Omugundjuka Timoteus okwa li ha kala a hala okukwathela aantu. Timoteus okwa li ha yi komahala ogendji a ka kwathele aantu. Shika osha li sha ningitha onkalamwenyo ye yituntula. Mbela owa hala okuuva oshindji kombinga yaashika?— 

Timoteus okwa putukile moshilando Listra. Sho a li okanona, yinakulu, Loide, nayina, Eunike, oya li ya tameke oku mu longa kombinga yaJehova. Sho ta putuka, Timoteus okwa li e hole okukwathela yalwe yi ilonge kombinga yaJehova.

Sho Timoteus a li omugundjuka natango, Paulus okwa li e mu pula ye ku uvithe komahala galwe. Timoteus okwa li e shi zimine. Okwa li a halelela okuya pamwe naPaulus ya ka kwathele aantu.

 Timoteus okwa yi pamwe naPaulus koshilando Tessalonika shi li muMakedonia. Opo ya thike hoka, oya li ye na okweenda kolupadhi oshinano oshile, opo ya ka londe ombautu. Hugunina sho ya thiki, oya li ya kwathele aantu oyendji yi ilonge kombinga yaJehova. Ihe aantu yamwe oya li ya geye noya kambadhala oku ya dhenga. Onkee ano, Paulus naTimoteus oya li ya zi mo e taye ku uvitha komahala galwe.

Konima yoomwedhi dhontumba, Paulus okwa li a pula Timoteus a shune kuTessalonika, opo a ka tale kutya aamwahe oye li po ngiini. Shika osha li tashi pula uulaadhi okushuna koshilando shoka sha nika oshiponga. Ihe nonando ongaaka, Timoteus okwa shuna, molwaashoka okwa li ti ipula naamwahe yaahoka. Sho a galuka, okwa li e nine Paulus onkundana ombwanawa. Aamwahe yokuTessalonika oya li ye li nawa lela.

Timoteus okwa li a longo pamwe naPaulus uule woomvula odhindji. Oshikando shimwe Paulus okwa li a nyola kutya Timoteus oye ta opalele okutumwa a ka kwathele omagongalo. Timoteus okwa li e hole Jehova naantu.

Mbela nangoye owu hole aantu nowa hala oku ya kwathela yi ilonge kombinga yaJehova?—  Ngele osho, oto vulu okukala nonkalamwenyo yinyanyudha noonkondo noyituntula, ngaashi naanaa Timoteus.