1. Oshike tu na okuninga opo tu nyanyudhe Kalunga?

OPO tu nyanyukilwe ekwatathano lyopahole naKalunga, otu na okukala kaatu na ombinga momalongelokalunga giifundja. Otu na okukala melongelokalunga lyashili. Nena aantu omamiliyona muuyuni auhe osho taya ningi.

2. Oonzapo dhaJehova otadhi vulu okwaadhika peni, niilonga yadho oyashike?

² Ngaashi Ombimbeli ya hunganeke, aalongelikalunga yashili oya ninga po “ongundu onene” ndjoka ya za ‘maapagani ayehe nomiilongo ayihe nomiigwana ayihe nomomalaka agehe.’ (Ehololo 7:9) Miilongo 235, Oonzapo dhaJehova omamiliyona otadhi kwathele yalwe yi ilonge kombinga yomikalo dhaJehova nosho wo iitegelelwa ye yopahole.

3. Oonzapo ohadhi longele lye, nohadhi yanda okulongela shike?

³ Oonzapo odha zimina kutya Jehova oye awike a gwana okulongelwa. Ohadhi tindi okwiisizimikila iimenka nenge omathano gopamalongelokalunga. (1 Johannes 5:21) Ihadhi simaneke oonakusa mokukutha ombinga mokuunga omitanda nenge miituthi yilwe mbyoka tayi humitha komeho omalongo gomalongelokalunga giifundja ‘nomalongo goompwidhuli.’ (1 Timoteus 4:1) Ihe ohadhi hekeleke mboka ya silwa moku ya fatululila euvaneko lyaKalunga kutya otapu ka kala eyumuko lyaasi meviparadisa.—Johannes 5:28, 29; Iilonga 24:15.

4. Oshigwana shaKalunga ohashi tala ko ngiini uumpulile?

⁴ Oonzapo kadhi na sha nuumpulile nenge nuulodhi, nodhi shi kutya iinima mbika oya za kOndiaboli. Inadhi inekela muumpulile u dhi gamene—odhi inekela Jehova.—Omayeletumbulo 18:10.

5. Omomukalo guni Oonzapo dhaJehova ‘kaadhi shi oshitopolwa shuuyuni’?

⁵ Jesus okwa ti kutya aalongwa ye “kaye shi oshitopolwa shuuyuni.” (Johannes 17:16, NW) Jesus okwa tindi okukutha ombinga moopolotika dhopethimbo lye. (Johannes 6:15) Sha faathana, Oonzapo ihadhi kutha ombinga moopolotika, muukwashigwana nomokukondjela oondondo kwuuyuni mbuno. Ihe ohadhi futu oompale dhadho nohadhi simaneke oompango dhoshilongo moka dhi li.—Johannes 15:19; Aaroma 13:1, 7.

6. Omisindalandu dhini hadhi landulwa kaapiya yaKalunga shi na ko nasha nondjokana nosho wo neteyondjokana?

⁶ Molwashoka ohadhi vulika komalombwelo gepangelo, Oonzapo ohadhi kala dha shilipaleka kutya oondjokana dhadho odhi li paveta. (Titus 3:1) Ohadhi vulika kewiliko lyaKalunga, nonkee ano ohadhi yanda okuhokana ombanda. (1 Timoteus 3:2) Niishewe, molwashoka ohadhi longitha omakotampango gOmbimbeli monkalamwenyo yadho, aapiya yaKalunga mbaka oondjokana dhawo ihadhi teka naanaa.

7. Oonzapo ohadhi ulikilathana ohole ngiini?

⁷ Oonzapo odhi holathane. Ohole ndjika nohole yadho yokuhola Kalunga, oye dhi hanganitha muumwayinathana washili, nonando oye li yomomihoko noyomiigwana oyindji. Uuna pwa holoka iiponga iinene nenge pu na ompumbwe yasha, Oonzapo ohadhi endelele okukwathelathana. Oonzapo ohadhi ulike ohole monkalamwenyo yadho.—Johannes 13:35.

8. Oshigwana shaKalunga ohashi yanda iilonga iiwinayi yini?

⁸ Oshigwana shaJehova ohashi longo nuudhiginini opo shi kale nonkalamwenyo yi li pauyuuki. Ohashi yanda okuyaka, okufundja, oluhondelo, uunkolwe nokwaa na uuyuuki mokuninga oongeshefa. Aasamane ihaya dhenge aakulukadhi yawo. Manga inaaya ninga Oonzapo, aantu yamwe oya li haya longo iilonga mbyoka, ihe kekwatho lyaJehova oye yi  etha po. Oyi “iyogitha” koshipala shaKalunga.—1 Aakorinto 6:9-11.

9. Embo limwe olya popya shike kombinga yoongeleka dhopambepo dhaAfrika?

⁹ Dhoshili, omalongelokalunga ogendji otaga ti kutya oge na oshili. Otashi vulika ga longe iilonga iikumithi mbyoka tayi ambidhidha okupopya kwago. Pashiholelwa, shi na ko nasha naangoka tagi ithanwa oongeleka dhopambepo muAfrika, embo limwe otali ti: “Oshilonga shonganga osha pingenwa po [koongundu oompe dhUukriste]. . . . Otadhi ti kutya ohadhi hunganeke nohadhi longo iikumithalonga. Aaprofeti mokati kadho ohaya monithitha aantu omamoniko nohaya fatulula oondjodhi. Ohaya longitha omeya omayapuki, omagadhi omayapuki, omitoko, omalehita nosho wo omatsinino okwaaludha nokukeelela omikithi.”

10, 11. Omolwashike mbyoka aniwa iikumithalonga nena ihaayi ulike kutya elongelokalunga olya za kuKalunga?

¹⁰ Iilyo yomalongelokalunga ngoka otayi ti kutya iikumithalonga otayi ulike kutya omalongelokalunga gawo oga yambekwa kuKalunga. Ihe mbyoka aniwa iikumithalonga ihayi ulike kutya omalongelokalunga oga hokiwa kuJehova. Satana okwa nkondopaleke aalongelikalunga yiifundja yamwe ya longe “iikumithalonga.” (2 Aatessalonika 2:9, OB-1986) Niishewe Ombimbeli otayi hunganeke kutya omagano giikumithalonga ga za kuKalunga, ngaashi okuhunganeka, okupopya omalaka nosho wo ontseyo yi ikalekelwa, otayi ka ‘hula po.’—1 Aakorinto 13:8.

¹¹ Jesus okwa londodha ta ti: “Hakehe ngoka ta lombwele ndje: Omuwa, Omuwa, ta yi [muukwaniilwa womegulu, NW], aawe, oye tuu ngoka ta longo ehalo lyaTate yomegulu. Esiku ndyoka oyendji otaa lombwele ndje notaa ti: Omuwa, Omuwa, hatse tuu mboka tu uvithile medhina lyoye notwa tidha mo oompwidhuli medhina lyoye notwa longa iilonga oyindji yoonkondo medhina lyoye? Ongame otandi ya lombwele ihe: Ongame inaandi mú tseya noshitonale; zii po pungame, ne aakolokoshi.”—Mateus 7:21-23.

12. Oolye taya ka ya mUukwaniilwa womegulu?

¹² Oolye ano taya ka ya mUukwaniilwa womegulu? Oomboka taya longo ehalo lyaJehova.

13. Kalunga ota lombwele oshigwana she shi longe iilonga yini nena, noolye mboka taye yi longo?

¹³ Kalunga okwa hala oshigwana she nena shi ninge shike? Jesus okwa ti: “Nonkundana ndjika ombwanawa yuukwaniilwa otayi ku uvithwa mevi alihe ekaliwa yi ningile iigwana ayihe uunzapo.” (Mateus 24:14, NW) Iilonga mbika oyo tayi longwa nuulaadhi kOonzapo dhaJehova.

14. Uukwaniilwa waKalunga oshike, noolye taya ka pangela mUukwaniilwa mbuka?

¹⁴ “Mevi alihe ekaliwa,” Oonzapo dhaJehova otadhi uvitha Uukwaniilwa waKalunga u li epangelo lyomegulu ndyoka tali ka pangela evi alihe pauyuuki. Otadhi longo aantu kutya Jehova okwa tula po Kristus Jesus a kale Omukwaniilwa gwUukwaniilwa mboka, pamwe naapangeli ooyakwawo 144 000 ya hogololwa maantu ayehe.—Daniel 7:14, 18; Ehololo 14:1, 4.

15. Uukwaniilwa otau ka hanagula po shike?

¹⁵ Mokulongitha Ombimbeli, Oonzapo ohadhi ulukile aantu kutya Uukwaniilwa waKalunga otau ka hanagula po onkalelo ayihe yaSatana. Omalongelokalunga giifundja pamwe nomalongo gago ngoka itaaga simaneke Kalunga notaga simaneke Ondiaboli itaga ka kala po we. (Ehololo 18:8) Omapangelo gopantu ngoka ge li po taga pataneke Kalunga nago itaga ka kala po we.—Daniel 2:44, KB.

16. Oolye taya ka kala aalelwa yaKristus Jesus, nopeni taya ka kala?

¹⁶ Natango, Oonzapo dhaJehova otadhi tseyitha kutya Kristus Jesus ote ke etela ayehe mboka taya longo shoka Kalunga ta pula omauwanawa omakumithi. Otaya ka kala aalelwa ye yokombanda yevi. Ombimbeli otayi uvaneke tayi ti: “Oye ta hupitha omutokele ta lilile ekwatho nohepele naangoka kee na omupopili. Oye ta si ohenda aafupi naatokele noomwenyo dhoohepele ote dhi hupitha.”—Epsalmi 72:12, 13.

17. Oolye awike tayu uvitha Uukwaniilwa waKalunga?

¹⁷ Kapu na we ongundu yilwe yaantu ndjoka tayi longo ehalo lyaKalunga mokuuvitha onkundana ombwanawa yUukwaniilwa. Oonzapo dhaJehova odho awike tadhi tseyitha Uukwaniilwa waKalunga muuyuni auhe.