ONTOPOLWA 10
“Okwa nyolwa”
‘Nena ndjika oohapu ndhika odha gwanithwa’
1-3. Jesus okwa li a hala aantu muNasareti ya thike pehulithodhiladhilo lini, nokwe shi ulike ngiini?
PETAMEKO lyuukalele we, Jesus okwa shuna kuNasareti moshilongo moka a za. Elalakano lye olya li okukwathela aantu yamo ya thike pehulithodhiladhilo lya simanenena kutya oye Mesiasa ngoka a kala u uvanekwa nalenale. Okwa li e shi ulike ngiini kutya oye Mesiasa?
2 Oyendji oya li ya tegelela a longe oshikumithalonga. Oya li yu uvu omahokololo omakumithi giikumithalonga mbyoka a longo. Ihe muNasareti ina longa mo oshikumithalonga. Pehala lyaashoka, okwa yi kosinagoga ngaashi he shi ningi shito. Okwa thikama e ta pewa ondhinga yembo lyaJesaja e yi leshe. Oya li onde notashi vulika ya li ya dhiingilwa kuuti uushona uyali, na Jesus okwa li e na oku yi gonyununa sigo a mono pehala mpoka a hala okulesha. Okwa lesha mokule oohapu ndhoka tadhi adhika ngashingeyi muJesaja 61:1-3. — Lukas 4:16-19.
3 Aapulakeni ye oya li ya tseya nawa oohapu ndhoka. Odha li ehunganeko kombinga yaMesiasa. Ayehe mboka ya li mosinagoga oya li ya tala kuJesus ya mwena ya tya thilu. Opo ihe Jesus okwa tameke okuyelitha uuyelele mboka muule sho a ti: “Nena ndjika oohapu ndhoka mu uvu dha leshwa, odha gwanithwa.” Aapulakeni oya kuminwa oohapu dhe dhuunongo, ihe oyendji oya li ya tegelela a longe oshikumithalonga. Pehala lyoshikumithalonga, okwa popi nuulaadhi ta longitha Omanyolo a aneke pomutenya okwaaheneitaalo kwawo. Sho e shi ningi, aantu muNasareti oya li ya hala oku mu dhipaga. — Lukas 4:20-30.
4. Jesus okwa tula po oshiholelwa shini kombinga yuukalele we, noshike tatu ka tala montopolwa ndjika?
4 Jesus okwa tula po oshiholelwa shuudhiginini muukalele we auhe. Okwa li i inekela thiluthilu mOohapu dhaKalunga dha nwethwa mo. Iikumithalonga mbyoka a longo oyu ulike shili kutya ombepo yaKalunga otayi longo muye. Ihe Jesus okwa li a simaneka unene Omanyolo Omayapuki. Natu taleni koshiholelwa shoka e tu tulila po. Otatu ka tala nkene a li a longitha Oohapu dhaKalunga, nkene e dhi popile noku dhi yelithila yalwe.
Okwa li a totha mOohapu dhaKalunga
5. Jesus okwa li a hala aapulakeni ye ya tseye shike, nongiini u ulike oshili moohapu dhe?
5 Jesus okwa li a hala aantu ya tseye kutya etumwalaka lye olya za konzo yini. Okwa ti: “Elongo ndika tandi li longo, kali shi lyandje mwene, ihe olya za kuKalunga, ngoka a tuma ndje.” (Johannes 7:16) Oshikando shimwe okwa tile: “Itandi vulu okuninga sha ngame mwene, ihe otandi popi ashike shoka Tate a longa ndje.” (Johannes 8:28) Okwa ti ishewe: “Oohapu ndhoka tandi dhi mú lombwele, itandi dhi popi mungame mwene; ihe Tate, ngoka e li mungame, oye ta longo iilonga ye.” (Johannes 14:10) Omukalo gumwe moka Jesus u ulike kutya ota longo aantu oshili omokulongitha oohapu dhaKalunga iikando niikando.
6, 7. (a) Jesus okwa li a totha shi thike peni mOmanyolo gOshihebeli, nomolwashike tashi kumitha? (b) Elongo lyaJesus olya yooloka ko ngiini kwaandyoka lyaalongimpango?
6 Ngele tatu konakona nawa oohapu dhaJesus ndhoka dha nyolwa, otatu ka mona kutya etata lyoohapu ndhoka okwa li e dhi totha shu ukilila mOmanyolo gOshihebeli nenge a popi a kankamena kugo. Otashi vulika wu kale wu wete a fa inaa pondola sha nenge wu kale wa kumwa kutya, omolwashike Jesus inaa totha momambo agehe ngoka ga li ga nwethwa mo omimvo ndatu netata sho a longo aantu noku yu uvithila. Otashi vulika a li e shi ningi. Dhimbulukwa kutya oohapu owala oonshona dhaJesus niilonga ye ya nyolwa mOmbiimbeli. (Johannes 21:25) Oohapu dhe adhihe ndhoka dhi li mOmbiimbeli, otashi vulika wu dhi leshe muule woowili oonshona. Dhiladhila owala to popi kombinga yaKalunga nUukwaniilwa we moowili oonshona, ihe owa totha etata lyOmanyolo gOshihebeli. Iikando oyindji Jesus okwa li a longo aantu, nonando ka li e na ondhinga yembo. MEuvitho lyokOndundu ndyoka lya tseyika nawa, okwa li a totha shu ukilila mOmanyolo gOshihebeli ta popi nopwaahe na okutala membo lyasha.
7 Jesus okwe shi ulike kutya okwa lenga Oohapu dhaKalunga sho a totha mudho. Aapulakeni ye “oya kuminwa elongo lye, oshoka olya li li na oonkondo, hangaashi ndyoka lyaalongimpango.” (Markus 1:22) Aalongimpango oya li ye hole okulonga aantu taya totha moompango oonkulu ndhoka dha popiwa koorabbi yonale. Jesus ina totha nando olumwe moompango ndhoka dhopakana dhoorabbi. Pehala lyaashono, okwa li a lenga Oohapu dhaKalunga. Iikando niikando okwa popi a ti: “Okwa nyolwa.” Okwe endulula oohapu ndhoka mokulonga aalongwa ye naasho ta pukulula mboka ye na omadhiladhilo ga puka.
8, 9. (a) Jesus okwe shi ulike ngiini kutya okwa lenga Oohapu dhaKalunga sho a tidha mo aahalithi motempeli? (b) Aawiliki yelongelokalunga oyu ulike ngiini kutya inaya simaneka Oohapu dhaKalunga?
8 Sho Jesus a tidha aahalithi motempeli muJerusalem, okwa ti: “Okwa nyolwa: ‘Ongulu yandje oyi na okwiithanwa ongulu yegalikano,’ ihe ne omwe yi ninga ombogo yaayugi.” (Mateus 21:12, 13; Jesaja 56:7; Jeremia 7:11) Esiku lya tetekele okwa li a longo iikumithalonga oyindji. Aanona oya li ya kumwa e taya tameke okwiigidha. Aawiliki yelongelokalunga oya geye noonkondo e taya pula Jesus ngele oku uvite sho aanona taya ti. Okwa yamukula a ti: “Eeno. Inamu lesha nani nando lumwe, sho taku tiwa: ‘Momakana guunona noguuhanona owa longekidhile mo ehambelelo.’” (Mateus 21:16; Episalomi 8:2) Jesus okwa li a hala aawiliki mboka ya tseye kutya shoka aanona taya ningi oshi li metsokumwe nOohapu dhaKalunga.
9 Aawiliki yelongelokalunga oya li ya gongalela Jesus e taye mu pula taya ti: “Okoonkondo dhalye ho longo ngeyi?” (Mateus 21:23) Jesus okwa li a yelitha nawa kutya olye Onzo yoonkondo dhe. Ina popya oohapu dhe mwene. Okwa li a popi shoka shi li mOohapu dhaHe dha nwethwa mo. Aasaaseri naalongimpango oya li yu ulike lela kutya inaya simaneka nando Jehova nosho wo Oohapu dhe. Osha li she eleka sho Jesus e ya ambulula omolwuuwinayi wawo. — Mateus 21:23-46.
10. Ongiini tatu vulu okuholela Jesus mokulongitha Oohapu dhaKalunga, niikwa niipangitho yini tu na mbyoka kaaya li ko pethimbo lye?
10 Ngaashi Jesus, Aakriste yashili kunena ohaya longitha Oohapu dhaKalunga muukalele. Oonzapo dhaJehova muuyuni auhe odha tseyikila nawa uulaadhi wadho wokuuvithila yalwe Oohapu dhaKalunga. Iileshomwa yetu olundji ohayi kala nOmanyolo ga tothwa mo naangoka inaaga tothwa mo. Natse ohatu kambadhala okulongitha Omanyolo uuna tatu popi naantu muukalele. (2 Timoteus 3:16) Ohashi tu nyanyudha uuna gumwe a zimine tu mu leshele okuza mOmbiimbeli nokukundathana eityo lyOohapu ndhoka. Omadhiladhilo getu inaga gwanenena ngaashi gaJesus, ihe otu na iikwa niipangitho oyindji mbyoka kaaya li ko pethimbo lye. Kakele kOmbiimbeli ndjoka ya nyanyangidhwa momalaka ogendji, otu na iileshomwa oyindji mbyoka hayi tu kwathele tu mone enyolo ndyoka tu na okulongitha. Natu kale twa tokola toko tu ulukile aantu Omanyolo ethimbo kehe.
Okwa li a popile Oohapu dhaKalunga
11. Omolwashike Jesus a li a popile olundji Oohapu dhaKalunga?
11 Jesus okwa li e shi kutya aantu oyendji oye tonde Oohapu dhaKalunga, ihe shoka inashi mu kumitha. Okwa galikana kuHe a ti: “Oohapu dhoye odho oshili.” (Johannes 17:17) Jesus okwa li wo e shi kutya, Satana oye “omupangeli guuyuni mbuka,” noku li “omufundja nahe yiifundja ayihe.” (Johannes 8:44; 14:30) Jesus okwa totha lwiikando itatu mOmanyolo sho ta makelwa kuSatana. Satana okwa li a totha ovelise mEpisalomi e te yi yelitha pambambo, na Jesus okwa popile Oohapu dhaKalunga sho tadhi fatululwa papuko. — Mateus 4:6, 7.
12-14. (a) Aawiliki yelongelokalunga oyu ulike ngiini kutya inaya simaneka Ompango yaMoses? (b) Ongiini Jesus a popile Oohapu dhaKalunga?
12 Olundji Jesus okwa li ha popile Omanyolo Omayapuki opo kaaga fatululwe papuko nenge ga pengithwe. Aawiliki yelongelokalunga pethimbo lye, oya li haya yelitha Oohapu dhaKalunga papuko. Oya li haya gandja owala eitulomo kiinima mbyoka inaayi simana yomOmpango yaMoses, ihe ihaya tula miilonga omakotampango hoka kwa kankamena oompango. Okulongela Kalunga kwawo okwa li owala kokwiimonikitha, ihe kaya li ye na ko nasha niinima ya simana ngaashi, uuyuuki, olukeno nuudhiginini. (Mateus 23:23) Ongiini Jesus a popile Ompango yaKalunga?
13 MEuvitho lye lyokOndundu, Jesus okwe endulula uutumbulilo mboka tawu ti: “One omu uvu,” sho a li ta popi iinima yomOmpango yaMoses. Okwa landulitha ko uutumbulilo tawu ti: “Ihe ngame otandi mú lombwele,” opo nduno ta yelitha nawa oshitegelelwa shoka hoka kwa kankamena Ompango ndjoka. Mbela okwa li e li ompinge nOmpango? Aawe, okwa li te yi popile. Pashiholelwa, aantu oya li ya tseya nawa ompango ndjoka tayi ti: “Ino dhipaga.” Ihe Jesus okwe ya lombwele kutya ngele owu tonde gumwe nena owu li kondje yompango ndjoka. Sha faathana, ngele owu na okahalu nagumwe ngoka kee shi kuume koye kopandjokana oto yono ompango yaKalunga ndjoka ya dhilika oluhondelo. — Mateus 5:17, 18, 21, 22, 27-39.
14 Lwahugunina, Jesus okwa ti: “One omu uvu kwa tiwa: ‘Hola mukweni, tonda omutondi gwoye.’ Ihe ngame otandi mú lombwele: Holeni aatondi yeni, galikaneneni aahepeki yeni.” (Mateus 5:43, 44) Mbela oshipango “tonda omutondi gwoye” otashi adhika ngaa mOohapu dhaKalunga? Aawe, oshinima shoka aawiliki yelongelokalunga oya li owala ye shi kutha momitse dhawo yene. Oya li ya lumbakanitha Ompango yaKalunga mumwe nomithigululwakalo dhopantu. Ihe Jesus okwa li a popile Oohapu dhaKalunga nopwaahe na uumbanda opo kaadhi nyatekwe komithigululwakalo ndhoka. — Markus 7:9-13.
15. Ongiini Jesus a li a popile Ompango yaKalunga sho Aafarisayi ye yi ningi yi kale ya fa ondhigu noyi li omutenge?
15 Natango aawiliki yelongelokalunga oya ningitha Ompango yaKalunga yi kale ya fa ondhigu noyi li omutenge. Sho aalongwa yaJesus ya li taya piti pokati komapya oya polola omaha, Aafarisayi yamwe oya ti kutya oya ningi shoka shi indikwa mEsabati. Jesus okwa li a longitha oshiholelwa shopamanyolo a popile Oohapu dhaKalunga opo a yelithe etaloko lyawo ndyoka lya puka. Okwa totha mOmanyolo te ya lombwele kombinga yaDavid naalumentu mboka ya li puye, sho ya li ya sa ondjala oya yi motempeli e taya li iikwiila mbyoka yi na owala okuliwa kaayambi. Jesus okwa li u ulukile Aafarisayi kutya yo kaayu uvite ko ohenda nolukeno lwaJehova mpoka lu thike. — Markus 2:23-27.
16. Ongiini aawiliki yelongelokalunga ya lundulula oshipango shaMoses kombinga yokuhengana, na Jesus okwe ya yamukula ngiini?
16 Aawiliki yelongelokalunga oya li wo ya toto po oompango dhawo opo ya kuthe Ompango yaKalunga ongushu. Pashiholelwa, Ompango oya li ya pitika omulumentu a henge po omukadhi ngele a mono “ombedhi yasha” muye nenge epuko lya kwata miiti ndyoka tali sitha ohoni uukwanegumbo. (Deuteronomium 24:1) Ihe aawiliki mboka yopethimbo lyaJesus oya li ya pitike aasamane ya henge po aakulukadhi yawo nomiinima yaa na mutse nandungu. Pashiholelwa, omusamane okwa li ta vulu okutidha omukadhi ngele okwa lungunitha ombiga. * Jesus okwa li u ulike kutya oya pengitha nayi oohapu dhaMoses dha nwethwa mo. Okwe shi yelitha kutya Jehova okwa pitika owala ondjokana yi teke ngele gumwe gwomaaihokani a yi moluhondelo. — Mateus 19:3-12.
17. Aakriste kunena ohaya holele ngiini Jesus mokupopila Oohapu dhaKalunga?
17 Aalanduli yaKristus kunena nayo wo ohaya popile Omanyolo Omayapuki kaaga pengithwe. Ngele aawiliki yomalongelokalunga taya ti kutya omithikampango dhopamikalo dhOmbiimbeli odha kwisha, osha yela kutya otaye dhi pengitha. Ohaya longo wo aantu omalongo giifundja noku ya mbembeleka kutya oga kankamena kOmbiimbeli. Otu na uuthembahenda wokupopila oshili yOohapu dhaKalunga, pashiholelwa ohatu longo aantu kutya Kalunga ke shi omukwatatu. (Deuteronomium 4:39) Uuna tatu dhi popile ohatu shi ningi nekoto, tu na ombili nesimaneko. — 1 Petrus 3:15.
Okwe ya fatululile Oohapu dhaKalunga
18, 19. Iiholelwa yini tayi ulike kutya Jesus okwa li e na uunkulungu wa shiga ko wokuyelitha Omanyolo?
18 Jesus okwa li megulu sho Omanyolo gOshihebeli taga nyolwa. Okwa li a halelela okuya kombanda yevi opo a yelithe Oohapu dhaKalunga. Pashiholelwa, dhiladhila kesiku endhidhilikwedhi konima yeyumuko lye sho a tsakanene naalongwa ye yaali mondjila ya thinda kuEmmaus. Petameko inaye mu dhimbulula noye mu lombwele kutya oya nika oluhodhi noya lulilwa omolweso lyOmulongi gwawo ngoka ye hole. Okwe ya yamukula ngiini? Ombiimbeli otayi ti: “Opo Jesus okwe ya fatululile shoka sha tiwa kombinga ye mOmanyolo agehe okutameka momambo gaMoses sigo omambo agehe gaahunganeki.” Shika osha li she ya gumu ngiini? Konima yethimbo oya lombwelathana ya ti: “Katwa li tuu tu na ehwamo moomwenyo dhetu, sho a popi natse mondjila nokwe tu fatululile Omanyolo?” — Lukas 24:15-32.
19 Mesiku olyo tuu ndyoka, Jesus okwa tsakanene naayapostoli ye nosho wo yalwe. Okwa ningi po shike? Ombiimbeli otayi ti: “Okwa patulula omadhiladhilo gawo, yu uve ko Omanyolo.” (Lukas 24:45) Nopwaahe na omalimbililo, enyanyu ndyoka ya li ye na olye ya dhimbulukitha iikando oyindji mbyoka Jesus a li e ya fatululile Omanyolo nosho wo kehe ngoka a li a hala oku mu pulakena. Olundji okwa li ha totha Omanyolo ngoka ge shiwike nawa noku ga yelitha momukalo ngoka tagu hokitha opo aapulakeni ye ya mone ontseyo ompe yomuule yOohapu dhaKalunga.
20, 21. Jesus okwa yelitha ngiini oohapu ndhoka Jehova a li a kundathana naMoses poshihwa sha hwama?
20 Oshikando shimwe Jesus okwa li ta popi nongundu yAasadukayi. Oya li oshimpaga shelongelokalunga lyOshijuda noya li haya longele kumwe naasaaseri Aajuda, ihe Aasadukayi kaya li yi itaala meyumuko. Jesus okwa ti kuyo: “Ihe kombinga yeyumuko lyaasi inamu lesha nani ndhoka mwe dhi lombwelwa kuKalunga, sho ta ti: ‘Ongame Kalunga kaAbraham, Kalunga kaIsak naKalunga kaJakob.’ Shika tashi ti, ke shi Kalunga kaasi, aawe, okaanamwenyo.” (Mateus 22:31, 32) Aafarisayi oya li ye shi nawa Enyolo ndika lyaMoses. Mbela owu wete nkene Jesus a li e li yelitha nawa?
21 Moses naJehova oya li ya yi moonkundathana poshihwa sheno sha hwama lwomo 1514 K.E.N. (Eksodus 3:2, 6) Pethimbo mpoka Abraham okwa adhika a sa nale omimvo 329 dha pita, Isak 224 naJakob 197. Natango, Jehova okwa ti: ‘Ongame’ Kalunga kawo. Aasadukayi oya li ye shi shi kutya Jehova ina fa iikalunga yaapagani yoonakusa, mbyoka kwi itaalwa kutya ohayi pangele oonakusa yi li kohi yevi. Ihe Jesus okwa ti kutya Kalunga ‘okaanamwenyo.’ Shoka otashi ti shike? Jesus okwa hulitha nomuthindo a ti: “Ayehe otaa kala ye na omwenyo.” (Lukas 20:38) Jehova ita ka dhimbwa nando okashona aapiya ye mboka ya sa. Oshili oyo kutya elalakano lye oku ya yumudha opo ya kale ishewe nomwenyo. (Aaroma 4:16, 17) Kali shi tuu eyelitho ekumithi lyOohapu dhaKalunga! Itashi kumitha sho ‘aantu ya li ya kuminwa elongo lye.’ — Mateus 22:33.
22, 23. (a) Ongiini tatu vulu okuholela Jesus mokuyelithila aantu Oohapu dhaKalunga? (b) Otatu ki ilonga shike montopolwa tayi landula?
22 Kunena, Aakriste oye na uuthembahenda wokuholela omukalo gwaJesus gwokuyelitha Oohapu dhaKalunga. Odhoshili kutya katu na omadhiladhilo ga gwanenena. Olundji ohatu longitha Omanyolo ngoka aantu ye shi nale noku ya yelithila iinima mbyoka inaaya tseya natango. Pashiholelwa, olundji aantu ohaya endulula uutumbulilo “Edhina lyoye nali yapulwe” nosho wo “Uukwaniilwa woye nawu ye” monkalamwenyo yawo, nonando kaye shi edhina lyaKalunga nosho wo kutya Uukwaniilwa we oshike. (Mateus 6:9, 10, yelekanitha KB.) Itayi ka kala tuu ompito ombwaanawa uuna gumwe a pitike tu mu yelithile ooshili dhOmbiimbeli momukalo gwa yela nomupu okuuviwa ko!
23 Omukalo dhingi okuholela nkene Jesus a longo aantu oshili, ogwo okutotha mOohapu dhaKalunga, oku dhi popila noku dhi yelitha nawa. Natu ka tale komikalo dhimwe ndhoka a li a longitha opo a adhe omitima dhaapulakeni ye nooshili dhOmbiimbeli.
^ Omunandjokonona gwomethelemumvo lyotango Josefus ngoka a li Omufarisayi a henga omukadhi, okwa nyola konima yethimbo a ti kutya okuteya ondjokana okwa li kwa pitikwa “nomiinima yowala (naashika osha li unene hashi ningwa kaalumentu).”
