OSHILESHWA 43
Aakriste oye na okutala ko ngiini omalovu?
Aantu muuyuni awuhe oye na omataloko ga yoolokathana kombinga yomalovu. Yamwe oye hole okunwa nookuume kawo omathimbo gamwe. Yamwe ohaya tokola kaaga ende mo nando mokana kawo. Omanga yamwe haya nu, e taya kolwa. Ihe mbela Ombiimbeli otayi ti ngiini kombinga yomalovu?
1. Mbela osha puka okunwa omalovu?
Ombiimbeli inayi indika okunwa omalovu. Oya popya owala iinima oyindji iiwanawa mbyoka Kalunga e tu pa, mwa kwatelwa ‘omaviinu ngoka haga nyanyudha omuntu.’ (Episalomi 104:14, 15) Shimwe ishewe, mOmbiimbeli omwa popiwa aalumentu naakiintu yamwe aadhiginini mboka nayo ya li haya nu omalovu. — 1 Timoteus 5:23.
2. Ombiimbeli oya gandja omayele geni kwaamboka haya nu omalovu?
Jehova okwi indika okunwa sha pitilila nosho wo uunkolwe. (Aagalati 5:21) Oohapu dhe otadhi ti: “Ino kala mokati kaanwi yomaviinu.” (Omayeletumbulo 23:20) Onkee ngele otwa tokola okunwa omalovu, kutya nduno otu li nayalwe nenge otu li otse atuke, inatu ipa mo unene e tatu kala itaatu vulu okudhiladhila nawa, okupopya oohapu dha yogoka nokwiihumbata nawa. Shimwe ishewe, katu na oku ga nwa sigo taga yono po uukolele wetu. Ngele ihatu vulu okupangela okunwa kwetu, oshihwepo tu ku ethe po thiluthilu.
3. Ongiini tatu vulu okusimaneka omatokolo gayalwe ge na ko nasha nokunwa omalovu?
Kehe gumwe oku na okutokola ngele ota nu omalovu nenge hasho. Inatu pangula omuntu ngoka a tokola okunwa omalovu pandjele noinatu thiminika omuntu ngoka a tokola kee ga nwe nandonando. (Aaroma 14:10) Ngele okunwa kwetu omalovu otaku pundukitha yalwe, onawa tu ku ethe po. (Lesha Aaroma 14:21.) Ihatu longo owala ‘shoka she tu opalela, ihe ooshoka tashi opalele wo yakwetu.’ — Lesha 1 Aakorinto 10:23, 24.
ILONGA OSHINDJI
Tala omakotampango gOmbiimbeli ngoka tage ku kwathele wu tokole ngele oto nu omalovu nenge hasho nosho wo kutya nwa shi thike peni, ngele oho nu. Tala wo shoka to vulu okuninga, ngele owu na uupyakadhi wokunwa omalovu.
4. Tokola ngele oto nu omalovu nenge hasho
Jesus okwa li a tala ko ngiini okunwa omalovu? Opo tu mone eyamukulo, natu tale koshikumithalonga she shotango. Lesha Johannes 2:1-11, e tamu kundathana omapulo taga landula:
-
Oshike tatu vulu okwiilonga moshikumithalonga shika kombinga yetaloko lyaJesus li na ko nasha nomalovu nosho wo kombinga yaamboka haye ga nu?
-
Molwaashoka Jesus ka li i indike okunwa omalovu, ongiini Omukriste e na okutala ko ngoka he ga nu?
Omukriste nonando okwa manguluka okunwa omalovu, shika itashi ti kutya oshi li aluhe pandunge oku shi ninga. Lesha Omayeletumbulo 22:3, e to tala nkene iinima tayi landula, tayi vulu oku ku kwathela wu tokole ngele oto nu nenge hasho:
-
Uuna to ka hinga nenge to ka longa neshina lyontumba.
-
Uuna wu li metegelelo.
-
Uuna ndohotola e ku lombwele kuu nwe omalovu.
-
Uuna ho nyengwa okuyeleka kutya nwa shi thike peni.
-
Uuna ompango yomoshilongo inaayi pitika wu nwe omalovu.
-
Uuna wu li nomuntu ngoka ihaa nu omalovu, molwaashoka a li e na uupyakadhi wokunwa sha pitilila monakuziwa.
Mbela owu na okupa aantu omalovu pohango nenge piituthi yilwe? Opo wu mone shoka tashi vulu oku ku kwathela kutya ninga po shike, dhana OKAVIDIO.
Lesha Aaroma 13:13 nosho wo 1 Aakorinto 10:31, 32. Konima ngele mwa lesha enyolo kehe, kundathaneni epulo tali landula:
-
Ongiini okutula miilonga ekotampango ndika taku vulu oku ku kwathela wu ninge etokolo ndyoka tali nyanyudha Jehova?
Omukriste kehe oku na okutokola ye mwene, ngele ota nu omalovu nenge hasho. Nonando omathimbo gamwe oha nu omalovu, otashi vulika a hogolole kee ga nwe poompito dhimwe
5. Yeleka kutya oto nu shi thike peni
Ngele owa tokola wu nwe omalovu, kaleka oshinima shika momadhiladhilo: Jehova ina indika okunwa omalovu, ihe okunwa sha pitilila. Omolwashike mbela? Lesha Hosea 4:11, 18, e tamu kundathana epulo tali landula:
-
Oshike tashi vulu okuningwa po, ngele omuntu oha nu sha pitilila?
Ongiini tatu vulu okuyanda okunwa sha pitilila? Otwa pumbwa okukala tu na ondjele nenge tu shi omangambeko getu. Lesha Omayeletumbulo 11:2, e tamu kundathana epulo tali landula:
-
Omolwashike shi li pandunge okwiitulila po ongamba, ngele tashi ya pokunwa omalovu?
6. Shoka tashi vulu okukwathela omuntu a ethe po okunwa sha pitilila
Tala shoka sha kwathele omulumentu gumwe a ethe po okunwa omalovu sha pitilila. Dhana OKAVIDIO, e tamu kundathana omapulo taga landula.
-
Mokavidio hano, Dmitry okwa li hi ihumbata ngiini uuna a nwa omalovu?
-
Mbela okwa li a vulu oku ga etha po nziya?
-
Oshike she mu kwathele a ethe po okunwa omalovu sha pitilila?
Lesha 1 Aakorinto 6:10, 11, e tamu kundathana omapulo taga landula:
-
Uunkolwe owa nika oshiponga shi thike peni?
-
Oshike tashi ulike kutya omuntu ngoka ha nu omalovu sha pitilila, ota vulu okulunduluka?
Lesha Mateus 5:30, e tamu kundathana epulo tali landula:
-
Ethaneko lyokuteta ko oshikaha otali ulike kutya otu na okweetha po oshinima shontumba, opo tu nyanyudhe Jehova. Oshike to vulu okuninga ngele oto nyengwa okweetha po okunwa omalovu sha pitilila? a
Lesha 1 Aakorinto 15:33, e tamu kundathana epulo tali landula:
-
Oshike tashi vulu oku ku ningilwa, ngele oho endathana nookuume mboka haya nu sha pitilila?
GUMWE OTASHI VULIKA A PULE TA TI: “Osha puka ngaa okunwa omalovu?”
-
Mbela oto ke mu yamukula ngiini?
OWI ILONGO SHIKE?
Jehova okwe tu pa omalovu, opo tu inyanyudhe, ihe okwi indika okunwa sha pitilila nosho wo uunkolwe.
Omapulo geendululo
-
Ombiimbeli otayi ti ngiini kombinga yomalovu?
-
Okunwa sha pitilila ohaku eta iizemo yini?
-
Ongiini tatu vulu okusimaneka omatokolo gayalwe ngoka haya ningi shi na ko nasha nokunwa omalovu?
UUYELELE WA GWEDHWA PO
Ongiini aagundjuka yomimvo omulongo nasha taya vulu okuninga omatokolo gopandunge ge na ko nasha nomalovu?
Tala koonkatu ndhoka to vulu okukatuka, opo wu vule okweetha po okunwa sha pitilila.
“Kala netaloko lyu uka kombinga yiikolitha” (Oshungolangelo, 1 Januali 2010)
Mbela Omukriste oku na okukutha ombinga mokudhenga uuhalasa kumwe?
“Omapulo ga za kaaleshi” (Oshungolangelo, 15 Febuluali 2007)
Lesha ehokololo, “Onda li handi kwata iitenga,” wu uve nkene gumwe a etha po okunwa sha pitilila.
“Ombiimbeli ohayi lundulula onkalamwenyo yaantu” (Oshungolangelo, 1 Mei 2012)
a Mboka ya pikwa komalovu otashi vulika ya kale ya pumbwa ekwatho lyandohotola, opo ye ga ethe po. Oondohotola odhindji ohadhi ti kutya mboka ya li ye na uupyakadhi wokunwa omalovu, naya kale kokule nomalovu thiluthilu.
Opu na ishewe uuyelele mbuka
OMAPULO NGOKA HAGA PULWA OLUNDJI KOMBINGA YOONZAPO DHAJEHOVA
Ekonakonombiimbeli ndyoka hali ningwa kOonzapo dhaJehova oshike?
Oto vulu okulongitha Ombiimbeli kehe mootundi dhopaMbiimbeli dhoshali, ndhoka hadhi ningwa kOonzapo dhaJehova. Oto vulu okuhiya aantu yaandjeni nenge ookuume koye.
