Aantu ayehe yopambepo mboka Jehova a shiti oya li aawanawa. Opo nduno omuyengeli gumwe okwa ningi omwiinayi. Oye Satana Ondiaboli. Satana okwa li a hala aantu yokombanda yevi ye mu galikane pehala lyaJehova. Shika osho sha ningwa:

Moshikunino shaEden, omwa li omiti odhindji hadhi imi iiyimati iitoye. Jehova okwa lombwele Adam nomukiintu gwe, Eva, kutya yo okwa li taya vulu okulya kudho ya manguluka. Ihe opwa li omuti gumwe ngoka Kalunga a ti inaye gu lya. Okwa ti kutya ngele ya li ko, oya li ye na okusa shili.—Genesis 2:9, 16, 17.

Esiku limwe Eva okwa li oye awike sho eyoka lya popi naye. Dhoshili, kalya li eyoka lyo lyenelyene olyo lya li tali popi; oSatana Ondiaboli ngoka a ningi eyoka li kale lya fa olyo lya li tali popi. Satana okwa lombwele Eva kutya ngele okwa li komuti ngoka gwi indikwa, ota ka kala e na oondunge a fa Kalunga. Okwa ti wo kutya Eva ita ka sa. Omapopyo agehe ngaka gaali oga li giifundja. Nando ongaaka, Eva okwi itaale Satana e ta li oshiyimati. Lwahugunina, okwa pe Adam, naye e ta li.—Genesis 3:1-6.

Mehokololo ndika lyoshili, otatu ilongo mo kutya Satana omunashipotha nomufundja. Okwa lombwele Eva kutya ngele okwa kala inaa vulika kuKalunga, ita ka sa. Shoka osha li iifundja. Okwa si nosho wo Adam. Satana ina sa pethimbo mpono, nonando hugunina ota ka sa oshoka okwa yona. Ihe ngashingeyi oku na natango omwenyo nota tsikile okupukitha aantu. Natango ye omufundja, nota kambadhala a taagulukithe aantu oompango dhaKalunga.—Johannes 8:44.

Konima yaashono, aayengeli yalwe oya ningi aawinayi. Aayengeli mbaka oya mono aakiintu aawanawa kombanda yevi noya li ya hala okulala nayo. Omolwaashono yo yi ile kombanda yevi e tayi izaleke omalutu gopantu goshilumentu. Opo nduno oyi ikuthile aakiintu. Shika osha li tashi tsu ondumbo nompangela yaKalunga.—Genesis 6:1, 2; Judas 6.

Shika oshe etele aantu omaupyakadhi ogendji. Aakiintu yaayengeli mbaka oya vala aanona, ihe kaya li ya fa aanona aakwawo. Oya ningi aalefule aakolokoshi naakwanyanya. Lwahugunina evi olyu udhithwa uukolokoshi nopo nduno Jehova okwa tokola okuhanagula po aantu aawinayi neyelu enene. Omuyuki Noa nuukwanegumbo we oyo ayeke aantu ya hupu po kEyelu.—Genesis 6:4, 11; 7:23.

Ihe aayengeli mboka aawinayi oya shuna moshilongo shoombepo; yo inaya sa. Ihe oya li ya geelwa. Inaya pitikwa we ya shune muukwanegumbo waKalunga waayengeli aayuki. Niishewe, Jehova ine ya pitika we ya shune momalutu gopantu. Nolwahugunina yo otaya ka sa mepangulo ndyoka enene.—2 Petrus 2:4; Judas 6.

Petameko lyethelemimvo lyetu, megulu omwa li iita. Embombimbeli lyEhololo otali hokolola shoka sha ningwa po: “Megulu nomwa tukuluka olugodhi; Mikael [Jesus Kristus omuyumudhwa] naayengeli ye [aawanawa] ya kondjitha oshikoko [Satana]. Oshikoko naayengeli yasho [aawinayi] noya kondjo noya nyengwa, neha lyawo inali monika we megulu. Noshikoko oshinene shu umbwa mo, eyoka ndyoka ekulu, lyi ithanwa ondiaboli naSatana, oongoka ta hongolola evi alihe, oku umbilwa pevi, naayengeli ye [aawinayi] yu umbilwa ko pamwe naye.”

Oshilanduliko osha li shike mbela? Ehokololo otali tsikile: “Onkee ano nyanyukweni, one omagulu naamboka mwa kala mugo!” Aayengeli aawanawa oya li taa vulu okukala ya nyanyukwa oshoka Satana naayengeli ye aawinayi, nenge oombepo oombwinayi, kaye mo we megulu. Ihe ongiini nee kombinga yaantu kombanda yevi? Ombimbeli otayi ti: “Yaye evi nefuta, oshoka ondiaboli ya kulukile kune, e na ondjahi onene, oshoka e shi shi, e na ethimbo efupi lyowala.”—Ehololo 12:7-9, 12.

Eeno, Satana nookuume ke aawinayi otaya pukitha notaye etele aantu yokombanda yevi oyaye onene. Aayengeli mbaka aawinayi ohayi ithanwa oompwidhuli. Yo aatondi yaKalunga. Yo ayehe aawinayi.