OSHILESHWA 19
Mbela Oonzapo dhaJehova odho Aakriste yashili?
Tu li Oonzapo dhaJehova otwi itaala kutya tse Aakriste yashili. Omolwashike mbela? Tala kutya shoka twi itaala osha kankamena koshike, nedhina ndyoka lye tu yoolola ko kaantu yalwe nosho wo ohole ndjoka hatu ulukilathana.
1. Iinima mbyono yi itaalwa kOonzapo dhaJehova, oya kankamena koshike?
Jesus okwa ti: ‘Oohapu dhaKalunga odho oshili.’ (Johannes 17:17) Ngaashi Jesus, iinima mbyoka Oonzapo dhaJehova dhi itaala, oya kankamena kOohapu dhaKalunga. Pashiholelwa, natu tale kwaashono twa kala tatu ningi pethimbo lyetu. Lwomomumvo 1870, okangundu kaakonakonimbiimbeli oka li ka tameke okukonakona Ombiimbeli nuukeka. Iinima mbyoka ki itaala oya kankamena kOmbiimbeli, noya yooloka ko komalongo goongeleka. Okuza mpono, oka tameke okulombwela yalwe shoka ki ilonga mOmbiimbeli. a
2. Omolwashike hatu i iyithana Oonzapo dhaJehova?
Jehova okwa ti kutya mboka haye mu longele oye li Oonzapo dhe, molwaashoka ohaya lombwele yalwe kombinga ye. (Aahebeli 11:4–12:1) Pashiholelwa, pethimbo lyonale Kalunga okwa li a lombwele oshigwana she a ti: “One oonzapo dhandje.” (Lesha Jesaja 43:10.) Jesus oti ithanwa “omuhokololi omudhiginini” nenge Onzapo Ondhiginini. (Ehololo 1:5) Onkee ano, mo 1931, otwa li twa taamba ko edhina Oonzapo dhaJehova. Otwa nyanyukwa sho hatu ithanwa nedhina ndyoka.
3. Oonzapo dhaJehova ohadhi holele ngiini ohole yaJesus?
Jesus okwa li e hole aalongwa ye noonkondo, ya fa aantu yaandjawo. (Lesha Markus 3:35.) Sha faathana, Oonzapo dhaJehova odhi li uukwanegumbo wa hangana muuyuni awuhe, nomolwaashono hatu iyithana aamwatate naamwameme. (Filemon 1, 2) Ohatu vulika wo koshipango shika tashi ti: “Holeni ooitaali ooyakweni.” (1 Petrus 2:17) Oonzapo dhaJehova ohadhi ulike ohole ndjika momikalo odhindji, ngaashi okukwathela ooitaali ooyakwawo muuyuni awuhe mboka ye na oompumbwe.
ILONGA OSHINDJI
Ilonga oshindji kombinga yOonzapo dhaJehova nosho wo kombinga yuuyelele wulwe mboka tawu ulike kutya odhi li Aakriste yashili.
Iinima mbyoka Aakriste yashili yi itaala oya kankamena kOmbiimbeli nohaye yi lombwele yalwe
4. Shoka twi itaala osha kankamena kOmbiimbeli
Jehova okwa li a hunganeke kutya oshili yOmbiimbeli otayi ka kala ya yela. Lesha Daniel 12:4, e tamu kundathana epulo tali landula:
-
Oshike sha li shi “indjipala” mokati koshigwana shaKalunga, sho sha tsikile okukonakona Ombiimbeli?
Tala nkene Charles Russell naakonakonimbiimbeli ooyakwawo ya li haya konakona Oohapu dhaKalunga. Dhana OKAVIDIO, e tamu kundathana epulo tali landula.
-
Mokavidio, Charles Russell naakonakonimbiimbeli ooyakwawo oya li haya konakona ngiini Ombiimbeli?
Owe shi tseya ngaa?
Poompito dhimwe otwa ninga omalunduluko miinima mbyoka twi itaala. Omolwashike mbela? Ngaashi owala etango tali piti, hali endele ko tali eta uuyelele, Kalunga naye okwe endela ko te tu hololele oshili yomOohapu dhe. (Lesha Omayeletumbulo 4:18.) Onkee ano, nonando Ombiimbeli ihayi lunduluka, euvoko lyetu lyOmbiimbeli ohali ende tali hwepopala.
5. Ohatu kala metsokumwe nedhina lyetu
Omolwashike twa taamba ko edhina Oonzapo dhaJehova? Dhana OKAVIDIO, e tamu kundathana epulo tali landula.
-
Omolwashike edhina Oonzapo dhaJehova tali opalele?
Omolwashike Jehova a hogolola aantu ya ninge oonzapo dhe? Omolwaashoka otaye mu ndhindhilikitha mo e li Kalunga kashili, oshoka opu na iifundja oyindji ya popiwa kombinga ye. Tala kiifundja yimwepo yopaali.
Omalongelokalunga gamwe ohaga longo iilyo yago kutya Kalunga okwa hala yi longithe iihongwathano melongelokalunga, ihe lesha Levitikus 26:1, e tamu kundathana omapulo taga landula:
-
Oshili yini tayi popiwa mEnyolo muno? Jehova oha kala u uvitile ngiini iikalunga?
Aawiliki yomalongelokalunga gamwe ohaya longo aantu kutya Jesus oKalunga, ihe lesha Johannes 20:17, e tamu kundathana omapulo taga landula:
-
Oshili yini tayi popiwa mEnyolo muno? Mbela Jesus naKalunga omuntu gumwe?
-
Oho kala wu uvite ngiini sho Jehova a tuma oonzapo dhe dhu uvithe oshili kombinga ye nOmwana?
6. Otu holathane
Ombiimbeli otayi yelekanitha Aakriste niilyo yi ili noyi ili yolutu lwomuntu. Lesha 1 Aakorinto 12:25, 26, e tamu kundathana omapulo taga landula:
-
Aakriste yashili oye na okuninga po shike ngele Aakriste ooyakwawo otaya mono iihuna?
-
Owa ndhindhilika shike kombinga yohole mokati kOonzapo dhaJehova?
Ngele Oonzapo dhaJehova otadhi mono iihuna moshitopolwa shimwe, Oonzapo oonkwawo muuyuni awuhe ohadhi dhi kwathele meendelelo. Opo wu mone oshiholelwa shimwe, dhana OKAVIDIO, e tamu kundathana epulo tali landula.
-
Ekwatho ndyono hali gandjwa kOonzapo dhaJehova ohali ulike ngiini kutya odhi holathane?
Aakriste yashili ohaya kwathele pahole mboka ye na ompumbwe
AANTU YAMWE OHAYA TI: “Oonzapo dhaJehova elongelokalunga opo lye ya.”
-
Jehova okwa tameke okukala hi ithana aalongeli ye oonzapo dhe, okuza uunake?
OWI ILONGO SHIKE?
Oonzapo dhaJehova Aakriste yashili. Otu li uukwanegumbo womuuyuni awuhe, tawu longele Kalunga, wi itaala shoka shi li mOmbiimbeli nohawu lombwele yalwe oshili kombinga yaJehova.
Omapulo geendululo
-
Omolwashike twa taamba ko edhina Oonzapo dhaJehova?
-
Ohatu ungaunga ngiini nooitaali ooyakwetu?
-
Sho to tala Oonzapo dhaJehova Aakriste ngaa yashili?
UUYELELE WA GWEDHWA PO
Ilonga oshindji kombinga yondjokonona yetu.
Oonzapo dhaJehova tadhi ulike eitaalo — Oshitopolwa 1: Tadhi zi mo momilema (1:00:53)
Tala oshiholelwa shimwe wu uve nkene Oonzapo dhaJehova dha aneke pomutenya omalongo giifundja.
Mona omayamukulo komapulo ngoka tashi vulika wu na kombinga yOonzapo dhaJehova.
Stephen okwa li e tonde aantu yomihoko dhilwe nokwa li he ya ponokele. Tala kutya oshike a mono mOonzapo dhaJehova, shoka she mu inyengitha a lundulule.
“Onkalamwenyo yandje oya li yu uka lela kuuwinayi” (Oshungolangelo, 1 Juli 2015)
a Okuza mo 1879, Oonzapo dhaJehova odha kala hadhi nyanyangidha oshifo shOshungolangelo tashi yelitha shoka Ombiimbeli tayi ti.
Opu na ishewe uuyelele mbuka
OMAPULO NGOKA HAGA PULWA OLUNDJI KOMBINGA YOONZAPO DHAJEHOVA
Ekonakonombiimbeli ndyoka hali ningwa kOonzapo dhaJehova oshike?
Oto vulu okulongitha Ombiimbeli kehe mootundi dhopaMbiimbeli dhoshali, ndhoka hadhi ningwa kOonzapo dhaJehova. Oto vulu okuhiya aantu yaandjeni nenge ookuume koye.
