1, 2. Omolwashike itatu vulu okuya kuJehova kutse yene, nongiini Jesus Kristus e tu kwathele moshinima shika?

 MBELA owa kanene nale? Otashi vulika to dhimbulukwa oshikando shontumba sho wa li molweendo oku ka talela po kuume koye nenge aapambele yoye e to kana. Mbela owa li wa thikama e to pula gumwe e ku pukulule? Dhiladhila owala nkene to ka kala wu uvite ngele omuntu omunambili te ku lombwele ta ti: “Landula ndje owala, otandi ku fala,” pehala lyoku ku ulukila ondjila. Mbela ito ka kala wu uvite wa pepelelwa?

² Otatu vulu okutya Jesus Kristus okwe tu ningila oshinima sha faathana. Itatu vulu okukala nekwatathano ewanawa naKalunga kutse yene. Molwaashoka otwa thigulula uulunde nokwaahagwanenena, otu li “kokule nomwenyo gwomuKalunga.” (Aaefeso 4:17, 18, KB) Otwa pumbwa ekwatho opo tu mone ondjila. Jesus Omuholelwa gwetu omunambili, ine tu pa owala omayele noku tu ulukila ondjila ndjoka yu uka, ihe okwe tu ningila oshindji. Ngaashi twe shi mona mOntopolwa yo-1, ote tu hiya ta ti: ‘Ila u landule ndje.’ (Markus 10:21) Onkee ano, okwe tu pa wo omatompelo ga simana okutaamba ko ehiyo ndyoka. Oshikando shimwe okwa tile: “Ongame ondjila noshili nomwenyo. Kape na ngoka ta vulu okuya kuTate, okuninga ta pitile mungame.” (Johannes 14:6) Natu kundathaneni omatompelo gamwe kutya omolwashike tatu vulu owala okuhedha kuKalunga okupitila mOmwana. Ngele tatu kaleke omatompelo ngoka momadhiladhilo, otatu vulu okumona shili kutya Jesus oye “ondjila noshili nomwenyo.”

3. Omolwashike tu na okuhedha popepi naKalunga okupitila muJesus?

³ Etompelo limwe lya simanenena kutya omolwashike tatu vulu owala okuhedha kuJehova Kalunga okupitila muJesus, omolwaashoka ota dhana onkandangala ya simana noonkondo mokugwanitha po omalalakano gaHe. * (2 Aakorinto 1:20; Aakolossa 1:18-20) Opo tu uve ko nawa onkandangala ya simanenena ndjoka Omwana ta dhana, otwa pumbwa okukonakona shoka sha li sha ningwa moshikunino shaEden moka aaihokani yotango naSatana ya tukulile Jehova oshipotha. — Genesis 2:16, 17; 3:1-6.

4. Uunashipotha muEden owe etitha ompata yini, noshike Jehova a tokola okuninga opo e yi kandule po?

⁴ Uunashipotha muEden owe etitha po ompata meshito alihe kutya: Mbela Jehova oha pangele ngaa nawa iishitwa ye? Opo ompata ndjoka yi kandulwe po, okwa li a tumu Omwana gumwe gwopambepo a gwanenena kombanda yevi. Oshilonga shoka Omwana a li ta ka longa osha simanenena. Okwa gandja omwenyo gwe opo a yukipalithe uunamapangelo waJehova noku kulile aantu opo ya vule okuhupithwa. Omwana gwaKalunga okwa li te ke shi ninga tashi wapa opo omaupyakadhi agehe ngoka ge etithwa po kuunashipotha waSatana ga vule okukandulwa po, sho a kala omudhiginini sigo omeso. (Aahebeli 2:14, 15; 1 Johannes 3:8) Ihe Jehova oku na oyana yopambepo ya gwanenena omamiliyona ogendjigendji. (Daniel 7:9, 10) Oguni po a hogolola a longe oshilonga she shoka sha simanenena? Okwa hogolola “Omwana awike” ngoka a tseyika nedhina Jesus Kristus. — Johannes 3:16.

5, 6. Jehova oku ulike ngiini kutya okwiinekela Omwana, neinekelo lye olya kankamena kushike?

⁵ Mbela ehogololo ndyoka Jehova a ninga oli na oku tu  kumitha? Aawe. He okwiinekela thiluthilu Omwana epona. Omathelemimvo manga Omwana inee ya kombanda yevi, Jehova okwa li a hunganeke kutya Omwana ota ka kala omudhiginini nonando okuhepekwe momikalo dhi ili nodhi ili. (Jesaja 53:3-7, 10-12; Iilonga 8:32-35) Tala kutya shoka osha hala okutya shike. Omwana okwa shitwa nemanguluko lyokuninga omatokolo kuye mwene, ngaashi iishitwa ayihe iinandunge. Molwaashoka Jehova okwa li e mu inekela, okwa hunganeke kutya ota ka kala omudhiginini. Mbela einekelo lye olya li lya kankamena kushike? Okontseyo. Jehova okwa li a tseya nawa Omwana, noku shi kutya oku na ehalo lyokuvulika kuye. (Johannes 8:29; 14:31) Omwana oku hole He, naHe oku mu hole. (Johannes 3:35) Oye holathane noye na einekelo kutya ekwatathano lyawo kali na siku li teke po. — Aakolossa 3:14.

⁶ Ngele tatu tala konkandangala ya simanenena ndjoka Omwana gwaKalunga ta dhana mokugwanitha po elalakano lyaHe, einekelo ndyoka He e na muye nokohole ndjoka ye ya mangela kumwe, mbela inatu tompwa kutya otatu vulu owala okuhedha kuKalunga okupitila muJesus? Opu na natango etompelo limwe kutya omolwashike tatu vulu okuhedha kuHe okupitila owala mOmwana.

7, 8. Omolwashike shi li mondjila sho Jesus a ti kutya kapu na ngoka e shi He, ihe “Omwana awike”?

⁷ Otu na okugwanitha po iitegelelwa yontumba opo Jehova e tu hokwe. (Episalomi 15:1-5) Olye e shi nawa shoka a hala tu ninge opo tu gwanithe po omithikampango Dhe nokukala twa hokiwa kuye e vule Omwana? Jesus okwa ti: “Iinima ayihe onde yi pewa kuTate. Kaku na ngoka a tseya Omwana, Tate oye tuu awike. Osho wo kaku na ngoka a tseya Tate, Omwana oye tuu awike, naangoka Omwana a hala oku mu hololela.” (Mateus 11:27) Natu tale kutya omolwashike taku vulu okutiwa kutya Jesus okwa li e li mondjila noka li ta dhenge  omutoto sho a ti kutya kapu na ngoka e shi He nawa, ihe “Omwana oye tuu awike.”

⁸ Omwana oku na ekwatathano lyopothingo li ikalekelwa naHe, molwaashoka oye “omutango gwiishitwa ayihe.” (Aakolossa 1:15) Dhiladhila owala kekwatathano lyopothingo ndyoka He nOmwana ya kala ye na sho ya li oyo ayeke uule woomvula kaadhi shi okuyalulwa sigo oosho iishitwa yilwe yopambepo ya shitwa. (Johannes 1:3; Aakolossa 1:16, 17) Sho Jesus a li pamwe naHe, okwa li e na ompito ombwanawa yokwiilonga nkene He ha dhiladhila nosho wo kombinga yehalo lye, omithikampango dhe noondjila dhe. Kashi shi nando omutoto sho taku tiwa kutya Jesus okwa tseya He e vulithe kehe gumwe. Omolwekwatathano ndyoka, Jesus okwa li a holola oshili kombinga yaHe momikalo ndhoka kaapu na gulwe ta vulu oku shi ninga.

9, 10. (a) Jesus okwa holola He momikalo dhini? (b) Oshike tu na okuninga ngele otwa hala Jehova a kale e tu hokwa?

⁹ Elongo lyaJesus olyu ulike nkene Jehova ha dhiladhila nonkene ha kala e uvite nosho wo shoka a hala mboka haye mu longele ya ninge. * Okwa holola He momukalo gulwe gwa tongomana. Jesus okwa ti: “Ngoka a mona ndje, okwa mona wo Tate.” (Johannes 14:9) Okwa li a holele He thiluthilu mukehe shoka a popi naashoka a ningi. Ngele tatu lesha mOmbiimbeli kombinga yoonkondo dhaJesus noohapu ndhoka a longitha mokulonga aantu, olukeno ndoka lwa li lwe mu inyengitha a aludhe aavu nosho wo uukwawo wanankali mboka wa li we mu inyengitha a lile, ohatu kala twa fa tu wete nkene Jehova ha popi nonkene ha ningi iinima. (Mateus 7:28, 29; Markus 1:40-42; Johannes 11:32-36) Omwana okwa holola thiluthilu omikalo nehalo lyaHe moohapu nomilonga ye. (Johannes 5:19; 8:28; 12:49, 50) Onkee ano, ngele otwa hala okukala twa hokiwa kuJehova, otu na okupulakena komalongo gaJesus nokulandula oshiholelwa she. — Johannes 14:23.

 ¹⁰ Molwaashoka Jesus okwa tseya nawanawa Jehova noha holele omaukwatya ge thiluthilu, itashi kumitha sho Jehova a tokola kutya otatu vulu owala okuhedha kuYe okupitila mOmwana. Opo tu uve ko kutya omolwashike tatu vulu owala okutseya Jehova okupitila muJesus, natu konakoneni eityo lyoohapu dhe ndhoka tadhi ti: “Ongame ondjila noshili nomwenyo. Kape na ngoka ta vulu okuya kuTate, okuninga ta pitile mungame.” — Johannes 14:6.

11. (a) Omolwashike tatu vulu owala okukala nekwatathano ewanawa naKalunga okupitila muJesus? (b) Ongiini oohapu ndhoka dhi li muJohannes 14:6, tadhi tsu omuthindo ondondo yaJesus yi ikalekelwa? (Tala enyolo lyopevi.)

¹¹ Otwi ilonga nale kutya itatu vulu okuya kuKalunga nopwaahena okupitila muJesus. Tala kutya shoka osha hala naanaa okutya shike kutse. Jesus oye “ondjila” moka tatu vulu owala okupitila ngele otwa hala okukala nekwatathano ewanawa naKalunga. Omolwashike taku tiwa ngawo? Omolwaashoka okwa kala omudhiginini sigo omeso, okwa gandja omwenyo gwe gu li ekuliloyambo. (Mateus 20:28) Andola kapwa li ekuliloyambo, ando natse itatu vulu okukala nekwatathano naKalunga. Uulunde owa tula po einda pokati kaantu naKalunga, molwaashoka omuyapuki noke hole nando uulunde. (Jesaja 6:3; 59:2) Ihe ekuliloyambo olye tu mangulula muwo, onkee ano, oondjo dhetu ohadhi siikilwa nenge ohadhi dhimwa po omolwekuliyambo. (Aahebeli 10:12; 1 Johannes 1:7) Jehova ota ka kala e tu hokwa ngele otwa taamba ko nokwiitaala ekuliloyambo ndyoka e tu pa okupitila muKristus. Kapu na omukalo gulwe tagu vulu oku tu ‘hanganitha naKalunga.’ * — Aaroma 5:6-11.

12. Omeityo lini Jesus e li “ondjila”?

¹² Jesus oye “ondjila” ngele tashi ya pokugalikana. Okupitila  owala muye tatu vulu okuya kuJehova megalikano tu na einekelo kutya ote ku uva omagalikano getu ngoka taga zi komutima. (1 Johannes 5:13, 14) Jesus okwa ti: “Tate ote ke mú pa shaa shoka tamu shi indile medhina lyandje. . . . Indileni, e tamu pewa, enyanyu lyeni opo li kale lyu udhilila pombanda.” (Johannes 16:23, 24) Oshe eleka sho tatu vulu okuhedha kuJehova megalikano noku mu ithana “Tate yetu” okupitila medhina lyaJesus. (Mateus 6:9) Ihe Jesus oku li wo “ondjila” meityo limwe molwaashoka okwe tu tulila po oshiholelwa. Ngaashi twe shi mono metetekelo, Jesus okwa li a holele He thiluthilu. Oshiholelwa she otashi tu ulukile nkene tu na okwiihumbata opo tu nyanyudhe Jehova. Onkee ano, opo tu hedhe kuJehova otu na okulandula oshiholelwa shaJesus. — 1 Petrus 2:21.

13, 14. (a) Oshili oya li yi iwetikile ngiini mokupopya kwaJesus? (b) Opo Jesus a kale ‘oshili’ oku na okuninga shike, nomolwashike?

¹³ Jesus okwa li a popi aluhe oshili kombinga yoohapu dhaHe ndhopahunganeko. (Johannes 8:40, 45, 46) Mokana ke inamu za nando iifundja. (1 Petrus 2:22) Nokuli naapataneki ye oya li ya zimine kutya oha longo ‘ondjila yaKalunga pashili.’ (Markus 12:13, 14) Onkee ano, sho Jesus a popi kutya ‘oye oshili’ ka li ta popi oshili ndjoka a longo aantu mokuuvitha onkundana ombwanawa. Okukala kwaJesus e li oshili okwa kwatela mo oshindji kaashi shi owala oku yi popya.

¹⁴ Dhimbulukwa kutya Jehova okwa li a nwetha mo aanyoli yOmbiimbeli ya nyole komeho yethimbo omahunganeko ogendji kombinga yaMesiasa nenge Kristus. Omahunganeko ngoka oga popya kombinga yonkalamwenyo ye, uukalele we neso lye. Kakele kaashono, Ompango yaMoses oya li omuzizimba tagu thaneke Mesiasa. (Aahebeli 10:1) Mbela Jesus okwa li ngaa ta ka kala omudhiginini sigo omeso opo a gwanithe po omahunganeko agehe ngoka tage mu popi? Ngele okwe shi ningi, osha li tashi ku ulika kutya Jehova ota ka yukipalithwa e li Kalunga komahunganeko gashili. Oshinakugwanithwa  shoka oshinene osha li komapepe gaJesus. Ihe Jesus okwa li a holola oshili ndjoka ya kwatelwa miinima mbyoka ya li omuzizimba, okupitila monkalamwenyo ye, mokupopya nosho wo miilonga ye. (2 Aakorinto 1:20) Jesus oye ‘oshili,’ molwaashoka muye omo mwa gwanithilwa oohapu dhaJehova dhomahunganeko. — Johannes 1:17; Aakolossa 2:16, 17.

15. Okukala neitaalo mOmwana osha hala okutya ngiini, notashi ke tu petha shike?

¹⁵ Jesus oye ‘omwenyo’ molwaashoka okupitila muye omo owala tatu vulu okumona “okukalamwenyo kwashili.” (1 Timoteus 6:19) Ombiimbeli otayi ti: “Oongoka i itaala Omwana, oku na omwenyo gwaaluhe, ihe ngoka itaa vulika kOmwana, ita ka mona ko omwenyo, ihe ondjahi yaKalunga otayi kala kombanda ye.” (Johannes 3:36) Okukala neitaalo mOmwana gwaKalunga osha hala okutya ngiini? Otashi ti kutya otu na uushili kutya otatu ka mona owala omwenyo okupitila muye. Otashi ti wo kutya otu na okuulika eitaalo lyetu miilonga, mokutsikila okwiilonga kombinga ye nokuninga ngaashi tatu vulu tu landule omalongo ge noshiholelwa she. (Jakob 2:26) Okukala neitaalo tali longo mOmwana gwaKalunga otashi ke tu petha omwenyo gwaaluhe. Aakriste aagwayekwa nombepo mboka ye li “okangundu okashona” otaya ka mona omwenyo gwaaluhe megulu ye li iishitwa yopambepo, omanga “engathithi lyaantu” nenge ongundu onene ‘yoonzi dhilwe’ tayi ka kala nomwenyo sigo aluhe meviparadisa ye li aantu ya gwanenena. — Lukas 12:32; 23:43; Ehololo 7:9-17; Johannes 10:16.

16, 17. (a) Jesus oku ulike ngiini kutya oku li ‘omwenyo’ nokwaamboka ya sa? (b) Otatu vulu okukala neinekelo lini?

¹⁶ Ongiini kombinga yaamboka ya sa nale? Jesus oku li wo ‘omwenyo’ nokaasi. Omanga inaa yumudha kuume ke Lasarus, okwa lombwele Martha omumwayina gwaLasarus a ti: “Ongame eyumuko nomwenyo. Oongoka i itaala ndje, ota  kala e na omwenyo, nando ona se.” (Johannes 11:25) Jehova okwa pa Omwana “iipatululo yeso noshaasi,” sha hala okutya, oonkondo ndhokuyumudha. (Ehololo 1:17, 18, KB) Jesus Omukwaniilwa a tumbala ota ka patulula niipatululo mbyoka omiyelo dhoshaasi nokumangulula oonakusa mboka ye li mo. — Johannes 5:28, 29.

¹⁷ Jesus sho a ti kutya oye “ondjila noshili nomwenyo,” okwa li ta popi paufupi onkalamwenyo ye nuukalele we kombanda yevi. Oohapu ndhoka otadhi ti sha nokutse kunena. Okwa tsikile ko a ti: “Kape na ngoka ta vulu okuya kuTate, okuninga ta pitile mungame.” (Johannes 14:6) Oohapu dhe ndhoka otadhi longo sigo okunena. Onkee ano, otatu vulu okukala neinekelo kutya ngele otwa landula Jesus itatu ka kana nando. Oye awike te tu ulukile ondjila ndjoka tayi fala ‘kuHe.’

18. Okukala aalanduli yashili yaJesus osha kwatela mo shike?

¹⁸ Otu na etompelo lya kola okulandula Jesus molwaashoka oku shi nawanawa He nota dhana onkandangala ya simanenena. Ngaashi twe shi mono mOntopolwa yo-1, okukala aalanduli yashili yaJesus osha kwatela mo iilonga, ihe hakutya owala otu li Aakriste nenge otu mu hole. Oku mu landula osha kwatela mo okutula miilonga omalongo ge noshiholelwa she monkalamwenyo yetu. (Johannes 13:15) Embo ndika otali ke ku kwathela wu ninge oonkambadhala ndhoka.

19, 20. Membo ndika omu na shike shoka tashi vulu oku ku kwathela moonkambadhala dhoye dhokulandula Kristus?

¹⁹ Montopolwa tayi landula otatu ka konakona nawanawa onkalamwenyo yaJesus nuukalele we. Oontopolwa membo ndika odha topolwa miitopolwa itatu. Moshitopolwa shotango, otatu ka tala paufupi kombinga yuukwatya we noondjila dhe. Moshitiyali, otatu ka konakona oshiholelwa she shuulaadhi mokuuvitha nomokulonga aantu. Moshititatu, otatu ka tala nkene a li u ulike ohole. Okutameka pOntopolwa onti-3, opu na okampungu komapulo ke na oshipalanyolo  tashi ti: “Ongiini tatu vulu okulandula Jesus?” Omanyolo nomapulo ngoka ge li mo oga nuninwa oku tu kwathela tu tedhatedhe nkene tatu vulu okuholela okupopya kwe niilonga ye.

²⁰ Molwaashoka Jehova Kalunga oku na ehalo oku ku kwathela, ino pumbwa okukala wu uvite wa kana nowu uvite wa fa wu li kokule naye omolwuulunde mboka wa thigulula. Nonando oshe mu pula oshindji, okwa tumu Omwana nohole opo e tu ulukile nkene tatu vulu okukala nekwatathano ewanawa naYe. (1 Johannes 4:9, 10) Ohole onene ndjoka Jehova e tu ulukila nayi ku inyengithe wu taambe ko ehiyo lyaJesus ndyoka tali ti: ‘Ila u landule ndje.’ — Johannes 1:43.