1, 2. (a) Otu na okulandula ewiliko lyalye? (b) Omapulo geni tatu ka kundathana montopolwa ndjika?

SHO wa li okanona, otashi vulika omathimbo gamwe aavali yoye ya li haye ku lombwele wu ninge sha, ihe kwa li ho kala wa hala oku shi ninga. Owa li wu ya hole nowa li wu shi kutya owu na okuvulika kuyo. Ihe natango haaluhe wa li ho kala wa hala okuvulika.

² Otu shi shi kutya Tate yetu, Jehova, oku tu hole. Ohe tu sile oshimpwiyu noha shilipaleke kutya otu na ashihe shoka twa pumbwa, opo tu nyanyukilwe onkalamwenyo. Ohe tu wilike, opo tu pondole monkalamwenyo. Omathimbo gamwe oha longitha aantu yalwe ye tu wilike. Onkee ano, otu na oku ya simaneka. (Omayeletumbulo 24:21) Ihe omolwashike omathimbo gamwe hashi kala oshidhigu okuvulika kuyo? Omolwashike Jehova te tu pula tu kale hatu vulika? Ongiini tatu vulu okuulika kutya otwa simaneka mboka Jehova a tula po ye tu wilike? — Tala eyelitho eti-9.

3, 4. Oshe ende ngiini opo aantu ya kale inaaya gwanenena? Omolwashike hashi kala oshidhigu kutse tu vulike kwaamboka taye tu wilike?

³ Tu li aantu, otu na egamo lyokukala inaatu hala okuvulika.  Osho sha kala ngawo okuza ngaa sho Adam naEva ya yono. Nonando oya li ya shitwa ya gwanenena, kaya li ya vulika kewiliko lyaKalunga. Okuza kesiku ndyoka, aantu ayehe ohaya valwa inaaya gwanenena. Etompelo limwe kutya omolwashike hashi kala oshidhigu kutse tu vulike kewiliko ndyoka tatu pewa kuJehova nokaantu yalwe, olyo kutya inatu gwanenena. Etompelo lilwe olyo kutya mboka Jehova ha longitha ye tu wilike, nayo inaya gwanenena. — Genesis 2:15-17; 3:1-7; Episalomi 51:5; Aaroma 5:12.

⁴ Otu na egamo lyokukala tu na uuntsa, molwaashoka inatu gwanenena. Uuntsa ohawu shi ningi oshidhigu kutse tu vulike kwaamboka taye tu wilike. Pashiholelwa, muIsraeli shonale Jehova okwa li a hogolola Moses a wilike oshigwana She. Nonando Moses okwa li ta wilike oshigwana, ka li e na uuntsa. Ota popiwa nokuli kutya oye a li omulumentu omwiifupipiki e vule aantu ayehe pethimbo ndyoka. Ihe Kora, ngoka a kala nokulongela Jehova omimvo odhindji, okwa kwatwa kuuntsa nokwa li a dhina Moses noonkondo. Ka li nokuli a hala okulandula ewiliko lyaMoses. Okwa li a ningitha ongundu onene yi mu landule noyi tse ondumbo naMoses. Oshike sha li sha ningilwa Kora naalanduli ye? Oya li ya dhipagwa. (Numeri 12:3; 16:1-3, 31-35) MOmbiimbeli otatu adha mo iiholelwa oyindji mbyoka tayi tu longo kutya uuntsa owa nika oshiponga. — 2 Ondjalulo 26:16-21; tala eyelitho eti-10.

5. Aantu yamwe oya li ya longitha nayi ngiini oonkondopangelo dhawo?

⁵ Mondjokonona ayihe aantu oya kala nokulongitha nayi oonkondopangelo dhawo. (Lesha Omuuvithi 8:9.) Pashiholelwa, Saul okwa li omulumentu omwaanawa nomwiifupipiki sho Jehova e mu hogolola a ninge omukwaniilwa  gwaIsraeli. Ihe okweetha uuntsa nefupa yi mene omidhi momutima gwe. Oshizemo? Okwa kala nokuhepeka David, omulumentu ngoka kee na ondjo. (1 Samuel 9:20, 21; 10:20-22; 18:7-11) Konima yethimbo David okwa ningi omukwaniilwa gwaIsraeli noye a li omukwaniilwa dhingi kwaayehe. Ihe naye konima okwa longitha nayi oonkondopangelo dhe. Okwa li a yi momilalo naBatseba, omukiintu gwaUria, nokwa li a kambadhala okuholeka eyono lye mokudhipagitha Uria miita. — 2 Samuel 11:1-17.

6, 7. (a) Ohole yetu yokuhola Jehova ohayi tu inyengitha tu ninge shike? (b) Oshike tashi ke tu kwathela tu kale hatu vulika nuuna kaashi shi oshipu?

⁶ Ohatu vulika kewiliko lyaJehova notwa hala oku mu nyanyudha, oshoka otu mu hole shi vulithe pomuntu kehe nenge oshinima kehe. (Lesha Omayeletumbulo 27:11; Markus 12:29, 30.) Okuza ngaa sho Jehova a tula aaihokani yotango moshikunino shaEden, Satana okwa kala nokuninga ngaashi ta vulu a dhiladhilithe aantu kutya Jehova ke na uuthemba woku ya lombwela shoka ye na okuninga. Ihe otu shi kutya mbyoka iifundja yowala. Otatu tsu kumwe noohapu ndhoka tadhi ti: “Omuwa, Kalunga ketu! Owa gwana okusimanekwa omolweadhimo, esimano noonkondo, oshoka ongoye wa shiti iinima ayihe.” — Ehololo 4:11.

⁷ Sho wa li okanona, otashi vulika aavali yoye ya li ye ku longo wu kale ho vulika kuyo, nonando omathimbo gamwe osha li hashi kala oshidhigu. Sha faathana, tu li aapiya yaJehova otashi vulika shi kale oshidhigu omathimbo gamwe okuvulika. Ihe molwaashoka otu mu hole  notwe mu simaneka, ohatu ningi ngaashi tatu vulu tu vulike kuye. Jesus okwe tu tulila po oshiholelwa oshiwanawa shokuvulika. Okwa li ha vulika kuJehova nonando kasha li oshipu kuye. Nomolwaashono a li a lombwele He ta ti: “Hamolwehalo lyandje, ihe olyoye li gwanithwe.” — Lukas 22:42; tala eyelitho eti-11.

8. Jehova ohe tu wilike momikalo dhini? (Tala oshimpungu “ Pulakena komayele.”)

⁸ Kunena Jehova ohe tu wilike momikalo dha yoolokathana. Pashiholelwa, okwe tu pa Ombiimbeli nosho wo aakuluntugongalo. Ohatu ulike kutya otwa simaneka ewiliko lyaJehova uuna twa simaneka mboka ha longitha ye tu wilike. Ngele otwa tindi ekwatho lyawo, kungawo otatu tindi ekwatho lyaJehova. Sho Aaisraeli ya li ya tindi okuwilikwa kuMoses, Jehova okwa li e shi tala ko kutya otaya tindi ewiliko lye. — Numeri 14:26, 27; tala eyelitho eti-12.

9. Ohole yokuhola aamwatate naamwameme otayi ke tu inyengitha ngiini tu landule omalombwelo?

⁹ Ngele ohatu vulika kwaamboka taye tu wilike, otatu ulike kutya otu hole aamwatate naamwameme. Ngiini mbela? Natu shi thaneke. Ngele pwa holoka oshiponga shopaunshitwe, ongundu yaamboka haya gandja omakwatho ohayi longele kumwe opo yi hupithe aantu oyendji ngaashi tashi vulika. Opo yi pondole, opu na ngoka e na oku yi unganeka nakehe gumwe oku na okulandula omalombwelo ngoka ta pewa. Ihe ongiini ngele gumwe gwomuyo okwa kala inaa landula omalombwelo e ta ningi shoka a hala? Nokuli nonando oku shi ninge nomatompelo omawanawa, okukala kwe inaa landula omalombwelo otaku vulu okweetela ooyakwawo omaupyakadhi nota vulu nokuli oku ya etela oshiponga. Sha faathana, ngele ihatu landula omalombwelo gaJehova naangoka  tatu pewa kwaamboka a tula po ye tu wilike, otatu vulu okweetela yalwe oshiponga. Ihe ngele otwa vulika kuJehova, otatu ku ulika kutya otu hole aamwatate notwa simaneka elongekidho ndyoka Jehova a tula po. — 1 Aakorinto 12:14, 25, 26.

10, 11. Oshike tatu ka kundathaneni ngashingeyi?

¹⁰ Kehe shoka Jehova te tu pula tu ninge, ohashi tu etele uuwanawa. Uuna tatu ulike kutya otwa simaneka ewiliko lye megumbo nomegongalo nonokutya otwa simaneka aapangeli, otashi ke tu etela uuwanawa. — Deuteronomium 5:16; Aaroma 13:4; Aaefeso 6:2, 3; Aahebeli 13:17.

¹¹ Ngele otu shi kutya omolwashike Jehova a hala tu ulike kutya otwa simaneka yalwe, otashi ke tu kwathela tu ya simaneke. Natu ka kundathaneni muule nkene tatu vulu okuulika esimaneko miinima itatu.

12. Omusamane oha ulike ngiini kutya okwa simaneka ewiliko lyaJehova?

¹² Jehova oye omutotipo gwegumbo nokwa pa kehe gumwe megumbo oshinakugwanithwa. Ngele kehe gumwe okwa tseya shoka Jehova a tegelela a ninge, iinima otayi ka enda nawa megumbo notashi ka etela aanegumbo ayehe uuwanawa. (1 Aakorinto 14:33) Jehova okwa tula po omusamane a kale omutse gwegumbo. Shika otashi ti kutya omusamane okwa tegelelwa a sile oshimpwiyu nokuwilike pahole omukulukadhi gwe noyana. Onkee ano, oku na oku ki ihokolola koshipala shaJehova omolwomukalo moka ha sile oshimpwiyu aanegumbo lye. Omusamane Omukriste oku na okukala omunambili, omunahole noha ungaunga naanegumbo ye ngaashi Jesus ha ungaunga negongalo. Ngele te shi ningi, otu ulike kutya okwa  simaneka Jehova. — Aaefeso 5:23, OB-1954; tala eyelitho eti-13.

13. Omukulukadhi oha ulike ngiini kutya okwa simaneka ewiliko lyaJehova?

¹³ Omukulukadhi Omukriste naye ota dhana onkandangala ya simana. Oha ambidhidha omusamane gwe sho ta longo nuudhiginini a kale omutse gwegumbo e li nawa. Ayehe oye na oshinakugwanithwa shokuputudha oyana. Omukalo gumwe ngoka ha longo oyana ya kale ye na esimaneko, omoku ya tulila po oshiholelwa. (Omayeletumbulo 1:8) Oku na okukala ha simaneke omusamane gwe noha ambidhidha omatokolo ge. Uuna itaa tsu kumwe nomusamane gwe, oku na oku mu lombwela omaiyuvo ge momukalo gwombili nogwesimaneko. Ngele omukulukadhi Omukriste okwa hokanwa komusamane kee shi Onzapo, ohashi kala eshongo enene. Ihe ngele okwa tsikile okukala e hole omusamane gwe nokwe mu simaneka, otashi vulika esiku limwe omusamane a ka kale a hala okutseya Jehova noku mu longela. — Lesha 1 Petrus 3:1.

14. Aanona ohaya ulike ngiini kutya oya simaneka ewiliko lyaJehova?

¹⁴ Aanona oye na ondilo momeho gaJehova noya pumbwa okugamenwa nokuwilikwa. Aanona ohaya nyanyudha aavali yawo mokukala haya vulika kuyo. Shoka sha simanenena, mokukala haya vulika otayu ulike kutya oya simaneka Jehova nohaye mu nyanyudha. (Omayeletumbulo 10:1) Momagumbo ogendji, aanona otaya putudhwa owala komuvali gumwe. Shika ohashi kala oshidhigu komuvali nokaanona. Ihe ngele aanona ohaya vulika nohaya ambidhidha omuvali gwawo, otashi vulu okuhwepopaleka onkalo megumbo. Kutya nduno onkalo oyi kale ya tya ngiini kapu na uukwanegumbo wa gwanenena. Ihe megumbo kehe otamu vulu okukala mu na enyanyu, ngele ayehe taya landula ewiliko lyaJehova. Shika ohashi simanekitha Jehova, Omutotipo gwegumbo. — Aaefeso 3:14, 15.

15. Ongiini tatu vulu okuulika kutya otwa simaneka ewiliko lyaJehova megongalo?

¹⁵ Jehova ohe tu wilike ta longitha egongalo lyopaKriste nokwa langeka po Jesus a ninge omutse gwalyo. (Aakolossa 1:18) Jesus okwa pa “omumati omwiinekelwa nomunandunge” nenge omupiya omudhiginini nomunandunge oshinakugwanithwa shokusila oshimpwiyu oshigwana shaKalunga kombanda yevi. (Mateus 24:45-47) Kunena omupiya ngoka oye Olutuwiliki. Olutuwiliki ohalu tu pe shoka twa pumbwa pethimbo lyo opala, opo tu kale tu na eitaalo lya kola. Aakuluntugongalo, aayakuligongalo naatonatelishikandjo ohaya ambidhidha omagongalo muuyuni awuhe nohaya pewa omalombwelo kOlutuwiliki. Aamwatate ayehe mboka oye na oshinakugwanithwa shoku tu sila oshimpwiyu. Otaye ki ihokolola kuJehova omolwomukalo moka haya gwanitha po oshinakugwanithwa shoka. Onkee ano, ngele otwa kala twe ya simaneka, otatu ka ulika wo kutya otwa simaneka Jehova. — Lesha 1 Aatessalonika 5:12; Aahebeli 13:17; tala eyelitho eti-14.

16. Omolwashike tatu vulu okutya aakuluntugongalo naayakuligongalo ohaya langekwa po kombepo ondjapuki?

¹⁶ Aakuluntugongalo naayakuligongalo ohaya kwathele aantu megongalo ya kale aadhiginini noya hangana. Ihe nayo inaya gwanenena ngaashi tse. Mbela ohaya hogololwa ngiini? Oye na okugwanitha po iitegelelwa mbyoka ya popiwa mOmbiimbeli. (1 Timoteus 3:1-7, 12; Titus 1:5-9) Jehova okwa li a longitha ombepo ondjapuki a kwathele aanyoli yOmbiimbeli ya nyole iitegelelwa mbyoka. Aakuluntugongalo ohaya pula Jehova megalikano e ya pe ombepo ondjapuki uuna taya kundathana kutya olye ye na okulangeka po a ninge omukuluntugongalo nenge omuyakuligongalo. Osha yela kutya omagongalo  otaga wilikwa kuJesus naJehova. (Iilonga 20:28) Aalumentu mboka ya langekwa po ye tu kwathele noye tu sile oshimpwiyu oye li omagano ga za kuJehova. — Aaefeso 4:8.

17. Omumwameme oku na okuninga shike opo u ulike kutya okwa simaneka elongekidho lyuukwamutse?

¹⁷ Omathimbo gamwe otashi vulika kaapu kale pu na aakuluntugongalo nenge aayakuligongalo mboka ye na okugwanitha po oshinakugwanithwa shontumba megongalo. Monkalo ndjoka aamwatate yalwe mboka ya ninginithwa otaya vulu okukwathela. Ihe ngele kaye po, omumwameme otashi vulika a longe po oshinakugwanithwa shoka. Sho te shi ningi, oku na okukala a zala sha komutse, ngaashi oshikayiwa nenge egala. (1 Aakorinto 11:3-10) Kungawo, ota ka ulika kutya okwa simaneka elongekidho lyuukwamutse ndyoka lya tulwa po kuJehova megumbo nomegongalo. — Tala eyelitho eti-15.

18, 19. (a) Oshike tatu ilongo mAaroma 13:1-7? (b) Ohatu ulike ngiini kutya otwa simaneka omapangelo nosho wo yalwe mboka ye na oonkondopangelo?

¹⁸ Kunena, Jehova okwa etha omapangelo ga kale ge na oonkondopangelo dhontumba. Onkee ano, otu na oku ga simaneka. Ohaga unganeke iinima miilongo nomoshigwana, opo iinima yi kale tayi ende nawa nohaga pe aantu omayakulo ngoka ya pumbwa. Aakriste oye na okuvulika komalombwelo ngoka taga adhika mAaroma 13:1-7. (Lesha.) Ohatu simaneke ‘aapangeli mboka taye tu pangele’ nohatu vulika koompango dhomiilongo nenge dhomomidhingoloko moka tu li. Oompango ndhoka otashi vulika dha guma aanegumbo yetu, oongeshefa dhetu nenge iiniwe yetu. Pashiholelwa, ohatu futu iifendela nohatu gandja uuyelele kehe tatu pulwa kepangelo. Ihe oshike tu  na okuninga uuna epangelo tali tu pula tu ninge oshinima shoka kaashi li metsokumwe noompango dhaJehova? Omuyapostoli Petrus okwa ti: “Otu na okuvulika kuKalunga, hakaantu.” — Iilonga 5:28, 29.

¹⁹ Ngele otatu ungaunga naakwanepangelo, ngaashi omupanguli nenge omupolisi, otu na aluhe oku ya simaneka. Aagundjuka Aakriste oye na okusimaneka aalongi yawo nosho wo aaniilonga yalwe yoposikola. Uuna tu li kiilonga, otu na okusimaneka omugandji gwiilonga nonando aaniilonga yalwe inaye mu simaneka. Uuna tatu shi ningi, otatu holele Omuyapostoli Paulus ngoka a li a ulike kutya okwa simaneka aapangeli mboka ya li aadhigu okuungaungiwa nayo. (Iilonga 26:2, 25) Nonando mboka ye na oonkondopangelo oye tu ninge nayi, otu na oku ya simaneka. — Lesha Aaroma 12:17, 18; 1 Petrus 3:15.

20, 21. Iinima iiwanawa yini tayi ka ningwa po ngele otwa kala hatu simaneke yalwe?

²⁰ Aantu apuhe muuyuni, ihaya simaneke yalwe. Ihe aapiya yaJehova hasho ye li ngaaka. Oyi itulila po elalakano lyokusimaneka kehe gumwe. Ohaya landula shoka omuyapostoli Petrus a popi, sho a ti: “Simanekeni aantu ayehe.” (1 Petrus 2:17) Uuna tatu simaneke yalwe, ohaya kala ye shi wete. Jesus okwe tu lombwela a ti: “Uuyelele weni nau yele montaneho yaantu, ya mone iilonga yeni iiwanawa noya hambelele Ho yeni yomegulu.” — Mateus 5:16.

²¹ Uuna tatu ulike kutya otwa simaneka ewiliko lyaJehova megumbo, megongalo nomiinima yilwe monkalamwenyo, oshiholelwa shetu oshiwanawa otashi ki inyengitha yalwe ya kale ya hala okwiilonga oshindji kombinga yaJehova. Ngele ohatu simaneke yalwe, otatu ku ulika kutya ohatu simaneke Jehova. Shika otashi ke mu nyanyudha notashi ku ulika kutya otu mu hole.