Dhiladhila konkalo ndjika: Manga Tim a li ta dhana nookuume ke, oku umbu okatanga e taka tatula ekende lyaashiinda.

Ando ongoye wa li Tim, ando owa ningi po shike?

OWU NA OMAHOGOLOLO GATATU:

1. Oto vulu okufadhuka po.

2. Oto vulu okupa gulwe uusama.

3. Oto vulu okulombwela aashiinda shoka sha ningwa po, e to ya lombwele kutya ekende oto li futu.

Otashi vulika wu kale wa hala okuhogolola po ehogololo lyotango. Ihe opu na aluhe omatompelo omawanawa gokukala ho zimine kutya owa ninga epuko, kutya nduno owa tatula ekende nenge owa ninga sha shilwe.

1. Oshinima oshiwanawa okuzimina epuko lyoye.

   Ombiimbeli otayi ti: “Otwa hala aluhe okulonga shoka shi li mondjila.” — Aahebeli 13:18.

2. Aantu ohaya dhimine po nuupu mboka haya zimine omapuko gawo.

   Ombiimbeli otayi ti: “Oongoka ta holeke iilonga ye iiwinayi, oye ke na elago, ihe ngoka te yi hempulula note yi etha, oye ta silwa ohenda.” — Omayeletumbulo 28:13.

3. Okuzimina omapuko ohaku nyanyudha Kalunga.

   Ombiimbeli otayi ti: “Omugoyoki oye iihuna koshipala shOmuwa, ihe Omuwa okwi inekela aayuuki.” — Omayeletumbulo 3:32.

Karina, gwomimvo 20, okwa li a kambadhala okuholeka he okatekete hoka a pewa sho a li ta hingilile. Ihe ina vula oku ka holeka sigo aluhe. Okwa ti: “Konima yomvula, tate okwe ka mono. Ondi itula owala muupyakadhi.”

Okwi ilongo mo shike? Okwa ti: “Okuholeka omapuko ohaku nayipaleke onkalo. Konima yethimbo, iilanduliko oto ke yi mona owala.”

Ombiimbeli otayi ti: “Tseni atuheni ohatu puka olwindji.” (Jakob 3:2) Ngaashi sha popiwa metetekelo, okuzimina omapuko getu pethimbo mpoka otaku ulike kutya otu na eifupipiko notwa koka pambepo.

Onkatu ya landula ko, okwiilonga sha momapuko goye. Omukadhona gwedhina Vera ota ti: “Mepuko kehe tandi ningi ohandi kambadhala okwiilonga mo sha, opo ndi ninge omalunduluko nopo ndi kale ndi shi nkene ndi na okuungaunga nonkalo ndjoka ngele ondi iyadha muyo ishewe.” Natu tale nkene to vulu oku shi ninga.

Natu tye ando owa longitha ombasikela ya tate gwoye e to yi teya. Mbela oto ka ninga po shike?

• Oto ka kala inoo shi mu lombwela, to dhiladhila kutya ite shi dhimbulula.

• Oto ke mu lombwela shoka sha ningwa po.

• Oto ke mu lombwela shoka sha ningwa po, ihe oto ka pa gulwe uusama.

Natu tye ando owa ndopa otutsa, molwaashoka inoo lesha. Mbela oto ka ninga po shike?

• Oto ki ipopila kutya otutsa oya li ondhigu.

• Oto ka zimina kutya epuko olyoye sho inoo lesha.

• Oto ki ipopila kutya omulongi ke ku hole.

 Dhiladhila koonkalo ndhoka dha popiwa metetekelo, e to kala ando wa fa ongoye (1) tate gwoye (2) nomulongi gwoye. Mbela tate gwoye nomulongi gwoye otaya ka dhiladhila ngiini kombinga yoye ngele owa zimine omapuko goye nehalo ewanawa? Otaya ka kala yu uvite ngiini ngele owa holeke omapuko goye?

Dhiladhila komapuko ngoka wa ninga momukokomoko gwomvula ya zi ko e to yamukula omapulo taga landula.

Omapuko geni wa li wa ningi nowa li wu ungaunga nago ngiini?

• Owa li we ga holeke.

• Owa li wa pe gulwe uusama.

• Owa li we ga zimine.

Ngele owa li inoo zimina omapuko goye, konima yethimbo owa ka kala wu uvite ngiini?

• Owa li wa nyanyukwa sho inaaga monika.

• Owa li wu uvite wu na ondjo, sho inoo popya oshili.

Ongiini wa li to vulu okuungaunga nomapuko ngoka momukalo omwaanawa?

Owi ilonga shike momapuko goye?

Omolwashike aantu yamwe haya tindi okuzimina omapuko gawo?

Aantu otaya ka dhiladhila ngiini kombinga yoye ngele oho holeke aluhe omapuko goye, nota ya ka dhiladhila ngiini ngele oho zimine omapuko goye? — Lukas 16:10.