1, 2. Omolwashike wu hole Jehova Kalunga?

MBELA owu hole Kalunga? Otashi vulika wu mu hole noonkondo nomolwaashono we mu iyapulila. Otashi vulika wu uvite nokuli kutya oku li Kuume koye kopothingo. Nokuli nomanga wa li kuu mu hole, ye okwa kala e ku hole nale. Ombiimbeli otayi ti: ‘Otse otu hole Kalunga, oshoka okwa kala e tu hole tango.’ — 1 Johannes 4:19.

² Dhiladhila owala komikalo adhihe ndhoka Jehova e tu ulukila ohole. Okwe tu pa evi li kale ehala lyetu ewanawa lyokukala nakehe shimwe twa pumbwa, opo tu nyanyukilwe onkalamwenyo. (Mateus 5:43-48; Ehololo 4:11) Okwa hala tu kale tu na ekwatathano ewanawa naye, nokwe shi ninga tashi wapa tu ilonge kombinga ye. Ohatu pulakene kuJehova uuna tatu lesha Ombiimbeli, noha pulakene kutse uuna tatu galikana. (Episalomi 65:2) Ohe tu pe ombepo ye ondjapuki yi tu wilike noyi tu nkondopaleke. (Lukas 11:13) Okwa tumine nokuli Omwana omuholike kombanda yevi, opo e tu mangulule muulunde nomeso. — Lesha Johannes 3:16; Aaroma 5:8.

3. Ongiini tatu vulu okukaleka po uukuume wetu naJehova?

 ³ Dhiladhila owala kukuume koye kopothingo ngoka a kala kuume koye miipyu nomiitalala. Ohashi pula oonkambadhala, opo wu kaleke po uukuume mboka wa tsa kesipa. Otu na wo okuninga sha faathana ngele tashi ya puukuume wetu naJehova, ngoka e li Kuume ketu a dhenga mbanda. Uukuume wetu naye otawu vulu okukala sigo aluhe. Onkee ano, Ombiimbeli otayi tu lombwele tu “ikaleke mohole yaKalunga.” (Judas 21) Otatu shi ningi ngiini? Ombiimbeli otayi yamukula tayi ti: “Oshoka ohole yokuhola Kalunga oyo okuvulika kiipango ye. Iipango ye kayi shi iidhigu kutse.” — 1 Johannes 5:3.

4, 5. (a) Oshike she ku inyengitha wu kale ‘wu hole Kalunga?’ (b) Oshe ende ngiini opo ohole yoye yokuhola Jehova yi kokeke?

⁴ Oshike she ku inyengitha wu kale ‘wu hole Kalunga?’ Oto dhimbulukwa ethimbo sho wa tameke okukala wu mu hole?

⁵ Dhiladhila nkene wa li wu uvite sho wa tseya oshikando shotango kutya Jehova okwa hala wu ka kale nomwenyo sigo aluhe muuyuni we uupe. Owi ilongo ashihe shoka a ninga po, opo wu ka kale mo nowa tseya kutya Jehova okwe tu pa omagano ga dhenga mbanda, sho a tumu Omwana kombanda yevi. (Mateus 20:28; Johannes 8:29; Aaroma 5:12, 18) Sho wa tseya kutya Jehova oku ku hole shi thike peni, osha gumu omutima gwoye nowa tameke okukala wu mu hole wo. — Lesha 1 Johannes 4:9, 10.

6. Okukala wu hole gumwe osha kwatela mo shike? Ohole yoye yokuhola Kalunga oye ku inyengitha wu ninge shike?

⁶ Ihe okukala wu hole Jehova Kalunga, osha kwatela mo oshindji. Pashiholelwa, ngele owu hole gumwe, oho  ningi oshindji kaashi shi owala oku mu lombwela kutya “ondi ku hole.” Ohole ohayi ku ningitha wu kale wa hala oku mu ningila iinima mbyoka tayi mu nyanyudha. Sha faathana, ohole yoye yokuhola Jehova ohayi ku inyengitha wu kale wa hala okwiihumbata momukalo ngoka a hokwa. Sho ohole ndjoka ya koko, owe mu iyapulile e to ninginithwa. Kungawo, owu uvaneka kutya oto ke mu longela sigo aluhe. (Lesha Aaroma 14:7, 8.) Ongiini to vulu okugwanitha po euvaneko ndyoka?

7. Ngele otu hole Jehova otatu ka ninga po shike? Iipango ye yimwe yini tu na okuvulika kuyo?

⁷ Ohatu ‘vulika kiipango’ yaJehova, molwaashoka otu mu hole. Otwi ilonga mOmbiimbeli kutya Jehova okwa hala tu ihumbate ngiini. Pashiholelwa, okwe tu lombwela kutya osha puka okukolwa, okuyaka, okufundja, okuhondela, okulongela gumwe nenge oshinima shilwe pehala lyoku mu longela. — 1 Aakorinto 5:11; 6:18; 10:14; Aaefeso 4:28; Aakolossa 3:9.

8, 9. Ohatu tseya ngiini shoka Jehova a hala tu ninge uuna mOmbiimbeli kaamu na ompango yokondandalunde ndjoka tayi tu lombwele shoka tu na okuninga? Gandja oshiholelwa.

⁸ Opo tu kale twa hokiwa kuJehova, otwa pumbwa okuninga oshindji kaashi shi owala okuvulika kiipango ye. Ine tu pa omusholondondo gwoompango ndhoka tadhi tu lombwele shoka tu na okuninga monkalo kehe. Onkee ano, omathimbo gamwe mOmbiimbeli otashi vulika mu kale kaamu na ompango yokondandalunde ndjoka tayi tu lombwele shoka tu na okuninga. Ngele osho shi li ngawo, ongiini tatu vulu okuninga omatokolo ge li mondjila? (Aaefeso 5:17) MOmbiimbeli omu na omakotampango, ngoka ge li omalongo ga simana, ngoka  tage tu longo nkene Jehova ha tala ko iinima. Nuuna tatu lesha Ombiimbeli ohatu tseya kutya Jehova omuntu a tya ngiini. Ohatu ilongo nkene ha dhiladhila, ano shoka e hole naashoka e tonde. — Lesha Episalomi 97:10; Omayeletumbulo 6:16-19; tala eyelitho lyo-1.

⁹ Pashiholelwa, ohatu hogolola ngiini shoka twa hala okutala kotiivii nenge kointaneta? Jehova ihe tu lombwele shu ukilila shoka tu na okuhogolola. Ihe omakotampango ngoka e tu pa ohage tu kwathele tu ninge ehogololo lyomondjila. Omainyanyudho ogendji kunena ogu udha elongithonkondo nomilalo. Jehova ote tu lombwele okupitila mOmbiimbeli kutya “oku tonde unene ookakombwiilitha” nenge mboka ye hole elongithonkondo nota ka “pangula mboka ye hole oluhondelo.” (Episalomi 11:5; Aahebeli 13:4) Omakotampango ngaka otage tu kwathele ngiini tu ninge ehogololo lyomondjila? Ngele otwa tseya kutya Jehova oku tonde oshinima shontumba nenge okwe shi tala ko inaashi yogoka, natu shi yande.

10, 11. Omolwashike hatu vulika kuJehova?

¹⁰ Omolwashike hatu vulika kuJehova? Mbela omolwaashoka owala twa tila okugeelwa nenge twa tila iilanduliko iiwinayi mbyoka hayi tu adha uuna twa ninga omatokolo kaage li mondjila? (Aagalati 6:7) Aawe, ohatu vulika kuye, molwaashoka otu mu hole. Ngaashi owala aanona haya kala ya hala okunyanyudha oohe, natse otwa hala okunyanyudha Tate gwetu gwomegulu. Ihashi tu nyanyudha tuu okutseya kutya Jehova okwe tu hokwa! — Episalomi 5:12; Omayeletumbulo 12:2; tala eyelitho eti-2.

¹¹ Ihatu vulika owala kuJehova uuna oshipu kutse nenge uuna kaatu na nkene. Ihatu hogolola kutya  oompango nomithikampango dhini tu na okulandula naandhoka kaatu na okulandula. (Deuteronomium 12:32) Pehala lyaashoka, ohatu vulika kuye miinima ayihe, ngaashi omupisalomi ngoka a ti: “Onda hokwa iipango yoye nondi yi hole.” (Episalomi 119:47; Aaroma 6:17) Otwa hala okukala ngaashi Noa. Ombiimbeli otayi ti kutya “okwa ningi, ngaashi Kalunga e mu lombwele.” Kungawo, oku ulike kutya oku hole Jehova. (Genesis 6:22) Mbela ino hala Jehova e ku popye ngaaka?

12. Ongiini tatu vulu okunyanyudha Jehova?

¹² Oshi uvitha Jehova ngiini uuna tatu vulika kuye? Ohashi ‘nyanyudha omwenyo’ gwe. (Omayeletumbulo 11:20; 27:11) Omushiti gwiinima ayihe oha kala a nyanyukwa ngele tatu vulika kuye. Ihe ihe tu thiminike tu vulike. Pehala lyaashono, okwe tu pa uuthemba wokutokola kutya oshike tu na okuninga. Shika osha hala okutya otwa manguluka okutokola tu ninge shoka shi li mondjila nenge sha puka. Jehova okwa hala ohole yetu yoku mu hola yi tu inyengithe tu ninge omatokolo gomondjila, opo tu kale tu na onkalamwenyo ombwanawa. — Deuteronomium 30:15, 16, 19, 20; tala eyelitho eti-3.

13, 14. Otu shi shi ngiini kutya kashi shi oshidhigu okuvulika kiipango yaKalunga? Gandja oshiholelwa.

¹³ Ongiini ngele otu uvite kutya iipango yaJehova iidhigu kutse nenge kutya otayi tu ningitha tu kale inaatu manguluka? Ombiimbeli otayi shi popi sha yela tayi ti: “Iipango ye kayi shi iidhigu kutse.” (1 Johannes 5:3) Momanyolo galwe oshitya “iidhigu” ohashi longithwa okuulika kiipango mbyoka hayi kala ya dhigupalela aantu nenge kaantu mboka haya kala ya hala okupangela yakwawo noku ya ehameka. (Mateus 23:4; Iilonga 20: 29, 30) MOmbiimbeli yo-New English Translation ovelise ndjoka oya tolokwa taku ti: “Iipango ye ihayi tu gwilile po.” Iipango yaJehova kayi shi “iidhigu,” sha hala okutya, kashi shi oshidhigu okuvulika kuyo. Jehova oku na aluhe ondjele. Ihe tu pula tu ninge shoka itaatu vulu okuninga.

¹⁴ Pashiholelwa, dhiladhila ando to kwathele kuume koye a tembuke. Okwa pakela iinima ye ayihe miipakate. Yimwe iipu okutumbwa, ihe yimwe iidhigu noonkondo tayi pumbwa okutumbwa kaantu yaali. Ngele kuume koye oku na ko nasha nangoye, mbela ote ke ku pula ngaa wu tumbe po iipakete mbyoka iidhigu noonkondo ongoye awike? Ite ke shi ninga nando. Omolwashike mbela? Omolwaashoka ina hala wu iyehameke. Ngaashi kuume ngoka, Jehova kapu na esiku e tu pule tu ninge oshinima oshidhigu noonkondo. (Deuteronomium 30:11-14) Jehova oku tu shi nawa. “Okwa tseya kutya otwa shitwa nashike; oku shi shi kutya otse ontsi yevi.” — Episalomi 103:14.

15. Omolwashike tatu vulu okukala nuushili kutya iipango yaJehova otayi tu etele uuwanawa?

¹⁵ Moses okwa li a lombwele oshigwana shaIsraeli kutya iipango yaJehova otayi ke ya etela ‘elago’ nuuna taya vulika kuyo, Jehova ote ke ya “tonatela” nenge ote ke ya kaleka nomwenyo. (Deuteronomium 5:28-33; 6:24) Shoka osho shi li ngawo nokunena. Kehe shoka Jehova te tu pula tu ninge, otashi ke tu etela uuwanawa monkalamwenyo. (Lesha Jesaja 48:17.) Tate Jehova oku shi aluhe shoka she tu opalela. (Aaroma 11:33) Ombiimbeli otayi ti: “Kalunga oye ohole.” (1 Johannes 4:8) Shika otashi ti kutya kehe shoka Jehova ta popi nenge ta ningi ohi inyengithwa kohole.

16. Otu shi shi ngiini kutya otatu vulu okukala hatu vulika, nonando inatu gwanenena notu li muuyuni wa kolokosha?

 ¹⁶ Ihashi kala aluhe oshipu okuvulika kuKalunga. Otu li muuyuni wa kolokosha mboka tawu pangelwa kOndiyapoli. Ohayi kambadhala okunwetha mo aantu ya longe uuwinayi. (1 Johannes 5:19) Otu na wo okukondjitha omadhiladhilo nomaiyuvo getu inaaga gwanenena, molwaashoka otaga vulu oku tu ningitha kaatu vulike kuKalunga. (Aaroma 7:21-25) Ihe molwaashoka otu hole Jehova, ohashi tu kwathele tu longe shoka shu uka. Oha mono oonkambadhala ndhoka tatu ningi, opo tu vulike kuye nohe tu kwathele moku tu pa ombepo ye ondjapuki. (1 Samuel 15:22, 23; Iilonga 5:32) Ombepo ondjapuki ohayi tu kwathele tu kokeke omaukwatya ngoka tage tu kwathele tu vulike kuye nuupu. — Aagalati 5:22, 23.

17, 18. (a) Membo ndika otatu ki ilonga mo shike? (b) Otatu ka kundathana shike montopolwa tayi landula?

¹⁷ Membo ndika otatu ki ilonga nkene tatu vulu okukala nonkalamwenyo ndjoka Jehova a hokwa. Otatu ki ilonga nkene tatu vulu okutula miilonga omakotampango ge nosho wo omithikampango dhe dhopamikalo. Dhimbulukwa kutya Jehova ihe tu thiminike nando tu vulike kuye. Ngele otwa tokola okuvulika kuye, onkalamwenyo yetu otayi ka hwepopala nonakuyiwa yetu otayi ka kala ombwanawa. Shoka sha simanenena, okuvulika kwetu otaku ku ulika kutya otu hole Kalunga shi thike peni. — Tala eyelitho eti-4.

¹⁸ Jehova okwe tu pa eiyuvo, opo li tu kwathele tu tseye shoka shi li mondjila naashoka sha puka. Ngele otwe li dheula, otali ke tu kwathela tu “vulike kiipango ye.” Mbela eiyuvo oshike, nongiini tatu vulu oku li dheula? Natu shi taleni montopolwa tayi landula.