1-3. (a) Omolwashike meme ha shilipaleke kutya okamwana oka yogoka? (b) Omolwashike Jehova a hala oshigwana she shi kale sha yogoka?

DHILADHILA andola meme omunahole ta longekidha okamwana ka ye kosikola. Oha shilipaleke kutya oki iyoga noka zala iikutu yako nawa noya yela. Shika ohashi ka kaleke ke na uukolele nohashi ningitha yalwe ya mone kutya aavali yako ohaye ka sile oshimpwiyu.

² Tate gwetu, Jehova, okwa hala tu kale twa yogoka. (Episalomi 18:26) Oku shi kutya okukala twa yogoka, ohashi tu  etele uuwanawa. Ngele otwa yogoka, ohashi mu simanekitha wo. — Hesekiel 36:22; lesha 1 Petrus 2:12.

³ Okukala twa yogoka okwa kwatela mo shike? Omolwashike okukala twa yogoka taku vulu wo oku tu etela uuwanawa? Sho tatu konakona omapulo ngaka, otashi vulika tu ka mone kutya omalunduluko geni twa pumbwa okuninga.

4, 5. (a) Omolwashike twa pumbwa okukala twa yogoka? (b) Eshito otali tu longo shike kombinga yankene Jehova a tala ko uuyogoki?

⁴ Oshiholelwa shaJehova, ohashi tu longo tu kale twa yogoka. (Levitikus 11:44, 45) Onkee ano, etompelo lya simanenena kutya omolwashike twa pumbwa okukala twa yogoka, olyo kutya otwa hala “okuholela Kalunga.” — Aaefeso 5:1.

⁵ Eshito ohali tu longo oshindji kombinga yankene Jehova a tala ko uuyogoki. Jehova okwa shita omadhingoloko gopaunshitwe, ngoka haga kaleke ombepo nomeya ga yela. (Jeremia 10:12) Dhiladhila komikalo odhindji moka evi hali iyopaleke lyo lyene, nokuli nokonima ngele aantu ye li nyateke. Pashiholelwa, Jehova okwa shita oombakiteli dhi na omwenyo, ndhoka hadhi vulu owala okumonika nenenepekikende. Oombakiteli ndhoka ohadhi vulu okulundulula ondoya kaayi kale we yi na uuzigo. Elunduluko ndika ekumithi. Aanongononi ohaya longitha nokuli oombakiteli ndhoka ya opalekulule evi. — Aaroma 1:20.

6, 7. Ompango yaMoses oya li ya ulike ngiini kutya mboka haya longele Jehova oye na okukala ya yogoka?

⁶ Otu wete wo kutya omolwashike sha simana tu kale twa yogoka, kokutala kOmpango ndjoka Jehova a li a pe Aaisraeli okupitila muMoses. Pashiholelwa, aantu oya li ye na okukala ya yogoka palutu, opo Jehova a taambe ko elongelokalunga lyawo. MEsiku lyEkwatakanitho, omuyambi omukuluntu okwa li e na okwiiyoga lwaali olutu  aluhe. (Levitikus 16:4, 23, 24) Aayambi yalwe manga inaaya gandja omayambo, oya li wo ye na okwiiyoga kiikaha nokoompadhi. (Eksodus 30:17-21; 2 Ondjalulo 4:6) Poompito dhimwe, omuntu ngoka inaa vulika kompango yi na ko nasha nuuyogoki, okwa li ha dhipagwa. — Levitikus 15:31; Numeri 19:17-20.

⁷ Ongiini kunena? Otatu vulu okwiilonga oshindji kombinga yomithikampango dhaJehova kOmpango ndjoka a li a pe Moses. (Maleaki 3:6) Otayi ulike sha yela kutya omolwashike aapiya yaJehova ya li ya pumbwa okukala ya yogoka. Omithikampango dhaJehova inadhi lunduluka. Kunena, okwa tegelela wo aalongeli ye ya kale ya yogoka. — Jakob 1:27.

8. Omiinima yini tu na okukala twa yogoka?

⁸ Pataloko lyaJehova, okukala twa yogoka okwa kwatela mo oshindji shi vulithe pokwiiyoga komalutu, pokuyoga oonguwo nokwoopaleka omagumbo getu. Uuyogoki owa kwatela mo onkalamwenyo yetu ayihe. Owa kwatela mo okulongela kwetu Jehova, eihumbato lyetu nomadhiladhilo getu. Opo Jehova e tu tale ko twa yogoka, otu na okukala twa yogoka monkalamwenyo yetu ayihe.

9, 10. Okukala twa yogoka mokulongela Kalunga, otashi ti shike?

⁹ Elongelokalunga lya yogoka. Itatu vulu okukala hatu kutha ombinga momalongelokalunga giifundja. Sho Aaisraeli ya li muukwatwa waBabilonia, oya li ya dhingolokwa kaantu mboka haya kutha ombinga miinima ya nyata yomalongelokalunga goshipagani. Jesaja okwa li a hunganeke kutya Aaisraeli otaya ka galukila koshilongo shawo, opo ya totulule elongelokalunga lya yogoka. Jehova okwe ya lombwele a ti: “Zii mo muBabilon! Shi thigeni po! Inamu guma tuu shoka sha nyata! Iyoololeni mo musho ne mu iyapule.” Okulongela kwawo Kalunga kakwa li ku  na okulumbakanithwa nomalongo, omikalondjigilile nenge noonkuluhedhi dhelongelokalunga lyiifundja lyaBabilonia. — Jesaja 52:11.

¹⁰ Aakriste yashili kunena nayo ohaya yanda okukutha ombinga momalongelokalunga giifundja. (Lesha 1 Aakorinto 10:21.) Muuyuni awuhe, omithigululwakalo odhindji, omikalondjigilile nomaitaalo ogendji ngoka ge shiwike nawa, oga kankamena komalongo gomalongelokalunga giifundja. Pashiholelwa, momithigululwakalo odhindji, aantu oyi itaala kutya opu na sha shoka hashi tsikile okukala nomwenyo konima ngele omuntu a si, nopu na omikalondjigilile odhindji dha kankamena keitaalo ndyoka. (Omuuvithi 9:5, 6, 10) Aakriste oya pumbwa okuyanda omikalondjigilile ndhoka. Aakwanezimo yetu otashi vulika ye tu thiminike tu kuthe ombinga mudhimwe dhomudho. Ihe molwaashoka otwa hala Jehova e tu tale ko twa yogoka, ihatu zimine tu kuthe ombinga mudho. — Iilonga 5:29.

11. Okukala twa yogoka pamikalo otashi ti shike?

¹¹ Uuyogoki wopamikalo. Opo Jehova e tu tale ko twa yogoka, otwa pumbwa okuyanda okukutha ombinga moluhondelo lwoludhi kehe. (Lesha Aaefeso 5:5.) MOmbiimbeli, Jehova okwe tu lombwela tu ‘yande oluhondelo.’ Okwe shi popya sha yela kutya mboka taya hondele noihayi iyele ombedhi, itaya “ka ya mOshilongo shaKalunga.” — 1 Aakorinto 6:9, 10, 18; tala eyelitho eti-22.

12, 13. Omolwashike twa pumbwa okukala twa yogoka pamadhiladhilo?

¹² Uuyogoki wopamadhiladhilo. Olundji, omadhiladhilo ohagi inyengitha aantu ya katuke oonkatu. (Mateus 5:28; 15:18, 19) Omadhiladhilo ga yogoka ohage tu inyengitha tu ninge iinima ya yogoka. Odhoshili kutya inatu gwanenena, onkene omathimbo gamwe ohatu dhiladhila iinima ya puka. Uuna twa tameke oku yi dhiladhila, otu na  oku yi yanda nziya. Ngele inatu shi ninga, otashi vulika tu nyateke omadhiladhilo getu. Otashi vulika tu tameke okukala twa hala oku yi ninga. Onkee ano, otu na okukala hatu dhiladhila iinima mbyoka ya yogoka. (Lesha Aafilippi 4:8.) Otu na wo okuyanda iinima ngaashi omainyanyudho ngoka ga kwatela mo omilalo nenge elongithonkondo. Ohatu hogolola nawa shoka tatu lesha, tatu tala naashoka tatu popi. — Episalomi 19:8, 9.

¹³ Opo tu ikaleke mohole yaKalunga, otu na okukala twa yogoka mokulongela Kalunga, pamikalo nopamadhiladhilo. Osha simana wo kuJehova tu kale twa yogoka palutu.

14. Omolwashike okukala twa yogoka palutu kwa simana?

¹⁴ Uuna tatu kaleke omalutu getu nomidhingoloko dhetu dha yela, otashi ke tu etela uuwanawa nosho wo mboka ye tu dhingoloka. Otatu ka kala tu uvite nawa, nayalwe otaya ka kala ya hala okukala natse. Ihe opu na wo etompelo lya simanenena lyokukala twa yogoka palutu. Etompelo ndyoka olyo kutya ohaku simanekitha Jehova. Dhiladhila kwaashika: Ngele oho mono okanona haka kala aluhe ka luudha, otashi vulika wu dhiladhile kutya aavali yako ihaye ka sile oshimpwiyu. Momukalo gwa faathana, ngele ihatu isile oshimpwiyu nokwiikaleka twa yogoka, aantu otashi vulika ya kale ye na etaloko ewinayi kombinga yaJehova. Paulus okwa ti: “Tse itatu alulitha omuntu nando omoshinima shimwe, oshilonga shetu opo shaa shekwe. Ihe moshinima kehe shoka tatu ningi, otatu ulike kutya tse aayakuli yaKalunga.” — 2 Aakorinto 6:3, 4.

15, 16. Oshike tatu vulu okuninga, opo tu ikaleke twa yogoka?

¹⁵ Olutu lwetu noonguwo dhetu. Otwa pumbwa okukala twa yogoka esiku kehe. Pashiholelwa, ohatu iyogo pandjigilile nenge nokuli kehe esiku, ngele otashi vulika. Ohatu iyogo kiikaha nothewa nosho wo nomeya, unene  tuu ngele tatu tameke okuteleka nenge okulya, nokonima ngele twa longitha okandjugo nenge twa gumu oshinima sha luudha. Okwiiyoga kiikaha osha fa oshinima shanathangwa, ihe osha pumbiwa, ngele otwa hala tu keelele oombakiteli nomikithi kaadhi taandele. Otaku vulu nokuli okuhupitha oomwenyo. Ngele katu na okandjugo nenge hoka haka pombwa, otatu vulu okulongitha omikalo dhilwe dhokweekelahi onyata. Aaisraeli kaya li ye na uundjugo hawu pombwa, onkene oya li haya fulile oonyata dhawo kokule nomagumbo nosho wo noonzo dhomeya. — Deuteronomium 23:12, 13.

¹⁶ Oonguwo dhetu kadhi na okukala dhokwiimonikitha, dhondilo nenge ndhoka opo dha kondo. Ihe odhi na okukala dhi shi okutalwa nodha yogoka. (Lesha 1 Timoteus 2:9, 10.) Otwa hala aluhe eholokopo lyetu li simanekithe Jehova. — Titus 2:10.

17. Omolwashike twa hala okukaleka egumbo lyetu nomudhingoloko gwalyo gwa yela?

 ¹⁷ Omagumbo getu nomidhingoloko dhago. Ohatu kaleke omagumbo getu ga yela, kashi na mbudhi kutya ohatu zi peni. Ohatu shilipaleke wo kutya ohauto yetu, omota, ombasikela nenge kehe oshiyenditho hatu longitha osha yela, unene tuu ngele tatu yi kokugongala nenge tatu uvitha. Komeho gaayihe, uuna tatu uvitha, ohatu lombwele yalwe kombinga yonkalamwenyo meviparadisa lya yela. (Lukas 23:43; Ehololo 11:18) Monkalo moka egumbo lyetu li li nomudhingoloko gwalyo, otagu vulu okuulika kutya otatu ilongekidhile onkalamwenyo ya yogoka yomuuyuni uupe.

18. Omolwashike twa hala ehala lyetu lyokugongalela li kale lya yela?

¹⁸ Omahala moka hatu gongalele. Ohatu ulike kutya uuyogoki owa simana kutse, mokukaleka ehala lyetu lyokugongalela lya yela, kashi na mbudhi kutya Oshinyanga shUukwaniilwa nenge ehala moka hatu ningile iigongi yetu. Uuna aantu ye ya okugongala pamwe natse oshikando shotango, olundji ohaya mono nkene Oshinyanga shUukwaniilwa sha yela. Shika ohashi simanekitha Jehova. Tu li iilyo yegongalo, atuhe otu na ompito yokwoopaleka Oshinyanga shUukwaniilwa noku shi kaleka monkalo ombwanawa. — 2 Ondjalulo 34:10.

19. Oshike tu na okuyanda?

¹⁹ Nonando mOmbiimbeli inamu tumbulwa kehe omukalondjigilile inaagu yogoka ngoka tu na okuyanda, omu na omakotampango ngoka hage tu kwathele tu uve ko nkene Jehova ha kala e dhi uvitile. Ina hala tu hile omakaya nenge tu longithe nayi omalovu nenge iingangamithi. Ngele otu li ookuume kaKalunga, otatu ka yanda okuninga iinima mbyoka. Omolwashike? Omolwaashoka otwa  simaneka noonkondo omagano gomwenyo. Iinima mbyoka ohayi fupipike onkalamwenyo yetu, ohayi teya po uukolele wetu nohayi gumu nayi mboka ye tu kundukidha. Oyendji ohaya kambadhala oku yi etha po, omolwuukolele wawo. Nonando ongawo, tu li ookuume kaJehova, etompelo lyetu lya simanenena lyokweetha po iinima mbyoka, ohole yetu yoku mu hola. Omukiintu gumwe omugundjuka okwa ti: “Kekwatho lyaJehova, onda lundulula onkalamwenyo yandje nonda etha po iinima mbyoka ya li ya pika ndje. . . . Ondi wete kutya kanda li tandi vulu okuninga omalunduluko ngoka kungame mwene.” Natu ka kundathaneni omakotampango gOmbiimbeli gatano ngoka taga vulu okukwathela omuntu a ethe po omikalondjigilile inaadhi yogoka.

20, 21. Jehova okwa hala tu manguluke ko komikalondjigilile dhini?

²⁰ “Ookuume kandje aaholike, ano sho tu na omauvaneko ngaka agehe, natu iyogeni shaa shoka tashi nyateke olutu nenge omwenyo. Tu lalakaneni wo okukala aayapuki, tse tu tile Omuwa.” (2 Aakorinto 7:1) Jehova okwa hala tu manguluke ko komikalondjigilile inaadhi yogoka, ndhoka tadhi vulu okunkundipaleka omadhiladhilo nenge omalutu getu.

²¹ Etompelo lya simanenena ‘lyokwiiyoga shaa shoka tashi tu nyateke,’ olya popiwa mAakorinto aatiyali 6:17, 18. Jehova ote tu lombwele ta ti: “Inamu kala mu na ekwatathano naashoka sha nyata.” Opo nduno, okwe tu uvanekele a ti: “[Otandi] ke mu taamba. Ngame otandi kala Ho, ne notamu kala aamwandje aamati naakadhona.” Eeno, Jehova ota ka kala e tu hole ngaashi he e hole oyana, ngele otwa yanda kehe shoka tashi tu nyateke.

22-25. Omakotampango geni gopaMbiimbeli taga vulu oku tu kwathela tu yande omikalondjigilile inaadhi yogoka?

²² “Hola Omuwa Kalunga koye komutima gwoye  aguhe nokomwenyo gwoye aguhe nokomadhiladhilo goye agehe.” (Mateus 22:37) Shika osho oshipango oshinenenene kwaayihe. (Mateus 22:38) Jehova oye twa gwana okukala tu hole nomutima gwetu aguhe. Shono otatu vulu oku shi ninga ngiini, ngele otwa hogolola okuninga iinima mbyoka tayi vulu okufupipika onkalamwenyo yetu nenge tayi nkundipaleke uuluyi wetu? Pehala lyokuninga ngawo, ohatu ningi kehe shoka tatu vulu, tu ulike kutya otwa simaneka omwenyo ngoka e tu pa.

²³ “[Jehova] oye mwene ha pe aantu ayehe omwenyo nomufudho niinima ayihe.” (Iilonga 17:24, 25) Ngele kuume koye okwe ku pe omagano gi ikalekelwa, mbela oto ke ga ekelahi nenge wu ga yone po? Omwenyo omagano omakumithi ga za kuJehova. Omagano ngoka otwe ga lenga noonkondo. Onkene otwa hala tu kale nonkalamwenyo tayi mu simanekitha. — Episalomi 36:9.

²⁴ “Hola mukweni ngaashi ngoye wi ihole mwene.” (Mateus 22:39) Omikalondjigilile dhetu inaadhi yogoka, hatse owala hadhi ehameke. Ohadhi vulu wo okweehameka mboka ye tu kundukidha, unene tuu mboka tu hole. Pashiholelwa, omuntu ngoka ha zi megumbo limwe naangoka ha hili omakaya, ota vulu okukwatwa kuuwehame wa kwata miiti, omolwokufudhila mo olwithi lwomakaya. Ihe ngele otwa etha po omikalondjigilile omiwinayi, otatu ulukile mboka ye tu kundukidha kutya otu ya hole. — 1 Johannes 4:20, 21.

²⁵ “Dhimbulutha aakwanegongalo yoye, ya kale haa vulika kaaleli nokaapangeli.” (Titus 3:1) Miilongo oyindji, okukala wu na iingangamithi nenge oku yi longitha, inashi pitikwa pampango. Manga Jehova e tu lombwela tu simaneke aapangeli, ohatu vulika koompango ndhoka. — Aaroma 13:1.

26. (a) Oshike tu na okuninga, opo Jehova a taambe ko elongelokalunga lyetu? (b) Omolwashike okukala twa yogoka momeho gaKalunga ku li omukalo gwokukalamwenyo gwa dhenga mbanda?

 ²⁶ Ngele otwa hala tu kale ookuume kaJehova, otashi vulika tu kale tu wete twa pumbwa okuninga omalunduluko gontumba. Ngele osho, inatu kakadhala oku ga ninga. Ihashi kala aluhe oshipu okweetha po omukalondjigilile inaagu yogoka, ihe otatu vulu oku shi ninga. Jehova okwa uvaneka kutya ote ke tu kwathela. Okwa ti: “Ongame Omuwa Kalunga koye, ngoka [“tandi ku longo,” OB-1954] shoka she ku opalela noku ku ulukila ondjila u na okweenda nayo.” (Jesaja 48:17) Uuna tatu ningi ngaashi tatu vulu tu kale twa yogoka, otatu vulu okukala nuushili kutya otatu simanekitha Kalunga ketu.