1-3. (a) Oshike tatu ilongo mOmayeletumbulo 13:20? (b) Omolwashike twa pumbwa okuhogolola ookuume pandunge?

OWA ndhindhilika ngaa nkene okahanona haka tala aavali yako? Nokuli nomanga kaake shi okupopya, ohaka kala taka pungula momadhiladhilo gako kehe shoka ke wete nenge ke uvite. Sho taka koko, ohaka tameke okuholela aavali yako nuupu. Shoka kashi shi oshikumithi, oshoka aakuluntu nayo ohaya vulu okudhiladhila nokuninga iinima taya holele mboka haya kala nayo olundji.

² Omayeletumbulo 13:20 otayi ti: “Enda pamwe naanawino, u likole owino.” Uutumbulilo “enda pamwe” owa kwatela mo okukala nomuntu ethimbo olindji. Shika osha kwatela mo oshindji kaashi shi owala okukala pamwe naye. Omulongwantu gumwe gwOmbiimbeli okwa ti kutya okweenda pamwe nagumwe osha kwatela mo okukala wu mu hole nowu na ekwatathano lyopothingo naye. Ohatu nwethwa mo unene kaantu mboka hatu kala nayo ethimbo olindji, unene tuu mboka tu na ekwatathano lyopothingo nayo.

³ Ookuume ketu otaya vulu oku tu nwetha mo nawa nenge nayi. Omayeletumbulo 13:20 otayi tsikile ko tayi  ti: “Ngoka ta kala paagoya, ota likola uuwinayi.” MOshihebeli oshitya ‘okukala’ nagumwe otashi vulu okutya okupanga uukuume naye. (Omayeletumbulo 22:24) Ookuume mboka ye hole Kalunga otaye ke tu ladhipika tu kale aadhiginini kuye. Opo tu vule okuhogolola ookuume pandunge, natu kundathaneni kutya Kalunga oha hogolola ookuume ye li ngiini.

4. Omolwashike shi li uuthembahenda uunene okukala kuume kaKalunga? Omolwashike Jehova a li i ithana Abraham ‘kuume ke’?

⁴ Jehova, Omupangeli gweshito alihe, okwe tu pa ompito yokuninga ookuume ke. Shika kashi shi tuu uuthembahenda uunene! Jehova oha hogolola ookuume ke nuukeka. Oha hogolola mboka ye mu hole noye mu itaala. Dhiladhila kuAbraham. Okwa li i ilongekidha okulonga kehe shimwe Jehova te mu pula. Abraham okwa li aluhe hu ulike kutya omudhiginini nomuvuliki. Okwa li nokuli e na ehalo lyokuyamba po omwana Isak. Abraham okwa li i itaala kutya “Kalunga ota vulu okuyumudha Isak nokuusi.” (Aahebeli 11:17-19; Genesis 22:1, 2, 9-13) Omaukwatya ngoka ogo ga ningitha Jehova e mu ithane ‘kuume ke.’ — Jesaja 41:8; Jakob 2:21-23.

5. Jehova okwa tala ko ngiini mboka aadhiginini kuye?

⁵ Jehova okwa lenga ookuume ke. Ookuume ke ohaya kala ya hala okukala aadhiginini kuye oye awike. (Lesha 2 Samuel 22:26.) Molwaashoka oye mu hole oye li aadhiginini nohaya vulika kuye. Ombiimbeli otayi ti kutya Kalunga “okwi inekela aayuuki,” mboka haya vulika kuye. (Omayeletumbulo 3:32) Jehova ota hiya ookuume ke yi ikalekelwa ya kale “motempeli” ye. Ote ya hiya ye mu longele noya galikane kuye ethimbo kehe. — Episalomi 15:1-5.

6. Ongiini tatu vulu okuulika kutya otu hole Jesus?

 ⁶ Jesus okwa ti: “Oongoka e hole ndje, ota vulika koohapu dhandje. Tate ota kala e mu hole.” (Johannes 14:23) Opo tu ninge ookuume kaJehova, otwa pumbwa wo okukala tu hole Jesus nokuninga shoka e tu longa. Pashiholelwa, ohatu vulika kelombwelo lyaJesus lyokuuvitha onkundana ombwanawa nokuninga aantu aalongwa. (Mateus 28:19, 20; Johannes 14:15, 21) Molwaashoka otu hole Jesus, ohatu ‘landula ondjila ndjoka a li e yi ende.’ (1 Petrus 2:21) Jehova oha kala a nyanyukwa uuna e wete tatu ningi ngaashi tatu vulu, opo tu holele Omwana mokupopya nomiilonga yetu.

7. Omolwashike ookuume ketu ye na okukala ookuume kaJehova?

⁷ Ookuume kaJehova aadhiginini, aanashili, aavuliki noye hole Omwana. Mbela ohatu hogolola ookuume mboka ya fa yaJehova? Ngele ookuume koye ohaya holele Jesus nohaya kala yi ipyakidhila nokulonga yalwe kombinga yUukwaniilwa waKalunga, otaye ke ku kwathela u kale omuntu e li nawa nowu kale omudhiginini kuJehova.

8. Oshike oshihokithi kombinga yuukuume mboka wa li pokati kaRut naNaemi?

⁸ MOmbiimbeli otatu vulu okwiilonga mo kombinga yaantu mboka ya li ya panga uukuume, ngaashi uukuume mboka wa li pokati kaRut nayinamweno, Naemi. Aakiintu mbaka oya li ya za momaputuko nomiigwana ya yoolokathana, naNaemi okwa li omukuluntu kuRut. Ihe oya li ya panga uukuume wopothingo molwaashoka oya li ye hole Jehova. Sho Naemi a li ta tembuka muMoab a shune kuIsraeli, “Rut okwa tindile po puye.” Okwa lombwele Naemi a ti: “Aangandjoye otaa ka ninga  aangandjetu, ngaashika Kalunga koye ota ka kala Kalunga kandje wo.” (Rut 1:14, 16) Rut okwa li e hole Naemi noonkondo. Sho ya thiki muIsraeli, Rut okwa li a longo nuudhiginini, opo a kwathele kuume ke. Naemi okwa li e hole Rut tagu pu mo, nokwa li e mu pe omayele omawanawa. Rut okwa li a pulakene kuye, noshizemo, ayehe oya li ya mono omayambeko ogendji. — Rut 3:6.

9. Oshike oshihokithi kombinga yuukuume mboka wa li pokati kaJonatan naDavid?

⁹ Oshiholelwa shilwe oshaJonatan naDavid. Oya li ya panga uukuume wopothingo noya li aadhiginini kuJehova. Pokati kaDavid naJonatan opwa li pwa pita omimvo 30, naJonatan oye a li ta ka ninga omukwaniilwa gwaIsraeli. (1 Samuel 17:33; 31:2; 2 Samuel 5:4) Ihe sho a tseya kutya Jehova okwa hogolola David a ninge omukwaniilwa, ka li e mu tsila ondumbo nenge a ninge omathigathanopo naye. Pehala lyaashono, Jonatan okwa li a ningi kehe shoka ta vulu a kwathele David. Pashiholelwa, sho David a li moshiponga, Jonatan okwa li e “mu tsu omukumo.” Okwa li a tula omwenyo gwe moshiponga omolwaDavid. (1 Samuel 23:16, 17) David naye okwa li omudhiginini kukuume ke, Jonatan. Okwa li u uvaneke okusila oshimpwiyu aanegumbo ye nokwa li a gwanitha po euvaneko lye nokonima nokuli sho Jonatan a sa. — 1 Samuel 18:1; 20:15-17, 30-34; 2 Samuel 9:1-7.

10. Kaagundjuka yatatu Aahebeli, oshike tatu ilongo ko kombinga yuukuume?

¹⁰ Aagundjuka yatatu Aahebeli, Shadrak, Meshak naAbednego, nayo oya li ookuume. Oya li ya falwa muupongekwa manga ya li aashona. Nonando oya li kokule noyaandjawo, oya li ya kwathelathana, opo ya kale aadhiginini kuJehova. Sho ya koko, eitaalo lyawo olya li lya makelwa  sho omukwaniilwa Nebukadnezzar e ya lombwele yi inyongamene oshiyelekela shoshingoli. Oya li ya tindi oku shi inyongamena, e taya lombwele omukwaniilwa taya ti: “Tse itatu ka simaneka kalunga koye noitatu inyongamene koshiyelekela shoshingoli shoka wa dhika.” Sho eitaalo lyawo lya makelwa, ookuume mboka yatatu oya kala aadhiginini kuKalunga kawo. — Daniel 1:1-17; 3:12, 16-28.

11. Otu shi shi ngiini kutya Paulus naTimoteus oya li ookuume kopothingo?

¹¹ Sho omuyapostoli Paulus a tseyathana nomugundjuka Timoteus, okwa li a mono kutya Timoteus oku hole Jehova noku na ko nasha negongalo. Paulus okwa li e mu dheula, opo a kale ta kwathele aamwahe mboka ye li momahala gi ili nogi ili. (Iilonga 16:1-8; 17:10-14) Timoteus okwa li a longo nuudhiginini. Paulus okwe mu popi a ti: ‘Otwa kala tatu longo pamwe naye moshilonga shevaangeli.’ Paulus okwa li e shi shi kutya Timoteus ota ka kale e na “oshimpwiyu” nAakriste ooyakwawo. Sho ya kala taya longele Jehova pamwe nuudhiginini, oya panga uukuume wopothingo. — Aafilippi 2:20-22; 1 Aakorinto 4:17.

12, 13. (a) Omolwashike twa pumbwa okukala twa kotoka, uuna tatu hogolola ookuume nokuli nomegongalo? (b) Omolwashike omuyapostoli Paulus a li a gandja elondodho mAakorinto yotango 15:33?

¹² Otatu vulu okwiilonga oshindji kaamwatate nokaamwameme megongalo notatu vulu okukwathelathana tu kale aadhiginini. (Lesha Aaroma 1:11, 12.) Ihe nokuli nomegongalo otwa pumbwa okukala twa kotoka uuna tatu hogolola ookuume. Otu na aamwatate naamwameme  oyendji aawanawa ya za momihoko nomomaputuko gi ili nogi ili. Yamwe aape megongalo, omanga yalwe ya kala taya longele Jehova omimvo odhindji. Ngaashi owala hashi pula ethimbo, opo oshiyimati shi pye, ohashi pula wo ethimbo, opo ekwatathano lyomuntu naJehova li koke. Onkee ano, otu na okukala hatu idhidhimikilathana nohatu ulukilathana ohole. Otu na wo okuhogolola aluhe ookuume ketu pandunge. — Aaroma 14:1; 15:1; Aahebeli 5:12–6:3.

 ¹³ Omathimbo gamwe, megongalo otamu vulu okuholoka onkalo ya kwata miiti. Ngele ya holoka, natu kale lela twa kotoka. Otashi vulika omumwatate nenge omumwameme gwontumba a kale ha ningi iinima mbyoka Ombiimbeli tayi ti kutya oya puka. Nenge tashi vulika a tameke okukala e na iikala yokungungutula, mbyoka tayi vulu okuteya po egongalo. Shika kashi na oku tu kumitha, oshoka nopethimbo lyAakriste yopetameko, megongalo omwa li hamu kala omaupyakadhi omathimbo gamwe. Omuyapostoli Paulus okwa li nokuli a londodha Aakriste mboka a ti: “Inamu pukithwa. ‘We ende nombudhi, nangoye oto ningi ombudhi.’” (1 Aakorinto 15:12, 33) Paulus okwa li wo a londodha Timoteus, opo a kotokele mboka ta hogolola ya ninge ookuume ke kopothingo. Natse otu na okukala twa kotoka nokunena. — Lesha 2 Timoteus 2:20-22.

14. Ookuume mboka tatu hogolola ohaya gumu ngiini ekwatathano lyetu naJehova?

¹⁴ Otu na okugamena ekwatathano lyetu naJehova. Olyo oshinima shi na ondilo shoka tu na. Onkee ano, natu yande okupanga uukuume wopothingo nakehe ngoka ta vulu okunkundipaleka eitaalo lyetu nokuteya po ekwatathano lyetu naJehova. Ngaashi owala itaatu vulu okutula efulafula momeya ga kaka e tatu kala twa tegelela li kale li na omeya ga yela, itatu vulu okukala nookuume mboka haya ningi iinima ya puka, e tatu kala twa tegelela shi kale oshipu kutse okuninga shoka shu uka. Onkee ano, otu na okuhogolola ookuume ketu pandunge. — 1 Aakorinto 5:6; 2 Aatessalonika 3:6, 7, 14.

15. Oshike to vulu okuninga, opo wu mone ookuume aawanawa megongalo?

¹⁵ Megongalo oto vulu okwaadha mo aantu mboka ye hole Jehova noonkondo. Otaya vulu okuninga ookuume  koye kopothingo. (Episalomi 133:1) Ino panga owala uukuume naantu yepipi lyoye nenge yomeputuko lyeni. Dhimbulukwa kutya Jonatan okwa li e vule David kokule, na Rut okwa li omugundjuka lela kuNaemi. Otwa hala okulandula omayele gOmbiimbeli ngoka taga ti: ‘Natu egululileni omitima dhetu.’ (2 Aakorinto 6:13; lesha 1 Petrus 2:17.) Ngele oho holele Jehova, yalwe otaya ka kala ya hala okuninga ookuume koye.

16, 17. Ngele gumwe megongalo okwe tu uvitha nayi, oshike tu na okuyanda?

¹⁶ Megumbo kehe omu na aantu ye na omaukwatya nomataloko gi ili nosho wo omikalo dhokuninga iinima dhi ili. Shika osha faathana nomegongalo. Iinima mbyoka oyo hayi ningitha onkalamwenyo yi kale tayi hokitha, notatu vulu okwiilonga oshindji kuyalwe. Ihe molwaashoka otwa yoolokathana, omathimbo gamwe otashi vulika tu kale kaatu uvitathane naamwatate naamwameme e tatu kala tu uvite taye tu ningile nayi. Omathimbo gamwe otashi vulika tu uvithwe nayi nenge tu geyithwe. (Omayeletumbulo 12:18) Mbela otatu ke etha omaupyakadhi ga tya ngaaka ge tu teye omukumo nenge ge tu kaleke kokule negongalo?

¹⁷ Hasho nando. Nokuli nonando gumwe oku tu uvithe nayi, inatu kala kokule negongalo. Jehova haye e tu uvitha nayi. Okwe tu pa omwenyo niinima yilwe ayihe. Otwa pumbwa okukala tu mu hole notu li aadhiginini kuye. (Ehololo 4:11) Egongalo omagano ga za kuJehova, nohali tu kwathele tu kale neitaalo lya kola. (Aahebeli 13:17) Inatu hala okutinda omagano ngoka, molwaashoka owala gumwe e tu uvitha nayi. — Lesha Episalomi 119:165.

18. (a) Oshike tashi vulu oku tu kwathela tu kale hatu longele kumwe naamwatate naamwameme? (b) Omolwashike tu na okukala hatu dhimine po yalwe?

 ¹⁸ Otu hole aamwatate naamwameme notwa hala okukala hatu longele kumwe nayo. Jehova ina tegelela tu kale twa gwanenena. Natse inatu tegelela Aakriste ooyakwetu ya kale ya gwanenena. (Omayeletumbulo 17:9; 1 Petrus 4:8) Atuheni ohatu ningi omapuko, ihe ohole otayi ke tu kwathela tu tsikile ‘okwiidhiminathanatha po oondjo ethimbo kehe.’ (Aakolossa 3:13) Otayi ke tu kwathela wo, opo okapuko okashona kaatu ka ninge epuko enene. Oshoshili kutya uuna gumwe e tu ninga nayi, ohashi kala oshidhigu okukala itaatu shi dhiladhila. Oshipu okugeya nokukala twe mu kwatela onkone. Ohashi tu ningitha wo tu kale owala twa yemata. Ihe ngele otwe mu dhimine po, otatu ka kala tu na ombili yopamadhiladhilo nuukumwe megongalo. Shoka sha simana unene, otatu ka kala tu na ekwatathano ewanawa naJehova. — Mateus 6:14, 15; Lukas 17:3, 4; Aaroma 14:19.

19. Uunake tu na okuhulitha po eendathano nagumwe megongalo?

¹⁹ Megumbo moka aantu ye holathane, kehe gumwe oha kambadhala okunyanyudha yakwawo. Ihe ongiini ngele gumwe gwomuyo okwa ningi omunashipotha? Kehe gumwe megumbo otashi vulika a kambadhale oku mu kwathela, ihe ota tindi ekwatho lyawo. Otashi vulika a tokole a ze mo megumbo nenge omutse gwegumbo e mu lombwele a ze mo. Oshinima sha faathana otashi vulu okuholoka nomegongalo. Otashi vulika gumwe a tokole okukala ha ningi iinima mbyoka Jehova inaa  hokwa nokweetela egongalo oshiponga. Otashi vulika a tinde okukwathelwa e ta kala ta ningi iinima mbyoka tayi ulike kutya ina hala we okukala oshilyo shegongalo. Otashi vulika a tokole a thige po egongalo nenge a kondwe mo. Ngele shoka osha ningwa, Ombiimbeli otayi popi sha yela tayi ti kutya ‘inatu kwatathana’ naye. (Lesha 1 Aakorinto 5:11-13; 2 Johannes 9-11) Shika otashi vulu okukala oshidhigu ngele omuntu ngoka okuume ketu nenge gwaandjetu. Ihe ngele otwi iyadha monkalo ndjoka, uudhiginini wetu kuJehova owo nawu kale wa simanenena kutse, wu vule uudhiginini wetu kuyalwe. — Tala eyelitho eti-8.

20, 21. (a) Okukondwa oku li ngiini elongekidho lyopahole? (b) Omolwashike sha simana tu hogolole ookuume ketu pandunge?

²⁰ Okukondwa elongekidho lyopahole ndyoka Jehova a tula po. Ohaku gamene egongalo kwaamboka inaaya hala okulandula omithikampango dhaJehova. (1 Aakorinto 5:7; Aahebeli 12:15, 16) Ohaku tu kwathele tu ulike kutya otu hole Jehova, edhina lye eyapuki nomithikampango dhe dha dhenga mbanda. (1 Petrus 1:15, 16) Natango ohaku ulike kutya omuntu ngoka a kondwa oku holike. Egeeloputudho ndika lya kwata miiti otali vulu oku mu kwathela a mone kutya shoka ta ningi osha puka notali vulu oku mu inyengitha a lundulule. Oyendji mboka ya li ya kondwa, konima oya ka galukila kuJehova, negongalo olya li lye ya taamba ko nomaako agehe. — Aahebeli 12:11.

²¹ Ookuume ketu otaya vulu oku tu nwetha mo momukalo omwaanawa nenge omwiinayi. Onkee ano, osha simana tu ya hogolole pandunge. Ngele otu hole mboka Jehova e hole, otatu ka kala naantu mboka taya vulu oku tu kwathela tu kale aadhiginini kuye sigo aluhe.