1-4. (a) Uunkulungu waJesus wokulonga aantu owa li wi iwetikile ngiini sho a popi nomukiintu Omusamaria, noshizemo osha li shike? (b) Aayapostoli ye oya li yi inyenge ngiini?

 JESUS naalongwa ye oya li mela lyondjila yu uka kuumbangalantu waGalilea taya zi kuJudea. Oya yi nondjila ndjoka ofupi ya pita muSamaria, hayi endwa omasiku gatatu lwaampo. Lwomoshanga shomutenya oya thiki pokalando Sikar, opo ya vululukwe po nokulanda iikulya.

² Sho aayapostoli ye ya ka landa iikulya, Jesus okwa li ta vululukwa pomuthima gu li kondje yokalando hoka. Omukiintu gumwe okwe ya okuteka. Jesus okwa li ta vulu oku mu ipwililikila, molwaashoka okwa li “a vulithwa kondjila.” (Johannes 4:6) Okwa li ta vulu oku mu etha a teke omeya ge e ta yi inaa popya naye. Ngaashi twa mona mOntopolwa onti-4 yembo ndika, omukiintu ngoka otashi vulika a li a tegelela Omujuda kehe a kale e mu dhina. Ihe Jesus okwa tameke oonkundathana naye.

³ Jesus okwa tameke okupopya kombinga yaashoka omukiintu a li ta ningi pethimbo mpoka. Okwa li e ya okuteka, na Jesus okwe mu lombwele omeya ngoka tage mu kutha enota lyopambepo. Mokupopya kwawo omukiintu okwa li ta popi iinima mbyoka tayi vulu okweeta oontamanana pokati kawo. * Jesus okwa li i ipwililikile oohapu ndhoka e ta tsikile nokupopya shoka a li a hala okutya. Okwa li  a gandja eitulomo unene kiinima yopambepo, ngaashi elongelokalunga lya yogoka nosho wo kombinga yaJehova Kalunga. Oohapu dhe odha li dha gumu omutima gomukiintu ngoka nokwa yi koshilando a ka lombwele aantu, naasho ye shi kundana oya li ya hala ya pulakene kuJesus mwene. — Johannes 4:3-42.

⁴ Sho aayapostoli ya galuka, oya li yu uvitile ngiini Jesus sho ta gandja uunzapo komukiintu ngoka? Kaya li ye shi nyanyukilwa. Oya li ya kumwa sho Jesus ta popi nomukiintu nosha yela kutya kaya li ye na onkwa nomukiintu ngoka. Sho omukiintu a yi, oya ladhipike Jesus a lye iikulya mbyoka ye mu etele. Ihe okwa ti kuyo: “Ondi na iikulya mbyoka kaamu yi shi.” Tango, oya li ye shi Jesus ota popi iikulya yo yeneyene. Okwe ya yelithile a ti: “Iikulya yandje oyo okulonga ehalo lyaanguka a tumu ndje nokutsakanitha oshilonga shoka e shi pe ndje.” (Johannes 4:32, 34) Kungeyi, Jesus okwe ya longo kutya shoka ta longo osha simanenena monkalamwenyo ye shi vulithe iikulya. Okwa li a hala nayo ya kale ye na etaloko lya fa lye. Oshilonga shoka osha li shike?

5. Iilonga yaJesus oya li yashike, notatu ki ilonga shike montopolwa ndjika?

⁵ Oshikando shimwe Jesus okwa ti: “Ondi na okuuvithila iilando yimwe wo evaangeli lyuukwaniilwa waKalunga, oshoka olyo tuu ndyoka nde li tuminwa.” (Lukas 4:43, KB) Eeno, Jesus okwa li a tumwa e ye u uvithe noku longe aantu onkundana ombwaanawa yUukwaniilwa waKalunga. * Aalanduli yaJesus kunena nayo ohaya ningi sha faathana. Onkee ano, osha simanenena okutala kutya omolwashike Jesus a li u uvitha, okwa li u uvitha kombinga yashike nokwa li a tala ko ngiini oshilonga she.

6, 7. Jesus okwa hala ‘omulongimpango kehe’ a kale u uvite ngiini kombinga yokuuvitha onkundana ombwaanawa? Gandja ethaneko.

⁶ Natu tale nkene Jesus a li u uvitile ooshili ndhoka a longo aantu, opo ihe tatu ka kundathana iikala mbyoka a li e ya nine. Okwa longitha ethaneko lya tsa u ulike nkene a li u uvitile okulonga yalwe ooshili ndhoka a longwa kuJehova. Okwa ti kuyo: “Okehe tuu omulongimpango ta ningi omulongwa [gwUukwaniilwa wegulu, KB], okwa fa mwene gwegumbo ta holola mompungulo ye iinima iipe niikulu.” (Mateus 13:52) Omolwashike mwene gwegumbo gwomethaneko a li a holola iinima mompungulo ye?

⁷ Mwene gwegumbo okwa li u uvite uuntsa okuulika iiniwe ye, ihe ine yi ulika momukalo moka Omukwaniilwa Hesekiel a li e shi ningi e tashi mu etele. (2 Aakwaniilwa 20:13-20) Oshike shi inyengitha omunegumbo e shi ninge? Natu tale kethaneko ndika: Natu tye nduno oto talele po omulongi ngoka wu hole megumbo lye. Okwa patulula okasikopa ke e ta kutha mo oontumwafo mbali, yimwe oya kulupa omanga onkwawo ompe. Adhihe odha za kuhe, yimwe okwe yi nyolelwa omimvo dha pita omanga a li okamatyona, ihe onkwawo opo owala e yi nyolelwa. Omeho ge otagu ulike enyanyu sho te ku lombwele nkene a lenga oontumwafo ndhoka nonkene omayele ngoka ge li mo ga lundulula onkalamwenyo ye nonkene taga vulu oku ku kwathela. Oontumwafo ndhoka odhi li shili eliko komulongi ngoka noku dhi hole nomutima aguhe. (Lukas 6:45) Ite dhi ku ulukile nelalakano lyokwiinoma nenge a likole sha mungoye, ihe oku ku pukulula noku ku ulukila ongushu yadho.

8. Omolwashike tu na etompelo lya kola okukala tu uvite kutya ooshili ndhoka twi ilonga mOohapu dhaKalunga odhi li eliko?

⁸ Omulongi Omunene, Jesus okwa li e na iikala ya fa mbyoka sho ta longo aantu ooshili dha za kuKalunga. Jesus okwa li a lenga ooshili ndhoka. Okwa li e dhi hole nokwa li a halelela oku dhi longa aantu. Okwa hala wo aalanduli ye ayehe,  ‘aalongimpango’ ya kale yu uvite ngaaka. Mbela natse osho tu uvite ngawo? Otu na etompelo lya kola okukala tu hole oshili ndjoka tatu ilongo okuza mOohapu dhaKalunga. Otu hole uuyelele wOohapu dhaKalunga mboka twa kala tu shi nale naamboka uupe. Ngele otu hole shoka Jehova e tu longa noku shi lombwela yamwe nomutima aguhe, otatu ka longa aantu ya kale ye hole ooshili ndhoka, ngaashi Jesus.

9. (a) Jesus okwa li u uvitile ngiini aantu mboka a longo? (b) Ongiini tatu vulu okuholela Jesus mokuungaunga naantu?

⁹ Moshitopolwa oshi-3 otatu ki ilonga kutya Jesus okwa li e hole aantu mboka ha longo. Omahunganeko oga popya kutya Mesiasa “ota sile oshimbembe nohepele olukeno.” (Episalomi 72:13) Okwa li e na ko nasha shili naantu. Okwa li hi ipula nomitenge ndhoka dhe ya gwilila po notadhi ya thiminike nosho wo omandangalati ngoka tage ya imbi ya mone oshili. Okwa li e na ko nasha nomadhiladhilo gawo niikala yawo mbyoka hayi ya inyengitha ya ninge iinima yontumba. (Mateus 11:28; 16:13; 23:13, 15) Pashiholelwa, dhimbulukwa omukiintu Omusamaria. Omukiintu okwa li a kuminwa shili omukalo ngoka Jesus u ungaunga naye. Shoka oshi inyengitha omukiintu ngoka i itaale kutya Jesus omupolofeti nokulombwela yalwe kombinga ye. (Johannes 4:16-19, 39) Tu li aalanduli yaJesus kunena ihatu vulu okumona shoka shi li momitima dhaamboka tatu uvithile. Ihe otatu vulu okukala tu ya hole, ngaashi Jesus, mokukala tu na ko nasha nayo, mokupopya nayo iinima mbyoka ye hole, omaudhigu gawo noompumbwe dhawo.

10, 11. (a) Jesus oku uvitha kombinga yashike? (b) Oshe ende ngiini opo pu kale ompumbwe yUukwaniilwa waKalunga?

¹⁰ Jesus okwa li u uvitha kombinga yashike? Ngele owa kala nokukonga omayamukulo mokukonakona shoka oongeleka odhindji ndhoka hadhi iti odhopaKriste tadhi longo aantu, otashi vulika wu dhiladhile kutya okwa li u uvitha kombinga yokweeta omalunduluko gopankalathano muuyuni. Nenge  wu dhiladhile kutya okwa li u uvitha nkene aantu taya vulu okweeta po omalunduluko miinima yopapolotika. Oongeleka dhimwe ohadhi longo aantu kutya Jesus okwa li a tsu omuthindo kutya ehupitho lyomuntu pauhandimwe olya simanenena li vulithe iinima ayihe. Ngaashi twe shi mono metetekelo, Jesus okwa popi sha yela a ti: “Ondi na okuuvithila iilando yimwe wo evaangeli lyuukwaniilwa waKalunga.” Shoka osha kwatela mo shike?

¹¹ Dhimbulukwa kutya Jesus opo a li sho Satana ta lundile Kalunga oshikando shotango kutya ye omupangeli omukwanyanya. Osha li she ehameke Jesus okumona He omuyuuki ta lundilwa nokuulwa kutya ye Omupangeli ngoka kee na ko nasha niishitwa Ye. Osha li she ehameke Jesus sho Adam naEva, aavali yaantu ayehe kombanda yevi yi itaale iifundja yaSatana. Omwana okwa li a mono nkene aantu ya gwile muulunde nomeso omolwuunashipotha wawo. (Aaroma 5:12) Jesus ka li tuu a tuntukwa unene okuuva kutya He ota ka yukipalitha iinima siku limwe!

12, 13. Uukwaniilwa waKalunga otawu ka hulitha po okwaahenuuyuuki kuni, na Jesus oku ulike ngiini kutya owo wa li enenedhiladhilo lyuukalele we?

¹² Iinima yini ya pumbwa okuyapulwa komeho gaayihe? Edhina lyaJehova ndyoka lya nyatekwa nondhino kuSatana naalanduli ye olya pumbwa okuyapulwa nokuyelithwa. Uuthemba waJehova wokupangela owa li wu na okuyukipalithwa. Jesus okwa li u uvite ko iinima mbika ya simanenena e vule aantu ayehe. Moshiholelwa shegalikano shoka a longo aalanduli ye okwe ya lombwele ya yapule tango edhina lyaHe, nopo nduno Uukwaniilwa waHe wu ye nehalo lyaKalunga li gwanithwe kombanda yevi. (Mateus 6:9, 10) Masiku Uukwaniilwa waKalunga, mboka Jesus oye Omukwaniilwa gwawo, otawu ka hulitha po uuyuni mbuka wa yonana wu li mewiliko lyaSatana nokuyukipalitha uuthemba waJehova wokupangela sigo aluhe. — Daniel 2:44.

¹³ Uukwaniilwa mboka owo wa li enenedhiladhilo lyuukalele  waJesus. Oohapu dhe niilonga ye oya li ya kwathele aantu ya mone kutya Uukwaniilwa mboka oshike nonkene tawu ka gwanitha po elalakano lyaKalunga. Jesus ina pitika nando osha shi ye moshipala elalakano lye okuuvitha onkundana ombwaanawa yUukwaniilwa waKalunga. Nonando pethimbo lye opwa li pu na okwaahenuuyuuki nomathiminiko miinima yontumba noyongandi, ye okwa li u ukitha eitulomo ketumwalaka lye nokiilonga ye. Mbela shoka osha hala okutya Jesus okwa li e na omadhiladhilo omafupi noke na ko nasha nayalwe? Hasho nando.

14, 15. (a) Jesus oku ulike ngiini kutya “oku vule Salomo”? (b) Ongiini tatu vulu okuholela Jesus mokuuvitha kwetu?

¹⁴ Oshitopolwa ashihe shika otashi ke tu kwathela tu mone kutya Jesus okwa li a longo aantu iinima yi ili noyi ili notayi hokitha. Omitima dhaantu odha li dha tuntukwa. Shika otashi tu dhimbulukitha Omukwaniilwa omunandunge, Salomo ngoka a kongo oohapu dho opala, dhu uka nodhoshili opo a popye nawa omadhiladhilo ngoka Jehova e mu nwetha mo a nyole. (Omuuvithi 12:10) Jehova okwa pe Salomo ngoka inaa gwanenena ‘omayele kaage shi okuyelekwa’ a tange oondhila, oohi, omiti, iinamwenyo niinima iikwawo oyindji. Aantu oya li haya zi kooha nooha ye ye okupulakena kuunongo we. (1 Aakwaniilwa 4:29-34) Ihe Jesus “oku vule Salomo” kokulekule. (Mateus 12:42) ‘Omayele ge itaga yelekwa’ nogaSalomo nando okashona. Jesus mokulonga aantu okwa longitha ontseyo ya shiga ko yOohapu dhaKalunga, yuudhila, yiinamwenyo, yoohi, yuunamapya, yonkalo yombepo, yiiningwanima yopethimbo ndyoka, yondjokonona nosho wo yiinima yopankalathano. Ihe Jesus ka li hi itadhele ontseyo ye nelalakano a kumithe aantu. Okwa li a popi iinima ya yela noyu uvitike. Itashi kumitha sho aantu ya li haya kala ya nyanyukwa okupulakena kuye. — Markus 12:37; Lukas 19:48.

¹⁵ Tu li Aakriste kunena ohatu kambadhala tu landule oshiholelwa she. Katu na uunongo nontseyo oyindji ya fa ye, ihe  otatu vulu okulongitha ontseyo nuunongo mboka tu na tu kwathele aantu yi ilonge ooshili ndhoka dhi li mOmbiimbeli. Aavali otaya vulu okulongitha iimoniwa yawo yokuputudha oyana yu ulike nkene Jehova e hole oyana yokombanda yevi. Yalwe otashi vulika ya longithe iiholelwa nenge iimoniwa yaampoka haya longo, yokosikola noyontseyo yawo yokuungaunga nayalwe noyiiningwanima yopethimbo ndyoka. Ihe otu na wo okukala twa kotoka opo kaatu pitike nando osha shi ye moshipala iilonga yetu yokuuvitha onkundana ombwaanawa yUukwaniilwa waKalunga. — 1 Timoteus 4:16.

16, 17. (a) Jesus okwa li e na iikala ya tya ngiini ngele tashi ya puukalele? (b) Jesus oku ulike ngiini kutya okwa li a lenga uukalele?

¹⁶ Jesus okwa li a lenga uukalele noonkondo. Okwa li a nyanyukwa okukwathela aantu ya tseye He gwomegulu nawa nelongo lye kalya li lya nwethwa mo komalongo gaantu nokomithigululwakalo dhawo. Jesus okwa li e hole okukwathela aantu ya kale ye na ekwatathano ewanawa naHe opo ya ka mone omwenyo gwaaluhe. Okwa li e na ohokwe okuuvithila aantu onkundana ombwaanawa ndjoka tayi nyanyudha notayi talaleke. Ongiini u ulike kutya oku na ohokwe ndjoka? Okwe shi ulike momikalo ndatu.

¹⁷ Omukalo gwotango, Jesus okwa li a lenga uukalele. Okwa li ha popi unene kombinga yUukwaniilwa monkalamwenyo ye, shoka sha li eithano lye. Shoka osha li sha ningitha a kaleke onkalamwenyo ye ya nathangwa, ngaashi twi ilongo montopolwa onti-5. Uuna ta pe yamwe omayele, okwa li ha tala kiinima mbyoka yi na oshilonga. Ka li i indumbile iinima mbyoka e na okukala ta futu, ta sile oshimpwiyu nokuyipangela nenge e yi pingene po mokweendela ko kwethimbo. Onkalamwenyo ye oya li paunathangwa opo a vule okutsikila niilonga ye yuukalele. — Mateus 6:22; 8:20.

18. Jesus okwa li a longitha ngiini ethimbo lye muukalele?

¹⁸ Omukalo omutiyali, Jesus okwa li a longitha ethimbo lye  olindji noonkondo dhe muukalele. Okwe ende iinano iile muPalestina tu uvithile aantu onkundana ombwaanawa. Okwa li e ya longo momagumbo gawo, momahala gaayehe nogomalandithilo nosho wo pomahala ga andjuka. Oku uvithile aantu nopethimbo mpoka a vulwa, a sa ondjala nenota nosho wo pethimbo mpoka a li ta thuwa po naalongwa ye. Okwa tsikile okuuvithila yalwe onkundana ombwaanawa yUukwaniilwa waKalunga, nokuli naasho e li pokusa. — Lukas 23:39-43.

19, 20. Ethaneko lini Jesus a gandja opo u ulike kutya iilonga yokuuvitha oye endelela?

¹⁹ Omukalo omutitatu, Jesus okwa li a tala ko uukalele wu li oshinima she endelela. Shino okwa li e shi ulike sho a popi nomukiintu Omusamaria pomuthima puSikar. Aalongwa yaJesus kaya li ye wete she endelela okuuvithila yalwe onkundana ombwaanawa. Okwa ti kuyo: “One ohamu ti: ‘oku na natango oomwedhi ne, eteyo li thike.’ Ongame otandi mú lombwele: Yelutheni omeho geni, mu tale kutya omapya oga thika okuteywa.” — Johannes 4:35.

²⁰ Jesus okwa li a longitha ethaneko li ikolelela kethimbo lyomumvo moka ye li opo e ya kwathele. Ethimbo ndyoka olya li omwedhi gwOshijuda Chislev (Novomba/Desemba). Eteyo ndyoka hali tameke lwopethimbo lyOpaasa ndjoka hayi dhanwa mo 14 Nisan, olya li owala li na ko oomwedhi ne. Aanamapya kaya li ye wete eteyo lya thika pethimbo mpoka, molwaashoka okwa li ku na ethimbo olindji natango. Ihe ongiini kombinga yeteyo lyopambepo? Aantu oyendji oya li ya hala okuuva, okwiilonga, okuninga aalongwa yaKristus noku ka mona etegameno ekumithi ndyoka Jehova e ya pungulila. Jesus okwa li e wete kutya epya lyopathaneko oli na okuteywa molwaashoka ethimbo olya thika. * Olya li ethimbo lyiilonga mbyoka ye endelela. Sho  aantu yomoshilando shimwe ya li ya hala Jesus a kale puyo, okwe ya lombwele a ti: “Ondi na okuuvithila wo iilando yimwe evaangeli lyuukwaniilwa waKalunga, oshoka olyo tuu ndyoka nde li tuminwa.” — Lukas 4:43, KB.

21. Ongiini tatu vulu okuholela Jesus?

²¹ Otatu vulu okuholela Jesus momikalo adhihe ndatu ndhoka twa zi nokukundathana. Uukalele wetu wopaKriste owo nawu kale pondondo yotango monkalamwenyo yetu. Nonando otu na omaukwanegumbo niilonga yokwiikongela omboloto, otatu vulu oku shi ulika mokukutha aluhe ombinga muukalele nuulaadhi, ngaashi Jesus. (Mateus 6:33; 1 Timoteus 5:8) Otatu vulu okulonga nuudhiginini muukalele, mokulongitha ethimbo lyetu, oonkondo dhetu niiniwe yetu mokwaambidhidha uukalele. (Lukas 13:24) Natu kale tu shi kutya iilonga yetu oye endelela. (2 Timoteus 4:2, NW) Okathimbo kehe tatu mono natu ka longithe okuuvithila yalwe.

22. Oshike tashi ka kundathanwa montopolwa tayi landula?

²² Jesus oku ulike wo esimano lyiilonga yokuuvitha sho a gandja eshilipaleko kutya otayi ka tsikila konima yeso lye. Okwa lombwele aalanduli ye ya tsikile nokuuvitha nokulonga aantu. Ontopolwa tayi landula otayi kundathana kombinga yiilonga mbyoka.