Jehova okwa lombwele Moses a ti: ‘Ila kungame kondundu. Otandi ka nyola oompango dhandje kiipelende yomamanya e tandi yi ku pe.’ Moses okwa londo kondundu nokwa kala ko omasiku 40, uusiku nomutenya. Manga a li hono, Jehova okwa nyola Iipango Omulongo kiipelende yomamanya gaali e te yi mu pe.

Konima yethimbo lyontumba, Aaisraeli oya li taya dhiladhila kutya Moses okwe ya thiga po. Oya lombwele Aaron ya ti: ‘Otwa hala gumwe ngoka te tu kwatele komeho. Tu ningila kalunga.’ Aaron okwa ti: ‘Pii ndje omagola geni goshingoli.’ Okwe ga hemuna e te ga tholoma oshimenka shontana yoshingoli. Aantu oya ti: ‘Ontana ndjika oyo kalunga ketu ngoka e tu tembudha muEgipiti.’ Oya tameke okugalikana ontana yoshingoli, e taya dhana oshituthi. Mbela shika osha li sha puka? Eeno, molwaashoka aantu oya li yu uvaneka kutya otaya ka longela owala Jehova. Ihe ngashingeyi inaya gwanitha po euvaneko ndyoka.

 Jehova okwa mono shoka taya ningi, e ta lombwele Moses ta ti: ‘Londoloka wu ye kaantu. Itaya vulika kungame notaya galikana oshikalunga.’ Moses okwa londoloka ko kondundu te endelele a humbata omamanya gaali giipelende.

Sho ta hedha pontanda, oku uvu aantu tayi imbi. Opo nduno okwa mono taya dhana yo taya tutula notayi isizimikile ontana. Moses okwa li a geya noonkondo. Okwe ekelehi iipelende yomamanya iyali mbyoka a li a humbata, e tayi tatuka. Nziyanziya okwa hanagula po oshiyelekela shoka. Okwa pula Aaron a ti: ‘Aantu mbaka oye ku itaalitha ngiini wu ninge oshinima shika oshinyanyalithi?’ Aaron okwa ti: ‘Ino geela ndje. Owu shi shi nawa kutya aantu mbaka aawinayi. Oya pula ndje ndi ya ningile kalunga, onkene ondu umbile omagola gawo goshingoli meziko e tandi ga tholoma ontana ndjika.’ Aaron ka li e na oku shi ninga. Moses okwa shuna kondundu e ti indile Jehova e ya dhimine po.

Jehova okwa dhimine po mboka ya li ye na ehalo okuvulika kuye. Mbela ku wete nkene sha li sha simana kAaisraeli okulandula ewiliko ndyoka ya li taya pewa kuMoses?