1, 2. Oshike twa pumbwa okutseya kombinga yaSatana noompwidhuli dhe?

ONKALAMWENYO muuyuni uupe otayi ka kala ombwanawa. Otayi ka kala ngaashi Kalunga a li a lalakanena petameko. Ihe ngashingeyi, otu li muuyuni tawu pangelwa kuSatana noompwidhuli dhe. (2 Aakorinto 4:4) Nonando ihatu ya mono, oko ye li shili noye na oonkondo.

² Montopolwa ndjika, otatu ka kundathana nkene tatu vulu okukala popepi naJehova nokwiigamena kuSatana. Jehova oku uvaneka kutya ote ke tu kwathela. Ihe otwa pumbwa okutseya iineya yaSatana noompwidhuli dhe mbyoka haya longitha ye tu heke noku tu ponokela.

3. Satana okwa hala oku tu ningila shike?

³ Satana okwa ti kutya aantu ohaya longele Jehova omolwomatompelo gokwiihola mwene. Okwa ti wo kutya otatu ka etha po okulongela Jehova, uuna tu li moonkalo oondhigu. (Lesha Job 2:4, 5.) Ngele omuntu okwa hala okwiilonga kombinga yaJehova, Satana noompwidhuli dhe ohaye shi mono nohaya kambadhala oku mu ya moshipala. Ohaya kala ya geya ngele omuntu okwi iyapulile Jehova, e ta ninginithwa. Ombiimbeli otayi yelekanitha Satana ‘nonime tayi ndunduma, tayi kongo ngoka tayi mu ninagula po.’ (1 Petrus 5:8) Satana okwa  hala okuteya po ekwatathano lyetu naJehova. — Episalomi 7:1, 2; 2 Timoteus 3:12.

4, 5. (a) Oshike shoka Satana ita vulu okuninga? (b) ‘Okukondjitha Satana’ otashi ti shike?

⁴ Katu na okukala twa tila Satana noompwidhuli dhe. Jehova okwa ngambeka shoka taya vulu oku tu ningila. Oku uvaneka kutya “ongundu onene” yAakriste yashili otayi ka hupa ‘muudhigu uunene.’ (Ehololo 7:9, 14, yelekanitha OB-1954.) Ondiyapoli itayi vulu oku shi keelela, molwaashoka Jehova oha gamene aapiya ye.

 ⁵ Ngele otwa kala popepi naJehova, Satana ita vulu okuteya po ekwatathano lyetu naYe. Oohapu dhaKalunga otadhi tu shilipaleke tadhi ti: “Omuwa ota kala nane, ngele otamu kala naye.” (2 Ondjalulo 15:2; lesha 1 Aakorinto 10:13.) Aapiya yaJehova oyendji aadhiginini yonale, ngaashi Abel, Enok, Noa, Sara naMoses, oya li ya kondjitha Satana, mokukala popepi naJehova. (Aahebeli 11:4-40) Natse otatu vulu oku ya holela. Ombiimbeli otayi ti: “Kondjitheni Satana, ye note mu yi ontuku.” — Jakob 4:7.

6. Satana ohe tu ponokele ngiini?

⁶ Jehova okwa ngambeka Satana kee tu ningile shoka a hala. Satana oshinima shoka oku shi shi. Ihe nonando ongawo, oha kambadhala ngaashi ta vulu a nkundipaleke ekwatathano lyetu naJehova. Kunena, Satana ohe tu ponokele momikalo odhindji dha yoolokathana. Oha longitha iineya mbyoka a kala nokulongitha uule womimvo omayuvi dha ka pita. Iineya mbyoka ongaashi yini?

7. Omolwashike Satana ha ponokele aapiya yaJehova?

⁷ Omuyapostoli Johannes okwa nyola a ti: “Uuyuni auhe ou li mepangelo lyomuhindadhi.” (1 Johannes 5:19) Satana oye omupangeli gwuuyuni mbuka wa kolokosha, nokwa hala wo okupangela aapiya yaJehova. (Mika 4:1; Johannes 15:19; Ehololo 12:12, 17) Satana oku shi shi kutya oku na ko owala okathimbo okafupi. Onkee oha kambadhala a mana mo a ponokele kehe gumwe gwomutse, a kale kee shi omudhiginini kuKalunga. Omathimbo gamwe, Satana ohe tu ponokele shu ukilila, ihe omathimbo galwe ohe shi ningi monanguwi.

8. Oshike Omukriste kehe e na okukala e shi?

⁸ Aaefeso 6:12 otayi ti: ‘Otatu kondjitha oonkondo dhuuwinayi mewangandjo.’ Omukriste kehe oku na  okukondjitha pauhandimwe Satana noompwidhuli dhe. Otu na okukala tu shi kutya kehe gumwe ngoka i iyapulila Jehova oku li molugodhi ndoka. Montumwafo ndjoka omuyapostoli Paulus a li a nyolele Aaefeso, okwe ya ladhipike ya ‘kandeke,’ ‘yi ipopile’ noya ‘kale yi ilongekidha.’ — Aaefeso 6:11, 13, 14.

9. Satana noompwidhuli dhe ohaya kambadhala oku tu ningila shike?

⁹ Satana noompwidhuli dhe ohaya kambadhala oku tu pukitha momikalo dhi ili nodhi ili. Ngele otwa pondola okukondjitha Satana pompito yimwe, itashi ti kutya ke na we siku e ke tu yule momukalo gulwe. Oha tala kutya otu na omaunkundi geni, opo a mone kutya omwigo guni ta vulu oku tu kwata nago. Ihe katu na okweetha tu ye moomwigo dhe, oshoka Ombiimbeli oye tu kwathela tu tseye omakoto ge. (2 Aakorinto 2:11; tala eyelitho eti-31.) Omwigo gwe gumwe ngoka ha longitha, uumpulile.

10. (a) Uumpulile oshike? (b) Jehova okwa tala ko ngiini uumpulile?

¹⁰ Uumpulile owa kwatela mo oonkondo kaadhi li paunshitwe ndhoka hadhi ningitha omuntu a kale e na ekwatathano noompwidhuli. Owa kwatela mo iinima ngaashi: Okwaanekela, okuloga, okutikila nenge okupopya naakwampungu. Ombiimbeli otayi ti kutya uumpulile oshinima ‘oshinyanyalithi.’ Otayi ti wo kutya itatu vulu okukala hatu longele Jehova, pethimbo opo tuu mpoka otatu kutha ombinga muumpulile. (Deuteronomium 18:10-12; Ehololo 21:8) Osha yela kutya Aakriste oye na okuyanda thiluthilu omikalo adhihe dhuumpulile. — Aaroma 12:9.

11. Oshike tashi vulu oku tu ningilwa, ngele otu na okatalekonawa kiinima mbyoka yi na oonkondo kaadhi shi dhopaunshitwe?

¹¹ Satana oku shi kutya ngele otu na okatalekonawa kiinima mbyoka yi na oonkondo kaadhi shi dhopaunshitwe,  otashi ka kala oshipu kuye e tu yule nuumpulile. Oshinima kehe sha nika uumpulile, otashi teya po ekwatathano lyetu naJehova.

12. Satana oha kambadhala ngiini okunwetha mo omadhiladhilo gaantu?

¹² Satana oha kambadhala okupukitha omadhiladhilo gaantu. Ohe ende ta kunu kashona nakashona omalimbililo momadhiladhilo gaantu, sigo taya tameke okudhiladhila kutya “uuwinayi owo uuwanawa, nuuwanawa owo uuwinayi.” (Jesaja 5:20) Ondiyapoli otayi humitha komeho omadhiladhilo ga puka kutya omayele gOmbiimbeli oga kwisha nosho wo kutya otatu ka kala twa nyanyukwa ngele ohatu ipwililikile omithikampango dhaKalunga.

13. Ongiini Satana a kala nokukuna omalimbililo?

¹³ Omukalo gumwe gwaSatana ngoka hagu pondola mokupukitha aantu, ogwo okukuna omalimbililo. Okwa kala noku gu longitha ethimbo nuule. Moshikunino shaEden, okwa kambadhala okukuna omalimbililo muEva, sho e mu pula a ti: “Kalunga okwe mu lombwele shili, mwaa lye komiti adhihe dhomeyana?” (Genesis 3:1) Pethimbo lyaJob, Satana okwa li a pula Jehova montaneho yaayengeli a ti: “U shi Job oha tila Kalunga owala?” (Job 1:9) Konima owala sho Jesus a ninginithwa, Satana okwe mu yeleke a ti: “Ngele ngoye Omuna gwaKalunga, lombwela omamanya ngaka, ga shituke iikwiila.” — Mateus 4:3.

14. Satana oha kambadhala ngiini okuningitha aantu ya kale ya limbililwa ngele uumpulile owa nika oshiponga?

¹⁴ Satana ota tsikile okukuna omalimbililo maantu nopethimbo lyetu. Oha kambadhala okuningitha aantu ya kale ya limbililwa ngele uumpulile owa puka ngaa shili, mokuningitha iinima yimwe yawo yi kale ya fa inayi nika oshiponga. Aakriste yamwe oya gwila momwigo  ngoka. (2 Aakorinto 11:3) Oshike tu na okuninga, opo tu igamene? Ongiini tatu vulu okukala twa kotoka, opo kaatu pukithwe kiineya yaSatana? Natu kundathaneni omikalo mbali moka ta vulu oku tu kengelela. Gwotango, omainyanyudho nomutiyali uuna tatu ehama.

15. Ongiini tatu vulu okukala tu na ekwatathano noombepo dha nyata okupitila momainyanyudho?

¹⁵ Kunena, oomuvi odhindji, uuvidio, oopolohalama dhokotiivii, omaudhano gokokompiuta nomapandja gokointaneta ohagu ulike iinima ya nika uumpulile, uulodhi nenge iinima yi na oonkondo kaadhi li paunshitwe. Oyendji oya tala ko iinima mbyoka inaayi nika oshiponga notayi nyanyudha. Ihaya mono kutya osha nika oshiponga okunwethwa mo koombepo dha nyata monkalamwenyo yawo. Omuntu ota vulu wo okukala e na ekwatathano noombepo dha nyata okupitila miinima ngaashi, okwiitaala moonyothi, okutala mokakola, okutongolola oondjila dhopeke nosho wo okuhunganeka. Ondiyapoli ohayi ningitha iinima mbyoka ya nika oshiponga yi kale ya fa tayi kumitha, tayi hokitha notayi nyanyudha. Omuntu otashi vulika a dhiladhile nokuli kutya kapu na omuponga gwasha okutala iinima mbyoka ya nika uumpulile nenge yi na oonkondo kaadhi li paunshitwe, shampa owala iha kutha ombinga muyo. Omolwashike okudhiladhila kwa tya ngawo kwa nika oshiponga? — 1 Aakorinto 10:12.

16. Omolwashike tu na okuyanda omainyanyudho ngoka ga kwatela mo iinima yi na oonkondo kaadhi li paunshitwe?

¹⁶ Satana noompwidhuli dhe ihaya mono shoka shi li momadhiladhilo getu. Ihe ohaya vulu okumona shoka tu hole nosho wo nkene hatu dhiladhila, mokutala komatokolo ngoka tatu ningi pauhandimwe nenge naantu yaandjetu nosho wo omainyanyudho ngoka hatu hogolola.  Ngele otu hole oomuvi, oongalo nenge omambo ge na ko nasha nokupula aathithi, okutikila, aantu ye na oompwidhuli, aalodhi, iishitukila hayi thipi aantu ombinzi nosho wo iinima ya fa mpoka, Satana noompwidhuli dhe otaya ka mona kutya otu na ohokwe muumpulile. Otaya ka kambadhala oku tu nwetha mo tu kale twa pwila muumpulile. — Lesha Aagalati 6:7.

17. Satana ota vulu oku tu kwata ko ngiini, ngele katu na uukolele?

¹⁷ Kehe gumwe okwa hala okukala e na uukolele, na Satana ota vulu okupitila mo e tu kwate ko. Aantu oyendji kunena, kaye na uukolele. Omuntu otashi vulika a kale ta vundu noshipangelo nokuya koondohotola dhi ili nodhi  ili, ihe ita mono ekwatho lyasha. (Markus 5:25, 26) Otashi vulika nokuli a kale a halelela okwaaluka, shono tashi mu ningitha a kale a hala okuya koonganga nenge a pewe ekwatho lyopaunamiti lya kwatela mo uumpulile. Ihe tu li Aakriste, otu na okukala twa kotoka, opo kaatu kuthe ombinga mepango kehe ndyoka lya kwatela mo ‘uumpulile.’ — Levitikus 19:31.

18. Epango lini Omukriste e na okukala kokule?

¹⁸ Jehova ota londodha mboka haya teya ompango ye ta ti: “Ngoka ta thitike omakutsi ge kaa uve ompango, negalikano lye olyo iihuna.” (Omayeletumbulo 28:9) Dhiladhila owala kutya Jehova ita ka pulakena nokuli komagalikano gomuntu a tya ngawo. Inatu hala okuninga sha shoka tashi yono po ekwatathano lyetu naJehova notashi mu ningitha kee tu kwathele, unene tuu ngele tatu ehama. (Episalomi 41:3) Onkee ano, otu na okushilipaleka kutya epango kehe tatu hogolola kali na ekwatathano nuumpulile, noinali kwatela mo iinima yi na oonkondo kaadhi li paunshitwe. (Mateus 6:13) Ngele epango olya kwatela mo iinima mbyono, natu li kale kokule. — Tala eyelitho eti-32.

19. Satana oha ningitha ngiini aantu oyendji ya kale ya tila?

¹⁹ Aantu yamwe ohaya dhiladhila kutya Satana noompwidhuli dhe kaye ko, omanga yalwe ye shi shi kutya oko ye li, omolwoonkalo ndhoka ya pita mudho. Oyendji ohaya kala ya tila oombepo dhuuwinayi noya ninga aapika yiidhila. Yamwe ohaya ningitha yalwe ya kale ya tila oompwidhuli, mokuhokolola iinima iiwinayi mbyoka hadhi ningile aantu. Olundji aantu ohaya kala ya hokwa omahokololo ngoka, nohaya kala ya halelela oku ga lombwela yalwe. Omahokololo ngoka ohaga ningitha aantu ya kale ya tila Satana.

20. Ongiini tatu vulu okutaandelitha iifundja yaSatana?

 ²⁰ Satana okwa hala aantu ya kale haye mu tila. (2 Aatessalonika 2:9, 10) Omufundja noku shi okunwetha mo omadhiladhilo gaantu mboka ye hole uumpulile, nohe ya ningitha yi itaale iinima mbyoka yaashi yoshili. Aantu mboka otashi vulika ya hokolole kombinga yiinima mbyoka haya dhiladhila kutya oya mona noyu uva. Omahokololo ngoka ohaga ende taga gwedhelwa sho aantu taye ga hokolola lwiikando. Inatu hala okukwathela Satana sho ta tilitha aantu, mokukala tatu taandelitha omahokololo ga tya ngaaka. — Johannes 8:44; 2 Timoteus 2:16.

21. Pehala lyokukala tatu hokolola kombinga yoompwidhuli, otatu vulu okupopya kombinga yashike?

²¹ Ngele gumwe gwomaapiya yaJehova okwa li e na ekwatathano noompwidhuli, ke na okukala ta taandeleke omahokololo ga tya ngaaka, opo a nyanyudhe yalwe. Aapiya yaJehova inaya pumbwa okutilithwa kiinima mbyoka Satana noompwidhuli dhe haya ningi. Pehala lyaashono, natu kale hatu popi kombinga yaJesus nosho wo oonkondo ndhoka Jehova e mu pa. (Aahebeli 12:2) Jesus ka li ha nywitha omakutsi gaalongwa ye moku ya hokololela omahokololo ge na ko nasha noompwidhuli. Okwa kala ta gandja eitulomo ketumwalaka lyUukwaniilwa nosho wo ‘kiilonga iinene yaKalunga.’ — Iilonga 2:11; Lukas 8:1; Aaroma 1:11, 12.

22. Owa tokola toko okuninga shike?

²² Inatu dhimbwa kutya elalakano lyaSatana, olyo okuyona po ekwatathano lyetu naJehova. Ota ka kambadhala a mana mo e li teye po. Ihe iineya ye otu yi shi notwa tokola toko okuyanda omikalo dhe adhihe dhuumpulile. Inatu “pa omuhindadhi ompito,” a nkundipaleke etokolotoko lyetu. (Lesha Aaefeso 4:27.) Onkee ano, ngele otatu kondjitha Satana, ite ke tu yula noomwigo dhe, na Jehova ote ke tu gamena. — Aaefeso 6:11.