1, 2. (a) Omolwashike aalangeli mboka ya li ya tumwa ya ka kwate po Jesus inaaye shi ninga? (b) Omolwashike Jesus a li omulongi ekeka?

 AAFARISAYI oya li ya geya ya pwa po sho Jesus ta longo aantu motempeli kombinga yaHe. Aapulakeni ye oya li ya topoka moongundu mbali, oyendji oyi itaale Jesus, omanga yalwe ya li ya hala a kwatwe po. Molwaashoka aawiliki yelongelokalunga kaya li taya vulu okupangela ongeyo yawo, oya tumu aalangeli ye ke mu kwate po. Ihe aalangeli inaye mu kwata. Aayambi aakuluntu nAafarisayi oya pula ya ti: “Omolwashike inamu mu eta huka?” Aalangeli oya yamukula ya ti: “Noshitonale inaku monika omuntu ta popi ngashika omulumentu ngwiyaka.” Oya li ya kuminwa shili elongo lyaJesus shoka she ya ningitha opo kaaye mu kwate. * — Johannes 7:45, 46.

² Aalangeli hayo ayeke ya li ya kuminwa elongo lyaJesus. Aantu oya li ya gongala momwaalu ogundji ya pulakene kuye. (Markus 3:7, 9; 4:1; Lukas 5:1-3) Omolwashike Jesus a li omulongi ekeka? Ngaashi twe shi mono mOntopolwa onti-8, okwa li e hole oshili nosho wo aantu mboka a longo. Okwa li wo e na owino oundji wokulonga aantu. Natu tale omikalo ndatu tadhi pondola ndhoka a li a longitha nonkene tatu vulu oku dhi holela.

3, 4. (a) Omolwashike Jesus a li a longo aantu momukalo moka taya vulu okuuva ko nuupu? (b) Jesus oku ulike ngiini kutya okwa li ha longitha iitya iipu, mEuvitho lyokOndundu?

³ Dhiladhila owala kuuyamba wiitya mbyoka Jesus a li ta  vulu okulongitha. Ihe sho a longo aantu, okwa popi momukalo moka taya vulu oku mu uva nuupu molwaashoka oyendji yomaapulakeni oya li “inaa longwa.” (Iilonga 4:13) Okwa li e shi omangambeko gawo, onkene ka li he ya ndumbilile uuyelele oundji poshikando. (Johannes 16:12) Okwa li a popi iitya iipu mbyoka tayi longo ooshili dhomuule.

⁴ Pashiholelwa, tala kEuvitho lyokOndundu ndyoka li li muMateus 5:3–7:27, moka Jesus a gandja omayele gomuule, ngoka taga gumu omitima dhaantu. Ina popya omadhiladhilo nenge omatumbulo ga kitakana, ihe okwa li a popi iitya mbyoka tayi vulu okuuviwa ko nuupu nokaanona. Itashi kumitha sho ongundu yaantu ya li ya “kuminwa elongo lye,” sho a mana okupopya. Mongundu moka omwa li mwa kwatelwa aanamapya, aasita yiimuna naayuli yoohi. — Mateus 7:28.

5. Gandja iiholelwa yoohapu oompu ndhoka dha popiwa kuJesus, ihe otadhi ti sha lela.

⁵ Jesus okwa longitha omatumbulo omapu go omafupi nokwa popi oohapu tadhi ti sha sho a longo aantu. Muuyuni wonale sho pwa li ihaapu nyanyangidhwa omambo, Jesus okwa li a thindile etumwalaka lye lyaaluhe momitima nomomadhiladhilo gaapulakeni ye. Natu tale kiiholelwa ngaashi: “Inamu pangula yakweni, opo Kalunga kee mú pangule.” “Aandjolowele itaa pumbwa omwaaludhi, ihe aavu tuu ayeke.” “Ombepo . . . oya hala, ihe onyama onkundi.” “Ano shono shomupangeli, shi peni omupangeli naashoka shaKalunga, shi peni Kalunga.” “Okugandja oku na elago ku vule okutaamba.” * (Mateus 7:1; 9:12; 26:41; Markus 12:17; Iilonga 20:35) Oohapu ndhoka otadhi dhimbulukiwa natango, nonando odha popiwa konyala omimvo 2 000 dha pita.

6, 7. (a) Omolwashike sha simana tu popye nenge tu longe aantu momukalo omupu uuna twa hala yu uve ko nawa? (b) Ongiini tatu vulu okuyanda okundumbila omukonakonimbiimbeli uuyelele oundji?

 ⁶ Ongiini tatu vulu okulonga aantu momukalo omupu? Omukalo gumwe gwa simana ogwo okupopya iitya mbyoka aantu taya vulu okuuva ko nuupu. Oshili yOohapu dhaKalunga inayi kitakana. Jehova okwa hololela mboka ye na omitima dhu uka naaifupipiki omalalakano ge. (1 Aakorinto 1:26-28) Omukalo omwanawa okulonga aantu oshili yOohapu dhaKalunga ogo okulongitha iitya iipu noya hogololekeka.

⁷ Opo tu longe momukalo omupu, otu na okukala twa kotoka opo twaaha ndumbile omukonakonimbiimbeli gwetu uuyelele oundji. Onkee ano, ngele tatu ningi ekonakonombiimbeli, inatu pumbwa okuyelitha okanima kehe nokatu na okweendelela tu mane ko omapandja, molwaashoka shoka hasho sha simana unene. Pehala lyaashono, ompumbwe nokuvula komukonakoni oyo tayi utha kutya otu na okweenda pondapo yi thike peni. Elalakano lyetu oku mu kwathela a ninge omulanduli gwaKristus nomulongeli gwaJehova. Opo tu mu kwathele otu na oku mu pa ethimbo lya gwana opo u uve ko nawa shoka ti ilongo. Ngele tatu shi ningi, oshili  yOmbiimbeli otayi ka guma omutima gwe noku mu inyengitha a tule miilonga shoka ti ilongo. — Aaroma 12:2.

8, 9. (a) Omolwashike Jesus a li a pula omapulo? (b) Ongiini Jesus a longitha omapulo a kwathele Petrus a thike pehulithodhiladhilo li li mondjila kombinga yokufuta iifendela?

⁸ Jesus okwa li ha longitha omapulo momukalo gwa dhenga mbanda, nonando okwa li owala e na okathimbo okafupi okulombwela aapulakeni ye oshitsa shontumba. Omolwashike a li ha pula omapulo? Omathimbo gamwe okwa li e ga longitha opo a mweneke aapataneki ye nokwaaneka pomutenya iihelele yawo. (Mateus 21:23-27; 22:41-46) Iikando oyindji, okwa li a pula aalongwa ye omapulo opo ya popye shoka ya li ye na momadhiladhilo gawo noku ya dheula ya kale haya dhiladhila muule. Okwa li ha pula omapulo ngaashi: “Otamu ti ngiini?” nosho wo “Owe shi itaala?” (Mateus 18:12; Johannes 11:26) Mokulongitha omapulo, Jesus okwa adha omitima dhaalongwa ye. Natu tale koshiholelwa.

⁹ Oshikando shimwe, aafendelithi oya li ya pula Petrus ngele Jesus oha futu iimaliwa yotempeli. * Petrus okwa yamukula neendelelo a ti: “Oha futu.” Konima, Jesus okwe mu pula a ti: “Oto ti ngiini, Simon? Aakwaniilwa yokombanda yevi ohaa pula kulye oompale nomafendelo, okoyana nenge okaathigona?” Petrus okwa yamukula a ti: “Okaathigona.” Jesus okwa ti kuye: “Ano oyana oya manguluka.” (Mateus 17:24-27) Omapulo ngoka oga li ga yelela Petrus, molwaashoka omaukwanegumbo gaakwaniilwa kaga li haga futu iifendela. Onkee ano, Jesus ka li e na okufuta iifendela molwaashoka ye epona lyaKalunga, Omukwaniilwa gwomegulu ngoka ha longelwa motempeli. Ndhindhilika kutya Jesus ina lombwela  Petrus eyamukulo lyu ukilila, ihe okwe mu pula opo Petrus a thike pehulithodhiladhilo li li mondjila noku kale ha dhiladhila muule omanga inaa yamukula.

10. Ongiini tatu vulu okupula omapulo taga pondola uuna tatu uvitha egumbo negumbo?

¹⁰ Ongiini tatu vulu okulongitha omapulo ngoka taga pondola muukalele wetu? Uuna tatu uvitha egumbo negumbo otatu vulu okupula omapulo ngoka taga pendutha ohokwe opo omuntu a kale a hala okupulakena ketumwalaka lyetu. Pashiholelwa, ngele megumbo otwa adha mo omunamimvo, otatu vulu oku mu pula nesimaneko tatu ti: “Mbela sho to tala konkalo ndjika tu li muyo kunena, oya faathana ngaa naandjoka yopethimbo sho mwa li aagundjuka?” Ngele a yamukula otatu vulu oku mu pula tatu ti: “Mbela oshike shi na okuningwa po opo uuyuni wu ye kondjila?” (Mateus 6:9, 10) Ngele megumbo otwa adha mo omuvalakadhi e na aanona aashona, otatu vulu oku mu pula tatu ti: “Mbela owi ipula ngaa nale kutya uuyuni otawu ka kala wa tya ngiini sho aanona yoye taya ka koka?” (Episalomi 37:10, 11) Otatu vulu okupula omapulo ngoka taga hokitha omunegumbo mokutala kwaashoka shi li momudhingoloko gwegumbo lye.

11. Ongiini tatu vulu okulongitha omapulo nawa uuna tatu konakona Ombiimbeli nagumwe?

¹¹ Ongiini tatu vulu okupula omapulo taga pondola uuna tatu konakona Ombiimbeli nagumwe? Omapulo ngoka ga dhiladhilwa nawa otage ke tu kwathela tu teke mo shoka shi li momutima gwomukonakoni. (Omayeletumbulo 20:5) Natu tye nduno otamu konakona ontopolwa “Kala nonkalamwenyo  ndjoka tayi nyanyudha Kalunga” membo Omalongo gashili gOmbiimbeli ogeni naanaa? * Ontopolwa ndjoka otayi popi nkene Jehova ha tala ko onyata yiipala, uunkolwi niifundja. Omayamukulo gomukonakoni otashi vulika gu ulike kutya oku uvite ko shoka Ombiimbeli tayi ti, ihe mbela oku li ngaa metsokumwe naashoka ti ilongo? Otatu vulu oku mu pula tatu ti: “Mbela sho to tala etaloko lyaKalunga miinima mbyoka oli li ngaa pandjele kungoye?” Nenge tu tye: “Ongiini to vulu okutula miilonga omayele ngoka monkalamwenyo yoye?” Sho tatu pula omukonakoni, otu na okukala twa kotoka notu na oku shi ninga nesimaneko. Katu na nando oku mu pula omapulo ngoka tage mu sitha ohoni. — Omayeletumbulo 12:18.

12-14. (a) Ongiini Jesus a li a longitha uunongo we a tompathane pandunge? (b) Jesus okwa li a tompathana ngiini nAafarisayi mboka ye mu ula kutya ota tidha mo oompwiidhuli koonkondo dhaSatana?

¹² Jesus oku na omadhiladhilo ga gwanenena nokwa li ha tompathana naantu pandunge. Iikando oyindji okwa li a longitha omayele gopandunge opo a tompe aalundili ye. Okwa li a longitha oohapu dhuunongo iikando oyindji opo a longe aalongwa ye iiyilongomwa ya simana. Natu tale kiiholelwa yimwe po.

¹³ Sho Jesus a li a aludha omulumentu e niwe koompwidhuli ye omuposi nombolo, Aafarisayi oya ti: “Hakusha shilwe ta tidha mo oompwidhuli ihe oonkondo dhaBelsebul [Satana], omukuluntu gwoompwidhuli.” Oya li ye shi zimine kutya omuntu okwa pumbwa oonkondo dhi ikalekelwa opo a tidhe mo oompwidhuli. Ihe oya li ya ti kutya Jesus oonkondo dhe ohadhi zi kuSatana. Shoka ya popi osha li iifundja nokashi li pandunge. Opo Jesus e yu ulukile kutya otaya tompakanitha iinima okwe ya lombwele a ti: “Okehe tuu oshilongo tashi itsile ondumbo, otashi yonuka po. Nakehe  oshilando nenge egumbo tali itsile ondumbo, itali kala po. Ano Satana ngele ta tidha mo Satana omukwawo, ini itsila tuu ondumbo muye mwene, noshilongo she otashi vulu tuu okukala po?” (Mateus 12:22-26) Paulelalela Jesus okwa li ta ti: “Ngele ngame omukalelipo gwaSatana, nena otandi tsu ondumbo niilonga ye, ngele osho Satana okwiipilukila po ye mwene nota ka hula po nziya.” Mbela Aafarisayi oya li ngaa taya vulu okupataneka uushili mboka?

¹⁴ Jesus okwa tsikile okutompathana nayo kombinga yoshinima shoka. Okwa li e shi kutya aalongwa yamwe yAafarisayi oya li haya tidha mo oompwidhuli. Okwe ya pula epulo epu opo ya dhiladhile muule a ti: “Ngele ngame otandi tidha mo oompwidhuli koonkondo dhaBelsebul, aana yeni otaye dhi tidha mo noonkondo dhalye?” (Mateus 12:27) Shoka Jesus a li a hala oku ya lombwela osho kutya: “Ngele ohandi tidha mo oompwidhuli koonkondo dhaSatana, nena naalongwa yeni odho haya longitha oku dhi tidha mo.” Oya li taya vulu we okutya shike? Kaye na siku ya ka zimine kutya aalongwa yawo ohaya longithwa kuSatana. Kungeyi, Jesus okwe ya thiminike ya mone kuyo yene kutya shono taya popi kashi na ndunge yasha. Omukalo gwaJesus gwokutompathana naantu itagu kumitha tuu! Oohapu dhe odha li tadhi ti sha noonkondo kaantu mboka yu uvu kokana ke mwene noku mu mona koshipa naamboka yu uvu omutono gwewi lye.

15-17. Gandja oshiholelwa nkene Jesus a tompathana naantu ta longitha uutumbulilo “unene tuu” opo e ya longe ooshili tadhi nyanyudha kombinga yaHe.

¹⁵ Jesus okwa longitha wo oondunge dhe dhokutompathana a longe aantu ooshili kombinga yaHe ndhoka tadhi nyanyudha notadhi talaleke omutima. Okwe shi ningi olundji ta longitha uutumbulilo “unene tuu,” opo a kwathele aapulakeni ye ya hume komeho meuvoko lyoshili ndyoka ye na nale nokukala ye na einekelo lya kola. Okutompathana kwa tya ngaaka ohaku thindile momitima dhaapulakeni shoka taya longwa. Natu tale kiiholelwa iyali.

 ¹⁶ Sho Jesus a yamukula aalongwa mboka ye mu pula e ya longe okugalikana, okwa popi kutya aavali inaaya gwanenena ohaya pe oyana “omagano omawanawa.” Okwa hulitha a ti: ‘Ano ne mboka aawinayi ngele omu shi okupa aana yeni omagano omawanawa, unene tuu Ho yeni yomegulu ota gandja ombepo ondjapuki kumboka taye mu indile.’ (Lukas 11:1-13) Jesus okwa longitha ekondjithathano opo a yelithe oshitsa shoka nawa. Ngele aavali mboka inaaya gwanenena ohaya sile oshimpwiyu oyana, mbela Tate yetu gwomegulu ngoka a gwanenena ye omuyuuki ota ka nyengwa ngaa okupa mboka haye mu longele nuudhiginini ombepo ondjapuki ngele taye yi mu pula neifupipiko megalikano?

¹⁷ Jesus okwa li wo a longitha ekondjithathano a kwathele aantu yaaha kale tayi ipula unene niimpwiyu yawo. Okwa ti: ‘Taleni komakola. Ihaga kunu noihaga teya; osho wo kage na oondunda dhokupungula nenge iigandhi, ihe Kalunga ohe ga palutha. Ihe ne omu vule oondhila. Taleni nokundhindhilika oongala dhokelundu, nkene hadhi koko. Odho ihadhi longo, dho ihadhi iningile oonguwo. Ano Kalunga ngele ta zaleke omwiidhi gwokelundu ngoka gwa thikama owala nena, ihe ngula otagu umbilwa meziko, ano ne mboka yeitaalo enkundi ite shi mú ningile ando?’ (Lukas 12:24, 27, 28) Ngele Jehova oha sile oshimpwiyu uudhila noongala, ota ka nyengwa ngaa okusila oshimpwiyu aantu mboka ye mu hole nohaye mu longele? Omukalo moka Jesus a li a tompathana ogwa li gwa gumu omitima dhaapulakeni ye.

18, 19. Ongiini tatu ka tompathana nomuntu ngoka ta ti kutya ini itaala muKalunga molwaashoka ihe mu mono?

¹⁸ Otu na okukala hatu tompathana pandunge muukalele opo tu aneke pomutenya omalongo giifundja. Opo tu longe ooshili dha yela kombinga yaJehova, otu na wo okutompa aantu. (Iilonga 19:8; 28:23, 24) Mbela shika osha hala okutya otu na okukala hatu popi iitya yomuule? Hasho nando. Jesus okwe tu tulila po oshiholelwa oshiwanawa sho a li a tompathana naantu ta longitha iitya iipu.

 ¹⁹ Pashiholelwa, ongiini tatu vulu okukwathela omuntu ngoka ta ti kutya ini itaala muKalunga molwaashoka ihe mu mono? Otatu vulu okutompathana naye nkene iinima hayi holoka po. Ngele otu wete oshinima shontumba shi li pokuma, katu na siku twi ipule kutya oshi iyeta po sho shene. Otatu vulu tu tye: Ngele owi itsu egumbo lya tungikikika lyi ilile olyo alike, ihe omu na iikulya ya longelwa nawa, mbela ito ka zimina kutya opu na gumwe ngoka e li tunga po nokutula mo iikulya mbyoka? Shika osha faathana neshito niinima oyindjiyindji mbyoka yi li mo. Mbela itatu ka zimina kutya opu na gumwe ngoka e yi shita? Ombiimbeli otayi shi popi shu ukilila tayi ti: “Egumbo kehe oli na omutungi gwalyo, ihe ngoka a tungu ayihe, oKalunga.” (Aahebeli 3:4) Ihe mboka ihaaya pitwa momitse itaye ki itaala nando otu tompathane nayo pandunge. — 2 Aatessalonika 3:2.

20, 21. (a) Ongiini natse tatu vulu okulongitha uutumbulilo “unene tuu” tu yelithile aantu omaukwatya gaJehova noondjila dhe? (b) Oshike tatu ka kundathana montopolwa tayi landula?

²⁰ Uuna tatu longo yamwe kutya nduno omuukalele nenge  opokugongala, otatu vulu wo okulongitha uutumbulilo “unene tuu” opo tu yelithe nawa omaukwatya gaJehova noondjila dhe. Pashiholelwa, opo tu ulike kutya elongo lyomulilo gwoheli itali simanekitha Jehova, otatu vulu tu tye: “Mbela opu na ngaa tate omunahole ta ka geela omwana mokutula oshikaha she momulilo? Edhiladhilo lyokufika aantu momulilo gwoheli sigo aluhe kali nyanyalitha tuu kuTate yetu yomegulu omunahole!” (Jeremia 7:31) Opo tu hekeleke Omukriste omukwetu ngoka a polimana kutya Jehova oku mu hole otatu vulu tu tye: “Ngele Jehova oku na ko nasha nenza limwe, mbela ita ka sila oshimpwiyu aapiya ye yokombanda yevi mboka taye mu longele nokukala e ya hole, nangoye wa kwatelwa mo?” (Mateus 10:29-31) Ngele otatu tompathana momukalo ngoka otatu ka adha omitima dhaapulakeni yetu.

²¹ Konima owala sho twa tala omikalo ndatu nkene Jesus a longo aantu, otu shi wete kutya aalangeli mboka ya li ya tumwa ye ke mu kwate, ihe inaye shi ninga kaya li taya dhenge omutoto sho ya ti: “Noshito nale inaku monika omuntu ta popi ngashika omulumentu ngwiyaka.” Montopolwa tayi landula otatu ka kundathana nkene Jesus a longitha nawa omathaneko sho a li ta longo aantu.