Galikana nokwiilongekidha nawa. Galikana kuJehova e ku kwathele wu gandje eitulomo ketumwalaka ndyoka to ka gandja nowu sinde uumbanda woye. Kaleka momadhiladhilo iitsa ya simana mbyoka wa pumbwa oku ka yelithila aapulakeni. Popya niitya yoye mwene, pehala lyokulesha oshitya noshitya moshileshomwa.

Popya tashi zi komutima. Kaleka aapulakeni yoye momadhiladhilo. Dhiladhila kutya omolwashike ya pumbwa uuyelele mboka. Kungawo, omukalo moka to ka thikama, to ka ninga omaudhi nosho wo omainyengo gokoshipala, otagu ka holola omaiyuvo goye notagu ka ulika kutya owu na ko nasha nayo.

Popya to tala kaapulakeni yoye. Inashi pumbiwa tu kale nomeho omambanda. Ngele kashi shi uupyakadhi okupopya to tala kaapulakeni meputuko lyeni, shi ninga. Uuna to gandja oshipopiwa, tala komupulakeni gumwe poshikando, pehala lyokutala meendelelo ongundu ayihe poshikando ngoye to galula ko omeho.