Jehova oku uvaneka kutya ‘itapu ka kala we okulila, uuwehame, omikithi neso. Ota ka theta po omahodhi agehe momeho gaantu. Iinima ayihe iiwinayi mbyoka ya ningwa nale otayi ka dhimbiwa.’

Jehova okwa li a tula Adam naEva moshikunino shaEden ya kale mo ye na ombili nenyanyu. Oya li ye na okulongela He gwomegulu nokumona aanona sigo evi lyu udha aantu. Adam naEva inaya vulika kuJehova, ihe elalakano lyaJehova inali lunduluka. Membo ndika otwi ilonga mo kutya kehe shimwe shoka Kalunga u uvaneka ohashi gwanithwa. Oshilongo she nenge Uukwaniilwa we, otashi ke eta omayambeko kombanda yevi, ngaashi owala a li u uvanekele Abraham.

Masiku Satana noompwidhuli dhe nosho wo aantu ayehe aakolokoshi otaya ka hanagulwa po. Ayehe mboka taya ka kala nomwenyo kombanda yevi otaya ka longela Jehova. Itaya ka kala we haye ehama nokusa. Pehala lyaashono, otaya ka kala ye na uukolele noya  nyanyukwa. Evi otali ka ninga oparadisa. Kehe gumwe ota ka kala ha li iikulya iiwanawa nokapu na ngoka te mu piyaganeke sho e li megumbo lye. Aantu otaya ka kala ye na ohenda, ihe kaye shi aakolokoshi. Iinamwenyo itayi ka kala hayi tu tila, noitatu ka kala hatu yi tila.

Otatu ka kala twa nyanyukwa shili, sho Jehova ta ka yumudha aasi. Otatu ka hambelela aantu mboka ya li ko nale ngaashi Abel, Noa, Abraham, Sara, Moses, Rut, Ester naDavid. Otatu ka longa pamwe nayo tu ninge evi oparadisa. Otatu ka longa iilonga oyindji iiwanawa.

Jehova okwa hala nangoye wu ka kale moparadisa. Oto ke mu tseya shi vulithe ngashingeyi. Onkee ano, hedha aluhe popepi lela naye esiku kehe, ngashingeyi nosigo aluhe.