Jehova okwa li a hogolola Jeremia a kale ta hunganekele oshigwana shaJuda. Okwe mu lombwele e ku uvithile aantu noku ya londodha kutya oya pumbwa okweetha po iilonga iiwinayi. Jeremia okwa ti: ‘Jehova ngame omunona, kandi shi okupopya naantu.’ Jehova okwa lombwele Jeremia a ti: ‘Ino tila, otandi ke ku lombwela shoka wu na okupopya notandi ku kwatha.’

Jehova okwa lombwele Jeremia a gongaleke aawiliki yoshigwana, a tatule oshiyuma sheloya komeho gawo noku ya lombwela ta ti: ‘Jerusalem otashi ka tatagulwa po ngaashi oshiyuma shika.’ Sho Jeremia a ningi shoka Jehova e mu lombwele, aawiliki yoshigwana oya geye noonkondo. Omuyambi Pashhur okwa dhenge Jeremia, e te mu mangele meti. Uusiku awuhe, Jeremia ka li ta vulu okwiinyenga. Okwe mu mangulula mo ongula yesiku lya landula. Opo ihe Jeremia okwa ti: ‘Itandi vulu we okwiidhidhimika. Itandi ku uvitha we.’ Mbela okwa li ngaa e etha po shili okuuvitha? Hasho nando. Sho Jeremia a dhiladhilulula kombinga yoshinima shono, okwa nyola a ti: ‘Etumwalaka lyaJehova olya fa omulilo gwa hwama meni lyandje, itandi vulu oku li mwenena.’ Jeremia okwa tsikile nokulondodha oshigwana.

Konima yomimvo dhontumba, opwa langekwa omukwaniilwa omupe muJuda. Aayambi naahunganeki yiifundja kaya li ya hokwa etumwalaka ndyoka Jeremia e ya faalele. Oya lombwele omalenga ya ti: ‘Omulumentu nguka oku na okudhipagwa.’ Jeremia okwa ti: ‘Ngele omwa dhipaga ndje, otamu dhipaga omuntu kee na ondjo. Jehova oye a tumu ndje ndi popye oohapu ndhika, ihe kadhi shi dhandje.’ Sho omalenga ge shi uvu, oga ti: ‘Omulumentu nguka ke na okudhipagwa.’

 Jeremia okwa tsikile nokuuvitha, nomalenga oga geye noonkondo. Oga pula omukwaniilwa, opo Jeremia a dhipagwe. Omukwaniilwa okwa ti kutya naya ningile Jeremia kehe shoka ya hala. Oyu umbile Jeremia momuthima omuleeleka mu na enono nedhiladhilo kutya ota sile mo. Jeremia okwa tameke okuningina menono.

Elenga lyomuuwa, Ebedmelek, olya lombwele omukwaniilwa lya ti: ‘Omalenga ogu umbila Jeremia momuthima. Ngele otwe etheni a kale mo, ota sile mo.’ Omukwaniilwa okwa lombwele Ebedmelek a ye naalumentu 30, ya ka hile mo Jeremia. Mbela katu na okukala twa fa Jeremia, ngoka inaa pitika nando osha shi mu imbe okuuvitha?