OSHILESHWA 14
Ongiini tatu vulu okulongela Kalunga momukalo ngoka a hokwa?
Ngaashi sha kundathanwa moshileshwa sha zi ko, Kalunga ina hokwa omalongelokalunga agehe. Ihe nonando ongawo, otatu vulu okulongela Omushiti gwetu momukalo ngoka hagu mu nyanyudha. “Elongelokalunga” lini lya hokiwa kuKalunga? (Jakob 1:27) Tala kwaashoka Ombiimbeli tayi ti.
1. Otu na okulongela Kalunga twi ikolelela kushike?
Otu na okulongela Kalunga twi ikolelela kOmbiimbeli. Jesus okwa ti kuKalunga: “Oohapu dhoye odho oshili.” (Johannes 17:17) Omalongelokalunga gamwe ohaga ipwililikile oshili ndjoka yi li mOohapu dhaKalunga dha nwethwa mo, Ombiimbeli. Ohage yi pingene po nomalongo gopantu nosho wo nomithigululwakalo. Ihe Jehova ina panda mboka haya ‘etha oshipango she.’ (Lesha Markus 7:9.) Mepingathano naashoka, ohatu nyanyudha Kalunga uuna tatu mu longele twi ikolelela kOmbiimbeli nohatu tula miilonga omayele ngoka ge li mo.
2. Otu na okulongela Jehova momukalo guni?
Otu na okulongela Jehova oye awike, oshoka oye Omushiti gwetu. (Ehololo 4:11) Shika osha hala okutya otu na okukala tu mu hole noku mu longela oye awike, itaatu longitha iimenka, iihongwathano nenge iikalunga. — Lesha Jesaja 42:8.
Elongelokalunga lyetu oli na okukala ‘eyapuki nolyo opalela’ Jehova. (Aaroma 12:1) Shika osha hala okutya otu na okukala hatu vulika koompango dhe. Pashiholelwa, mboka ye hole Jehova oya lenga nohaya landula omithikampango dhe dhi na ko nasha nondjokana. Ohaya yanda wo iinima ya nika oshiponga, ngaashi okuhila omakaya, okulongitha iingangamithi nokulongitha nayi omiti niikolitha. a
3. Omolwashike tu na okulongela Jehova pamwe nooitaali ooyakwetu?
Okugongala kehe hoka hatu kala tu na moshiwike, ohaku tu pe ompito tu ‘hambelele Omuwa megongalo.’ (Episalomi 111:1, 2) Omukalo gumwe moka hatu shi ningi, omokwiimbila Kalunga omaimbilohambelelo. (Lesha Episalomi 104:33.) Jehova ohe tu hiya tu ye kokugongala, oshoka oku tu hole noku shi kutya otaku tu kwathele tu kale nonkalamwenyo ombwanawa sigo aluhe. Pokugongala ohatu tsaathana omukumo.
ILONGA OSHINDJI
Ilonga kutya omolwashike Jehova inaa pitika tu longithe iihongwathano uuna tatu mu longele. Ilonga wo omikalo dha simana moka tatu vulu oku mu tanga.
4. Katu na okulongitha iihongwathano melongelokalunga lyetu
Otu shi shi ngiini kutya okuninga ngawo ohaku yemateke Kalunga? Dhana OKAVIDIO, e tamu kundathana epulo tali landula.
-
Oshike sha li sha ningwa po, sho aapiya yamwe yaKalunga pethimbo lyOmbiimbeli ya li ya kambadhala oku mu longela taya longitha oshikalunga?
Aantu yamwe ohaya longitha iihongwathano uuna taya galikana, oshoka ohashi ya ningitha anuwa ya kale yu uvite ye li popepi naKalunga. Ihe mbela shoka ihashi hedhitha owala Kalunga kokule nayo? Lesha Eksodus 20:4-6 nosho wo Episalomi 106:35, 36, e tamu kundathana omapulo taga landula:
-
Iinima nenge iihongwathano yini wa mona aantu taya longitha melongelokalunga lyawo?
-
Jehova oha kala u uvite ngiini uuna aantu taya longitha iihongwathano?
-
Ngoye owu uvite ngiini kombinga yokulongitha iihongwathano?
5. Ngele ohatu longele owala Jehova, otatu ka kala twa manguluka ko komalongo giifundja
Tala nkene okulongela Jehova momukalo ngoka a hokwa, taku vulu oku ku mangulula komalongo giifundja. Dhana OKAVIDIO.
Lesha Episalomi 91:14, e tamu kundathana epulo tali landula:
-
Jehova oku uvaneka kutya ote ke tu ningila shike, ngele ohatu ulike kutya otu mu hole moku mu longela oye awike?
6. Ohatu longele Kalunga uuna twa gongala
Ohatu tanga Jehova nokutungathana, mokwiimba nomokugandja omatyokosha pokugongala. Lesha Episalomi 22:22, e tamu kundathana omapulo taga landula:
-
Mbela okuuva omatyokosha gayalwe pokugongala ohaku ku nyanyudha?
-
Mbela nangoye ino hala okukala ho ilongekidha wu kale ho gandja etyokosha lyasha?
7. Ohashi nyanyudha Jehova, uuna tatu lombwele yalwe kombinga yaashoka twi ilonga
Opu na omikalo odhindji ndhoka tatu vulu okulongitha tu uvithile yalwe oshili yOmbiimbeli. Lesha Episalomi 9:1 no 34:1, e tamu kundathana epulo tali landula:
-
Oshinima shini wi ilonga mOmbiimbeli, wa hala okulombwela gumwe?
AANTU YAMWE OHAYA TI: “Itashi wapa okunyanyudha Kalunga.”
-
Ngoye oto ti ngiini?
OWI ILONGO SHIKE?
Ohatu nyanyudha Omushiti gwetu, uuna tatu mu longele oye awike, tatu mu tanga pomakugongala gegongalo nuuna tatu lombwele yalwe kombinga yaashoka twi ilonga.
Omapulo geendululo
-
Openi tatu vulu okwiilonga nkene tu na okulongela Kalunga momukalo ngoka a hokwa?
-
Omolwashike tu na okulongela Jehova oye awike?
-
Omolwashike tu na okulongela Kalunga pamwe naamboka ya hala oku mu nyanyudha?
UUYELELE WA GWEDHWA PO
Lesha ehokololo “Inandi pikwa we kiikalunga,” wu uve nkene omukiintu gumwe a etha po okulongela iikalunga.
“Ombiimbeli ohayi lundulula onkalamwenyo yaantu” (Oshungolangelo, 1 Kotoba 2011)
Ilonga kutya oshike tashi vulu oku ku kwathela wu gandje omatyokosha pokugongala.
Tala nkene omulumentu gumwe omugundjuka a li a mono uuwanawa mokugongala, nonando kasha li oshipu kuye okuya ko.
Aantu oyendji oya tala ko omushigakano gu li endhindhiliko lyUukriste, ihe mbela otu na ngaa oku gu longitha melongelokalunga lyetu?
a Iinima mbika otayi ka kundathanwa miileshwa yi li komeho.
Opu na ishewe uuyelele mbuka
OMAPULO NGOKA HAGA PULWA OLUNDJI KOMBINGA YOONZAPO DHAJEHOVA
Ekonakonombiimbeli ndyoka hali ningwa kOonzapo dhaJehova oshike?
Oto vulu okulongitha Ombiimbeli kehe mootundi dhopaMbiimbeli dhoshali, ndhoka hadhi ningwa kOonzapo dhaJehova. Oto vulu okuhiya aantu yaandjeni nenge ookuume koye.
