1. Muusiku mboka wa tetekele eso lye, Jesus okwa li ti ipula kombinga yashike?

OSHA LI uusiku mboka wa tetekele eso lyaJesus. Okwa li e shi kutya oku li pokuthiga po aalongwa ye, nokwa li ti ipula kombinga yonakuyiwa yawo. Okwe ya lombwele a ti: ‘One mwaa shi yomuuyuni.’ (Johannes 15:19, OB-1954) Lwanima, okwa galikana kuHe kombinga yawo, a ti: “Ngashi ngame ndaa shi gwomuuyuni, osho wo nayo kaye shi yomuuyuni.” (Johannes 17:15, 16) Jesus okwa li ta ti ngiini?

2. ‘Uuyuni’ mboka wa popiwa kuJesus oshike?

² Uutumbulilo ‘uuyuni’ owa ukitha kaantu mboka kaaye shi Kalunga noye li kohi yepangelo lyaSatana. (Johannes 14:30; Aaefeso 2:2; Jakob 4:4; 1 Johannes 5:19) Ongiini tatu vulu okukala ‘twaa shi yomuuyuni’? Montopolwa ndjika otatu ka kundathana omikalo dhontumba moka tatu vulu oku shi ninga, ngaashi: Ohatu kala aadhiginini kUukwaniilwa waKalunga noihatu kutha ombinga miinima yopapolitika. Ohatu kondjitha ombepo yuuyuni. Ohatu zala nokwiiyopaleka momukalo gu shi okutalwa notu na etaloko li li pandjele lyiimaliwa. Ohatu ihomateke wo iikondjitho mbyoka Kalunga e tu pa. — Tala eyelitho eti-16.

3. Jesus okwa li a tala ko ngiini opolitika?

³ Sho Jesus a li kombanda yevi, okwa li a mono kutya aantu oye na omaupyakadhi ogendji nosho wo kutya onkalamwenyo yawo kayi shi ompu. Okwa li lela e na ko nasha nayo nokwa li a hala oku ya kwathela. Mbela okwa li a ningi omuwiliki gwopapolitika? Hasho nando. Okwa li e shi kutya shoka aantu ya pumbwa, Uukwaniilwa nenge tu tye epangelo lyaKalunga. Jesus okwa li ta ka ninga Omukwaniilwa gwUukwaniilwa mboka. Uukwaniilwa owo wa li enenedhiladhilo melongo lye. (Daniel 7:13, 14; Lukas 4:43; 17:20, 21) Jesus ka li nando ha kutha ombinga mopolitika. Sho a li komeho gOmupangeli Omuroma, Pontius Pilatus, okwa ti: “Uukwaniilwa wandje kau shi womuuyuni mbuka.” (Johannes 18:36) Aalongwa ye nayo kaya li haya kutha ombinga mopolitika. Embo On the Road to Civilization olya ti kutya Aakriste yopetameko “kaya li ye na oondondo dhopapolitika.” Aakriste yashili kunena, nayo ohaya ningi sha faathana. Ohatu ambidhidha Uukwaniilwa waKalunga nuudhiginini noihatu kutha ombinga miinima yopapolitika yomuuyuni mbuka. — Mateus 24:14.

4. Aakriste yashili ohaya ambidhidha ngiini Uukwaniilwa waKalunga?

⁴ Aatumwakalelipo ohaya kalele po epangelo lyawo miilongo yilwe. Onkee ihaya kutha ombinga miinima yopapolitika miilongo moka taya longele. Mboka ye na etegameno lyoku ka pangela pamwe naJesus megulu, ano aagwayekwa, oye li monkalo ya faathana. Paulus okwa li a nyolele Aakriste aagwayekwa a ti: “Tse aatumwa yaKristus.” (2 Aakorinto 5:20) Aagwayekwa oye lile po epangelo lyaKalunga. Ihaya kutha ombinga miinima yopapolitika yomuuyuni mbuka. (Aafilippi 3:20) Pehala lyaashono,  aagwayekwa oya kala nokukwathela aantu omamiliyona yi ilonge kombinga yepangelo lyaKalunga. ‘Oonzi dhilwe,’ ndhoka dhi na etegameno lyoku ka kala nomwenyo sigo aluhe muuyuni uupe kombanda yevi, ohadhi ambidhidha aagwayekwa. Nadho ihadhi kutha ombinga mopolitika. (Johannes 10:16; Mateus 25:31-40) Osha yela kutya kapu na Omukriste gwashili ta ka kutha ombinga mopolitika. — Lesha Jesaja 2:2-4.

5. Omolwetompelo limwe lini Aakriste ihaaya kutha ombinga miita?

⁵ Aakriste yashili oya tala ko ooitaali ooyakwawo ye li aamwayina noya hangana, kashi na nduno mbudhi kutya oya za moshilongo shini nenge meputuko lini. (1 Aakorinto 1:10) Onkee ano, ngele otwa yi kiita, otatu ka kondjitha ooitaali ooyakwetu, mboka Jesus e tu lombwele tu kale tu ya hole. (Johannes 13:34, 35; 1 Johannes 3: 10-12) Shimwe ishewe, Jesus okwa lombwele aalongwa ye ya kale ye hole aatondi yawo. — Mateus 5:44; 26:52.

6. Aapiya yaJehova mboka ye mu iyapulila, oya tala ko ngiini omapangelo?

⁶ Tu li Aakriste, nonando ihatu kutha ombinga mopolitika, ohatu longo nuudhiginini tu kale aakwashigwana ye li nawa. Pashiholelwa, ohatu ulike kutya otwa simaneka epangelo, mokuvulika koompango dhalyo nomokufuta iifendela. Ihe ohatu shilipaleke aluhe okugandja shoka ‘shaKalunga kuKalunga.’ (Markus 12:17; Aaroma 13:1-7; 1 Aakorinto 6:19, 20) “ShaKalunga” osha kwatela mo ohole yetu yoku mu hola, okuvulika kuye noku mu longela. Otwi ilongekidha okusa, pehala lyokwaavulika kuye. — Lukas 4:8; 10:27; lesha Iilonga 5:29; Aaroma 14:8.

7, 8. “Ombepo yuuyuni” oshike, nohayi nwetha mo ngiini aantu?

⁷ Okwiiyoolola ko kuuyuni waSatana, otashi ti kutya itatu etha “ombepo yuuyuni” yi tu pangele. Ombepo ndjoka oya kwatela mo okudhiladhila nokwiihumbata ngaashi Satana, nohayi pangele mboka ihaaya longele Jehova. Ihe Aakriste ohaya kondjitha ombepo ndjoka. Ngaashi Paulus e shi popi, “tse inatu pewa ombepo yuuyuni mbuka, ihe otwa pewa ombepo ya zi kuKalunga.” — 1 Aakorinto 2:12; Aaefeso 2:2, 3; tala eyelitho eti-17.

⁸ Ombepo yuuyuni ohayi ningitha aantu ya kale yi ihole yo yene, ye na uuntsa naanashipotha. Ohayi ya ningitha ya dhiladhile kutya kaye na okuvulika kuKalunga. Satana okwa hala aantu ya kale taya ningi ngaashi ya hala, nopwaa na okudhiladhila kiilanduliko. Okwa hala aantu yi itaale kutya “uuhalu wopantu okuhola mbyoka aantu taye yi tala,” oyo iinima ya simanenena monkalamwenyo. (1 Johannes 2:16; 1 Timoteus 6:9, 10)  Satana ota kambadhala unene okupukitha aapiya yaJehova noku tu ningitha tu dhiladhile ngaashi ye. — Johannes 8:44; Iilonga 13:10; 1 Johannes 3:8.

9. Ombepo yuuyuni otayi vulu oku tu nwetha mo ngiini?

⁹ Ngaashi owala ombepo ndjoka hatu fudha, ombepo yuuyuni nayo oye tu kundukidha. Ngele itatu longo nuudhiginini tu kondjithe ombepo ndjoka, otayi ke tu nwetha mo. (Lesha Omayeletumbulo 4:23.) Shika ohashi vulika shi tameke miinima mbyoka tayi monika ya fa iishona, ngaashi okweetha tu nwethwe mo kokudhiladhila nokeihumbato lyaamboka ihaaya longele Jehova. (Omayeletumbulo 13:20; 1 Aakorinto 15:33) Nenge tashi vulika tu nwethwe mo kiinima ngaashi omathano giipala, aashunimonima nenge omaudhano gomathigathanopo. — Tala eyelitho eti-18.

10. Ongiini tatu vulu okukondjitha ombepo yuuyuni?

¹⁰ Ongiini nduno tatu vulu okuyanda okupangelwa kombepo yuuyuni? Otwa pumbwa okukala popepyeelela naJehova nokweetha uunongo we wu tu wilike. Otu na okukala hatu galikana aluhe e tu pe ombepo ye ondjapuki, nokukala twi ipyakidhila miilonga ye. Jehova oye Omunankondoadhihe meshito alihe. Otu na einekelo kutya ota vulu oku tu kwathela tu kondjithe ombepo yuuyuni. — 1 Johannes 4:4.

11. Ombepo yuuyuni oya nwetha mo ngiini omukalo gwaantu gwokuzala?

¹¹ Ohatu ulike wo kutya katu shi oshitopolwa shuuyuni, momukalo moka hatu zala nohatu iyopaleke. Aantu oyendji muuyuni ohaya zala omizalo dhontumba, opo yalwe ya gandje eitulomo kuyo, ya penduthe omahalo muyalwe gopamilalo, ya ulike kutya oye li ompinge naantu yalwe nenge yi iyulike kutya oye na oshimaliwa.  Aantu yalwe ihaya kala ye na ko nasha neholokopo lyawo. Otashi vulika nokuli ya tokole okukala ya kaka. Itatu vulu okweetha iikala mbyoka yi nwethe mo okuzala nokwiiyopaleka kwetu.

12, 13. Omakotampango geni taga vulu oku tu kwathela tu hogolole shoka tatu zala?

¹² Tu li aapiya yaJehova, otwa hala aluhe okuzala oonguwo dhi shi okutalwa, dha yela notadhi opalele mpoka tu li. Ohatu zala “oonguwo dhi shi kutalwa nodha yogoka,” opo tu ulike kutya tse “oonakutila Kalunga.” — 1 Timoteus 2:9, 10, yelekanitha OB-1954; Judas 21.

 ¹³ Omukalo moka hatu zala, otagu vulu okuguma yalwe nkene ya tala ko Jehova noshigwana she. Otwa hala okulonga “ayihe nokusimanekitha Kalunga.” (1 Aakorinto 10:31) Okuzala nawa okwa kwatela mo okusimaneka omaiyuvo nomataloko gayalwe. Onkee ano, uuna tatu hogolola oonguwo dhetu nenge tatu tokola kutya otwa hala okumonika ngiini, otu na okudhimbulukwa kutya ohashi gumu yalwe. — 1 Aakorinto 4:9; 2 Aakorinto 6:3, 4; 7:1.

14. Otu na okudhiladhila kombinga yashike, uuna tatu hogolola shoka tatu zala tu ka longe iilonga yopaKriste?

¹⁴ Ohatu zala ngiini, uuna tu li pokugongala nenge miilonga yokuuvitha? Mbela ohatu gandja unene eitulomo kutse yene? Mbela oonguwo dhetu ohadhi sitha yalwe ohoni? Mbela ohatu kala tu uvite kutya omukalo moka hatu zala kagu shi iilonga yomuntu? (Aafilippi 4:5; 1 Petrus 5:6) Odhoshili kutya ohatu kala twa hala okumonika nawa, ihe shoka hashi tu ningitha unene tu kale two opala, uukwatya wetu wopaKriste. Uukwatya mboka owo Jehova ha mono, uuna te tu tala. Ohawu ulike kutya otu li ngiini momitima, ano ‘eopalo lyomeni ndyoka li na oshilonga oshinene koshipala shaKalunga.’ — 1 Petrus 3:3, 4.

15. Omolwashike Jehova ihee tu lombwele kutya natu zale shike kondandalunde nenge nkene tu na okumonika?

¹⁵ Jehova ine tu tulila po omusholondondo gwaashoka tu na okuzala naashoka kaatu na okuzala. Pehala lyaashono, okwe tu pa omakotampango gopaMbiimbeli, ngoka taga vulu oku tu kwathela tu ninge omatokolo omawanawa. (Aahebeli 5:14) Omatokolo getu kutya nduno omanene nenge omashona, Jehova okwa hala ga kale gi ikolelela kohole yetu yoku mu hola nosho wo yokuhola aantu ooyakwetu. (Lesha Markus 12:30, 31.) Muuyuni awuhe,  aapiya yaJehova ohaya zala momikalo dha yoolokathana shi ikolelela keputuko lyawo nokwaashoka ye hole. Shoka ohashi ya ningitha ya kale yo opala.

16. Aantu muuyuni oye na etaloko lini lyiimaliwa, ndyoka li li ompinge naashoka Jesus e tu longa? Omapulo geni tu na okwiipula?

¹⁶ Satana okwa hala aantu ya dhiladhile kutya iimaliwa niinima yopamaliko, oyo tayi ya etele enyanyu, ihe aapiya yaJehova oye shi kutya shoka kashi shi shoshili. Otu na einekelo moohapu dhaJesus ndhoka tadhi ti: “Okukalamwenyo kwomuntu kombanda yevi itaku lelepekwa kowindji weliko lye.” (Lukas 12:15) Iimaliwa itayi  vulu nando oku tu etela enyanyu lyashili. Itayi vulu oku tu pa ookuume kashili, ombili yashili yopamadhiladhilo nenge omwenyo gwaaluhe. Odhoshili kutya otwa pumbwa iinima yimwe yopamaliko nonokutya otwa hala okunyanyukilwa onkalamwenyo. Ihe Jesus okwe tu longa kutya otatu ka kala twa nyanyukwa, ngele otu na ekwatathano ewanawa naKalunga nongele oku mu longela okwo oshinima sha simanenena monkalamwenyo yetu. (Mateus 5:3; 6:22) Ipula to ti: ‘Mbela onda nwethwa mo ketaloko lyuuyuni li na ko nasha niimaliwa? Mbela ohandi kala tandi dhiladhila nokupopya unene kombinga yiimaliwa?’ — Lukas 6:45; 21:34-36; 2 Johannes 6.

17. Onkalamwenyo yoye otayi ka kala ya tya ngiini, ngele owa kala inoo tala ko iimaliwa ngaashi uuyuni?

¹⁷ Ngele otwa kala tatu gandja eitulomo kokulongela Jehova nokuyanda etaloko lyuuyuni lyiimaliwa, onkalamwenyo yetu otayi ka kala yi na eityo. (Mateus 11:29, 30) Otatu ka kala twa gwanenwa notu na ombili yopamadhiladhilo noyokomwenyo. (Mateus 6:31, 32; Aaroma 15:13) Itatu ka kala unene tatu ipula niinima yopamaliko. (Lesha 1 Timoteus 6:9, 10.) Otatu ka mona enyanyu ndyoka hali zi mokugandja. (Iilonga 20:35) Otatu ka mona ethimbo lyokukala naamboka tu hole. Otashi vulika wo tu kale hatu kotha nawa. — Omuuvithi 5:12.

18. Satana ota kambadhala oku tu ningila shike?

¹⁸ Satana ota kambadhala okuyona po ekwatathano lyetu naJehova. Onkee ano, otu na okuninga ngaashi tatu vulu tu li kaleke po. Otatu kondjitha “oonkondo dhuuwinayi mewangandjo.” (Aaefeso 6:12) Satana noompwidhuli dhe inaya hala tu kale twa nyanyukwa nenge tu ka kale nomwenyo sigo aluhe. (1 Petrus 5:8) Aatondi mboka  aanankondo otaye tu kondjitha, ihe kekwatho lyaJehova otatu vulu okusindana molugodhi ndwoka!

19. “Iikondjitho” yini yOmukriste ya popiwa mAaefeso 6:14-18?

¹⁹ Pethimbo lyonale, aakwiita oya li hayi ihomateke iikondjitho, opo ye ki igamene molugodhi. Momukalo gwa faathana, natse otu na okuzala “iikondjitho” mbyoka Jehova e tu pa. (Aaefeso 6:13) Otayi ke tu gamena. Iikondjitho mbyoka oya popiwa mAaefeso 6:14-18: ‘Kaleni ano omuthika mwi ilongekidha; zaleni oshili, yi ninge epaya moombunda dheni. Izalekeni uuyuuki, u ninge ehuuyanza poontulo dheni. Kaleni mwi ilongekidha okuuvitha elaka etoye lyombili, li kale oongaku dhokoompadhi dheni. Ethimbo alihe zaleni eitaalo ongoshikandekitho, opo mu wape okudhima nalyo iikuti ayihe ya hwama omulilo mbyoka tayi umbwa kuMwiinayi. Taambeni ehupitho, li ninge ongegala lyosheela, noohapu dhaKalunga ongegongamwele, ndyoka ombepo tayi li mu pe. Mbika ayihe yi longeni negalikano okwiindila ekwatho lyaKalunga. Galikaneni aluhe, ombepo ngaashi tayi mu wilike. Onkee ano kaleni mwa tonata ne inamu teka omukumo. Galikaneneni aantu yaKalunga ayehe.’

20. Oshike tu na okuninga, opo “iikondjitho” yi tu gamene?

²⁰ Ngele omukwiita okwa dhimbwa okuzala oshikondjitho she shimwe, aatondi ye otaye ke mu monitha oshiponga mpoka inaa gamenwa. Ngele otwa hala “iikondjitho” yetu yi tu gamene, otu na oku yi zala ayihe. Otwa pumbwa oku yi zala ethimbo alihe noku yi kaleka monkalo ombwanawa. Olugodhi lwetu otalu tsikile sigo uuyuni waSatana wa hanagulwa po naasho Satana noompwidhuli dhe taya ka tulwa molumbogo. (Ehololo 12:17; 20:1-3) Onkee ano, ngele otatu kondjitha omahalo ga puka nenge uunkundi wontumba, inatu teka omukumo! — 1 Aakorinto 9:27.

21. Ongiini tatu vulu okusindana molugodhi lwetu?

 ²¹ Satana itatu vulu oku mu sinda kutse yene, ihe okekwatho lyaJehova. Opo tu kale aadhiginini kuJehova, otwa pumbwa okukala hatu galikana kuye, hatu konakona Oohapu dhe nohatu endathana naamwatate naamwameme. (Aahebeli 10:24, 25) Iinima mbika otayi ke tu kwathela tu kale aadhiginini kuKalunga nokukala twi ilongekidha okupopila eitaalo lyetu.

22, 23. (a) Ongiini tatu vulu okukala aluhe twi ilongekidha okupopila eitaalo lyetu? (b) Oshike tatu ka kundathana montopolwa tayi landula?

²² Otwa pumbwa okukala twi ilongekidha okupopila aluhe eitaalo lyetu. (Johannes 15:19) Opu na iinima yimwe hayi ningwa kOonzapo dhaJehova momukalo gwa yooloka ko kwaangoka hayi ningwa koyendji. Ipula to ti: ‘Mbela ondi uvite ko ngaa lela kutya omolwashike ihaatu ningi oshinima shontumba? Mbela ondi itaala ngaa kutya shoka tashi popiwa mOmbiimbeli nokomupiya omudhiginini nomunandunge, oshi li mondjila? Mbela ondi uvite ngaa uuntsa nuunambano sho ndi li Onzapo yaJehova? (Episalomi 34:2; Mateus 10:32, 33) Mbela otandi vulu ngaa okuyelithila yalwe kombinga yeitaalo lyandje?’ — Mateus 24:45; Johannes 17:17; lesha 1 Petrus 3:15.

²³ Moonkalo odhindji, ohashi kala sha yela kutya natu ninge shike, opo tu kale twa yooloka ko kuuyuni. Ihe poompito dhimwe ihatu kala tu shi shi. Satana oha kambadhala oku tu yula momikalo dhi ili nodhi ili. Omwigo gumwe ngoka ha longitha, omainyanyudho. Ongiini tatu vulu okuhogolola omainyanyudho pandunge? Shika otatu ke shi kundathana montopolwa tayi landula.