NATU tye ando owa ganeke omushiinda shoye sho to piti po. Owa koneke kutya omasiku ngaka oha kala te ku kondolola nawa nosho wo yaandjeni. Naye wo okwe ku ganeke e te ku lapa wu ye kuye. Sho wa thiki puye okwa ti: “Onda li ngaa nda hala oku ku pula sha? Ano oshike naanaa she mu yoolola ko kaantu yalwe?” Ngoye oto mu pula to ti: “Omolwashike to tile ngawo?” Ye ota ti: “Ne Oonzapo dhaJehova inamu fa nando aantu yalwe. Ihamu dhana omasiku gomafudho ne ishewe ihamu kutha ombinga mopolotika nenge miita. Ihamu hili omakaya, naanegumbo lyoye otaya monika lela ya fa ye na omikalo. Omolwashike mwa yooloka ko nayi kaantu yalwe ngawo?”

Owu shi shi kutya eyamukulo kepulo ndyoka oondika kutya tse otatu pangelwa kUukwaniilwa waKalunga. Omukwaniilwa gwetu Jesus oha kala te tu yogola. Ohe tu kwathele tu landule oshinkoti she, notu kale twa yooloka ko kuuyuni mbuka wa kolokosha. Moshitopolwa shika otatu ka mona nkene Uukwaniilwa wopaMesiasa wa kala tawu yogola ehangano, uupambepo nomikalo dhoshigwana shaKalunga, opo Jehova a simanekwe.