1-3. (a) Omolwashike omukulukadhi ha shilipaleke ngele okamwanamati oka zalekwa ngaa nawa noka yogoka? (b) Omolwashike Jehova a hala aalongeli ye ya kale ya yogoka, noshike hashi tu inyengitha tu kale twa hala okukala twa yogoka?

OMUKULUKADHI oha longekidha nawa okamwanamati ngele taka zi po. Oha shilipaleke ngele oka yogwa ngaa nongele oonguwo dhako odho opala nodha yogoka. Oku shi shi kutya uuyogoki owu li oshinima sha simanenena kuukolele wokamwanamati hoka. Okwa tseya wo kutya okuholoka po kwako otaku ka simanekitha aavali yako nenge ku ya shekithe.

² Jehova Tate yetu gwomegulu naye okwa hala aapiya ye ya kale ya yogoka nenge ya yela. Oohapu dhe otadhi ti: “Ngoye omuyogoki kumboka aayogoki.” * (Eps. 18:26) Jehova oku tu hole; okwa  tseya kutya ngele otwa kala twa yogoka otashi tu etele uuwanawa oundji. Okwa tegelela wo tu li Oonzapo dhe tu mu simanekithe mukehe oshinima tatu ningi. Odhoshili kutya okuholoka po kwetu ku li pauyogoki nosho wo eihumbato lyetu ewanawa otayi ka simanekitha Jehova nosho wo edhina lye eyapuki, ihe haku mu shekitha. — Hes. 36:22; lesha 1 Petrus 2:12.

³ Okukala kwetu tu shi shi kutya Kalunga oku hole aantu mboka ya yogoka ohashi tu inyengitha tu kale twa yogoka. Otwa hala onkalamwenyo yetu yi mu simanekithe molwaashoka otu mu hole. Otwa hala wo okwiikaleka mohole ye. Onkee ano natu konakoneni kutya omolwashike twa pumbwa okukala twa yogoka, kutya okukala aayogoki otashi ti shike nosho wo kutya ongiini tatu vulu okukala twa yogoka. Okukonakona iinima mbyoka otaku vulu oku tu kwathela tu mone kutya omiinima yini twa pumbwa okuhwepopala.

4, 5. (a) Omolwetompelo lya simana lini twa pumbwa okukala aayogoki? (b) Uuyogoki waJehova owi iwetikile ngiini miinima mbyoka a shita hayi monika?

⁴ Omukalo gumwe moka Jehova he tu wilike ogwo okupitila moshiholelwa she. Omolwaashono Oohapu dhe tadhi tu ladhipike tu ‘mu holele.’ (Ef. 5:1) Etompelo lya simana noonkondo kutya omolwashike twa pumbwa okukala twa yogoka olyo kutya Jehova Kalunga ngoka tatu longele omuyogoki nomuyapuki miinima ayihe. — Lesha Levitikus 11:44, 45.

⁵ Uuyogoki waJehova, ngaashi naanaa omaukwatya ge galwe ogendji nosho wo oondjila dhe, owi iwetikile miinima mbyoka a shita hayi monika. (Rom. 1:20) Evi olya shitwa li kale ehala lya yogoka lyokukalwa kaantu. Meshito Jehova okwa shitila mo iinima yokwoopaleka ombepo nosho wo omeya. Pashiholelwa, uumbaambala ohawu opaleke evi mokugongela uuhoho e tawu wu fumvike kohi yevi. Omazinyo, oontuko nuupuka wulwe ohayi tuku po iinamwenyo ya sa e tayi ningi ontsi yevi. Ano osha yela kutya uuyogoki owa simana ‘kOmushiti gwevi.’ (Jer. 10:12) Owu na wo okukala wa simana kutse.

6, 7. Ompango yaMoses oya li ya tsa ngiini omuthindo kutya mboka haya longele Jehova oye na okukala ya yogoka?

⁶ Etompelo lilwe molwashike twa pumbwa okukala aayogoki  olyo kutya molwaashono ye e li Omupangeli gwetu okwa hala aalongeli ye ya kale ya yogoka. Kohi yOmpango ndjoka a li a pa Aaisraeli, uuyogoki nelongelokalunga oya li hayi endele pamwe. Ompango oya li ya popya kutya mEsiku lyEkwatakanitho omusaaseri omukuluntu okwa li e na okuyoga nawa olutu lwe aluhe lwaali, ihe halumwe aluke. (Lev. 16:4, 23, 24) Aasaaseri mboka ya li miilonga oya li ye na okuyoga iikaha yawo noompadhi dhawo manga inaaya yambela Jehova omayambo. (Eks. 30:17-21; 2 Ondjal. 4:6) Ompango oya li ya tumbula omikalo 70 lwaampono ndhoka dha li tadhi ningitha omuntu a kale inaa yogoka palutu nenge pamikalo. Uuna Omwiisraeli a li e li monkalo yontumba inaayi yogoka, ka li ha vulu okukutha ombinga nando oyimwe mokulongela Kalunga, nongele okwe shi ningile owina, okwa li e na okudhipagwa. (Lev. 15:31) Kehe gumwe ngoka a li inaa hala okwiiyelitha pamukalo ngoka gwa li gwa tulwa po, mwa kwatelwa okwiiyoga olutu aluhe nokuyoga oonguwo dhe, okwa li e na “okudhimwa mo maantu yaKalunga.” — Num. 19:17-20.

⁷ Nonando katu li kohi yOmpango yaMoses, otayi tu kwathele tu uve ko nkene Kalunga ha tala ko iinima. Ompango oya li ya tsa omuthindo sha yela nawa kutya aalongelikalunga oye na okukala ya yogoka. Jehova ina lunduluka. (Mal. 3:6) Elongelokalunga lyetu ote li taamba ko owala ngele “lya yela nolya yogoka.” (Jak. 1:27) Onkee ano otwa pumbwa okutseya kutya okwa hala tu ninge shike moshinima shika.

8. Omiinima yini Jehova a hala tu kale twa yogoka?

⁸ MOmbiimbeli uuyogoki owa kwatela mo oshindji kaashi shi owala okukala twa yogoka palutu. Okukala twa yogoka koshipala shaKalunga okwa kwatela mo onkalamwenyo yetu ayihe. Jehova okwa hala tu kale twa yogoka miinima ine ya simana, ngaashi uuyogoki wopambepo, wopamikalo, wopamadhiladhilo nowopalutu. Natu yi taleni ano kooshimwe kutya oya kwatela mo shike.

9, 10. Uuyogoki wopambepo otashi ti shike, nAakriste yashili ohaya yanda shike?

⁹ Uuyogoki wopambepo. Oku shi popya paunathangwa, uuyogoki wopambepo otashi ti okwaavundakanitha elongelokalunga  lyashili naangoka giifundja. Sho Aaisraeli ya li ya zi muBabilonia e taya shuna kuJerusalem, oya li ye na okuvulika kelondodho lya nwethwa mo tali ti: “Shi thigeni po! Inamu guma . . . shoka sha nyata! Iyoololeni mo musho.” (Jes. 52:11) Aaisraeli oya li taya shuna koshilongo shawo opo ya ka tungulule elongelokalunga lyashili lyaJehova. Elongelokalunga lya tya ngaaka olya li li na okukala lya yogoka, inaali nyatekwa komalongo nosho wo komikalondjigilile dhontumba dhelongelokalunga lyomuBabilonia ndhoka tadhi dhinitha Kalunga.

¹⁰ Tu li Aakriste yashili kunena, otu na okukala twa kotoka opo twaa nyatekwe komalongelokalunga giifundja. (Lesha 1 Aakorinto 10:21.) Osha simana tu kale twa kotoka moshinima shika, molwaashoka enwethomo lyomalongelokalunga giifundja oli li apuhe. Miilongo oyindji, omithigululwakalo, omaipyakidhilo nosho wo omikalondjigilile dhi ili nodhi ili odhi na ekwatathano nomalongo gomalongelokalunga giifundja, ngaashi elongo ndyoka kutya opu na oshinima shi li momuntu shoka hashi hulu po ngele a si. (Omuuv. 9:5, 6, 10) Aakriste yashili ohaya yanda omikalondjigilile ndhoka dha kwatela mo omalongo gomalongelokalunga giifundja. * Itatu ke etha nando omathininiko okuza kaantu yamwe ge tu ningithe tu yone omakotampango gOmbiimbeli ge na ko nasha nelongelokalunga lya yogoka. — Iil. 5:29.

11. Uuyogoki wopamikalo owa kwatela mo shike, nomolwashike sha simana noonkondo tu kale aayogoki moshinima shika?

¹¹ Uuyogoki wopamikalo. Okukala twa yogoka pamikalo okwa kwatela mo okuyanda oluhondelo lwoludhi kehe. (Lesha Aaefeso 5:5.) Osha simana noonkondo okukala twa yogoka pamikalo. Ngaashi tatu ke shi mona montopolwa tayi landula, opo tu ikaleke mohole yaKalunga, otu na ‘okuyanda oluhondelo.’ Omuhondeli ini iyela ombedhi ‘ita ka ya moshilongo shaKalunga’ nenge mUukwaniilwa we. (1 Kor. 6:9, 10, 18) Kalunga aantu ya tya ngaaka okwe ya tala ko ye li “aagoyokithi.” Ngele oya nyengwa okukala ya yogoka pamikalo, ‘eha lyawo [nenge “oshipewa shawo,” OB-1954] osho eso etiyali.’ — Eh. 21:8.

12, 13. Omadhiladhilo nokukatuka oonkatu ohayi longele kumwe ngiini, nongiini tatu vulu okukala twa yogoka pamadhiladhilo?

 ¹² Uuyogoki wopamadhiladhilo. Omadhiladhilo ohagi inyengitha aantu ya katuke oonkatu. Ngele otwe etha omadhiladhilo omawinayi ga mene omidhi momitima dhetu, nena konima yethimbo otage ke tu ningitha tu longe iilonga inaayi yogoka. (Mat. 5:28; 15:18-20) Ihe ngele otwa kala hatu dhiladhila kombinga yiinima mbyoka ya yogoka, otashi vulu oku tu inyengitha tu kale tu na omikalo dha yogoka. (Lesha Aafilippi 4:8.) Ongiini tatu vulu okukala twa yogoka pamadhiladhilo? Shotango, otwa pumbwa okuyanda omainyanyudho goludhi kehe ngoka taga vulu okunyateka omadhiladhilo getu. * Kakele kaashono, otatu vulu okuudhitha omadhiladhilo getu niinima mbyoka ya yogoka mokukala hatu konakona aluhe Oohapu dhaKalunga. — Eps. 19:8, 9.

¹³ Opo tu ikaleke mohole yaKalunga, osha simana noonkondo okukala twa yogoka pambepo, pamikalo nopamadhiladhilo. Uuyogoki miinima mbino owa kundathanwa sha yela moontopolwa dhimwe dhembo ndika. Ngashingeyi natu konakoneni oshinima oshitine: uuyogoki wopalutu.

14. Omolwashike uuyogoki wopalutu kaawu shi owala oshinima shopaumwene?

¹⁴ Uuyogoki wopalutu owa kwatela mo okukaleka omalutu getu nomahala getu ga yela. Mbela uuyogoki wopalutu owu li oshinima shopaumwene shoka yamwe kaaye na okutya ko sha kusho? Kaalongeli yaJehova hasho shi na okukala ngawo nando. Ngaashi twe shi mona nale, Jehova ina hala owala tu kale twa yogoka molwaashoka oshiwanawa kutse, ihe omolwaashoka ngele tatu shi ningi, otashi mu simanekitha. Dhiladhila kombinga yeudhi ndyoka lya longithwa petameko lyontopolwa ndjika. Ngele to mono aluhe okanona kontumba ka kaka noinaka zala nawa, mbela iho kala to ipula shi na ko nasha naavali yako? Tse inatu hala eholokopo lyetu nenge onkalamwenyo yetu yi shekithe Tate yetu gwomegulu nenge etumwalaka ndyoka hatu uvitha. Oohapu dhaKalunga otadhi ti: “Tse itatu agulitha omuntu nando omoshinima  shimwe, oshilonga shetu opo shaa shekwe. Ihe moshinima kehe shoka tatu shi ningi, otatu ulike kutya otse aayakuli yaKalunga.” (2 Kor. 6:3, 4) Ihe ongiini ano tatu vulu okukala twa yogoka palutu?

15, 16. Okukala twa yogoka palutu okwa kwatela mo shike, nomizalo dhetu odhi na okukala monkalo ya tya ngiini?

¹⁵ Uuyogoki wetu neholokopo lyetu. Nonando omaputuko nomikalo dhokukala odha yoolokathana moshilongo noshilongo, konyala atuheni ohatu vulu okumona othewa nomeya ga gwana okwiiyoga aluhe opo tse naanona yetu tu kale twa yogoka. Uuyogoki wu li nawa owa kwatela mo okuyoga iikaha yetu nothewa manga inaatu lya nenge inaatu kwata iikulya, okwiiyoga konima yokulongitha okandjugo nokonima yokuyoga okanona nenge yoku ka hula omunambo. Okuyoga iikaha yetu nothewa otaku vulu okukeelela omikithi notaku hupitha nokuli oomwenyo. Otaku vulu okukeelela etaandelo lyoombuto dhuuvu noombakiteli ndhoka dha nika oshiponga, nokungeyi otashi kwathele aantu  kaaya kwatwe komikithi dhoshimela. Miilongo moka omagumbo kaage na uundjugo hawu pombwa, onyata otayi vulu okufumvikwa, ngaashi sha li hashi ningwa muIsraeli shonale. — Deut. 23:12, 13.

¹⁶ Omizalo dhetu nadho odha pumbwa okuyogwa aluhe opo dhi kale dha yela notadhi monika nawa. Omizalo dhOmukriste inadhi pumbwa okukala dhondilo nenge dhomoode, ihe odhi na okukala dhi li nawa, dha yogoka nodhi shi okutalwa. (Lesha 1 Timoteus 2:9, 10.) Kutya nduno otu li peni, otwa hala eholokopo lyetu “li simanekithe elongo ndyoka tali popi Kalunga, Omuhupithi gwetu.” — Tit. 2:10.

17. Omolwashike omagumbo getu nomidhingoloko dhago ge na okukala ga yogoka nogo opala?

¹⁷ Omagumbo getu nomudhingoloko gwalyo. Otashi vulika omagumbo getu kaage shi gondilo, ihe oge na okukala ga yogoka noge li monkalo ombwanawa ngaashi oonkalo dhetu tadhi shi pitike. Sha faathana, ngele ohatu yi kokugongala nomiilonga yomomapya nohauto, otu na okuninga ngaashi tatu vulu oku yi kaleka ya yela nawa meni nokombanda. Natu dhimbulukweni kutya egumbo nomudhingoloko gwalyo gwa yela ohayi gandja uunzapo kombinga yaKalunga ngoka hatu longele. Ohatu longo aantu kutya Jehova oKalunga a yogoka nonokutya ota ka ‘hanagula po mboka taya yonagula po evi’ nosho wo kutya masiku Uukwaniilwa we otawu ka ninga evi oparadisa. (Eh. 11:18; Luk. 23:43) Onkee ano otwa hala omagumbo getu niiniwe yetu yi ulukile yalwe kutya otu na nale nokuli omikalo dha yogoka ndhoka tadhi opalele muuyuni uupe.

18. Ongiini tatu vulu okuulika kutya otwa simaneka Iinyanga yetu yUukwaniilwa?

¹⁸ Omahala moka hatu gongalele. Ohole yetu yokuhola Jehova ohayi tu inyengitha tu simaneke Iinyanga yUukwaniilwa mbyoka yi li ondingandinga yelongelokalunga lyashili moshitopolwa shetu. Ngele mboka aape taye ya kOshinyanga shetu shUukwaniilwa, otwa hala ya adhe taku monika nawa. Opo tu ulike kutya otwa simaneka Iinyanga yetu yUukwaniilwa, otwa pumbwa aluhe oku yi opaleka noku yi pukulula opo yi kale monkalo ombwanawa noyi shi okutalika. Oshi li uuthembahenda okwiiyamba okulongitha ethimbo lyetu mokukwathela ‘okwoopaleka nokwaandeka’ omahala  getu moka hatu gongalele. (2 Ondjal. 34:10, NW) Ekotampango ndika otali longo wo uuna tatu gongalele mIinyanga yIigongi nenge momahala gamwe omolwiigongi iishona naambyoka iinene.

19. Opo tu kale twa yogoka palutu, otwa pumbwa okuyanda shike, nOmbiimbeli otayi tu kwathele ngiini moshinima shika?

¹⁹ Opo tu kale twa yogoka palutu, otu na okuyanda omikalondjigilile inaadhi yogoka, ngaashi okuhila omakaya, okunwa sha pitilila nokulongitha iingangamithi mbyoka hayi piki aantu nenge hayi lundulula omadhiladhilo gawo. MOmbiimbeli inamu popiwa kondandalunde omikalondjigilile adhihe ndhoka inaadhi yogoka nominyanyalithi ohayi monika apuhe kunena, ihe otatu adha mo omakotampango ngoka taga vulu oku tu kwathela tu tseye kutya Jehova oha tala ko ngiini iinima ya tya ngaaka. Molwaashoka otu shi nkene ha tala ko iinima mbyoka, ohole yetu yoku mu hola otayi tu inyengitha tu katuke oonkatu ndhoka a hokwa. Natu taleni omakotampango gatano gopamanyolo.

20, 21. Jehova okwa hala tu yande omikalondjigilile dhini, nomolwetompelo lya simana lini tu na okuvulika?

²⁰ “Sho tu na omauvaneko ngaka agehe, natu iyogeni shaa shoka tashi nyateke olutu nenge [ombepo, OB-1954]. Tu lalakaneni wo okukala aayogoki, tse tu tile Omuwa.” (2 Kor. 7:1) Jehova ina hala tu kuthe ombinga miinima mbyoka tayi nyateke omalutu getu notayi yono po ombepo yetu, sha hala okutya, iikala yetu yopamadhiladhilo. Onkee ano, otu na okuyanda iinima mbyoka hayi piki aantu mbyoka tu shi kutya ohayi yono po uukolele wopalutu nowopamadhiladhilo.

²¹ Ombiimbeli otayi tu pe etompelo lya yela kutya omolwashike twa pumbwa ‘okwiiyoga shaa shoka tashi nyateke olutu.’ Ndhindhilika kutya Aakorinto aatiyali 7:1 oya tameka taya ti: “Sho tu na omauvaneko ngaka agehe.” Mbela omauvaneko ngoka ogeni? Ngaashi sha tumbulwa moovelise dha tetekele, Jehova oku uvaneka a ti: “Ongame notandi ke mú taamba. Ongame notandi kala Ho.” (2 Kor. 6:17, 18) Dhiladhila owala keuvaneko ndika: Jehova te ku uvanekele kutya ote ke ku gamena nota ka kala e ku hole ngaashi he e hole omwanamati nenge omwanakadhona. Ihe Jehova ota  ka gwanitha po owala omauvaneko ngoka ngele to yanda shoka tashi nyateke “olutu nombepo.” Ano itashi ka kala tuu sha nika uusama okweetha omikalondjigilile dhontumba dha kaka dhi tu imbe kaatu kale nekwatathano lyetu ndika lyopothingo naJehova li na ondilo!

22-25. Omakotampango gopamanyolo geni taga vulu oku tu kwathela tu yande omikalondjigilile inaadhi yogoka?

²² “Hola Omuwa Kalunga koye komutima gwoye aguhe nokomwenyo gwoye aguhe nokomadhiladhilo goye agehe.” (Mat. 22:37) Jesus okwa ti kutya oshipango shika osho oshinene shi vule ayihe. (Mat. 22:38) Jehova oye lela twa gwana okukala tu hole. Opo tu kale tu mu hole nomutima gwetu aguhe nomwenyo gwetu aguhe nosho wo nomadhiladhilo getu agehe, otu na okuyanda omikalondjigilile ndhoka tadhi vulu okufupipika onkalamwenyo yetu nenge okuyona po okuvula kwetu okudhiladhila hoka twa pewa kuKalunga.

²³ “[Jehova oye] ha pe aantu ayehe omwenyo nomufudho niinima ayihe.” (Iil. 17:24, 25) Omwenyo ogwo omagano ga za kuKalunga. Molwaashoka otu hole Omugandji gwagwo, ano otwa hala okuulika kutya otwe ga simaneka. Ohatu yanda omukalondjigilile kehe ngoka tagu vulu okuyona po uukolele wetu, molwaashoka otu shi shi kutya omikalondjigilile ndhoka otadhi ulike kutya ihatu simaneke nandonando omagano gomwenyo. — Eps. 36:9.

²⁴ “Hola mukweni ngaashi ngoye wi ihole mwene.” (Mat. 22:39) Omikalondjigilile inaadhi yogoka ihadhi gumu owala mboka taya kutha ombinga mudho, ihe naamboka wo ye li pamwe nayo. Pashiholelwa, aantu mboka ye li popepi nomuntu ngoka ha hili omakaya otaya vulu okumona iilanduliko iiwinayi nonando yo ihaya hili omakaya. Omuntu ngoka he ehameke mboka ye li puye ota taaguluka oshipango shaKalunga shoka tashi ti kutya otu na okukala tu hole aantu ooyakwetu. Iilonga mbyoka ha longo otayi ulike kutya ke hole shili Kalunga. — 1 Joh. 4:20, 21.

²⁵ “Dhimbulutha aakwanegongalo yoye, ya kale haa vulika kaaleli nokaapangeli.” (Tit. 3:1) Miilongo oyindji okukala wu na iingangamithi yontumba nenge ho yi longitha oshi li etaaguluko lyompango yoshilongo. Tu li Aakriste yashili, ihatu kala tu na iingangamithi nenge oku yi longitha. — Rom. 13:1.

26. (a) Opo tu kale mohole yaKalunga, otwa pumbwa okuninga shike? (b) Omolwashike okukala twa yogoka koshipala shaKalunga ku li onkalamwenyo ya dhenga mbanda?

 ²⁶ Opo tu ikaleke mohole yaKalunga, otwa pumbwa okukala twa yogoka miinima ayihe, ihe hamuyimwe owala. Okweetha po nokuyanda omikalondjigilile inaadhi yogoka otashi vulika shi kale oshidhigu kutse, ihe otatu vulu oku shi ninga. * Nguka ogwo omukalo gwa dhenga mbanda gwonkalamwenyo, molwaashoka Jehova ote tu longo aluhe shoka tashi tu opalele nenge tashi tu etele uuwanawa. (Lesha Jesaja 48:17.) Shoka sha simana noonkondo osho kutya ngele otwa kala twa yogoka, otatu ka kala tu na enyanyu ndyoka hali etwa kokukala tu shi shi kutya otatu simanekitha Kalunga ngoka tu hole, nokungawo otatu ikaleke mohole ye.