1, 2. Ehogololo lya tya ngiini tu na okuninga li na ko nasha nomainyanyudho?

NATU tye ando owu li pokulya oshiyimati ihe oto mono kutya nani ombinga yimwe yasho oyo ola. Oto ka ninga po shike? Oto vulu okulya po oshiyimati ashihe nokuli nombinga ndyoka yo ola; nenge oto vulu oku shi ekelahi ashihe mwa kwatelwa ombinga ndjoka yo ola, nenge oto vulu okuteta ko ndjoka yo ola e to li ndjoka yi li nawa. Mbela oshike to ka tokola okuninga po?

² Omainyanyudho otaga vulu okuyelekanithwa noshiyimati shoka. Omathimbo gamwe oho kala wa hala okunyanyukilwa omainyanyudho gontumba, ihe oho mono kutya ogendji gomugo kunena inaga yogoka pamikalo, ogo ola nokuli pathaneko ngaashi oshiyimati. Mbela oto ka ninga po shike? Aantu yamwe ohaya taamba ko omainyanyudho kehe ge li muuyuni nonando omawinayi. Yalwe ohaya yanda omainyanyudho goludhi kehe opo ya kale nuushili kutya itaya ka adhika koshiponga shasha shoka hashi etithwa kokukutha ombinga mugo. Yalwe ishewe ohaya yanda nekoto omainyanyudho ngoka inaaga yogoka e taya nyanyukilwa ngoka ga yogoka. Mbela ngoye ehogololo lya tya ngiini wu na okuninga opo wi ikaleke mohole yaKalunga?

3. Oshike tatu ka kundathaneni ngashingeyi?

³ Oyendji yomutse ohatu yanda okukutha ombinga momainyanyudho ngoka inaaga yogoka e tatu nyanyukilwa ngoka ga yogoka. Otu shi shi kutya otwa pumbwa omainyanyudho gontumba, ihe otwa hala owala okukala hatu inyanyudha naangoka ga yogoka. Onkee ano, otwa pumbwa okutala kutya omainyanyudho  geni ga yogoka nogeni inaaga yogoka. Ihe tango natu kundathaneni kutya omainyanyudho ngoka tatu hogolola otaga vulu okuguma ngiini okulongela Jehova kwetu.

4. Eiyapulo lyetu oli na okuguma ngiini okuhogolola kwetu omainyanyudho?

⁴ Omukulupe gumwe Onzapo ngoka a ninginithwa mo 1946 okwa tile: “Onde shi ninga elalakano lyandje okukala aluhe poshipopiwa sheninginitho kehe nokupulakena nawa, nda fa ndi li poshipopiwa sheninginitho lyandje.” Omolwashike mbela? Ota ti: “Okukaleka eiyapulo lyandje momadhiladhilo lya fa epe okwa kwathela ndje noonkondo opo ndi kale omudhiginini.” Kapu na omalimbililo kutya nangoye oto tsu kumwe noohapu ndhoka. Okwiidhimbulukitha paumwene kutya owu uvanekela Jehova kutya oto ke mu longela onkalamwenyo yoye ayihe otashi ke ku inyengitha wu idhidhimike. (Lesha Omuuvithi 5:4.) Okutedhatedha kombinga yeiyapulo lyoye itaku ka nwetha mo owala etaloko lyoye li na ko nasha nuukalele wopaKriste ihe otaku ka nwetha wo iinima yimwe monkalamwenyo yoye, mwa kwatelwa omainyanyudho. Omuyapostoli Paulus okwa tsa omuthindo uushili mboka sho a nyolele Aakriste yopethimbo lye a ti: ‘Mwaashihe shoka tamu shi ningi, ngele tamu li nenge tamu nu, longeni ayihe nokusimanekitha Kalunga.’ — 1 Kor. 10:31.

5. Levitikus 22:18-20 ote tu kwathele ngiini tu uve ko elondodho ndyoka li li mAaroma 12:1?

⁵ Kehe shimwe to ningi monkalamwenyo  yoye osha pambathana nokulongela kwoye Jehova. Paulus montumwafo ye ndjoka a nyolela Aaroma, okwa li a longitha uutumbulilo wu na eityo lyomuule, opo a kwathele ooitaali ooyakwawo yu uve ko nawa oshinima shoka. Okwa li e ya kumagidha a ti: “Igandjeni [omalutu geni, OB-1954] kuKalunga eyambo li na omwenyo, mu kale mwe mu iyapulila, ne mu kale mwe mu opalela. Ndika olyo elongelokalunga lyeni lyashili.” (Rom. 12:1) Olutu lwomuntu olwa kwatela mo omadhiladhilo ge, omutima gwe nosho wo oonkondo dhe dhopalutu. Oto longitha iinima ayihe mbika okulongela Kalunga. (Mark. 12:30) Paulus okwa popya kutya okulongela Kalunga nomutima aguhe kwa tya ngawo oku li eyambo. Muutumbulilo “eyambo” omu na eityo lyelondodho tali tu londodha kutya otu na okuyanda okuninga iinima yontumba. Kohi yOmpango yaMoses, Kalunga ka li ha taamba ko eyambo li na oshipo. (Lev. 22:18-20) Sha faathana, ngele omayambo gopambepo gOmukriste inaga yogoka momukalo gwontumba, Kalunga ite ga taamba ko. Ihe shoka ongiini tashi vulu okuningwa?

6, 7. Ongiini Omukriste ta vulu okunyateka olutu lwe, notashi vulu okweetitha iilanduliko ya tya ngiini?

⁶ Paulus okwa li a kumagidha Aakriste yokuRoma a ti: “Inamu gandja iilyo yomalutu geni muulunde.” Okwa li wo e ya lombwele ya ‘dhipage iilonga yolutu.’ (Rom. 6:12-14; 8:13, OB-1954) Petameko lyontumwafo ye ndjoka a li a nyolele Aaroma okwa popya po iiholelwa yimwe ‘yiilonga yolutu.’ Okwa li a popi kombinga yaalunde a ti: ‘Omakana gawo ogu udha omatukano omadhigu. Oompadhi dhawo odhu uluma okutilahi ombinzi. Etilokalunga kali li montaneho yomeho gawo.’ (Rom. 3:13-18, yelekanitha OB-1954 nosho wo NW.) Omukriste ota nyateke olutu lwe ngele okwa longitha ‘iilyo yolutu’ iilonga mbyoka yuulunde. Pashiholelwa, ngele Omukriste oha tala owina iinima ya nyata, ngaashi omathano giipala, nenge ha tala iinima ya kwatela mo elongitho lyoonkondo, ota “gandja [omeho ge] muulunde” nokungawo ota nyateke olutu lwe aluhe. Okulongela Kalunga kwe akuhe otaku kala eyambo kaali shi we eyapuki noitaali vulu okutaambwa ko kuKalunga. (Deut. 15:21; 1 Pet. 1:14-16; 2 Pet. 3:11) Iilanduliko mbyoka hayi etithwa kokuhogolola  omainyanyudho inaaga yogoka kayi shi tuu yiyemateka!

⁷ Oshoshili kutya omainyanyudho ngoka Omukriste ha hogolola otaga vulu okweetitha iilanduliko ya kwata miiti. Onkee ano, otwa hala okuhogolola omainyanyudho ngoka tage ke tu kwathela tu hwepopaleke omayambo ngoka hatu yambele Kalunga, ihe haku ga nyateka. Ngashingeyi natu ka kundathaneni nkene tatu vulu okumona kutya omainyanyudho ngaka oga yogoka nenge inaga yogoka.

8, 9. (a) Omainyanyudho otaga vulu okutopolwa moongundu mbali dhini? (b) Otu na okuyanda omainyanyudho geni, nomolwashike?

⁸ Omainyanyudho otaga vulu okutopolwa unene tuu moongundu mbali. Gamwe oongoka ge na okuyandwa thiluthilu kAakriste; gamwe oongono Aakriste taya vulu okutala kutya ogeni tage yo opalele. Tango natu taleni kwaangoka Aakriste ye na okuyanda thiluthilu.

⁹ Ngaashi twa mona montopolwa yo-1, omainyanyudho gamwe oga kwatela mo iilonga mbyoka ya pangulwa kOmbiimbeli. Pashiholelwa, dhiladhila kombinga yomahala goko-Internet ngoka hagi ithanwa Web sites, ookino, oopolohalama dhoko-TV nosho wo oomusika ndhoka dha nika elongitho lyoonkondo nenge uumpulile, nenge hadhi ulike omathano giipala nenge hadhi humitha komeho omikalo omiwinayi. Molwaashoka omainyanyudho inaaga yogoka otaga popile iilonga mbyoka tayi yono po omithikampango dhOmbiimbeli nenge tayi teya oompango dhOmbiimbeli, oge na okuyandwa kAakriste yashili. (Iil. 15:28, 29; 1 Kor. 6:9, 10; Eh. 21:8) Ngele to yanda omainyanyudho ga tya ngaaka inaaga yogoka, oto ulukile Jehova kutya owu ‘tonde shili shoka oshiwinayi’ ‘nokweetha aluhe uukolokoshi.’ Komukalo nguka, oto ulike kutya owu na ‘eitaalo lyashili.’ — Rom. 12:9; Eps. 34:14; 1 Tim. 1:5.

10. Okudhiladhila kwa tya ngiini shi na ko nasha nomainyanyudho kwa nika oshiponga, nomolwashike?

¹⁰ Aantu yamwe otashi vulika ya kale yu uvite kutya okwiinyanyudha mokutala omathano giinima ya nyata inashi  nika oshiponga. Ohaya dhiladhila taya ti: ‘Otandi vulu okutala oshinima sha tya ngeyi mookino nenge ko-TV, ihe kandi na nando esiku limwe ndi shi ninge.’ Okudhiladhila ngawo otaku pukitha nokwa nika oshiponga. (Lesha Jeremia 17:9.) Ngele otwa hokwa okutala iinima mbyoka ya pangulwa kuJehova, mbela otu ‘tonde ngaa shili uuwinayi’? Ngele otwa kala hatu tala, hatu lesha nohatu pulakene lwiikando iinima mbyoka ya kwatela mo eihumbato ewinayi, otatu ka nyateka omadhiladhilo getu. (Eps. 119:70; 1 Tim. 4:1, 2) Ngele tatu shi ningi, otashi vulu okunwetha mo etaloko lyetu lyokutala ko eihumbato inaali yogoka lyayalwe.

11. Aagalati 6:7 otaya koleke uushili wuni wu na ko nasha nomainyanyudho?

¹¹ Shika osha li sha ningwa shili. Aakriste yamwe oya ya moluhondelo molwaashoka ya nwethwa mo komainyanyudho ngoka ya kala haya tala. Oyi ilonga sha miimoniwa iiwinayi kutya “shono omuntu te shi kunu, osho wo ta ka teya.” (Gal. 6:7) Ihe iilanduliko yinikitha oluhodhi ya tya ngaaka otayi vulu okuyandwa. Ngele owa kunu iinima mbyoka iiwanawa momadhiladhilo goye, oto ka teya nenyanyu iizemo iiwanawa. — Tala oshimpungu “ Omainyanyudho geni ndi na okuhogolola?”

12. Aagalati 6:5 otaya popi ngiini shi na ko nasha nomainyanyudho ngoka hatu hogolola, newiliko lini tu na ngele tatu ningi omahogololo paumwene?

¹² Ngashingeyi natu kundathaneni ongundu ontiyali yomainyanyudho, sha hala okutya, ngoka ga kwatela mo iinima inaayi pangulwa kondandalunde mOohapu dhaKalunga, ihe inayi popilwa wo kudho. Ngele tashi ya pomainyanyudho ga tya ngaaka, Omukriste kehe okwa pumbwa okuninga etokolo paumwene shi na ko nasha naangoka e wete ga yogoka. (Lesha Aagalati 6:5.) Ihe nando ongaaka, uuna tatu ningi etokolo ndika otu na ewiliko ndyoka tali vulu oku tu kwathela. Ombiimbeli oyi na omakotampango nenge ooshili dha simana ndhoka tadhi  vulu oku tu kwathela tu tseye nkene Jehova ha dhiladhila. Ngele tatu gandja eitulomo komakotampango ngoka, otatu vulu okutseya kutya ‘Omuwa okwa hala tu ninge shike’ miinima ayihe, mwa kwatelwa okuhogolola kwetu omainyanyudho. — Ef. 5:17.

13. Oshike tashi ke tu inyengitha tu yande omainyanyudho ngoka taga vulu okuyemateka Jehova?

¹³ Oshi uvitiwe ko kutya hAakriste ayehe ye na oondunge dhokuyoolola dhi thike pamwe. (Fil. 1:9) Niishewe, kaye hole  omainyanyudho ga faathana. Onkee ano, itatu vulu okutegelela Aakriste ayehe ya ninge omatokolo ga faathana lela. Ihe nando ongaaka, mpo ngaa pu thike okweetha omakotampango gaJehova ga nwethe mo omadhiladhilo nomitima dhetu, opo ngaa pu thike okukala twa halelela okuyanda omainyanyudho kehe ngoka taga vulu oku mu yemateka. — Eps. 119:11, 129; 1 Pet. 2:16.

14. (a) Ngele tatu hogolola omainyanyudho, oshinima shini tu na okudhiladhila? (b) Ongiini tatu vulu okupititha komeho iinima yUukwaniilwa monkalamwenyo yetu?

¹⁴ Ngele tatu hogolola omainyanyudho, otu na okudhiladhila kombinga yoshinima shilwe sha simana: ethimbo lyetu. Nonando omainyanyudho ngoka hatu hogolola ohagu ulike kutya oshike tu hole, ethimbo ndyoka hatu longitha mugo ohali ulike kutya oshike twa pititha komeho. Aakriste oye na okukala ya pititha komeho iinima yUukwaniilwa monkalamwenyo yawo. (Lesha Mateus 6:33.) Ano oshike to vulu okuninga opo wu shilipaleke kutya owa pititha komeho iinima yUukwaniilwa monkalamwenyo yoye? Omuyapostoli Paulus okwa ti: “Ikonakoneni ano nawa, nkene mu na okukala. Inamu kala ngashika omagoya, kaleni ngaashi aanandunge. Longitheni nawa ethimbo kehe mu li na.” (Ef. 5:15, 16) Odhoshili kutya okwiitulila po omangambeko ge na ko nasha nethimbo ndyoka ho longitha momainyanyudho otashi ku kwathele wu kale wu na ethimbo lya gwana lyokuyoolola “iinima mbyoka yi na oshilonga,” sha hala okutya, omaipyakidhilo ngoka tage ku tungu pambepo. — Fil. 1:10.

15. Omolwashike shi li pandunge okukala twa kotoka ngele tatu hogolola omainyanyudho?

¹⁵ Oshi li wo pandunge okukala twa kotoka ngele tatu hogolola omainyanyudho. Mbela shika osha hala okutya shike? Dhiladhila natango koshiyimati shoka sha popiwa petameko. Opo tu yande okulya papuko ombinga yasho ndjoka yo ola, hayo ayike tatu tete ko, ihe otatu kwatele mo wo oshitopolwa shimwe shoka sha dhingoloka ombinga ndjoka yo ola. Sha faathana, Omukriste omunandunge iha yanda owala omainyanyudho ngoka taga yono omakotampango gOmbiimbeli kondandalunde, ihe oha yanda wo ngoka taga limbilike nenge ga kwatela mo iinima  mbyoka tayi vulu okuyona po uupambepo we. (Omayel. 4:25-27) Ngele to landula lelalela omayele gOohapu dhaKalunga, otashi ke ku kwathela wu yande omainyanyudho ngoka taga kwatele mo iinima inaayi yogoka.

16. (a) Ongiini tatu vulu okuulika kutya otu na etaloko lya fa lyaJehova shi na ko nasha nomikalo? (b) Ongiini okutula miilonga omakotampango gOmbiimbeli taku vulu okuninga omukalo gwetu gwonkalamwenyo?

¹⁶ Ngele Aakriste yashili taya hogolola omainyanyudho, tango ohaya dhiladhila kutya Jehova ohe ga tala ko ngiini. Ombiimbeli oya popya kutya Jehova oku na omaiyuvo ga tya ngiini noya yelitha omakotampango ge. Pashiholelwa, omukwaniilwa Salomo okwa tumbula iinima oyindji mbyoka Jehova e tonde, ngaashi “elaka lyiifundja, iikaha tayi tilehi ombinzi yaa na ondjo, omutima tagu [dhiladhilile] omatedho giiponga, oompadhi tadhi endelele okuya kuuwinayi.” (Omayel. 6:16-19) Etaloko lyaJehova oli na okunwetha mo ngiini etaloko lyoye? Omupisalomi gumwe okwa ti: “Oomboka ye hole Kalunga, taa tondo uuwinayi.” (Eps. 97:10, OB-1954) Omainyanyudho ngoka ho hogolola oge na okuulika kutya owu tonde shili shoka Jehova e tonde. (Gal. 5:19-21) Dhimbulukwa wo kutya shoka hashi ulike naanaa kutya ngoye omuntu a tya ngiini, kashi shi shoka ho ningi montaneho yayalwe, ihe ooshoka ho ningi ngele wu li ongoye awike. (Eps. 11:4; 16:8) Onkee ano, ngele owa hala lela nomutima aguhe okukatuka metsokumwe nomaiyuvo gaJehova miinima yi na ko nasha nomikalo monkalamwenyo yoye ayihe, ninga aluhe omatokolo ge li metsokumwe nomakotampango  gOmbiimbeli. Okuninga ngawo otaku ka ninga omukalo gwoye gwonkalamwenyo. — 2 Kor. 3:18.

17. Manga inaatu hogolola omainyanyudho gontumba, omapulo geni tu na okwiipula?

¹⁷ Oshike ishewe to vulu okuninga po opo wu shilipaleke kutya owa katuka metsokumwe netaloko lyaJehova ngele to hogolola omainyanyudho? Ipula to ti: ‘Oshinima shika otashi ka guma ndje ngiini nosho wo ekwatathano lyandje naKalunga?’ Pashiholelwa, manga inoo tokola okutala okino yontumba, ipula to ti: ‘Mbela shoka tashi ulikwa mokino ndjino otashi ka guma ngiini eiyuvo lyandje?’ Natu taleni komakotampango ngoka taga vulu oku tu kwathela moshinima shoka.

18, 19. (a) Ongiini ekotampango ndyoka tali adhika mAafilippi 4:8 tali tu kwathele tu mone kutya omainyanyudho getu oga yogoka nenge inaga yogoka? (b) Omakotampango galwe geni taga vulu oku tu kwathela tu hogolole omainyanyudho ngoka ga yogoka? (Tala enyolo lyopevi.)

¹⁸ Ekotampango limwe lya simana li li mAafilippi 4:8 otali ti: “Kaleni nokudhiladhila iinima mbyoka iiwanawa noya gwana okusimanekwa: iinima mbyoka yoshili yo opala, yu uka, ya yogoka noyi na epopilo ewanawa.” Menyolo ndyoka Paulus ka li ta kundathana shi na ko nasha nomainyanyudho, ihe okwa li ta popi kombinga yokutedhatedha kwomutima hoka ku na okuukitha eitulomo kiinima mbyoka tayi nyanyudha Kalunga. (Eps. 19:15, OB-1954) Ihe nando ongaaka, ekotampango ndyoka otali longo wo miinima yi na ko nasha nomainyanyudho. Ngiini mbela?

¹⁹ Ipula to ti: ‘Mbela ookino ndhoka handi hogolola okutala, omaudhano goovidio ngoka handi dhana nenge oomusika ndhoka handi pulakene nosho wo omainyanyudho galwe moka handi kutha ombinga ohagu udhitha ngaa omadhiladhilo gandje niinima “ya yogoka”?’ Pashiholelwa, konima yokutala okino yontumba, iinima yini hayi kala tayi dhana onkandangala momadhiladhilo goye? Ngele oya yogoka notayi talaleke otashi ulike kutya omainyanyudho goye oga li ga yogoka. Ihe ngele okino ndjoka wa tala otayi ku ningitha wu dhiladhile kombinga yiinima mbyoka inaayi yogoka, nena otashi ulike kutya omainyanyudho goye kaga li ga yogoka noga nika oshiponga  nokuli. (Mat. 12:33; Mark. 7:20-23) Omolwashike taku vulu okutiwa ngawo? Omolwaashoka okudhiladhila kombinga yiinima mbyoka inaayi yogoka pamikalo ohashi yono po ombili yomuntu yokomutima notashi vulu okuyona po ekwatathano lye naKalunga. (Ef. 5:5; 1 Tim. 1:5, 19) Molwaashoka omainyanyudho ga tya ngaaka otaga vulu oku ku guma pauhandimwe, kala wa tokola toko oku ga yanda. * (Rom. 12:2) Kala ngaashi omupisalomi gumwe ngoka a li a galikana Jehova a ti: “Omeho gandje ga keelela po, gaa taalele uuwinayi.” — Eps. 119:37, OB-1954.

20, 21. Ekotampango ndyoka li li mAakorinto yotango 10:23, 24 otali tu kwathele ngiini ngele tatu hogolola omainyanyudho?

²⁰ Paulus okwa tumbula ekotampango lyOmbiimbeli lya simana ndyoka tu na okudhiladhila kulyo ngele tatu ningi omatokolo ge na ko nasha niinima yopaumwene. Okwa ti: “Ayihe otayi vulika okuningwa, ihe haayihe tayi kwatha. Inaku kala nando omuntu ta longo owala shoka she mu opalela, ihe na tale wo shoka tashi opalele mukwawo.” (1 Kor. 10:23, 24) Ongiini ekotampango ndyoka tali longo shi na ko nasha nokuhogolola omainyanyudho ga yogoka? Otwa pumbwa okwiipula ngeyi: ‘Ongiini omainyanyudho ngoka handi hogolola taga ka guma yalwe?’

²¹ Otashi vulika eiyuvo lyoye tali ku pitike wu kuthe ombinga momainyanyudho gontumba ngoka wu wete kutya ‘otaga vulu okuningwa.’ Ihe ngele owa mono kutya eiyuvo lyooitaali ooyakweni yalwe itali ya pitike ya kuthe ombinga mugo, oto vulu okutokola nangoye waa kuthe ombinga mugo. Omolwashike mbela? Omolwaashoka ino hala ‘okuyona kuyakweni’ nenge wu ‘yone nokuli kuKristus,’ ngaashi Paulus a popya, moku shi ninga oshidhigu kuyo okukakatela uudhiginini wawo kuKalunga. Kungeyi oto pulakene komakumagidho ngoka taga ti: “Kotokeni, mwaa pukithe [gumwe].” (1 Kor. 8:12; 10: 32) Aakriste yashili kunena ohaya vulika komayele gaPaulus gopandunge ge na ko nasha nokuyaalela yalwe mokuyanda omainyanyudho ngoka tashi vulika ‘taga vulu okuningwa’ ihe ‘itaga kwatha.’ — Rom. 14:1; 15:1.

22. Omolwashike Aakriste haya taamba ko omataloko gayalwe ga yooloka ko kwaangono gawo ge na ko nasha niinima yopaumwene?

²² Opu na ishewe oshinima shilwe shoka sha kwatelwa mokupititha komeho uuwanawa wayalwe. Omukriste ngoka eiyuvo lye itaali mu pitika a kuthe ombinga momainyanyudho gontumba ke na okukomangela kutya Aakriste ayehe megongalo oye na okukala ye na etaloko lya fa lye li na ko nasha nokutya omainyanyudho ga yogoka ogeni. Ngele okwa ningi ngawo, ota ka kala a fa omuhingi gwoshihauto ngoka ta hingi mondjila onene, ihe okwa hala aahingi ayehe mboka taya hingi mondjila ndjoka ya kale taya hingile kondapo ndjoka ta hingile. Okukala twa hala aantu ya ninge iinima ngaashi tse twa hala oku yi ninga kashi li pandjele. Omolwohole yopaKriste, Omukriste ngoka eiyuvo lye itaali mu pitika a kuthe ombinga momainyanyudho gontumba oku na okusimaneka ooitaali ooyakwawo mboka ye na etaloko lya yooloka ko kulye shi na ko nasha nomainyanyudho, uuna tali tsu kumwe nomakotampango gopaKriste. Kungawo, ote etha a kale ‘nolukeno [nenge “nondjele,” NW] naantu ayehe.’ — Fil. 4:5; Omuuv. 7:16.

23. Ongiini to vulu okushilipaleka kutya owa hogolola omainyanyudho ga yogoka?

²³ Oku shi popya paufupi, ongiini to vulu okushilipaleka kutya owa hogolola omainyanyudho ga yogoka? Yanda omainyanyudho kehe ngoka tagu ulike iinima inaayi yogoka pamikalo mbyoka ya pangulwa kOohapu dhaKalunga. Landula omakotampango gOmbiimbeli ngoka taga vulu oku ku kwathela ngele tashi ya pomainyanyudho ngoka inaaga tumbulwa kondandalunde mOmbiimbeli. Yanda omainyanyudho ngoka taga vulu okunyateka eiyuvo lyoye e to kala wo ho yanda omainyanyudho ngoka taga vulu okupundukitha yalwe, unene tuu ooitaali ooyakweni. Etokolotoko lyoye lyokuninga ngawo nali simanekithe Kalunga noku ku kaleka mohole ye pamwe nuukwanegumbo woye.