OSHILESHWA 16
Jesus okwa longo shike sho a li kombanda yevi?
Aantu oyendji ohaya dhiladhila kutya Jesus okahanona natango, omuhunganeki omunandunge, nenge omulumentu e li pokusa. Ihe mbela itatu vulu okwiilonga oshindji kombinga ye, mokutala konkalamwenyo ye sho a li kombanda yevi? Moshileshwa shika, otatu ka tala kiinima yimwe ya simanenena mbyoka Jesus a ninga nankene tayi vulu oku ku kwathela.
1. Iilonga yaJesus ya simanenena oya li yini?
Iilonga yaJesus ya simanenena oya li okuuvitha “elaka etoye lyOshilongo shaKalunga” nenge tu tye, onkundana ombwanawa yUukwaniilwa waKalunga. (Lesha Lukas 4:43.) Okwa li u uvitha onkundana ombwanawa kutya Kalunga ota ka dhika po Uukwaniilwa we nenge epangelo, ndyoka tali ka kandula po omaupyakadhi agehe gaantu. a Uule womimvo ndatu netata, Jesus okwa li a lombwele aantu nopwaa na ezimbuko kombinga yetumwalaka ndika tali tsu omukumo. — Mateus 9:35.
2. Omolwashike Jesus a li a longo iikumithalonga?
Ombiimbeli otayi popi kombinga ‘yiilongankondo, yiikumithalonga noyomandhindhiliko ogendji ngoka Kalunga a longitha Jesus.’ (Iilonga 2:22) Kekwatho lyoonkondo dhaKalunga, Jesus okwa li a vulu okumweneka iikungulu, okukutitha aantu omayuvi, okwaaludha aavu nokwa li nokuli a yumudha aasi. (Mateus 8:23-27; 14:15-21; Markus 6:56; Lukas 7:11-17) Iikumithalonga yaJesus oya li ye shi ulike sha yela kutya okwa tumwa kuKalunga. Otayi ulike wo kutya Jehova oku na oonkondo dhokukandula po omaupyakadhi getu agehe.
3. Oshike tatu vulu okwiilonga konkalamwenyo yaJesus?
Jesus okwa li a vulika kuJehova monkalo kehe. (Lesha Johannes 8:29.) Nonando Jesus okwa li ta patanekwa, okwa longo nuudhiginini sigo omeso, kehe shimwe shoka He e mu pula a longe. Okwe shi ulike kutya aantu otaya vulu okulongela Kalunga, nokuli nomoonkalo oondhigu. Onkee ano, Jesus okwe tu thigila ‘oshiholelwa, opo tu landule ondjila ndjoka a li e yi ende.’ — 1 Petrus 2:21.
ILONGA OSHINDJI
Tala nkene Jesus a li a lombwele aantu onkundana ombwanawa nokwa longo iikumithalonga.
4. Jesus okwa li a lombwele aantu onkundana ombwanawa
Jesus okwa li a ende iinano iile kolupadhi, tu uvithile aantu oyendji onkundana ombwanawa ngaashi tashi vulika. Lesha Lukas 8:1, e tamu kundathana omapulo taga landula:
-
Mbela Jesus okwa li owala a uvithile aantu mboka yi ile okupulakena kuye?
-
Jesus okwa li a ningi oonkambadhala dhini a ye kaantu, opo e ke ya uvithile?
Kalunga okwa li a hunganeke kutya Mesiasa ota ka uvithila aantu onkundana ombwanawa. Lesha Jesaja 61:1, 2, e tamu kundathana omapulo taga landula:
-
Jesus okwa li a gwanitha po ngiini ehunganeko ndika?
-
Sho to tala, aantu kunena oya pumbwa ngaa okuuva onkundana ombwanawa?
5. Jesus okwa li a longo aantu iiyilongomwa ya simana
Kakele kokuuvitha onkundana ombwanawa yUukwaniilwa waKalunga, Jesus okwa li a longo aantu iinima mbyoka tayi vulu oku ya kwathela. Tala kiiholelwa yimwepo mbyoka a li a longo aantu mEuvitho lye lyokOndundu. Lesha Mateus 6:14, 34 nosho wo 7:12, e tamu kundathana omapulo taga landula:
-
Moovelise ndhika Jesus okwe tu pa omayele geni tage tu kwathele?
-
Sho to tala, omayele ngaka otaga vulu ngaa oku tu kwathela nokunena?
6. Jesus okwa li a longo iikumithalonga
Jehova okwa li a pe Jesus oonkondo dhokulonga iikumithalonga oyindji. Opo wu mone oshiholelwa shimwe, lesha Markus 5:25-34 nenge wu dhane OKAVIDIO haka, e tamu kundathana omapulo taga landula.
-
Omukiintu ngoka a popiwa mokavidio okwa li e na einekelo lini?
-
Oshike she ku kumitha kombinga yoshikumithalonga shika?
Lesha Johannes 5:36, e tamu kundathana epulo tali landula:
-
Iikumithalonga yaJesus otayi “hokolola” shike, nenge oya ulike shike kombinga ye?
Owe shi tseya ngaa?
Uuyelele owundji mboka tu shi kombinga yaJesus owu li momambo gOmbiimbeli gane hagi ithanwa Omavaangeli, ano Mateus, Markus, Lukas naJohannes. Omunyoli gwEvaangeli kehe okwa nyola uuyelele wi ili kombinga yaJesus. Uuyelele awuhe mboka otawu tu pe ethano ewanawa lyonkalamwenyo yaJesus.
-
MATEUS
oye a nyola Evaangeli lyotango. Otali tu lombwele oshindji kombinga yomalongo gaJesus, unene tuu shoka Jesus a longa aantu kombinga yUukwaniilwa waKalunga.
-
MARKUS
oye a nyola Evaangeli ndyoka efupi. Otali popi iiningwanima oyindji tayi nyanyudha.
-
LUKAS
ote tu lombwele nkene egalikano lya li lya simana kuJesus nankene a li a ungaunga naakiintu.
-
JOHANNES
okwe tu hololela oshindji kombinga yiinima oyindji mbyoka Jesus a li a lombwele ookuume ke kopothingo nosho wo aantu yalwe. Shoka otashi tu kwathele tu mone kutya Jesus okwa li omuntu a tya ngiini.
AANTU YAMWE OHAYA TI: “Jesus okwa li owala omulumentu e li nawa, ihe ke shi Mesiasa.”
-
Ngoye oto ti ngiini?
OWI ILONGO SHIKE?
Jesus okwa li a uvitha kombinga yUukwaniilwa waKalunga, a longo iikumithalonga nokwa li a vulika kuJehova monkalo kehe.
Omapulo geendululo
-
Iilonga yaJesus ya simanenena oyini sho a li kombanda yevi?
-
Iikumithalonga yaJesus otayi ulike shike?
-
Jesus okwa li a longo aantu iiyilongomwa yini ya simana?
UUYELELE WA GWEDHWA PO
Jesus okwa li ha popi unene kombinga yashike?
“Jesus okwa tala ko ngiini Uukwaniilwa waKalunga?” (Oshungolangelo, 1 Kotoba 2014)
Tala uumbangi mboka tawu ulike kutya Jesus okwa longele shili iikumithalonga.
“Oshike tatu ilongo kiikumithalonga yaJesus?” (Oshungolangelo, 15 Juli 2004)
Lesha wu uve nkene oshiholelwa shaJesus shombepo yeiyambo sha lundulula onkalamwenyo yomulumentu gumwe.
“Onda li ndi ihole mwene” (Oshungolangelo, 1 Novomba 2014)
Tala omusholondondo gwiinima ya simana mbyoka Jesus a li a ningi, ya nyolwa melandulathano.
“Iinima ya simana monkalamwenyo yaJesus sho a li kombanda yevi” (Ekwatho kungoye wu ilonge Oohapu dhaKalunga, Oshitopolwa 4)
a Oshileshwa 31 sigo 33 otashi ka kundathana muule kombinga yUukwaniilwa waKalunga.
Opu na ishewe uuyelele mbuka
OMAPULO NGOKA HAGA PULWA OLUNDJI KOMBINGA YOONZAPO DHAJEHOVA
Ekonakonombiimbeli ndyoka hali ningwa kOonzapo dhaJehova oshike?
Oto vulu okulongitha Ombiimbeli kehe mootundi dhopaMbiimbeli dhoshali, ndhoka hadhi ningwa kOonzapo dhaJehova. Oto vulu okuhiya aantu yaandjeni nenge ookuume koye.
