1, 2. Oolye haya kala ya nyanyukwa uuna aantu taya ninginithwa?

NGELE owa longela Jehova uule womimvo odhindji, osha yela kutya owa pulakena iipopiwa yeninginitho oyindji piigongi. Ihe kashi na nduno mbudhi kutya owa kala po lungapi poompito dha tya ngaaka, osha yela kutya ohashi ku gumu ethimbo kehe uuna to mono aaninginithwa ya kuutumba kiipundi yokomeho taya thikama ya ka ninginithwe. Pompito ndjoka, aakalipo ohaya kala taya popi ya nyanyukwa nohaya hakele omake okuulika olupandu lwawo. Ohashi vulika nokuli wu lile kenyanyu sho wu wete pu na ishewe ongundu yaantu mboka ya tokola okulongela Jehova. Ihatu kala tuu twa nyanyukwa poompito dha tya ngaaka!

² Nonando otashi vulika tu mone aantu aashona taya ninginithwa omumvo kehe moshitopolwa shetu, aayengeli oye na uuthembahenda woku ya mona lwiikando oyindji. Dhiladhila owala ‘kenyanyu megulu’ mpoka hali kala li thike uuna aayengeli taya tala aantu omayovi muuyuni auhe taye ya moshitopolwa shehangano lyaJehova shokombanda yevi oshiwike kehe. (Luk. 15:7, 10) Kapu na omalimbililo kutya aayengeli ohaya kala ya nyanyukwa uuna taya tala eindjipalo lya tya ngaaka. — Hag. 2:7.

3. Omolwashike Satana he tu kundukidha ‘ta ndunduma a fa onime,’ nokwa hala okuninga shike?

³ Mepingathano naayengeli mboka haya kala ya nyanyukwa, opu na iishitwa yimwe yopambepo hayi kala ya geya uuna aantu  taya ninginithwa. KuSatana noompwidhuli dhe ohaya kala ya yemata okumona aantu omayuvi taya pilamene uuyuni mbuka wa yonuka. Satana okwi inomo kutya aantu ihaya longele Jehova molwaashoka ye mu hole shili nokapu na ngoka ta ka kala omudhiginini uuna ta makelwa sha kwata miiti. (Lesha Job 2:4, 5.) Kehe ethimbo omuntu ti iyapulile Jehova, Satana ohu ulikilwa kutya ye omufundja. Shoka ohashi kala sha fa Satana ta dhengwa omankawa omayuvi moshipala oshiwike kehe. Onkee ano, itashi kumitha sho ‘Satana he tu kundukidha, ta ndunduma a fa onime, ta kongo omuntu gwontumba, e mu ketsule po.’ (1 Pet. 5:8) “Onime” ndjika oya halelela oku tu ketsula po pambepo, sha hala okutya, yi tu ningithe tu yone po nenge tu teye po ekwatathano lyetu naKalunga. — Eps. 7:1, 2; 2 Tim. 3:12.

4, 5. (a) Omomikalo mbali dhini dha simana Jehova a ngambeka enwethomo lyaSatana? (b) Omukriste gwashili oku na okukala e na uushili wuni?

 ⁴ Nonando otwa taalelwa komutondi omukwanyanya, katu na okukala twa gwililwa po unene kuumbanda. Omolwashike mbela? Omolwaashoka Jehova okwa ngambeka oonkondo ‘dhonime ndjoka tayi ndunduma’ momikalo mbali dha simana. Mbela omikalo ndhono odhini? Gwotango, Jehova okwa hunganeka kutya “engathithi lyaantu” nenge ongundu onene yAakriste yashili otayi ka hupa ‘momahepeko omanene’ ngoka tage ya. (Eh. 7:9, 14) Omahunganeko gaKalunga ohaga gwanithwa aluhe. Onkee ano, Satana oku na okukala e shi shi kutya ita vulu okuyula oshigwana shaKalunga ashihe.

⁵ Omukalo omutiyali ogu iwetikile moshili ya simana ndjoka ya popiwa komupiya gwaKalunga omudhiginini ngoka a li ko nale. Omupolofeti Asarja okwa li a lombwele omukwaniilwa Asa a ti: “OMUWA ota kala nane, ngele otamu kala naye.” (2 Ondjal. 15:2; lesha 1 Aakorinto 10:13.) Iiholelwa oyindji mbyoka ya nyolwa mOmbiimbeli otayi ulike kutya methimbo lyonale, Satana okwa li a ndopa okuketsula po aapiya yaKalunga mboka ya kala popepi naye. (Heb. 11:4-40) Kunena, Omukriste ngoka ha kala popepi naKalunga ota ka vula okukondjitha nokusinda nokuli Ondiaboli. Oohapu dhaKalunga otadhi tu shilipaleke tadhi ti: “Kondjitheni Satana, oye note mú yi ontuku.” — Jak. 4:7.

6. Satana oha kondjitha ngiini Aakriste pauhandimwe?

⁶ Satana ita sindana mekondjo ndika lyopambepo, ihe ota vulu oku tu sinda pauhandimwe ngele otwa kala inaatu tonata pambepo. Satana oku shi shi kutya ota vulu oku tu ketsagula po ngele okwa nkundipaleke ekwatathano lyetu naJehova. Mbela Satana oha kambadhala ngiini opo e shi pondole? Ohe tu ponokele pauhandimwe a mana mo nosho wo mokulongitha omakoto. Natu ka taleni omikalo ndhoka Satana ha longitha unene.

7. Omolwashike Satana ha ponokele oshigwana shaJehova a mana mo?

⁷ Ohe tu ponokele a mana mo. Omuyapostoli Johannes okwa  ti: “Uuyuni auhe owu li mepangelo lyomuhindadhi.” (1 Joh. 5:19) Oohapu ndhoka otadhi londodha Aakriste yashili ayehe. Molwaashoka Satana okwa ketsagula po nale uuyuni auhe wa kolokosha, ngashingeyi okwa taalela oshigwana shaJehova shoka she mu ya ontuku note shi ponokele a mana mo. (Mika 4:1; Joh. 15:19; Eh. 12:12, 17) Oku udha ondjahi molwaashoka oku shi shi kutya oku na ko owala okathimbo okafupi. Onkee ano, omathininiko ge ogi indjipala. Kunena otwa taalela oonkambadhala dhe dhahugunina ndhoka ta ningi nonyanya opo a teye po ekwatathano lyetu naKalunga.

8. Omuyapostoli Paulus okwa li a hala okutya shike sho a popi kutya otatu “kondjitha” oombepo dhuuwinayi?

⁸ Otatu kondjo. Omuyapostoli Paulus okwa londodha Aakriste ooyakwawo a ti: ‘Otatu kondjitha oonkondo dhuuwinayi mewangandjo.’ (Ef. 6:12) Omolwashike Paulus a longitha uutumbulilo ‘okukondjitha’? Oshitya shOshigreka shoka sha tolokwa ‘okukondjitha’ otashi ti lela “okuninga ompindi” notashi gandja edhiladhilo lyaantu taya kondjo. Paulus mokulongitha uutumbulilo mboka, okwa li ta tsu omuthindo kutya kehe gumwe oku na okukondjitha oombepo dhuuwinayi pauhandimwe. Kutya nduno otu li moshilongo moka oombepo dhuuwinayi dhi itaalwa apuhe nenge hasho, katu na okudhimbwa kutya ekondjo lyetu olya tameka sho twi iyapulila Jehova. Okuza esiku ndyoka twi iyapula, Omukriste kehe oku li mekondjo ndyoka. Itashi kumitha sho Paulus a li e wete sha pumbiwa okuladhipika Aakriste yomuEfeso ya ‘kandeke omakotokelo’ nosho wo “okukala omuthika” ya kondjithe oombepo dhuuwinayi. — Ef. 6:11, 13, 14.

9. (a) Omolwashike Satana noompwidhuli dhe haya longitha “omakotokelo omawinayi” gi ili nogi ili? (b) Omolwashike Satana ha kambadhala okunyateka omadhiladhilo getu, nongiini tatu vulu okukondjitha oonkambadhala dhe? (Tala oshimpungu “ Takamitha omakoto gaSatana!”) (c) Omukalo gwomakoto guni tatu ka kundathaneni ngashingeyi?

⁹ Oompangela dhomakoto. Paulus okwa kumagidha Aakriste ya kandeke “omakotokelo omawinayi” gaSatana. (Ef. 6:11) Ndhindhilika kutya Paulus okwa longitha uutumbulilo omakotokelo pauwindji. Oombepo dhuuwinayi ohadhi longitha  omakotokelo ogendji tadhi shi ningi nelalakano. Momukokomoko gwethimbo, yamwe yomooitaali mboka ya kala nokukandeka omamakelo gontumba oyi igandja sho ya makelwa momukalo gulwe gwi ili. Onkee ano, Ondiaboli noompwidhuli ohaya konakona nuukeka eihumbato lyetu opo ya mone uunkundi wetu. Ohaya longitha uunkundi kehe wopambepo mboka tu na opo ya teye po ekwatathano lyetu naKalunga. Ihe oshi shi okupandulwa sho tatu vulu okudhimbulula omikalo odhindji ndhoka Ondiaboli hayi longitha, molwaashoka odha popiwa mOmbiimbeli. (2 Kor. 2:11) Otwa kundathana nale membo ndika omikalo dhimwe, ngaashi omwigo gwomaliko, eendathano ewinayi nonyata yiipala. Ngashingeyi natu ka kundathaneni kombinga yuumpulile mboka wu li wumwe womomakotokelo gaSatana.

10. (a) Uumpulile oshike? (b) Jehova oha tala ko ngiini uumpulile, nangoye oho wu tala ko ngiini?

¹⁰ Omuntu ngoka ha kutha ombinga muumpulile oha kala e na ekwatathano lela noombepo dhuuwinayi. Okwaanekela, okulya omayuku, okutikila nokupula aathithi odho omikalo dhimwe dhuumpulile. Ngaashi tu shi shi nawa, Jehova oku ‘tonde’ uumpulile. (Deut. 18:10-12; Eh. 21:8) Molwaashoka natse otu na wo ‘okutonda shaa shoka oshiwinayi,’ nena katu na nando okukala nekwatathano noombepo dhuuwinayi. (Rom. 12:9) Ngele tatu shi ningi otatu gwaaleke lelalela Tate yetu gwomegulu, Jehova.

11. Omolwashike tashi ka kala esindano enene kuSatana ngele e tu ningitha tu kuthe ombinga muumpulile? Shi thaneka.

¹¹ Molwaashoka okukutha ombinga muumpulile oshi li okukotokela Jehova, Satana okwa hala tu kuthe ombinga muwo. Oshikando kehe Satana ta ningitha Omukriste a kuthe ombinga muumpulile, oha mono esindano enene. Omolwashike mbela? Tala kethaneko tali landula: Ngele omukwiita okwa hekwa a thige po etangakwiita lyawo noku li kengelela e ta yi metanga lyomutondi, ondjayi yetangakwiita lyomutondi otayi ka  kala ya nyanyukwa. Otashi vulika ondjayi ndjoka yi ulike omukwiita ngoka ongo epole, opo yi uvithe nayi ondjayi yetangakwiita hoka a li nale. Sha faathana, ngele Omukriste okwa tameke okukutha ombinga muumpulile e ta thigi po Jehova owina nonehalo ewanawa, oti iningi omupiya gwaSatana. Satana ita ka kala tuu a nyanyukwa okuulika omuntu ngoka a thiga po Jehova, ongo epole lya sindanwa miita! Mbela opu na gumwe gwomutse a hala okupa Satana esindano lya tya ngawo? Aawe nando! Katu shi aakengeleli.

12. Satana oha longitha omukalo guni opo a nwethe mo etaloko lyetu li na ko nasha nuumpulile?

¹² Shampa owala tu tonde uumpulile, Satana ite ke tu pondola moku wu longitha. Onkee ano, oku na okuninga oonkambadhala a lundulule okudhiladhila kwetu. Ngiini mbela? Oha kongo omikalo okupukitha Aakriste sigo yamwe yomuyo tayi itaale kutya “uuwinayi owo uuwanawa, nuuwanawa owo uuwinayi.” (Jes. 5:20) Ohe shi ningi mokulongitha omukalo gwe ngoka hagu pondola, ta longitha omapulo gontumba e tu kune omalimbililo.

13. Satana okwa li a longitha ngiini omapulo okukuna omalimbililo?

¹³ Tala nkene Satana a li a longitha omukalo ngoka monakuziwa. Okwa li a pula Eva muEden a ti: ‘Kalunga okwe mú lombwele shili, mwaa lye komiti adhihe dhomeyana?’ Pethimbo lyaJob, sho aayengeli ya li ya gongala megulu, Satana okwa li a pula a ti: ‘U shi Job oha tila Kalunga owala?’ Petameko lyuukalele waJesus kombanda yevi, Satana okwa li e mu lombwele a ti: ‘Ngele ngoye Omuna gwaKalunga, lombwela omamanya ngaka, ga shituke iikwiila.’ Mokulombwela Jesus ngaaka, Satana okwa li ta sheke oohapu ndhoka Jehova opo a li a popi iiwike ihamano ya piti a ti: ‘Nguka oye Omumwandje omuholike nde mu hokwa.’ — Gen. 3:1; Job 1:9; Mat. 3:17; 4:3.

14. (a) Ongiini Satana ha longitha omukalo gwe gwomakoto a kune omalimbililo kombinga yuumpulile? (b) Ngashingeyi otatu ka tala kushike?

¹⁴ Kunena Ondiaboli ohayi longitha omikalo dha faathana  yi kune omalimbililo ge na ko nasha nuuwinayi wuumpulile. Shinikitha oluhodhi, okwe shi pondola mokukuna omalimbililo mooitaali yamwe. Oya li ya tameke okupula ngele omikalo dhontumba dhuumpulile odha nika ngaa shili oshiponga. (2 Kor. 11:3) Ongiini tatu vulu oku ya kwathela ya lundulule omadhiladhilo gawo? Ongiini tatu ka shilipaleka kutya Satana ine tu nwetha mo nomakoto ge ngoka? Opo tu mone omayamukulo, otatu ka tala omikalo mbali dhonkalamwenyo ndhoka Satana a nyateka niineya ye yuumpulile. Odho omainyanyudho nokusila oshimpwiyu uukolele wetu wopalutu.

15. (a) Aantu oyendji muAmerika naEuropa oya tala ko ngiini uumpulile? (b) Aakriste yamwe oya nwethwa mo ngiini ketaloko lyuuyuni li na ko nasha nuumpulile?

¹⁵ Okuyanekela, uulodhi nomikalo dhilwe dhuumpulile oya talika ko iinima ya nathangwa, unene tuu muAmerika naEuropa. Oofilima, omambo, oopolohalama dhoko-TV nomaudhano gokokompiuta ohayi ulike uumpulile ongo oshinima shinyanyudha, shopandunge nokashi na oshiponga. Omambo noofilima ndhoka hadhi ukitha eitulomo unene kuulodhi odha simanekwa apuhe, naantu mboka ye hole iinima mbyoka oya tota po omahangano gawo. Osha yela kutya oompwidhuli odhe shi pondola mokuninga uulodhi wu kale oshinima shanathangwa. Mbela omukalo nguka gwokutala ko uumpulile wu li oshinima shanathangwa ogwa nwetha mo Aakriste? Okudhiladhila kwayamwe nako okwa gumwa. Omomukalo guni mbela? Pashiholelwa sho Omukriste gumwe a li a tala oofilima kombinga yuulodhi, okwa ti: “Onda tala owala oofilima, ihe inandi kutha ombinga muumpulile.” Omolwashike okudhiladhila hoka kwa nika oshiponga?

16. Omolwashike sha nika oshiponga okuhogolola omainyanyudho ngoka ga kwatela mo uulodhi?

¹⁶ Nonando opu na eyooloko pokati kokukutha ombinga muumpulile nokutala iinima yuumpulile, shoka inashi hala okutya okutala iinima yuulodhi inashi nika oshiponga. Omolwashike  mbela? Ndhindhilika kutya Oohapu dhaKalunga otadhi ulike kutya Satana nenge oompwidhuli dhe ihaya vulu okumona shoka tatu dhiladhila. * Onkee ano, ngaashi sha popiwa metetekelo, Satana noompwidhuli dhe ohaya konakona shoka tatu ningi, mwa kwatelwa omainyanyudho ngoka tu hole, opo ya mone shoka tatu dhiladhila nokudhimbulula uunkundi wetu wopambepo. Ngele Omukriste oku hole oofilima nenge omambo ngoka ge na ko nasha naathithi, okutikila, aantu mboka taya longithwa koompwidhuli niinima iikwawo ya nika uumpulile, nena otu ulukile lela oompwidhuli shoka ye e hole nosho wo uunkundi we. Oompwidhuli otadhi ka kondjitha Omukriste ngoka ngaashi tadhi vulu mokulongitha uunkundi we mboka e dhi hololela sigo dhe mu sindi. Yamwe mboka ye hole iinima yuumpulile ohokwe yawo tango oya li ya penduthwa komainyanyudho ngoka tagu ulike uulodhi shoka she ya ningitha ya kuthe ombinga muumpulile. — Lesha Aagalati 6:7.   

17. Omukalo gwomakoto oguni Satana ha longitha, opo a pukithe mboka taye ehama?

¹⁷ Satana iha kambadhala owala okulongitha nayi omahalo getu gomainyanyudho, ihe oha longitha wo nayi ompumbwe yetu yokusila oshimpwiyu uukolele wetu. Ngiini mbela? Omukriste ngoka kee na uukolele otashi vulika a teke omukumo konima yokuya olundji koshipangelo nenge kundohotola, ihe ina mona ekwatho lyasha. (Mark. 5:25, 26) Shoka otashi vulu okupa Satana noompwidhuli dhe ompito oku mu pukitha. Oompwidhuli ohashi vulika dhi makele Omukriste ngoka te ehama a taaguluke elondodho ndyoka moku ka konga ekwatho ‘koonganga.’ (Lev. 19:26) Ngele oompwidhuli odhe shi pondola mokulongitha omakotokelo gadho, otashi ka nkundipaleka  ekwatathano lyOmukriste ngoka naKalunga. Omomukalo guni mbela?

18. Omukriste oku na okutinda epango lyoludhi luni, nomolwashike?

¹⁸ Jehova okwa li a londodha Aaisraeli mboka ya li haya yi koonganga a ti: “Uuna tamu yelutha omaako geni megalikano, itandi ke mu tala nando. Nando mu galikane olule ngiini, itandi ka pulakena.” (Jes. 1:15) Odhoshili kutya otwa hala aluhe okuhenuka shoka tashi yi moshipala omagalikano getu nokuyona po ekwatho ndyoka hali zi kuJehova, unene ngele tatu ehama. (Eps. 41:3) Onkee ano, Omukriste gwashili oku na okutinda epango kehe ndyoka lya nika uumpulile. * (Mat. 6:13) Ngele te shi ningi, nena Jehova ote ke mu kwathela. — Tala oshimpungu “ Mbela oshinima shika oshi na lela ekwatathano nuumpulile?”

19. (a) Ondiaboli oya pukitha aantu oyendji yi itaale shike kombinga yoonkondo dhayo? (b) Aakriste yashili oye na okuyanda omahokololo geni?

¹⁹ Nonando aantu oyendji muAmerika naEuropa oya tala ko Satana kutya ke na naanaa oonkondo, miilongo yimwe hasho shi li ngaaka. Okwa pukitha aantu oyendji miilongo mbyoka moku ya itaalitha kutya oku  na oonkondo oonenenene, ndhoka kee na shili. Aantu yamwe ohaya kala aluhe ya tila oombepo dhuuwinayi. Ohaya hokolola omahokololo ogendji kombinga yiilongankondo yoompwidhuli. Omahokololo ngoka olundji ohaga hokololwa nenyanyu, naantu ohaya kala ya tuntukwa kugo. Mbela natse otu na okutaandelitha omahokololo ngoka? Aawe, aapiya yaKalunga kashili ohaya yanda oku shi ninga omolwomatompelo gaali ga simana.

20. Ongiini Omukriste ta vulu okutaandelitha iifundja yaSatana inee shi tseya?

²⁰ Etompelo lyotango olyo kutya ngele to hokolola omahokololo nkene oompwidhuli hadhi pondola, nena oto humitha komeho oonkambadhala dhaSatana. Ngiini mbela? Ombiimbeli otayi shi koleke kutya Satana ota vulu okulonga iikumithalonga, ihe otayi londodha wo kutya oha longitha ‘omandhindhiliko giifundja’ nosho wo “omakoto.” (2 Tes. 2:9, 10) Molwaashoka Satana omupukithi a shiga ko, oku shi nawa  okunwetha mo omadhiladhilo gaamboka taya lemene kuumpulile noku ya ningitha yi itaale iinima mbyoka kaayi shi yoshili. Aantu ya tya ngaaka otashi vulika yi itaale lela kutya oya mona noyu uva iinima yontumba noku yi hokolola ya fa yoshili. Ihe konima yethimbo omahokololo ngoka ohage ende taga gwedhelwa sho taga hokololwa lwiikando. Ngele Omukriste ota taandelitha omahokololo ngoka, osha yela kutya ota longo ehalo lyOndiaboli, ‘he yiifundja ayihe’ nota taandelitha iifundja ye. — Joh. 8:44; 2 Tim. 2:16.

21. Okushike tu na okuukitha eitulomo moonkundathana dhetu?

²¹ Etompelo etiyali, nonando Omukriste okwa li e na ekwatathano noombepo dhuuwinayi nale, oku na okutakamitha opo kaa kale ta hokololele lwiikando ooitaali ooyakwawo kombinga yadho. Omolwashike mbela? Otatu kumagidhwa taku ti: “Tu taleni kuJesus hoka kwi ikwatelela eitaalo lyetu okuza petameko sigo opehulilo.” (Heb. 12:2) Otu na okugandja shili eitulomo kuKristus, ihe hakuSatana. Oshindhindhilikwedhi osho kutya sho Jesus a li kombanda yevi, ka li a hokololele aalongwa ye kombinga yoombepo dhuuwinayi, nonando okwa li ta vulu okupopya shoka Satana ta vulu okuninga naashoka itaa vulu. Pehala lyaashono, Jesus okwa li a gandja eitulomo ketumwalaka lyUukwaniilwa. Onkee ano, mokuholela Jesus naayapostoli ye, natu ukithe eitulomo ‘kiilonga iinene yaKalunga’ uuna tatu kundathana nayalwe. — Iil. 2:11; Luk. 8:1; Rom. 1:11, 12.

22. Oshike tatu vulu okuninga shoka tashi kaleke po ‘enyanyu megulu’?

²² Satana oha longitha shili omikalo dhomakoto dha yoolokathana, mwa kwatelwa uumpulile, a kambadhale a teye po ekwatathano lyetu naJehova. Ihe mokutonda shoka oshiwinayi nokuhola shoka oshiwanawa, Ondiaboli itayi ka mona ompito yi tu nkundipaleke tu kuthe ombinga muumpulile woludhi kehe. (Lesha Aaefeso 4:27.) Dhiladhila owala ‘enyanyu ndyoka hali kala megulu’ ngele tatu tsikile “okukandeka omakotokelo omawinayi gomuhindadhi” sigo osho ta ka hulithwa po. — Luk. 15:7; Ef. 6:11.