Mbela owa silwa nale omuntu ngoka wu hole? Pethimbo lyuudhigu mboka, otashi vulika wi ipule to ti: ‘Oshike hashi tu ningilwa ngele twa si? Mbela aaholike yetu mboka ya sa otatu ke ya mona we ngaa?’ Moshileshwa shika nomwaashoka sha landula ko, otatu ka tala komayamukulo taga hekeleke gomapulo ngoka mOmbiimbeli.

1. Oshike hashi tu ningilwa ngele twa si?

Jesus okwa yelekanitha eso noomposi oondhigu. Omuntu ngoka a pwila moomposi, iha kala e shi shoka tashi ningwa pehala mpoka e li. Eso noomposi oya faathana meityo lini? Ngele omuntu okwa sa, iha kala u uvite uuwehame washa. Iha kala we u uvite uuwike kutya nduno okwa li e hole ookuume ke noyaandjawo shi thike peni. Ombiimbeli otayi ti: “Aasi itaa tseya sha nando.” — Lesha Omuuvithi 9:5.

2. Uuna tu shi oshili kombinga yeso, ohashi tu kwathele ngiini?

Aantu oyendji ohaya tila eso nosho wo oonakusa. Ihe shoka Ombiimbeli tayi ti kombinga yeso, otashi ku hekeleke. Jesus okwa ti: “Oshili otayi ke mu mangulula.” (Johannes 8:32) Omalongelokalunga gamwe ohaga ti kutya opu na sha shoka hashi hupu po ngele omuntu a si, ihe Ombiimbeli hasho tayi ti ngaaka. Osha yela kutya omuntu iha kala ta mono iihuna ngele okwa sa. Shimwe ishewe, iha kala u uvite shoka tashi ningwa, noiha vulu oku tu ehameka. Onkee ano, inatu pumbwa okugalikana oonakusa nenge tu ninge iinima mbyoka tayi ya keelele anuwa opo kaaye tu geele, nokatu na oku ya galikanena.

Aantu yamwe ohaya ti kutya ohaya vulu okupopya noonakusa. Ihe shoka itashi wapa, oshoka ngaashi twe shi ilongo, oonakusa inaya “tseya sha nando.” Aantu mboka haya ti kutya ohaya popi noonakusa, ihe paulelalela ohaya popi noompwidhuli, ndhoka hadhi ifethitha oonakusa. Onkee ano, okutseya oshili kombinga yeso, ohaku tu gamene koompwidhuli. Jehova ote tu londodha kaatu kambadhale okupopya noonakusa, oshoka oku shi kutya ngele otwa kwatathana noompwidhuli, otadhi ke tu ehameka. — Lesha Deuteronomium 18:10-12.

3. Ilonga oshili kombinga yonkalo yoonakusa

Muuyuni aantu oye na omaitaalo gi ili nogi ili kombinga yaashoka hashi tu ningilwa ngele twa si. Ihe uushili owo kutya omaitaalo ngoka haagehe ge li mondjila.

• Moshitopolwa sheni aantu oyi itaala shike kombinga yonkalo yoonakusa?

 4. Oshili kombinga yeso ohayi tu kwathele

Okutseya oshili kombinga yeso ohaku tu mangulula muumbanda wokutila oonakusa. Lesha Omuuvithi 9:10, e tamu kundathana epulo tali landula:

• Mbela oonakusa otaya vulu oku tu ehameka?

Oshili yOmbiimbeli ohayi tu gamene kiifundja mbyoka kutya otu na okuningila sha oonakusa, opo anuwa kaaye tu geele nenge kutya otu na oku ya galikana. Lesha Jesaja 8:19 nosho wo Ehololo 4:11, e tamu kundathana epulo tali landula:

• Sho to tala, Jehova oha kala u uvitile ngiini omuntu ngoka ha galikana nenge ha ka konga ekwatho kunakusa?

5. Ohashi tu hekeleke, uuna twa tseya oshili kombinga yeso

Aantu oyendji oya longwa kutya ngele oya si, otaya ka mona iihuna omolwiinima iiwinayi mbyoka ya ninga. Ihe otashi tu hekeleke okutseya kutya kapu na omuntu ha ka mona iihuna ngele okwa si, nokuli nonando okwa li ha ningi iinima iiwinayi noonkondo. Lesha Aaroma 6:7, e tamu kundathana epulo tali landula:

• Ombiimbeli otayi ti kutya ngele omuntu a si, okwa manguluka ko kuulunde. Sho to tala, ngele omuntu okwa sa, oha kala ta mono iihuna omolwomayono ngoka a ninga?

Sho tatu tsikile okwiilonga kombinga yaJehova, otatu ka mona kutya iha hepeke nando oonakusa. Lesha Deuteronomium 32:4 nosho wo 1 Johannes 4:8, e tamu kundathana omapulo taga landula:

• Kalunga ngoka a popiwa e na omaukwatya ngoka ga popiwa moovelise ndhino, otashi wapa ngaa a hepeke oonakusa?

• Oshili ndjoka wi ilongo kombinga yeso, otayi ku hekeleke ngaa? Omolwashike to tile ngawo?

 OWI ILONGO SHIKE?

Ngele omuntu okwa si, onkalamwenyo ye ohayi hulu po. Oonakusa itaya mono iihuna, yo ihaya ehameke aanamwenyo.

Omapulo geendululo

• Oshike hashi tu ningilwa ngele twa si?

• Oshili kombinga yeso ohayi tu etele ngiini uuwanawa?

• Oshili kombinga yeso ohayi tu hekeleke ngiini?