1, 2. (a) Omumwatate Russell okwa yamukula ngiini omusita ngoka a li a hala okutseya kutya Aakonakoni yOmbiimbeli ohaya adha peni oshimaliwa? (b) Oshike tatu ka konakona montopolwa ndjika?

 OSHIKANDO shimwe omusita gwongeleka yaReformed Church, ngoka a li a hala okutseya kutya iilonga yAakonakoni yOmbiimbeli ohayi ambidhidhwa ngiini pashimaliwa, okwi ile komumwatate Charles T. Russell.

Omumwatate Russell okwa ti: “Ihatu umbu ongalo.”

Omusita okwe mu pula a ti: “Iimaliwa ohamu yi adha peni ano?”

Russell okwa yamukula: “Ngele onde ku lombwele nkene hatu yi mono, ito shi itaale. Uuna aantu taye ya kokugongala kwetu, ihaya pewa uutungwa wongalo. Ihe oye shi shi kutya otu na iinima hayi futwa. Ohayi ipopile momitima dhawo taya ti, ‘Oshinyanga shika ohashi futwa . . . Ongiini mbela tandi vulu okwaambidhidha?’”

Omusita okwa tala omumwatate Russell nonkumwe.

Russell okwa tsikile ko a ti: “Odhoshili ndhoka. Aantu ohaya pula ndje aluhe epulo ndika: ‘Ongiini tandi vulu okwaambidhidha?’ Ngele omuntu okwa mono oshimaliwa, oha kala a hala oku shi longitha miinima yOmuwa. Ihe ngele ke na sha, ihatu mu thiminike.” a

² Omumwatate Russell okwa popile “oshili yo yene.” Oshigwana shaKalunga osha tseyika nawa kutya osha kala hashi ambidhidha elongelokalunga lyashili pashimaliwa. Montopolwa ndjika otatu ka kundathana iiholelwa yimwe yopamanyolo pamwe naambyoka yopethimbo lyetu shi na ko nasha naashika. Sho tatu tala nkene iilonga yUukwaniilwa hayi ambidhidhwa nena pashimaliwa, kehe gumwe gwomutse ni ipule ngeyi: “Ongiini tandi vulu okwaambidhidha Uukwaniilwa pashimaliwa?’

3, 4. (a) Jehova okwi inekela kutya aalongeli ye otaya ka ninga shike? (b) Aaisraeli oya li ya ambidhidha ngiini iilonga yokutunga etsalihangano?

³ Jehova okwi inekela aalongeli ye yashili noku shi kutya uuna pwa pumbiwa omaambidhidho, otaye ke ga gandja nenyanyu. Natu taleni kiiholelwa iyali yAaisraeli.

⁴ Konima sho Jehova a kutha Aaisraeli muEgipiti, okwe ya lombwele ya tunge etsalihangano, opo ye mu longelele mo.  Etsali ndyoka niinima mbyoka ya li tayi ka kala mo oya li tayi ka kotha oshimaliwa oshindji. Nomolwashono Jehova a lombwele Moses a lombwele oshigwana shi ambidhidhe oproyeka, a ti: “Shaa ngoka a hala oku shi ninga, ne ete omayambo.” (Eks. 35:5) Oshigwana shika oshi inyenge ngiini, nonando opo owala sha adhika sha zi muupika wAaegipiti, mboka ye shi ‘tsike iilonga iidhigu yuupika noye shi longitha nonyanya’? (Eks. 1:14) Oshigwana osha gandja omaambidhidho goshingoli, oshisiliveli niinima yilwe yongushu, mbyoka oyindji tapeya ye yi pelwe kAaegipiti. (Eks. 12:35, 36) Aaisraeli oya gandja oshindji shi vulithe pwaashoka sha li sha pumbiwa, nomolwaashono ya lombwelwa ‘kaaye ete we oombalagelo.’ —  Eks. 36:4-7.

5. Aaisraeli oyi inyenge ngiini sho David e ya pe ompito ya ambidhidhe iilonga yokutunga otempeli?

⁵ Konima yoomvula 475 lwaampono, David okwa kutha oshimaliwa ‘meliko lye mwene’ e te shi gandja koproyeka yokutunga otempeli, ehala lyotango kombanda yevi lyokulongelela mo Kalunga kashili. Opo nduno okwa pe Aaisraeli ooyakwawo ompito yokugandja, sho a pula a ti: “Ope na tuu mbela mboka ya hala okweetela OMUWA oombalagelo?” Aantu oyi inyenge ngiini? Oya “gandja nehalo kOMUWA.” (1 Ondjal. 29:3-9) Molwashoka David okwa li e shi kutya Jehova oye ha gandja iinima ayihe, okwa galikana kuye a ti: ‘Ayihe oyo omagano ga za kungoye. Ano otwe ku galulile owala shoka shoye.’ —  1 Ondjal. 29:14.

6. Omolwashike iimaliwa ya pumbiwa opo iilonga yUukwaniilwa yi longwe kunena, naashika otashi pendutha omapulo geni?

⁶ Moses naDavid kaya li ya thiminike aantu ya gandje. Pehala lyaashono, aantu oya gandja nomutima aguhe. Ongiini kunena? Otu shi shi kutya iilonga yi na ko nasha nUukwaniilwa waKalunga, mbyoka tayi longwa nena ohayi pula oshimaliwa. Ohashi pula oshimaliwa oshindji noonkondo okunyanyangidha nokutaandelitha Oombiimbeli niileshomwa yOmbiimbeli, okutunga nokusila oshimpwiyu omahala gokugongalela, iitayimbelewa nosho wo okukwatha mbala ooitaali ooyakwetu mboka ye li monkugo yi na onkambe. Onkee ano, shika otashi pendutha omapulo ga simana: Oshimaliwa ohashi zi peni? Mbela aalanduli yaJesus oye na okuthiminikwa ya gandje oshimaliwa?

7, 8. Omolwashike oshigwana shaJehova ihaashi hehela nenge shi indile oshimaliwa?

⁷ Omumwatate Russell nooyakwawo oya tindi okulandula oshiholelwa shooproyeka dhokugongela oshimaliwa ndhoka hadhi ningwa kehe pamwe moongeleka dhUukwakriste. Moshifo oshitiyali shOshungolangelo, omwa li oshileshwa shi na oshipalanyolo “Mbela owa hala ‘Oshungolangelo’?” moka Russell a ti: “Molwashoka otwi itaala kutya ‘Oshungolangelo’ otayi ambidhidhwa kuJEHOVA, kayi na siku yi ka hehele nenge yi indile oshimaliwa kaantu. Ngele Ngoka ta ti: ‘Iisiliveli ayihe niingoli yomuuyuni awuhe oyandje’ ite ke tu pa oshimaliwa, nena otatu ka uva ko kutya ethimbo olya thikana okweetha po oshifo  shika.” (Hag. 2:7-9) Ihe ngashingeyi pwa pita oomvula dhi vulithe 130, Oshungolangelo nehangano ndyoka hali yi nyanyangidha otayi pula natango komeho.

⁸ Oshigwana shaJehova ihashi hehela oshimaliwa. Ihashi taambekidha uutungwa wongalo nenge shi gandje oombapila dhomahanga ga pya. Nenge shi kale shi na osumina, oontanda, okukondjela epandela nenge shi pule oshipe, opo shi mone oshimaliwa. Osha tsu kumwe naashoka Oshungolangelo ya popile sho ya ti: “Otwa mona kutya kashi li mondjila okwiindila oshimaliwa, opo tu longele Omuwa ngaashi hashi ningwa koongeleka dhilwe . . . Otwa tseya kutya osha puka ngele otwa gongele nokuhehela oshimaliwa medhina lyOmuwa gwetu. Shika ine shi taamba ko noita ka yambeka iilonga yetu nosho wo mboka taya gandja momukalo nguka.” b

9, 10. Omolwashike hatu gandja omaambidhidho nehalo ewanawa?

⁹ Kunena tu li aalelwa yUukwaniilwa, ihatu thiminikwa tu gandje. Ihe ohatu longitha nenyanyu iimaliwa yetu niiniwe yetu yilwe tu ambidhidhe iilonga yUukwaniilwa. Omolwashike tu hole okugandja? Natu taleni komatompelo gatatu.

¹⁰ Lyotango, ohatu gandja omaambidhidho nehalo ewanawa, molwaashoka otu hole Jehova notwa hala ‘okulonga shoka she mu opalela.’ (1 Joh. 3:22) Jehova oku hole shili aapiya ye mboka haya gandja nomutima aguhe. Natu konakoneni oohapu ndhoka dha popiwa komuyapostoli Paulus kutya Omukriste oku na okugandja ngiini. (Lesha 2 Aakorinto 9:7.) Omukriste gwashili ke shi omuluya noiha thiminikilwa okugandja. Pehala lyaashono, okwa tokola a gandje “ngaashi eiyuvo lye tali mu lombwele.” c Ano oha gandja uuna a mona kutya opu na ompumbwe, nuuna a mona nkene ta vulu oku yi kandula po. Jehova okwa lenga omuntu ngoka ha gandja ngaaka, ‘oshoka oku hole ngoka ta gandja nenyanyu.’ Etoloko lilwe olya ti: “Kalunga oku hole aantu mboka ye hole okugandja.”

11. Oshike hashi tu inyengitha tu pe Jehova omagano omawanawaelela?

¹¹ Etiyali, sho tatu gandja omaambidhidho otatu pandula Jehova omolwomalaleko nuuyamba ngoka e tu pa. Natu tedhatedheni kekotampango limwe tali adhika mOmpango yaMoses. (Lesha Deuteronomium 16:16, 17.) Omulumentu kehe Omwiisraeli ta yi koshituthi kehe shomiituthi itatu yokomumvo, okwa li e na okufaalela omagano ‘ngaashi ta vulu pamuthika ngoka OMUWA Kalunga ke’ e mu pa. Onkee ano, manga inaa ya koshituthi shoka, okwa li e na okudhiladhila komayambeko ngoka a pewa nokukonakona omutima gwe, e ta tokola okugandja omagano omawanawa ngaashi ta vulu. Sha faathana, uuna tatu tedhatedha komayambeko ngoka Jehova e tu pa, ohashi tu inyengitha tu mu pe omagano ngoka omawanawelela. Omagano ngoka hatu gandja nomutima aguhe, ngoka  ga kwatela mo iiniwe yetu, otagu ulike kutya otwa pandula Jehova sho e tu yambeka. —  2 Kor. 8:12-15.

12, 13. Omaambidhidho getu ohaga ulike ngiini kutya otu hole Omukwaniilwa, nohatu gandja ingapi?

¹² Etitatu, uuna tatu gandja omaambidhidho, ohatu ulike kutya otu hole omukwaniilwa Jesus Kristus. Ngiini? Tala kwaashoka Jesus a lombwelele aalongwa ye ongulohi ye yahugunina kombanda yevi. (Lesha Johannes 14:23.) Jesus okwa ti: “Oongoka e hole ndje, ota vulika koohapu dhandje.” ‘Oohapu’ dhaJesus odha kwatela mo elombwelo lyokuuvitha onkundana ombwanawa yUukwaniilwa muuyuni awuhe. (Mat. 24:14; 28:19, 20) Ohatu vulika “koohapu” ndhoka mokulonga ngaashi tatu vulu, ano tatu longitha ethimbo lyetu, oonkondo dhetu nosho wo iiniwe niiyemo yetu, opo tu humithe komeho iilonga yokuuvitha Uukwaniilwa. Nokungawo, otatu ulike kutya otu hole Omukwaniilwa gwopaMesiasa.

¹³ Tu li aalelwa yUukwaniilwa, otwa hala okuulika nomutima gwetu aguhe kutya ohatu ambidhidha Uukwaniilwa mokwaambidhidha pashimaliwa. Ihe otu na okugandja ingapi?  Ndika etokolo lyopaumwene. Kehe gumwe oku na okugandja ngaashi ta vulu. Ihe oyendji yomutse kaye na oshindji. (Mat. 19:23, 24; Jak. 2:5) Ashike naya tseye kutya Jehova nOmwana oya lenga omaambidhidho gawo ngoka haya ningi nomutima aguhe nando omashona. —  Mark. 12:41-44.

14. Iileshomwa yOonzapo dhaJehova oya kala uule woomvula odhindji hayi gandjwa ngiini?

¹⁴ Oonzapo dhaJehova odha kala uule woomvula odhindji hadhi gandja iileshomwa yopaMbiimbeli tadhi pula omaambidhidho gokondandalunde. Oshimaliwa shoka omuntu a li ha pulwa a ambidhidhe osha li oshishoneelela, opo naamboka ye na iiyemo iishona ya vule okumona wo iileshomwa. Ngele omunegumbo ota monika e na ohokwe, ihe ita vulu okugandja omaambidhidho, aauvithi yUukwaniilwa oya li haye mu thigile oshileshomwa. Oshoka elalakano lyawo olya li okugandja iileshomwa kwaamboka ye na ohokwe mboka taye ke yi lesha nokukwathelwa kuyo.

15, 16. (a) Mo 1990 elunduluko lini lya tamekelwe kOlutuwiliki shi nasha nomukalo ngoka hatu gandja iileshomwa? (b) Omaambidhidho gehalo ewanawa ohaga ningwa ngiini? (Tala wo oshimpungu “ Omaambidhidho getu ohaga longithwa ngiini?”)

¹⁵ Mo 1990 Olutuwiliki olwa tameke okulundulula omukalo moka hatu gandja iileshomwa. Okutameka momumvo ngoka, iileshomwa ayihe moAmerika oya kala hayi gandjwa taku pulwa omuntu a gandje omaambidhidho ngaashi a hala. Ontumwafo ndjoka ya nyolelelwe omagongalo agehe moshilongo shoka oya yelitha ya ti: “Iifo niileshomwa yilwe otayi ka pewa aauvithi naamboka ye na ohokwe itaaku pulwa oshimaliwa shokondandalunde. . . . Kehe gumwe ngoka a hala okwaambidhidha oofuto dhiilonga yetu ota vulu oku shi ninga, ihe oku na okupewa iileshomwa kutya nduno okwa ambidhidha nenge hasho.” Elongekidho ndika olyu ulike kutya ihatu futwa, niilonga yetu oyopalongelokalunga nonokutya “tse inatu fa yalwe oyendji mboka haa halitha oohapu dhaKalunga.” (2 Kor. 2:17) Konima yethimbo, elongekidho ndyoka olya tameke okutulwa miilonga miitayimbelewa ayihe muuyuni.

¹⁶ Omaambidhidho ohaga gandjwa ngiini? MIinyanga yUukwaniilwa yOonzapo dhaJehova omu na uuketha moka hamu tulwa omaambidhidho. Omuntu ota vulu okutula mo omaambidhidho nenge oku ga tumina kulimwe lyomomahangano gopaveta ngoka haga longithwa kOonzapo dhaJehova. Omumvo kehe mOshungolangelo ohamu kala oshileshwa tashi popi kombinga yomikalo dhi ili nodhi ili nkene omuntu ta vulu okwaambidhidha.

17-19. Yelitha nkene oshimaliwa shoka hashi gandjwa nehalo ewanawa hashi longithwa (a) miilonga yomuuyuni awuhe, (b) mokutungitha Iinyanga yUukwaniilwa muuyuni awuhe nosho wo (c) moofuto dhegongalo.

¹⁷ Iilonga yomuuyuni awuhe. Oshimaliwa ohashi futile oofuto dhiilonga yokuuvitha muuyuni awuhe. Oofuto ndhika odha kwatela mo oofuto dhokunyanyangidha iinyolomwa mbyoka hayi longithwa muuyuni awuhe, okutunga nokwoopaleka omatungo giitayimbelewa nomagumbo gaBetel nosho wo okukaleka po oosikola dhOmbiimbeli dha yooloka. Oshimaliwa  ohashi longithwa wo okukwathela aatumwa, aatonateli aayendi naakokolindjila yi ikalekelwa. Omaambidhidho ngaka ohaga longithwa wo okukwathela aamwatate naamwameme mboka ye li monkugo yi na onkambe. d

¹⁸ Okutungitha Iinyanga yUukwaniilwa muuyuni awuhe. Oshimaliwa ohashi longithwa okukwathela omagongalo ga tunge Iinyanga yUukwaniilwa iipe nenge oku yi opalekulula. Naasho omaambidhidho omakwawo tage ya mo, ohaga pewa omagongalo galwe nago ga kwathelwe okutunga. e

¹⁹ Oofuto dhegongalo. Oshimaliwa ohashi longithwa okufuta oofuto ndhoka hadhi kaleke po Oshinyanga shUukwaniilwa. Aakuluntugongalo otaya vulu okupopya kutya oshimaliwa shimwe nashi tuminwe koshitayimbelewa shi ka longithwe miilonga yokuuvitha muuyuni awuhe. Ngele shoka tashi ningwa, aakuluntugongalo ohaya leshele egongalo okatokolitho. Ngele egongalo olya tsu kumwe, nena omaambidhidho ngoka ohaga tumwa. Omwedhi kehe omumwatate ngoka hu ungaunga nomambo goshimaliwa gegongalo oha longekidha olapota ndjoka hayi leshelwa egongalo.

20. Oto ka simanekitha Jehova ngiini ‘neliko lyoye’?

²⁰ Sho tatu dhiladhila kwaashihe shoka hashi ningwa po, opo iilonga yokuuvitha Uukwaniilwa nosho wo yokuninga aantu aalongwa yi longwe muuyuni awuhe, shika ohashi tu inyengitha tu ‘simanekithe OMUWA neliko lyetu.’ (Omayel. 3:9, 10, yelekanitha OB-1954.) Meliko lyetu omwa kwatelwa oonkondo dhetu, omadhiladhilo getu nuunkulungu wetu miinima yopambepo. Iinima ayihe mbika otwa hala oku yi longitha nawa miilonga yUukwaniilwa. Ashike dhimbulukwa kutya eliko lyetu olya kwatela mo wo iiniwe yetu. Natu kaleni twa tokola okugandja uuna tatu vulu. Oshimaliwa shoka hatu ambidhidha nehalo ewanawa ohashi simanekitha Jehova nohatu ulike kutya otatu ambidhidha Uukwaniilwa wopaMesiasa.