kale tawu pondola. Omuntu ngele a ninginithwa itashi ti kutya okwa pwa okulongwa. Ihe okwa pumbwa natango elongo lya gwedhwa po nokukwathelwa nkene e na okusinda omashongo ngoka haga adha aalanduli yaKristus. — Lukas 9:23, 24.

20, 21. (a) Omolwashike kaatu na okutila sho tatu gwanitha po oshilonga shoka Jesus e tu pa? (b) Omolwashike tu na okuuvitha neendelelo, notwa tokola toko okuninga shike?

²⁰ Elombwelo lyahugunina ndyoka Jesus a pe aalongwa ye olya li tali mbilipaleke sho a ti: “Ihe ngame otandi kala pamwe nane omasiku agehe sigo ehulilo lyuuyuni.” (Mateus 28:20) Jesus oku shi kutya oshilonga shika osha simana. Oku shi wo kutya mboka taye shi gwanitha po otaya ka kala ye tondike. (Lukas 21:12) Katu na etompelo okukala twa tila. Omuwiliki gwetu ina tegelela tu gwanithe po oshilonga shoka kutse yene. Mbela itashi hekeleke okutseya kutya Jesus ngoka a pewa “epangelo alihe megulu nokombanda yevi,” ote tu kwathele tu gwanithe po oshinakugwanithwa shika?

²¹ Jesus okwa lombwele aalongwa ye kutya ota ka kala pamwe nayo muukalele omasiku agehe sigo “ehulilo lyuuyuni.” Otu na okutsikila noshilonga shoka sigo ehulilo lye ya. Ngashingeyi olyo ethimbo lyokuuvitha neendelelo. Eteyo lyopambepo oli li metifa. Mboka ye na omitima dhu uka otaya gongelwa momwaalu ogundji. Tu li aalanduli yaKristus otu na okukala twa tokola toko tu gwanithe po oshilonga oshinene shoka twi inekelelwa. Natu kale twa tokola toko okulongitha ethimbo lyetu, oonkondo dhetu niiniwe yetu tu gwanithe po elombwelo lyaKristus ndyoka tali ti: “Indeni . . . ka ningeni aantu aalongwa.”