Abraham okwa longo omwanamati Isak a kale e hole Jehova nokukala i inekela momauvaneko Ge agehe. Ihe sho Isak a li e na omimvo 25 lwaampono, Jehova okwa pula Abraham a ninge oshinima shoka sha li itaashi ka kala oshipu okuninga. Osha li shike mbela?

Kalunga okwa lombwele Abraham a ti: ‘Kutha omumwoye epona u ke mu yambe, a ninge efikiloyambo kondundu koshilongo shaMoria.’ Abraham ka li e shi kutya omolwashike Jehova te mu pula a ninge ngaaka. Nonando ongawo, okwa li a vulika kuJehova.

Ongula yanakwasha, Abraham okwa kutha Isak, naapiya ye yaali noya yi kuMoria. Konima yomasiku gatatu, oya li ya vulu okumona oondundu okuza kokule. Abraham okwa li a lombwele aapiya ye ya kale ye mu tega, manga ye naIsak taya yi ya ka ninge efikiloyambo. Abraham okwa tsike Isak iikuni, omanga ye mwene a humbata omwele. Isak okwa pula he a ti: ‘Oshinamwenyo shefikilondjambo oshi li peni?’ Abraham okwa yamukula a ti: ‘Mumwandje, Jehova ote ke shi tu pa.’

Sho ya thiki kondundu, oya tungu oshiyambelo. Abraham okwa manga omwana Isak komaako nokoompadhi e te mu langeke koshiyambelo.

Abraham okwa kutha omwele. Pethimbo opo tuu mpoka, omuyengeli gwOmuwa okwe mu igidha okuza megulu a ti: ‘Abraham! Ino ehameka omumwoye, wu mu ningile ando uuwinayi washa. Ngashingeyi ondi shi shi kutya owu na eitaalo muKalunga, oshoka owa li wu na ehalo okuyamba po omumwoye.’  Abraham okwa mono onzi yi li mengande ya kwatwa komankono. Okwa mangulula Isak nziya, e ta yamba onzi efikilondjambo peha lyomwana.

Okuza tuu kesiku ndyoka, Jehova okwi ithana Abraham kuume ke. Mbela owu shi kutya omolwashike? Abraham okwa li a ningi kehe shoka Jehova a li a hala a ninge, nonando ka li u uvite ko kutya omolwashike te mu pula e shi ninge.

Jehova okwa li natango e endulula euvaneko ndyoka a li a ningi naAbraham a ti: ‘Otandi ku yambeke, notandi ke ku pa oluvalo olwindji.’ Shika osha hala okutya, Jehova ota ka yambeka aantu ayehe okupitila mezimo lyaAbraham.