1. Oshike tashi ningwa po ngele twa ‘hedha kuKalunga’?

JEHOVA oku hole mboka taye mu longele. Ngele oto longele Jehova, ote ku laleke nuuyamba ngashingeyi nomonakuyiwa. Ombimbeli otayi ti: “Hedheni kuKalunga, oye nota hedha kune.”—Jakob 4:8.

2. Ongiini tatu vulu okuhedha popepi naKalunga, nongiini shika tashi nwetha mo omagalikano getu?

² Opo u hedhe popepi naKalunga, ou na okukonakona nokutula miilonga Oohapu dhe. Uuna to galikana metsokumwe nehalo lye, Jehova ota ka pulakena omagalikano goye note ga yamukula. Omuyapostoli Omukriste Johannes okwa nyola ta ti: “Omukumo nguka gwetu tu gu na [okwiinekela Kalunga], ogwo tuu nguka, nge tatu mu indile sha opahalo lye, ote tu uvu. Ano nge twe shi tseya, oye te tu uvu, shaa shoka tatu indile, nena otu shi shi wo, tu na ayihe mbika twe yi mu indile.”—1 Johannes 5:14, 15.

3-7. Ongiini tatu vulu okumona uunongo wopakalunga, nongiini tau vulu oku tu kwathela?

³ Natango, sho to hedha popepi naKalunga, ote ke ku pa uunongo u shi pondole miinima yonkalamwenyo yakehe esiku. Ombimbeli otayi ti: “Ngele ku na ngoka gwomune ta pumbwa oondunge, oye ne dhi indile kuKalunga.”—Jakob 1:5.

⁴ Ongiini uunongo wopakalunga tau vulu oku ku kwathela? Tango, otau vulu oku ku kwathela u tseye iinima mbyoka tayi yemateke Jehova. Oto vulu wo okwiilonga kutya molwashike iinima mbika ya puka nosho wo shoka u na okuninga opo u yande oku yi longa. Ontseyo ya tya ngeyi otayi vulu oku ku gamena komaupyakadhi ogendji ngoka taga hepeke aantu oyendji. Pashiholelwa, okuvulika komayele gaKalunga okukala wa yogoka pamikalo otaku kwathele notaku gamene oshigwana shaKalunga kokumita, komikithi hadhi taandele pamilalo nokoondjokana kaadhi na elago nenge tadhi teka.

⁵ Uunongo wa gandjwa kuKalunga otau vulu ishewe oku ku ningila shike? Otau vulu oku ku kwathela u mone uuwanawa monkalamwenyo. Otau vulu oku ku kwathela u ninge omatokolo gopandunge miinima yi na oshilonga, ngaashi okukwata nawa iimaliwa yoye. Oto ka vula okulalakanena omalalakano ga simana nokweekelahi omalalakano ngoka ge na ongushu itaayi kalelele.

⁶ Uunongo wopakalunga otau vulu wo oku ku kwatha mekwatathano lyoye nayalwe. Oto vulu okukala u na uukwanegumbo u na onkalamwenyo yi na elago. Oto vulu okuninga uukuume washili notau kalelele nayalwe, noto ka simanekwa nokuli nokwaamboka ihaaya longele Kalunga.

⁷ Natango, okukala u na uunongo wopakalunga otaku ku kwathele u kale u na etaloko ewanawa lyonkalamwenyo. Otau ke ku kwatha u pondole omaupyakadhi nosho wo omayeme gomonkalamwenyo. Niishewe, oto ka kala u na etaloko li li pandjele nolyashili li na ko nasha nonakuyiwa. Etaloko lyashili otali ke ku etela wo uukolele wopamadhiladhilo nowopalutu.—Omayeletumbulo 14:30; Jesaja 48:17.

8. Ngele oto longele Kalunga, oshike shono itoo ka tila?

⁸ Ngele oto longele Kalunga kashili, oto ka kala wa manguluka kuumbanda mboka hau  hepeke mboka ihaaye mu longele. Molwashoka ou shi kutya oonakusa moombila oye li mo kaaye na omwenyo, ito ka tila mboka ya sa. Molwashoka ou na einekelo momauvaneko gaKalunga okuyumudha oonakusa, ito ka tila okusa. Nomolwashono ou shi kutya Kalunga oye omunankondo adhihe, ito ka tila uulodhi.—Johannes 8:32.

9-11. Oolye taya ka kala mOparadisa, noolye itaaya ka kala mo?

⁹ Ngele to hedha popepi naKalunga, ito ka tila onakuyiwa. Ngaashi twe shi mono, Ombimbeli oya hunganeka omaupyakadhi ogendji ngoka tu wete kombanda yevi nena. Jehova ote tu lombwele kutya iinima mbika oyopokathimbo; Uukwaniilwa waKalunga masiku otau ka ninga evi ndika oparadisa.—Lukas 21:10, 11, 31; 23:43.

¹⁰ Oomboka owala taya hedha popepi naJehova notaye mu longele taya ka kala mOparadisa. Ombimbeli otayi ti: “Oku na okathimbo kowala, omukeenakonashanakalunga nokee po we; nonge to tala eha lye, okwa yi nale. Ihe aaneifupipiko otaa ka thigulula [evi, OB-1986] e taa kala nokunyanyukilwa ombili oyindji.”—Epsalmi 37:10, 11.

¹¹ Mboka taya tindi nondudhi okuvulika koompango dhaKalunga dhuuyuuki otaya ka sa sigo aluhe. (2 Aatessalonika 1:8, 9) Itaya ka kala po we. Otaya ka ya meso lyaaluhe pamwe naSatana noompwidhuli dhe. (Ehololo 20:10, 14) Ihe mboka yi ilonga kombinga yaJehova notaye mu longele otaya ka nyanyukilwa Oparadisa kombanda yevi.

12. Ombimbeli otayi ti shike kombinga yonakuyiwa?

¹² Jehova okwa pungulila mboka ye mu hole iinima iikumithi! Tala owala shoka Oohapu dhe tadhi ti kombinga yonkalamwenyo mEviparadisa:

• Iikulya ya gwana okulya: “Ekuta lyiilya [nenge lyiikulya] tali kala moshilongo nosigo koondungu dhoondundu.”—Epsalmi 72:16.

• Omagumbo omawanawa: “Oyo taa kala nokudhika omagumbo nokukala mo.”—Jesaja 65:21.

• Iilonga yinyanyudha: “Aahogololwa yandje oyo yene taa ku utha iilonga yiikaha yawo. Oyo itaa kala nokwiihepeka osima.”—Jesaja 65:22, 23.

• Kapu na omikithi: “Kaku kala nando omuntu, ta ti: Ongame nda ala.”—Jesaja 33:24.

• Kapu na uulema: “Nena omeho gaaposi otaga tonata, nomakutsi goombolo otaga thituluka. Esiku ndyoka oshitiningili ta nuka ngomenye, nelaka lyoshikokoma tali imbi pombanda.”—Jesaja 35:5, 6.

• Kapu na uuwehame, oluhodhi, eso: “[Kalunga ota] theta po omahodhi momeho gawo, neso kali kala we nenge oluhodhi nenge elilagano, nenge uuwehame kau kala mo we, oshoka shiyaka shotango osha hulu po.”—Ehololo 21:4.

• Kapu na iita: ‘Kalunga ta hulitha po omalugodhi sigo okooha dhuuyuni.’—Epsalmi 46:10.

• Omwenyo gwaaluhe: “Aayuuki oyo otaa ka thigulula [evi, OB-1986] e taa kala mo aluhe.”—Epsalmi 37:29.

13. Olye awike ta vulu okuninga evi ndika oparadisa, nomolwashike?

¹³ Aantu itaya vulu nando okweeta po iinima mbyoka, ihe Jehova oku na oonkondo okulonga kehe shimwe shoka a ti ota ka ninga. Kapu na sha tashi mu kelele okuninga shoka a hala okuninga. Ombimbeli otayi ti: “Kalunga iha nyengwa kusha.”—Lukas 1:37.

14. Ongiini to vulu okuya mondjila ndjoka tayi fala komwenyo gwaaluhe?

¹⁴ Okupitila mOonzapo dhe, Jehova ota pe aantu shaa mpono ompito ya ‘pite mosheelo sha patekidha’ nokweenda mondjila ndjoka tayi fala komwenyo gwaaluhe. Kala mokati kaantu aanelago mboka taya taamba ko eithano ndyoka. Kala melongelokalunga lyashili e to nyanyukilwa omalaleko nuuyamba gaJehova sigo aluhe.—Mateus 7:13, 14.