Uusiku wumwe, omukwaniilwa Nebukadnezzar okwa li a yaguma ondjodhi tayi limbilike. Oya li ye mu piyaganeke e ta londokwa koomposi nokuli. Okwi ithana oompulile dhe, e te dhi lombwele ta ti: ‘Fatululilii ndje ondjodhi yandje.’ Odha ti: ‘Nkeyama, tu lombwela shoka wa yaguma.’ Ihe Nebukadnezzar okwa tindi. Okwa ti: ‘One mu na okulombwela ndje shoka nda yaguma, ngele hasho otandi mu dhipaga.’ Oompulile odha ti ishewe: ‘Tu lombwela shoka wa yaguma, opo nduno tatu ku fatululile shoka tayi ti.’ Nebukadnezzar okwa ti: ‘Ne amuhe otamu kambadhala okufundja ndje. Lombwelii ndje shoka nda yaguma.’ Oompulile odha yamukula dha ti: ‘Kapu na omuntu ta vulu okuninga ngawo. Shoka to pula itashi vulu okuningwa.’

Nebukadnezzar okwa geye noonkondo, e ta gandja elaka, aanongo ayehe muBabilonia ya dhipagwe. Muyo omwa kwatelwa Daniel, Shadrak, Meshak naAbednego. Daniel okwa pula omukwaniilwa e mu pe ethimbo lya gwana. Opo ihe ye nookuume ke oya galikana kuJehova, taye mu pula e ya kwathele. Mbela Jehova okwa li a ningi po shike?

Jehova okwa li u ulukile Daniel ondjodhi yaNebukadnezzar memoniko naashoka tayi ti. Esiku lya landula, Daniel okwa yi komupiya gwomukwaniilwa, e ta ti: ‘Ino dhipaga aanongo. Otandi vulu okufatulula ondjodhi yomukwaniilwa.’ Omupiya ngoka okwa fala Daniel komukwaniilwa. Daniel okwa lombwele omukwaniilwa a ti: ‘Kalunga okwe ku hololela shoka tashi ka ningwa komeho. Mondjodhi yoye owa mono oshiyelekela oshinenenene shi na omutse gwoshingolielela, ontulo nomaako gasho oshisiliveli, epunda noombwetelo dhasho oshikushu, omagulu gasho osheela noompadhi dhasho iiyela yi li mumwe neloya. Emanya enene olya pambuka kondundu kulyo lyene e tali dhenge oshiyelekela koompadhi. Oshiyelekela osha tatagulwa e tashi ningi sha fa etutu polupale, e tali pepwa po kombepo. Emanya olya ningi ondundu onene, ndjoka ya siikile evi alihe.’

 Opo ihe Daniel okwa ti: ‘Efatululo lyondjodhi yoye olyo ndika: Uukwaniilwa woye owo omutse gwoshingoli. Otawu ka landulwa kuukwaniilwa mboka wa fa oshisiliveli. Otawu ka landulwa kuukwaniilwa wa fa oshikushu notawu ka lela uuyuni awuhe. Otawu ka landulwa kuukwaniilwa wa kola wa fa osheela. Hugunina, otaku ke ya uukwaniilwa wopaali, ombinga yimwe yawo oya kola ya fa osheela nonkwawo inayi kola ya fa eloya. Emanya ndyoka lya ningi ondundu, olyo Uukwaniilwa waKalunga. Otawu ka yonagula po omaukwaniilwa ngoka agehe notawu ka kala sigo aluhe.’

Omukwaniilwa Nebukadnezzar okwa tsu oongolo e ta tsu oshipala she pevi komeho gaDaniel. Omukwaniilwa okwa ti: ‘Kalunga koye oye e ku hololele ondjodhi ndjika. Kalunga koye omunene e vule ookalunga ayehe.’ Pehala lyokudhipaga Daniel, okwe mu ningi elenga ekuluntu muBabilonia nomukuluntu gwaanongo ayehe musho. Mbela owu wete ngaa nkene Jehova a li a yamukula egalikano lyaDaniel?