1, 2. Jesus okwa hunganeke kombinga yoshilonga shini sha simana, nosha pendutha epulo lini lya simana?

 OLUNDJI aanapolotika ihaya gwanitha po omauvaneko gawo. Naamboka nokuli ya hala oku shi ninga ohaya nyengwa. Ihe Jesus Kristus, Omukwaniilwa gwopaMesiasa, okwa yooloka ko kuyo, oshoka oha gwanitha po aluhe omauvaneko ge.

² Sho Jesus a ningi Omukwaniilwa mo 1914, okwa tameke okugwanitha po oohapu ndhoka a popile omimvo 1 900 dha tetekele. Jesus manga inaa sa, okwa ti: “Elaka ndika etoye lyOshilongo [nenge lyUukwaniilwa] otali ka uvithilwa aantu ayehe.” (Mat. 24:14) Iilonga mbyoka yokuuvitha oya li tayi ku ulika kutya Jesus okwa tameka okupangela. Ihe epulo lya simana olya li mpano kutya: Omukwaniilwa nguka ota ka adha peni aauvithi yehalo ewanawa momasiku gahugunina moka aantu taya ka kala aakaanakalunga, kaaye na ohole noye na ombepo yokwiihola mwene? (Mat. 24:12; 2 Tim. 3:1-5) Osha simana okumona eyamukulo kepulo ndyoka, oshoka olya guma Aakriste yashili ayehe.

3. Jesus okwa li e na omukumo mushike, nomolwashike?

³ Natu taleni ishewe koohapu dhaJesus. Mbela oohapu “otali ka uvithilwa” otadhi ulike ngaa kutya Jesus okwa li ta popi nomukumo? Eeno o! Jesus okwa li e shi kutya momasiku gahugunina oyendji otaye ki iyamba nehalo ewanawa okulonga oshilonga shoka. Omolwashike a li e na omukumo? Omolwashoka sho a li megulu okwa mono nkene He, Jehova, i inekela kutya aapiya Ye otaye ki iyamba nehalo ewanawa. (Joh. 12:45; 14:9) Natu taleni nkene Jehova e shi ulike.

4. Jehova okwa lombwele Aaisraeli ya ambidhidhe oshilonga shini, nAaisraeli oyi inyenge ngiini?

⁴ Dhiladhila kwaashoka sha ningilwe po sho Jehova a lombwele Moses a dhike etsalihangano moka Aaisraeli ye na okulongela Jehova. Jehova okwa lombwele Moses a pule oshigwana ashihe shi yambidhidhe oshilonga shoka. Moses okwa ti kuyo: “Shaa ngoka a hala oku shi ninga, ne ete omayambo.” Oshizemo? Aantu “oya tsikile okweetela Moses oombalagelo  ongula kehe.” Oya li ye eta omayambo ogendji e taya lombwelwa nokuli ‘kaaye ete we oombalagelo.’ (Eks. 35:5; 36:3, 6) Aaisraeli oyu ulike shili kutya Jehova ota vulu oku yi inekela.

5, 6. Jehova naJesus oya li ya tegelela aapiya yashili ya kale nombepo yini momasiku gahugunina, ngaashi sha popiwa mEpisalomi 110:1-3?

⁵ Mbela Jehova oku na omukumo kutya momasiku gahugunina aapiya ye nayo otaye ki iyamba nehalo ewanawa? Lelalela! Omimvo dhi vulithe pe 1 000 manga Jesus inee ya kombanda yevi, Jehova okwa nwetha mo David a nyole kombinga yethimbo ndyoka Mesiasa ta ka tameka okupangela. (Lesha Episalomi 110:1-3.) Jesus, Omukwaniilwa nguka opo a langekwa po, okwa li ta ka kala e na aatondi. Ihe okwa li wo ta ka kala naayambidhidhi oyendji. Yo itaya ka thiminikwa ya longele Omukwaniilwa. Naagundjuka otaye ki iyamba nehalo ewanawa, oyendji ya fa omume gwongula. a

⁶ Jesus okwa li e shi shi kutya oohapu ndhoka dhEpisalomi 110 oye tadhi popi. (Mat. 22:42-45) Nomolwashoka a li e na omukumo kutya oyendji otaye ki iyamba nehalo ewanawa yu uvithe onkundana ombwanawa muuyuni awuhe. Mbela ondjokonona otayi tsu kumwe naashoka? Mbela Omukwaniilwa okwa mona ngaa aauvithi yehalo ewanawa momasiku ngaka gahugunina?

7. Nziya sho Jesus a ningi Omukwaniilwa okwa ningi po shike a kwathele aalanduli yi ilongekidhile oshilonga shoka shi li komeho?

⁷ Mbala sho Jesus a ningi Omukwaniilwa okwa kwathele aalanduli ye yi ilongekidhile oshilonga oshinene. MOntopolwa 2 otwa mono kutya okuza mo 1914 sigo opetameko lyo 1919, Jesus okwa konakona nokuyogola aalanduli ye. (Mal. 3:1-4) Nomo 1919 okwa langeke po omumati nenge  omupiya omudhiginini a wilike aalanduli ye. (Mat. 24:45) Okuza kesiku ndyoka, omupiya okwa kala ta gandja iikulya yopambepo okupitila miipopiwa piigongi yoshitopolwa nomiileshomwa. Omupiya okwa tsu omuthindo kutya Omukriste kehe oku na okuuvitha.

8-10. Iigongi oya li ya kwathele ngiini aauvithi yu uvithe nuulaadhi? Gandja oshiholelwa. (Tala wo oshimpungu “ Iigongi mbyoka ya kwathele aauvithi yu uvithe nuulaadhi.”)

⁸ Iipopiwa piigongi yoshitopolwa. Oshigongi shotango oshinene shAakonakoni yOmbiimbeli shoka sha ningwa konima yIita yoTango yUuyuni osha li moCedar Point moOhio moAmerika, okuza me 1 sigo 8 Septemba 1919. Mesiku etiyali tate Rutherford okwa popi moshipopiwa she kutya, “Oshinakugwanithwa shOmukriste kehe kombanda yevi . . . okutseyitha etumwalaka kombinga yuukwaniilwa wOmuwa.”

⁹ Mesiku etitano tate Rutherford okwa kundathana enenedhiladhilo lyoshigongi shoka moshipopiwa “Kaalongi pamwe natse” shoka sha ka nyanyangidhwa mOshungolangelo kohi yoshipalanyolo “Tseyitha Uukwaniilwa.” Okwa ti: “Omukriste ngoka ha dhiladhila pandunge ohi ipula kutya oku lile ko shike kombanda yevi. Oku na nduno okuyamukula kutya Omuwa okwa ningi ndje omukalelipo gwe nondi na uuthembahenda noshinakugwanithwa shokuuvitha etumwalaka lyombili lya za kuKalunga.”

¹⁰ Moshipopiwa shoka tate Rutherford okwa tseyitha kutya otapu ka nyanyangidhwa oshifo oshipe shedhina The Golden Age (ngashingeyi hashi ithanwa Awake!), shoka tashi ka kwathela aantu ya mone kutya Uukwaniilwa owo awuke tawu ka kandula po omaupyakadhi gawo. Olopota yi na sha noshigongi shika oya popi shoka sha ningwa po, sho a pula kutya yangapi ya hala okutaandelitha oshifo shoka. Oya ti: “Osha li oshiwanawa okumona sho aapulakeni ayehe 6 000 ya thikama oshita.” b Osha yela kutya Omukwaniilwa okwa li e na aayambidhidhi oyendji ya halelela okuuvitha kombinga yUukwaniilwa!

11, 12. Oshungolangelo yomo 1920 oya ti iilonga yokuuvitha mbyoka Jesus a ti oyi na okulongwa oya li tayi ka longwa uunake?

¹¹ Iileshomwa. Oshungolangelo oya kala tayi tsu omuthindo kutya okuuvitha onkundana ombwanawa yUukwaniilwa okwa simanenena. Natu taleni kiiholelwa yimwe mbyoka ya ningilwe mo 1920 nasha.

¹² Mateus 24:14 okwa hunganeke kutya etumwalaka lini tali ku uvithwa. Ehunganeko ndyoka olya ka gwanithwa uunake? Oshungolangelo ye 1 Juli 1920 ndjoka ya li yi na oshileshwa shi na oshipalanyolo “Evaangeli lyUukwaniilwa” oya tile: “Onkundana ombwanawa ndjoka ya popiwa muka oyi na sha nokudhikwa po kwuukwaniilwa wopaMesiasa nehulilo lyuuyuni.” Oshileshwa osha yelitha wo kutya etumwalaka olya li tali ku uvithwa uunake, sha ti: “Etumwalaka ndika  otali ku uvithwa okuza pIita yoTango yUuyuni sigo ‘opuudhigu uunene.’” Osha gwedha ko sha ti: “Ngashingeyi olyo ethimbo lyokuuvithila iilyo ayihe yoongeleka dhUukwakriste onkundana ndjika ombwanawa.”

13. Oshungolangelo yomo 1921 oya ladhipike ngiini aagwayekwa yi iyambe nehalo ewanawa?

¹³ Mbela oshigwana shaKalunga osha li tashi ka thiminikilwa oshilonga shokuuvitha? Aawe. Oshileshwa shi na oshipalanyolo “Kaleni mu na omukumo” shoka sha li mOshungolangelo yo 15 Maalitsa 1921 osha ladhipike aagwayekwa yi iyambe nehalo ewanawa, nokwiipula taya ti: “Mbela kashi shi oshinakugwanithwa nuuthembahenda uunene okulonga oshilonga shika?” Oshileshwa osha gwedha ko: “Otwi itaala kutya ngele omwa kala mwa tala ko oshilonga shika shi li uuthembahenda, ohapu yOmuwa otayi ka kala ‘ya fa omulilo gwa hwama meni lyeni’ noku mu inyengitha mu uvithe ngaashi yi inyengithile Jeremia.” (Jer. 20:9) Oohapu ndhoka odha li tadhi ulike kutya Jehova naJesus oyi inekela mboka taya ambidhidha Uukwaniilwa nuudhiginini.

14, 15. Mo 1922 Oshungolangelo oya ladhipike aagwayekwa yu uvithile aantu momukalo guni?

¹⁴ Aakriste yashili oye na okuuvithila ngiini aantu etumwalaka lyUukwaniilwa? Oshileshwa oshihupi shi na oshipalanyolo “Iilonga ya simana,” shoka sha li mOshungolangelo yo 15 Auguste 1922, osha ladhipikile aagwayekwa ya kale haya “uvithile aantu kutya uukwaniilwa wegulu owu li popepi, haya faalele aantu iileshomwa nokupopya nayo pomagumbo gawo.”

¹⁵ Osha yela kutya okuza mo 1919, Kristus okwa kala ta longitha omupiya omudhiginini nomunandunge a popye lwiikando kutya Omukriste oku na uuthembahenda noshinakugwanithwa shokuuvitha etumwalaka lyUukwaniilwa. Ihe Aakonakoni yOmbiimbeli oyi inyenge ngiini sho ya ladhipikwa yu uvithe etumwalaka lyUukwaniilwa?

16. Aakuluntugongalo yamwe oya li yi inyenge ngiini sho yu uvu kutya oye na okuuvitha egumbo negumbo?

¹⁶ Mo 1920 nasha nomo 1930 nasha aantu yamwe oya li yu uvite kutya haagwayekwa ayehe ye na okuuvitha. Oshungolangelo ye 1 Novomba 1927 oya popi shoka sha li tashi ningwa po ya ti: “Kunena mongeleki [megongalo] omu na aakuluntugongalo yamwe . . . mboka inaaya hala okuuvitha yo otaya keelele ooitaali ooyakwawo kaaya uvithe. . . . Otaya sheke edhiladhilo lyokuuvithila aantu egumbo negumbo kombinga yaKalunga, yOmukwaniilwa noyuukwaniilwa we.” Oshileshwa osha tsikile ko sha ti: “Ngashingeyi ethimbo olya thikana, opo aantu ya tya ngaaka kaaya hogololwe we ye li aakuluntugongalo.” c

17, 18. Ooitaali oyendji oyi inyenge ngiini kelombwelo ndyoka ya pewa komupiya omudhiginini? Naantu omamiliyona oya kala hayi inyenge ngiini moomvula ethele dha piti?

¹⁷ Lago enene, ooitaali oyendji oya taamba ko nenyanyu elombwelo ndyoka ya pewa komupiya omudhiginini. Kuyo osha li uuthembahenda okuuvitha etumwalaka lyUukwaniilwa.  Oshungolangelo yo 15 Maalitsa 1926 oya ti: “Aadhiginini otaye ki iyamba, . . . opo yu uvithile aantu etumwalaka ndika.” Shoka aadhiginini ya ningi osha gwanitha po oohapu ndhoka dha popiwa mEpisalomi 110:3, sho yi iyamba nehalo ewanawa ya ambidhidhe Omukwaniilwa gwopaMesiasa.

¹⁸ Oomvula dhi vulithe pe 100 dha piti, aantu omamiliyona oya kala nokwiiyamba nehalo ewanawa yu uvithile aantu kombinga yUukwaniilwa. Moontopolwa tadhi landula, otatu ka kundathana nkene ya kala taya uvitha, omikalo niilongitho mbyoka ya kala nokulongitha muukalele noshizemo shiilonga mbyoka. Tango natu taleni kutya omolwashike aantu mbaka yi iyamba nehalo ewanawa yu uvithe kombinga yUukwaniilwa, nonando oya kundukidhwa kaantu yu udha ombepo yokwiihola mwene. Sho tatu kundathaneni epulo ndyoka, ipula to ti, ‘Omolwashike handi uvithile aantu onkundana ombwanawa?’

19. Omolwashike hatu vulika komayele gaJesus ‘gokukonga tango Uukwaniilwa waKalunga’?

¹⁹ Jesus okwa ladhipike aalanduli ye a ti: “Tangotango kongeni Oshilongo shaKalunga [nenge “Uukwaniilwa waKalunga,” NW].” (Mat. 6:33) Omolwashike hatu vulika kelombwelo ndyoka? Omolwashoka tu uvite ko kutya Uukwaniilwa owo tawu dhana onkandangala ya simana mokugwanitha po elalakano lyaKalunga. Ngaashi twa mono montopolwa ya tetekele, ombepo ondjapuki oya kala nokuhololela oshigwana shaKalunga oshili kombinga yUukwaniilwa. Ngele oshili ndjika oye ku gumu komwenyo, otayi ke ku pa uulaadhi wu konge tango Uukwaniilwa.

20. Eyele lyaJesus lyuuyamba wa holekwa otali holola ngiini nkene aalanduli ye taya ka vulika komayele gokukonga tango Uukwaniilwa?

²⁰ Jesus okwa li e shi kutya aalanduli ye otaya ka taamba ko omayele gokukonga tango Uukwaniilwa. Natu taleni keyele lye lyuuyamba wa holekwa. (Lesha Mateus 13:44.) Okwa ti omulumentu gumwe okwi itsu uuyamba wa holekwa mepya e ta mono kutya owu na ongushu. ‘Nomolwenyanyu okwa yi nokwa landitha po iinima ye ayihe e ta landa epya ndiyaka.’ Meyele ndika otatu ilongo mo shike? Otatu ilongo mo kutya ngele otwa mono oshili e tatu mono kutya oyi na ongushu, ohatu ningi omaiyambo nehalo ewanawa tu konge tango Uukwaniilwa noku wu pititha komeho monkalamwenyo yetu. d

21, 22. Ongiini mboka haya ambidhidha Uukwaniilwa nuudhiginini haya ulike kutya oya pititha komeho Uukwaniilwa? Gandja oshiholelwa.

²¹ Mboka haya ambidhidha Uukwaniilwa nuudhiginini ohayu ulike miilonga yawo kutya owo ya pititha komeho. Ohaya longitha uunkulungu wawo, oonkalamwenyo dhawo niiniwe yawo ya ambidhidhe iilonga yokuuvitha Uukwaniilwa. Oyendji oya ninga omaiyambo, opo ya ye miilonga yethimbo lyu udha. Aauvithi ayehe mboka oya mona kutya  Jehova oha yambeke mboka ya pititha komeho Uukwaniilwa we. Natu taleni koshiholelwa shimwe.

²² Avery naLovenia Bristow oya li haya kokola ondjila pamwe muumbugantu waAmerika mo 1920 nasha. Lovenia ota ti: “Ngame naAvery otwa kala tatu nyanyukilwa oomvula ndhoka twa kala tatu kokola ondjila pamwe. Iikando oyindji otwa li hatu ipula kutya openi tatu adha oshimaliwa shomahooli noshiikulya. Ihe Jehova okwa kala aluhe noku tu sila oshimpwiyu noinatu etha po uukokolindjila. Aluhe otwa kala tu na shoka twa pumbwa.” Lovenia ota dhimbulukwa oshikando shimwe ya li moPensacola moFlorida sho ya li yaa na oshimaliwa niikulya. Sho ya galukile kokakalafana kawo, oya adha oonailona mbali oonene dhiikulya nokambapila taka ti: “Omagano ngaka oga zi kegongalo lyaPensacola.” Lovenia mokutala koomvula adhihe ndhoka a kala muukokolindjila okwa ti: “Jehova ke na nando esiku a li inee tu sila oshimpwiyu. Oku shi okwiinekelwa.”

23. Owu uvitile ngiini oshili yUukwaniilwa ndjoka wa mona, nowa tokola toko okuninga shike?

²³ Ihatu vulu okuuvitha shi thike pamwe, oshoka oonkalo dhetu odha yoolokathana. Ihe atuhe otu na uuthembahenda wokuuvitha onkundana ombwanawa nomutima aguhe. (Kol. 3:23) Molwashoka otwa lenga oshili yUukwaniilwa ohatu iyamba nehalo ewanawaelela tu longe ngaashi tatu vulu. Mbela shoka osho wa tokola toko okuninga?

24. Uukwaniilwa otawu longo oshilonga shini sha simanenena momasiku ngaka gahugunina?

²⁴ Oomvula ethele dha piti, Omukwaniilwa okwa kala ta gwanitha po oshilonga shoka sha popiwa muMateus 24:14. Ihe ina thiminika aalanduli ye ye shi longe. Sho ya zi mo muuyuni mbuka wu udha ombepo yokwiihola mwene, oyi igandja nehalo ewanawa yu uvithe. Onkundana ombwanawa ndjoka tayi uvithwa muuyuni awuhe oyi li endhindhiliko kutya Jesus ota pangele. Nokuli iilonga yokuuvitha onkundana ombwanawa oyo ya simanenena momasiku ngaka gahugunina.