Ombimbeli otayi ti kutya Satana ota “hongolola evi alihe.” (Ehololo 12:9) Satana noompwidhuli dhe inaya hala tu itaale Oohapu dhaKalunga, Ombimbeli. Yo otaya kambadhala okwiitaalitha aantu kutya oonakusa oye na omwenyo pamwe pwi ili moshilongo shoombepo. Natu tale nkene haye shi ningi.

Omalongelokalunga ogendji ohaga longo kutya kehe omuntu oku na omwenyo (mOshiingilisa, soul) ngoka hagu yi moshilongo shoombepo konima yeso lyopanyama. Ohaga ti kutya olutu ohalu si ihe omwenyo (soul) ihagu si. Natango go ohaga tsu omuthindo kutya omwenyo (soul) ihagu vulu okusa, kutya gwo ihagu si.

Ihe Oohapu dhaKalunga hasho tadhi longo ngaaka. Ombimbeli otayi ulike kutya omwenyo (soul) omuntu, kagu shi shimwe shi li meni lyomuntu. Pashiholelwa, mokuhokolola eshito lyaAdam, Ombimbeli otayi yelitha: “Omuwa Kalunga okwa kutha mo evi lyomevi nokwe li umbu omuntu nokwa fudhile momayulu ge omwenyomufudho, omuntu okwa tya onkalo yi na omwenyo—omunamwenyo [“a living soul,” “NW”].” (Genesis 2:7) Ano Adam ka li a pewa omwenyo (soul); ye okwa li omwenyo (soul).

Iinamwenyo nayo oyi ithanwa oomwenyo.—Epsalmi 74:19.

 Molwashoka oshitya shOmbimbeli “omwenyo” (soul) otashi ti omuntu ye mwene, itashi tu kumitha okuuva kutya oomwenyo ohadhi vulu okusa. Omishangwa otadhi ti:

• “Omwenyo [soul] nguka tagu yono—ogwo gu na okusa.”—Hesekiel 18:4.

• “Simson nokwa ti: ‘Omwenyo [“soul”] gwandje nagu se pamwe nAafilisti.’”—Aatokolihapu 16:30, NW.

• “Inaashi indikwa etango lyEsabati oshini po: okulonga uuwanawa nenge okulonga uuwinayi, okuhupitha omwenyo [soul] nenge oku gu yona po?”—Markus 3:4.

Omishangwa dhimwe otadhi ulike kutya oomwenyo otadhi vulu okuyonwa po (Mateus 10:28), okudhipagwa kegongamwele (Josua 10:37, NW), okupondwa (Job 7:15), nokusa omeya (Jona 2:6). Ano omwenyo (soul) ohagu si.

Ngele to lesha Ombimbeli okuza ketameko sigo okehulilo, ito ka mona mo nando etumbulo “omwenyo ihagu si.” Omwenyo gwomuntu (human soul) kagu shi ombepo. Elongo lyomwenyo ihaagu si kali shi elongo lyOmbimbeli. Olyo elongo lyaSatana noompwidhuli dhe. Jehova oku tonde iifundja ayihe yopamalongelokalunga.—Omayeletumbulo 6:16-19; 1 Timoteus 4:1, 2.

Omukalo gumwe ngoka Satana ha pukitha nago aantu ogwo okupitila maapopi noombepo. Omupopi noombepo oye omuntu ngoka ha vulu okutaamba omatumwalaka shu ukilila okuza moshilongo shoombepo. Aantu oyendji, mwa kwatelwa aapopi noombepo yo yene, oyi itaala kutya omatumwalaka ngaka ohaga zi koombepo dhoonakusa. Ihe ngaashi twe shi mono mOmbimbeli, shika itashi vulika.—Omuuvithi 9:5, 6, 10.

Ano omatumwalaka ngaka ohaga zi koolye? Okoompwidhuli dho dhene! Oompwidhuli ohadhi vulu okukonakona omuntu manga e na omwenyo; odhi shi nkene omuntu a li ha popi, nkene a li, naashono a li ha ningi, nosho wo shoka a li e shi. Onkene kudho oshi li oshipu okuholela aantu mboka ya sa.—1 Samuel 28:3-19.

Omukalo omukwawo nkene Satana ha humitha komeho iifundja shi na ko nasha noonakusa ogwo okupitila momahokololo giifundja. Omahokololo ga tya ngaaka olundji ohaga ningitha aantu ya gamuke ko koshili yOmbimbeli.—2 Timoteus 4:4.

MuAfrika omu na omahokololo ogendji kombinga yaantu mboka ya monika ye na omwenyo konima yokusa kwawo. Olundji aantu ya tya ngaaka ohaya monika kokule nehala mpoka ya li haya kala nale. Ihe ipula nduno ngoye mwene: ‘Oshopandunge ngaa mbela ngele omuntu oku na oonkondo dhokuyumuka kuusi, a galukile kehala li li kokule nuukwanegumbo we nonookuume ke?’

Niishewe, omuntu ngono a monika itashi vulika nando mbela a kale owala a fa ngwiyaka a sa? Pashiholelwa, aakalele Aakriste yaali mboka ya li taa uvitha momukunda gwontumba oya mono omusamane a kulupa ngoka a kala te ya landula oowili dhontumba. Sho ye mu pula, oya mono kutya omulumentu okwa li ta dhiladhila kutya gumwe gwomaakalele mbaka, omumwayina ngoka a sa oomvula dhontumba dha piti. Dhoshili, ye okwa li a puka, ihe okwa tindi okwiitaala kutya okwa puka. Dhiladhila nduno ehokololo ndyoka omusamane nguka a kulupa a hokololele ookuume ke naashiinda ye!

Pwaahenomalimbililo, ngoye ou shi iinima yi ili noyi ili mbyoka aantu ya mona, yu uva, nenge ya yaguma. Iimoniwa ya tya ngeyi yaa shi yopaunshitwe olundji ohayi tilitha mboka haye yi mono. Marein, ngoka a kala mUuninginino waAfrika, okwa kala hu uvu aluhe ewi lyayinakulu ngoka a sa nale te mu ithana uusiku. Mokuhaluka, Marein okwa li hi igidha pombanda nokupendula uukwanegumbo we auhe. Lwahugunina, okwa kanitha oondunge dhe.

Ando oonakusa oya li ye na omwenyo shili, andola oshi li ngaa pandunge ya tilithe aaholike yawo? Dhoshili, hasho nando. Oompwidhuli odho dhi li onzo yomatumwalaka ga tya ngeyi tage ehameke.

Ihe ongiini mbela kombinga yomatumwalaka ngoka ga fa taga gandja ekwatho notaga gandja ehekeleko? Pashiholelwa, Gbassay, gwokuSierra Leone, okwa li te ehama. Okwa yaguma ondjodhi a holokelwa kuhe ngoka a sa nale. Okwe mu lombwele a ye komuti gwontumba, a kuthe ko efo, te li tula momeya e ta nu. Ka li e na okupopya nagumwe manga inee shi ninga. Okwe shi ningi e ta aluka.

Omukiintu gumwe okwa ti kutya omulumentu gwe okwe mu holokele uusiku umwe konima yokusa kwe. Omukiintu okwa ti kutya omulumentu gwe okwa li o opala nokwa zala nawa.

 Omatumwalaka nomamoniko ga tya ngeyi oga fa omawanawa notaga kwathele. Mbela ohaga zi ngaa kuKalunga? Aawe, hakuye. Jehova oye “Kalunga koshili.” (Epsalmi 31:5, NW) Ita zimine nando oku tu kotokela nenge oku tu pukitha. Oompwidhuli odho owala hadhi shi ningi.

Ihe oku na ngaa mbela oompwidhuli oombwanawa? Aawe. Nonando iikando yimwe odha fa tadhi kwathele, dho adhihe oombwinayi. Sho Ondiaboli ya popi naEva, oya li ya fa i na ombili. (Genesis 3:1) Ihe oshizemo osha li shike mbela kuEva sho a pulakene kuyo e ta ningi shono ye mu lombwele? Okwa si.

Ou shi kutya kashi shi oshinima shokukala inaashi tseyika ngele omuntu omwiinayi ta ningi uukuume naamboka a hala okupukitha nokukotokela. “Omayego omatokele, omutima omuluudhe,” eyeletumbulo limwe lyOshiafrika osho tali ti. Ihe Oohapu dhaKalunga otadhi ti: “Satana mwene ti ishitukitha omuyengeli guuyelele.”—2 Aakorinto 11:14.

Kalunga iha kwatathana we naantu kombanda yevi tashi pitile moondjodhi, momamoniko nenge momawi ngoka haga zi moshilongo shoombepo. Ohe ya wilike noku ya longa tashi pitile mOmbimbeli, ndjoka tayi vulu okuninga omuntu a kale “a gwana nokwoopalela iilonga ayihe iiwanawa.”—2 Timoteus 3:17.

Ano sho Jehova te tu londodha tu kondjithe omakoto gOndiaboli, ote shi ningi molwashoka oku tu hole. Oku shi shi kutya oompwidhuli odho aatondi taye eta oshiponga.