MOMBIIMBELI yoye, Episalomi 83:18 olya tolokwa ngiini? (MOmbiimbeli yOshindonga yomo 1954, Episalomi 83:19.) MOmbiimbeli New World Translation of the Holy Scriptures ovelise ndjika 18 oya tolokwa taku ti: “Opo aantu ya tseye kutya ongoye, ngoka edhina lyoye Jehova, ongoye awike Omukombandambanda kevi alihe.” Omatoloko gamwe gOombiimbeli otage yi toloka sha faathana. Ihe omatoloko ogendji inaga longitha edhina Jehova. Ombiimbeli yOshindonga yomo 1986 oye li pingena po nomadhinasimaneko ngaashi “OMUWA” nenge “Kalunga.” Mbela oshike shi na okukala movelise ndjoka? Edhinasimaneko nenge edhina Jehova?

Ovelise ndjoka otayi popi shi na ko nasha nedhina. MOshihebeli shopetameko moka iitopolwa oyindji yOmbiimbeli ya li ya nyolwa, movelise ndjoka omwa li edhina ndyoka lyi ikalekelwa. Ohali nyolwa ngeyi יהוה moondanda dhOshihebeli ndhoka dhi lile po YHWH. MOshindonga edhina ndyoka ohali nyolwa “Jehova.” Mbela edhina ndyoka oli li owala movelise yimwe mOmbiimbeli? Aawe. Otali holoka mOmanyolo gopetameko gOshihebeli lwiikando 7 000 lwaampono.

Edhina lyaKalunga olya simana shi thike peni? Tala koshiholelwa shegalikano shoka Jesus Kristus a gandja. Egalikano olya tameke ngeyi: “Tate yetu, ngu u li megulu: Edhina lyoye nali yapulwe.” (Mateus 6:9) Nale Jesus okwa galikanene kuKalunga, a ti: “Tate, simanekitha edhina lyoye.” Kalunga okwa yamukulile okuza megulu, a ti: “Onde li simanekitha notandi li simanekitha natango.” (Johannes 12:28) Osha yela kutya edhina lyaKalunga olya simana noonkondo adhihe. Ihe mbela omolwashike aatoloki yamwe ya kutha mo edhina ndyoka momatoloko gawo gOombiimbeli noku li pingena po nomadhinasimaneko?

Opu na omatompelo gaali ga simana. Lyotango, aantu oyendji otaya ti kutya edhina ndyoka kali na okulongithwa molwaashoka omukalo moka lya li hali tumbulwa petameko inagu tseyika nena. Oshihebeli shonale osha li hashi nyolwa kaashi na uuitumbuli. Onkee ano, nena kapu na naanaa ngoka ta vulu okupopya thiluthilu nkene  aantu yopethimbo lyOmbiimbeli ya li haya tumbula YHWH. Ihe mbela shono oshi na oku tu imba okulongitha edhina lyaKalunga? Pethimbo lyOmbiimbeli, edhina Jesus otashi vulika lya li hali tumbulwa Yeshua nenge tashi vulika Yehoshua, ihe kapu na ngoka e na uushili. Ihe aantu muuyuni auhe nena ohaya tumbula edhina Jesus shi ikolelela komihingo dhomalaka gawo. Ihaya kakadhala okulongitha edhina ndyoka molwaashoka owala kaaye shi kutya olya li hali tumbulwa ngiini methelemumvo lyotango. Sha faathana, ngele owa yi koshilongo shimwe, otashi vulika aantu ya ka tumbule edhina lyoye momikalo dhi ili nodhi ili momalaka gamwe. Onkee ano, okwaakala nuushili kutya edhina lyaKalunga nale olya li hali tumbulwa ngiini, hako taku gandja etompelo lyokwaahe li longitha.

Etompelo etiyali ndyoka hali gandjwa kutya omolwashike edhina lyaKalunga lya kuthilwa mo mOmbiimbeli, olya kwatela mo omithigululwakalo dhonale dhAajuda. Oyendji yomuyo oya li yi itaala kutya edhina lyaKalunga kali na nandonando okutumbulwa. Eitaalo ndyoka osha yela kutya olyi ikolelela ketulo miilonga lya puka lyompango yOmbiimbeli ndjoka ya ti: “Edhina lyandje ino li tumbulila iinima yowala, oshoka ongame OMUWA, Kalunga koye, tandi geele ayehe mboka taa tumbulile edhina lyandje iinima yowala.”—Eksodus 20:7.

Ompango ndjoka otayi indike okulongitha nayi edhina lyaKalunga. Ihe mbela otayi indike okulongitha edhina lye nesimaneko? Hasho nandonando. Aanyoli yOmanyolo gOshihebeli (hagi ithanwa aniwa Etestamendi Ekulu) ayehe oya li aalumentu aadhiginini mboka ya li haya vulika kOmpango ndjoka Kalunga a li a pe oshigwana shonale shaIsraeli. Ihe nonando ongaaka oya longitha edhina lyaKalunga olundji. Pashiholelwa, oye li kwatela momapisalomi ogendji ngoka ga li hagi imbwa mokule koongundu dhaalongelikalunga. Jehova Kalunga okwa lombwele nokuli aalongeli ye yi ithane edhina lye, naamboka aadhiginini osho ya ninga. (Joel 2:32, OB-1954; Iilonga 2:21) Onkee ano Aakriste nena ihaya kakadhala okulongitha edhina lyaKalunga nesimaneko, ngaashi naanaa Jesus a li e shi ningi.—Johannes 17:26.

Mokupingena po edhina lyaKalunga nomadhinasimaneko, aatoloki yOombiimbeli oya ningi epuko lya kwata miiti. Oya ningitha Kalunga a kale a fa e li kokule nokee na omaukwatya gopantu, omanga Ombiimbeli tayi ladhipike aantu ya kale ‘ookuume ke.’ (Episalomi 25:14) Dhiladhila shi na ko nasha nakuume koye kopothingo. Oto ka vula ngiini okukala popepi naye ngele ku shi nando edhina lye? Sha faathana, ngele aantu inaya tseyithilwa edhina lyaKalunga,  Jehova, otaya vulu ngiini okuhedha popepi naye lela? Niishewe, ngele aantu ihaya longitha edhina lyaKalunga, itaya kala wo ye shi eityo lyalyo ekumithi. Edhina lyaKalunga otali ti shike?

Kalunga okwa yelithile omupiya gwe omudhiginini Moses eityo lyedhina lye. Sho Moses a li a pula kombinga yedhina lyaKalunga, Kalunga okwa li a yamukula, a ti: “Ngame otandi ka kala shoka tandi ka kala.” (Eksodus 3:14, NW) Ombiimbeli ya tolokwa kuRotherham oya toloka oohapu ndhoka ya ti: “Otandi ka kala kehe shoka nda hala okukala.” Ano Jehova oha vulu okukala kehe shoka sha pumbiwa opo a gwanithe po omalalakano ge.

Natu tye nduno ando oho vulu okuninga kehe shoka wa hala. Ando oto ka ningila shike ookuume koye? Ngele gumwe gwomuyo okwe ehama noonkondo, oto ka vula okuninga ndohotola e na owino e to mu aludha. Ngele gumwe okwa kanitha eliko lye, oto ka vula okuninga omukwathi omuyamba e to kandula po uupyakadhi we. Ihe oshili oyo kutya owa ngambekwa mwaashono to vulu okuninga. Atuheni otwa ngambekwa. Sho to konakona Ombiimbeli, oto ka kala wa kumwa okumona kutya Jehova oha kala shaashoka sha pumbiwa opo a gwanithe po omauvaneko ge. Nohashi mu nyanyudha okulongitha oonkondo dhe omolwaamboka ye mu hole. (2 Ondjalulo 16:9) Mboka inaa tseya edhina lyaJehova ihaa vulu okutseya omaukwatya ge ngoka omawanawa.

Odhoshili kutya edhina Jehova oli na okukala mOmbiimbeli. Okutseya eityo lyalyo noku li longitha twa manguluka mokulongela Kalunga kwetu, otashi ke tu kwathela noonkondo tu hedhe popepi lela naTate yetu gwomegulu, Jehova. *