1. PaOhapu dhaKalunga, opu na owala omalongelokalunga gomaludhi gaali geni?

JESUS okwa ti: “Indeni mo mu pitile mosheelo sha patekidha. Oshoka osheelo shiyaka oshinene nondjila ndjiyaka ya mbwalangandja, otayi fala mekano, noyendji mboka taa yi mo; ihe osheelo shiyaka oshishona nondjila ndjiyaka ya thinana, otayi fala komwenyo, naashona yowala mboka taye yi mono.” (Mateus 7:13, 14) PaOhapu dhaKalunga, opu na owala omalongelokalunga gomaludhi gaali: limwe olyoshili nalimwe olyiifundja; limwe oli li mondjila nalilwe olya puka; limwe otali fala komwenyo nalimwe otali fala mekano.

2. Omanyolo otagu ulike ngiini kutya hamalongelokalunga agehe ga hokiwa kuKalunga?

² Aantu yamwe otaya dhiladhila kutya omalongelokalunga agehe oga hokiwa kuKalunga. Oovelise dhOmbimbeli tadhi landula otadhi ulike kutya shika kashi shi shoshili:

• “Aaisrael oya yonununa momeho gOmuwa noya simaneke iibaali niiastarti, iiyelekelakalunga yaAram, iiyelekelakalunga yaSidon, iiyelekelakalunga yaMoab, iiyelekelakalunga yaAmmon niiyelekelakalunga yAafilisti noyi iteka po Omuwa, ye [inaye] mu simaneka. Ondjahi yOmuwa ya hwamenene Israel.” (Aatokolihapu 10:6, 7) Ngele otatu longele iihongwafano nenge iikalunga pehala lyaKalunga kashili, itatu ka hokiwa kuYe.

• “Oshigwana shika ohashi simaneke ndje [Kalunga] nomilungu, ihe oomwenyo dhawo odhi li kokule nangame; ihe taa longele ndje owala nokulonga aantu omalongo giipango yaantu.” (Markus 7:6, 7) Ngele aantu otaya ti kutya otaya longele Kalunga, ihe otaya longo aantu omadhiladhilo gawo yene pehala lyaashoka tashi longwa kOmbimbeli, elongelokalunga lyawo olyosimpa. Inali taambiwa ko kuKalunga.

• “Kalunga oye Ombepo; naamboka taye mu galikana, oyo ye na okugalikana mombepo nomoshili.” (Johannes 4:24) Okulongela Kalunga kwetu oku na okukala taku tsu kumwe noshili yOohapu dhaKalunga.

3. Omukalo gumwe gwokuyoolola elongelokalunga lyashili mwaandyoka lyiifundja oguni?

³ Ongiini mbela tatu vulu okutya kutya elongelokalunga otali nyanyudha Kalunga nenge hasho? Jesus okwa ti: “Omuti kehe omwaanawa hagu imi iiyimati iiwanawa, ihe omuti omwinayi hagu imi iiyimati iiwinayi . . . Onkee ano otamu ya dhimbulula kiiyimati yawo.” Noohapu dhimwe, ngele elongelokalunga olya za kuKalunga, otali ki imika iiyimati iiwanawa, ihe ngele elongelokalunga olya za kuSatana, otali ki imika iiyimati iiwinayi.—Mateus 7:15-20.

4. Aalongeli yaJehova ohayu ulike uukwatya uni?

⁴ Elongelokalunga lyashili ohali imike aantu mboka ye na ohole mokati kawo nohayu ulikilathana ohole. Shika oshi li ngawo molwashoka Jehova oye Kalunga omunahole. Jesus okwa ti: “Opo mpoka ayehe taye mú dhimbulula, one aalongwa yandje, ngele mu holathane.” Omalongelokalunga mbela otaga gwanitha omuthikampango nguno gwegalikano lyashili?—Johannes 13:35; Lukas 10:27; 1 Johannes 4:8.

5. Oensiklopedia yimwe oya hokolola ngiini elanditho lyaapika Aayafrika?

⁵ Dhiladhila elanditho lyaapika Aayafrika. OThe New Encyclopædia Britannica otayi ti: “Aayafrika 18 000 000 lwaampono oya li ya landithwa ongaapika pokati kaSahara nEnenefuta lyaIndia kAaislama pokati komumvo 650 no 1905. Metata etiyali lyethelemimvo eti-15, Aaeuropa oya li ya tameke okulanditha komunkulofuta gwokuuninginino waAfrika, nomo 1867 Aayafrika ye li pokati 7 000 000 no 10 000 000 oya li ya falwa noosikepa koNew World ye li ongaapika.”

6. Omalongelokalunga oga kwatelwa ngiini mokulanditha aapika?

⁶ Omalongelokalunga oga katuka onkatu yini pethimbo ndyoka lyepiyagano muAfrika sho aalumentu, aakiintu naanona ya li ya kuthwa kethininiko momagumbo gawo nopaakwanezimo yawo, ya mangwa nomalyenge, ya fikwa niitenda iipyu noya landwa nokulandithwa po ya fa oongombe? Bethwell Ogot okwa nyola moshifokundaneki Daily Nation shaNairobi, Kenya, ta ti: “Uukriste nosho wo Uuislama owa dhiginina pambelewa elongo lyuukumwe waantu, ihe nonando ongaaka wo auhe owe eta po omaulipamwe ngoka ge na aapika nogu udha okayoya kopamihoko. . . . Otu na okuzimina kutya Aamoslema nosho wo Aakriste, Uuninginino nosho wo Uuzilo woPokati, ayehe oye na ondjo noya posipala pamikalo shoka she ya fala mokumona iihuna kwAayafrika kwaa shi okuyelekwa uule womathelemimvo.”

7. Aawiliki yomalongelokalunga oya dhana onkandangala yini miita?

⁷ Omalongelokalunga giifundja ogu ulike iiyimati yago yo ola momikalo dhilwe ishewe. Pashiholelwa, nonando Ombimbeli otayi ti kutya “hola omukweni,” aawiliki yomalongelokalunga muuyuni auhe oya ambidhidha nuulaadhi iita noye yi humitha komeho.—Mateus 22:39.

8. (a) Aawiliki yomalongelokalunga oya ladhipike ngiini edhipago momaipumomumwe muAfrika? (b) Omusita gumwe okwa ti shike kombinga yaawiliki yomalongelokalunga pethimbo lyiita yopashigwana muNigeria?

⁸ Osha tseyika nawa apuhe kutya mo 1994, aaikaleli yamwe naapristeli oya li ya kutha ombinga medhipago lyaantu muRwanda. Omalongelokalunga oga dhana wo onkandangala onene momaipumomumwe galwe muAfrika. Pashiholelwa, pethimbo lyiita yopashigwana mbyoka ya li ya tilehi ombinzi muNigeria, omalongelokalunga koombinga adhihe oga li ga ladhipike aantu ya kondje. Sho iita ya tsikile ethimbo ele, omusita gumwe okwa ti kutya aawiliki  yoongeleka “oye etha po iilonga mbyoka ya pewa kuKalunga.” Okwa ti ishewe: “Tse mboka tatu iti aakalele yaKalunga otwa ningi aakalele yaSatana.”

9. Ombimbeli otayi ti ngiini kombinga yaakalele yaSatana?

⁹ Ombimbeli otayi popi oshindji sha fa shoka tayi ti: “[Satana] mwene ti ishitukitha omuyengeli guuyelele. Kashi shi ano oshinima shokupopiwa, [naapiya] ye ngele taa yelekele aalongeli yuuyuuki.” (2 Aakorinto 11:14, 15) Ngaashi owala aantu oyendji aawinayi hayi imonikitha ya fa aawanawa, osho Satana ha pukitha aantu naakalele ye mboka taya monika ya fa aayuuki ihe iilonga yawo iiwinayi nosho wo iiyimati yawo oyo ola.

10. Omomukalo guni aawiliki yomalongelokalunga yi idhimbike Kalunga?

¹⁰ Muuyuni auhe, aawiliki yomalongelokalunga oyu uvitha ohole, ombili nuuwanawa, ihe oya kutha ombinga muutondwe, miita nomokwaanakalunga. Ombimbeli otayi ya hokolola nawa. Otayi ti: “Oyo otaa ti, ya tseya Kalunga aniwa, ihe miilonga yawo taye mu idhimbike.”—Titus 1:16.

11. Ombimbeli otayi hokolola ngiini omalongelokalunga giifundja?

¹¹ Otatu vulu okumona shoka Jehova ta dhiladhila kombinga yomalongelokalunga giifundja mokulesha embo lyOmbimbeli Ehololo. Membo moka omalongelokalunga giifundja oga hokololwa ge li omukiintu gwopathaneko, ‘Babilon oshinene.’ (Ehololo 17:5) Ndhindhilika nkene Kalunga te mu hokolola:

• “[Ohonda] onene . . . oongoka a hondelwa naye kaakwaniilwa yevi.” (Ehololo 17:1, 2) Pehala lyokukala omadhiginini kuKalunga, omalongelokalunga giifundja oga kutha ombinga moopolotika, nolundji ohaga lombwele omapangelo shoka ge na okuninga.

• “[Musho] omo mwa monikile ombinzi yaaprofeti nombinzi yaayapuki noyaamboka ayehe ya dhipagwa kombanda yevi.” (Ehololo 18:24) Omalongelokalunga giifundja oga hepeke aapiya yaKalunga aadhiginini noku ya dhipaga noga li ga pewa ombedhi molwomaso gaantu omamiliyona miita.

• “Oshi isimanekitha nosha kala puukengeli usitha ohoni.” (Ehololo 18:7, NW) Omalongelokalunga giifundja oge na uuyamba uunene, mboka aawiliki yago haya longitha opo ya kale aakengeli.

• ‘Kuumpulile washo iigwana ayihe ya hongololwa.’ (Ehololo 18:23) Melongo lyasho lyiifundja kutya omwenyo ihagu si, omalongelokalunga giifundja oga pitike kehe oludhi lwuumpulile nosho wo uulodhi noga humitha komeho uumbanda wokutila aasi nokugalikana aakulu yonale.

12. Ombimbeli otayi gandja elondodho lini kombinga yomalongelokalunga giifundja?

¹² Ombimbeli otayi gandja elondodho lya kola kaantu ya ze mo momalongelokalunga giifundja, tayi ti: ‘Zeni mo musho, one aantu yandje, mwaa kwatathane noondjo dhasho, nomahepeko gasho gaaye mú kwate.’—Ehololo 18:4, 5.

13. Oshike mbela tashi ka ningilwa omalongelokalunga giifundja naamboka ye li mugo?

¹³ Monakuyiwa yi li popepi, Babilon Oshinene, uukwaniilwa womalongelokalunga giifundja guuyuni, otashi ka hanagulwa po thiluthilu. Ombimbeli otayi ti: ‘Omalwa gasho otage shi adha esiku limwe, eso noosa nondjala, notashi fikilwa momulilo, oshoka Omuwa Kalunga oye omunankondo, oonguka e shi pangula.’ (Ehololo 18:8) Opo tu yande okukutha ombinga momahepeko gasho, otu na okweetha omakwatathano agehe nomalongelokalunga giifundja, kaatu kuthe ombinga momikalo dhago, miituthi yago nosho wo momalongo gago ngoka itaaga nyanyudha Kalunga. Oshinima shika oshe endelela. Oomwenyo dhetu odhi li moshiponga!—2 Aakorinto 6:14-18.