1, 2. MuJanuali 1895, opwa ningwa elunduluko lini li nasha nOshungolangelo, naamwatate oyi inyengele ngiini?

 JOHN A. BOHNET, gumwe gwomAakonakoni yOmbiimbeli okwa li a nyanyukwa shambishi megumbo mwa tselwa, sho a mono Oshungolangelo yaJanuali 1895. Omolwashike mbela? Kefo lyokombanda okwa li kwa thanekwa oshungo yi li pooha dhefuta lya pindjala yi na olamba tayi minikile. Moshifo omwa li oshileshwa shi na oshipalanyolo “Omuzalo gwetu omupe” tashi popi kombinga yankene Oshungolangelo tayi monika.

² Omumwatate Bohnet okwa li a nyanyukwa e ta nyolele omumwatate Russell ombilive. “Onda nyanyukwa shili okumona Oshungolangelo tayi monika nawa ngeyi,” osho a nyola. John H. Brown, gumwe gwomAakonakoni yOmbiimbeli omudhiginini okwa nyola wo a ti: “Oshifo otashi monika nawa noonkondo. Oshungo nando otayi dhengwa komakuthikuthi nokiikungulu, otayi monika ya kolelela.” Shika osho oshikando shotango aamwatate ya mono efo lyayo lyokombanda lya lunduluka nokasha li shahugunina. MuNovomba opwa ka ningwa ishewe elunduluko lilwe. Elunduluko ndika olya li li nasha nuupyakadhi mehangano.

3, 4. Oshungolangelo yo 15 Novomba 1895 oya popi kombinga yuupyakadhi wuni, noya tseyitha elunduluko lini lya simanenena?

³ Oshungolangelo yo 15 Novomba 1895 oya kundathanene muule uupyakadhi mboka wa li po. Uupyakadhi mboka owa li tawu yono po ombili mokati kAakonakoni yOmbiimbeli. Aamwatate oya li haya tsu oompata kutya olye e na okukala omuwiliki megongalo. Opo ya kwathelwe ye ethe po ombepo yethigathanopo, oshileshwa osha yelekanitha ehangano nosikepa. Osha yelitha kondandalunde kutya mboka taya kwatele komeho oya ndopa okukwathela ehangano lyi ilongekidhile iikungulu. Opwa li pu na okuningwa shike?

⁴ Osha ti kutya kapitiya oha shilipaleke kutya mosikepa ye omu na iilongitho yokuhupitha oomwenyo, noonakulongamo oya pyakudhukwa okuthitika omiyelo nenge oombululu ngele ya adhika koshikungulu. Sha faathana, mboka taya kwatele komeho mehangano oya li ye na okushilipaleka kutya omagongalo agehe ogi ilongekidhila uupyakadhi awuhe tawu holoka po. Opo ye shi tompole, oshifo osha tseyitha elunduluko lya simanenena.  Osha ti kutya moompadhi oontalala “aakuluntugongalo oye na okuhogololwa megongalo kehe” opo ya “‘tonatele’ oshigunda.” —  Iil. 20:28.

5. (a) Omolwashike elangekopo lyaakuluntugongalo lya li elongekidho ewanawa? (b) Otatu ka kundathana omapulo geni?

⁵ Elangekopo ndika lyaakuluntugongalo olya li etameko lyelongekidho ewanawa ndyoka tali ka pameka omagongalo. Olya kwathele aamwatate ya pite momaupyakadhi ngoka ge etithwa po kIita yoTango yUuyuni. Moomvula ndhoka dha ka landula ko, omalunduluko ngoka ga ka ningwa mehangano oga kwathele oshigwana shaKalunga shi vule okulongela nawa Jehova. Ehunganeko lini lyOmbiimbeli lya popya shi na ko nasha nomalunduluko ngaka? Omalunduluko geni wa mona taga ningwa mehangano lyaJehova? Mbela oge ku kwathela ngaa?

6, 7. (a) Ehunganeko lyaJesaja 60:17 otali ti shike? (b) Otashi ulike kushike sho ehunganeko tali popi kombinga ‘yaapangeli’?

⁶ Ngaashi twa kundathana mOntopolwa 9, Jesaja okwa hunganekele kutya Jehova ote ki indjipalitha oshigwana she. (Jes. 60:22) Ihe Jehova oku uvaneke wo okuninga oshindji. Mehunganeko olyo tuu ndyoka, okwa ti: “Otandi ku etele oshingoli peha lyoshikushu, oshisiliveli peha lyiiyela iiluudhe. Peha lyoshiti otandi ku etele oshikushu nopeha lyomamanya iiyela iiluudhe. Aapangeli yoye itaye ke ku hepeka we; otaye ke ku lela nuuyuuki nombili.” (Jes. 60:17) Ehunganeko ndyoka otali ti shike? Olye tu guma ngiini kunena?

⁷ Jesaja okwa hunganeke kutya oshitungithi shontumba otashi ka pingenwa po noshikwawo. Ihe ndhindhilika kutya shoka tashi pingene po oshikwawo oshi na ongushu shi vule shoka tashi pingenwa po. Ngele owa tungitha oshingoli pehala lyoshikushu, osha yela kutya shoka to tungu otashi kala sha kola shi vulithe nale. Iitungithi yilwe ya tumbulwa mbyoka tayi pingene po iikwawo nayo otayi gandja edhiladhilo lya faathana. Onkee ano Jehova okwa longitha ethaneko ndika a hunganeke kutya onkalo yoshigwana she otayi ka hwepopala kashona nakashona. Ihe ehunganeko otali ti oshike tashi ka hwepopala? Mehunganeko ndyoka Jehova okwa popi kombinga ‘yaapangeli’ u ulike kutya omukalo moka oshigwana she tashi wilikwa ogwo tagu ke enda tagu hwepopala.

8. (a) Olye ta ningi omalunduluko ngoka ga popiwa mehunganeko lyaJesaja? (b) Omalunduluko ngoka ohage tu etele ngiini uuwanawa? (Tala wo oshimpungu “ Okwa taamba ko epukululo neifupipiko.”)

⁸ Olye te ke gu hwepopaleka? Jehova ota ti: ‘Otandi ku etele oshingoli. Otandi ku etele oshikushu.’ Osha yela kutya elunduluko momukalo moka iinima hayi ningwa megongalo inali etwa po komuntu, ihe okuJehova ye mwene. Okuza sho Jesus a ningwa omukwaniilwa, Jehova okwe mu longitha a ninge omalunduluko ngaka. Ohage tu etele ngiini uuwanawa? Ovelise oyo tuu ndjoka otayi popi kutya otage ke tu etela ‘ombili’ “nuuyuuki.” Ngele otwe etha tu wilikwe kuJehova e tatu ningi omalunduluko, otatu ka kala tu na ombili mokati ketu. Ohole yokuhola uuyuuki otayi ke tu inyengitha tu longele Jehova ngoka a popiwa komuyapostoli Paulus kutya ‘oKalunga ngoka te tu pe ombili.’ —  Fil. 4:9.

9. Elandulathano nuukumwe megongalo oya kankamekelwa kushike, nomolwashike?

 ⁹ Paulus okwa nyola kombinga yaJehova a ti: ‘Kalunga ine tu ithanena okukala twaa na elandulathano, ihe okukala tu na ombili.’ (1 Kor. 14:33) Ndhindhilika kutya Paulus ina kondjithathanitha okwaanelandulathano nelandulathano, ihe onombili. Omolwashike? Dhimbulukwa kutya elandulathano haaluhe hali eta ombili. Pashiholelwa, ongundu yaakwiita otayi vulu okukala tayi ende melandulathano yu uka kiita, ndele elandulathano lyayo itali eta ombili, ihe olugodhi. Onkee ano Aakriste oye na okukaleka oshinima shika sha simana momadhiladhilo: Elandulathano kehe ndyoka inaali kankamekelwa kombili itali kalelele. Mepingathano naashoka, ombili yopakalunga ohayi eta po elandulathano tali kalelele. Onkee ano, inatu pandula tuu sho ehangano lyetu tali wilikwa notali opalekwa ‘kuKalunga, ngoka oluthithiya lwombili’! (Rom. 15:33) Ombili ndjoka Kalunga ha gandja ohayi tu etele elandulathano nuukumwe mboka twa lenga noonkondo momagongalo getu agehe muuyuni. —  Eps. 29:11.

10. (a) Mehangano lyetu omwa ningwa omalunduluko geni moomvula opo dha piti? (Tala oshimpungu “ Nkene omukalo moka ehangano hali wilikwa gwa hwepopalekwa.”) (b) Otatu ka kundathana omapulo geni?

¹⁰ Oshimpungu “ Nkene omukalo moka ehangano hali wilikwa gwa hwepopalekwa” otashi popi kombinga yomalunduluko omawanawa ngoka ga ningilwe mehangano lyetu moomvula dhopetameko. Ihe moomvula opo dha piti, omalunduluko geni taga faathanithwa ‘nokulongitha oshingoli peha lyoshikushu’ ga ningwa kuJehova okupitila mOmukwaniilwa gwetu? Omalunduluko ngoka oga kaleke po ngiini ombili nuukumwe momagongalo muuyuni awuhe? Ohage ku kwathele ngiini paumwene wu longele “Kalunga, ngoka te tu pe ombili”?

11. (a) Euvoko lini epe aamwatate ya mono konima sho ya konakona Omanyolo muule? (b) Olutuwiliki olwa li lwa tokola okuninga po shike?

¹¹ Pokati ko 1964 no 1971, iilyo yolutuwiliki oya li ya konakona iinima yontumba mOmbiimbeli mwa kwatelwa nkene egongalo lyopaKriste methelemumvo lyotango lya li hali wilikwa. a Oya mono kutya omagongalo methelemumvo lyotango oga li haga wilikwa kolutu lwaakuluntugongalo, ihe hakomukuluntugongalo gumwe awike. (Lesha Aafilippi 1:1; 1 Timoteus 4:14.) Olutuwiliki sho lu uvu ko oshinima shika, olwa mono kutya Omukwaniilwa gwawo, Jesus, okwa hala ya lundulule omukalo oshigwana shaKalunga hashi wilikwa. Oya tokola okuvulika kOmukwaniilwa. Oya ningi omalunduluko moompadhi oontalala, opo omukalo gwokulangeka po aakuluntugongalo gu kale tagu tsu kumwe nOmbiimbeli. Omalunduluko geni ga ningilwe petameko lyomimvo dho 1970 nasha?

12. (a) Omalunduluko geni ga ningilwe molutuwiliki? (b) Hokolola kutya Olutuwiliki nena olwu unganekwa ngiini. (Tala oshimpungu “ Nkene Olutuwiliki halu tonatele iinima yUukwaniilwa.”)

¹² Elunduluko lyotango lya ningwa, olya ningwa molutuwiliki mo mwene. Pethimbo mpoka aamwatate aagwayekwa yaheyali mboka ya li iilyo yolutuwiliki, oyo wo ya li aawiliki yehangano lyopaveta lyo-Watch Tower Bible and Tract Society of Pennsylvania. Ihe mo 1971, molutuwiliki omwa gwedhwa iilyo ine yi ninge 11 noya li ya yooloka ko kaawiliki yehangano lyopaveta. Iilyo yolutuwiliki oya li yi itala ko yi thike pamwe,  nomolwaashono omumvo kehe ya li hayi ningi omalufo gokukala omunashipundi palandulathano lyoondanda dhomadhina gawo.

13. (a) Elongekidho lini lya kala lya tulwa miilonga uule woomvula 40, okuza mo 1932 sigo 1972? (b) Mo 1972, etokolo lini Olutuwiliki lwa ningi?

¹³ Elunduluko ndyoka lya ka landula ko, olya ningwa momagongalo. Elunduluko ndyoka olini? Pokati ko 1932 no 1972, egongalo olya li hali tonatelwa owala komumwatate gumwe. Sigo omo 1936, omumwatate ngoka okwa li hi ithanwa omuwiliki gwiilonga. Okuza mpoka okwa kala hi ithanwa omupiya gwehangano; e te ki ithanwa omupiya gwegongalo nokonima omutonateli gwegongalo. Aamwatate mboka oya li haya sile oshigunda oshimpwiyu pambepo nuulaadhi. Omutonateli gwegongalo okwa li ha tokolele egongalo nando ina pula omayele kaayakuli yalwe megongalo. Ihe mo 1972, Olutuwiliki olwa ka ninga po omalunduluko omanene. Oga li ga kwatela mo shike?

14. (a) Elongekidho lini lya yi miilonga me 1 Kotoba 1972? (b) Omuunganeki gwolutu lwaakuluntugongalo oha tula ngiini miilonga Aafilippi 2:3?

¹⁴ Peha lyokukala nomumwatate gumwe oye omutonateli gwegongalo, aamwatate yalwe mboka ya gwanitha po iitegelelwa yopamanyolo nayo oya ningwa aakuluntugongalo. Ayehe oya li ye na okulonga pamwe ongolutu lwaakuluntugongalo ya wilike egongalo. Elongekidho ndika lyokulangeka po aakuluntugongalo olya yi miilonga me 1 Kotoba 1972. Nena omuunganeki gwolutu lwaakuluntugongalo ihi itala ko a simana e vule ooyakwawo, ihe ‘ongomudhinwa kwaayehe.’ (Luk. 9:48)  Kashi li tuu elalekonuuyamba kutse atuheni sho tu na aamwatate mboka aaifupipiki! —  Fil. 2:3.

15. (a) Uuwanawa washike omagongalo ga mona sho haga kwatelwa komeho kolutu lwaakuluntugongalo? (b) Oshike tashi ulike kutya Omukwaniilwa gwetu oku na uunongo?

¹⁵ Elongekidho lyokutopolelathana iinakugwanithwa megongalo mokati kaakuluntugongalo olye eta uuwanawa. Natu taleni kiinima itatu: Shotango, elongekidho ndyoka ohali kwathele aakuluntugongalo ya kaleke momadhiladhilo kutya Jesus oye Omutse gwegongalo, kutya nduno iinakugwanithwa yawo megongalo iinene shi thike peni. (Ef. 5:23) Oshitiyali, Omayeletumbulo 15:22 otaga ti: ‘Omadhiladhilo otaga tompola sha mpoka pe na aagandjindunge oyendji.’ Uuna aakuluntugongalo taa paathana omayele miinima mbyoka ya guma uupambepo wegongalo nokupulakenathana nawa, nena otashi ya kwathele ya ninge omatokolo ngoka taga tsu kumwe nomakotampango gOmbiimbeli. (Omayel. 27:17) Jehova oha yambeke omatokolo ngoka, nohaga tompola. Oshititatu, omolwaakuluntugongalo oyendji ya pyokoka mboka ye li momagongalo, ehangano olya kala tali tonatele nokulitha nawa oshigunda okupitila muyo. (Jes. 60:3-5) Dhiladhila owala kutya mo 1971 otwa li tu na omagongalo ge vulithe 27 000 muuyuni awuhe, ihe mo 2013 oga li ge vulithe 113 000. Osha yela kutya, muunongo we owindji, Omukwaniilwa gwetu okwa langeke po aasita yokulitha oshigunda shaalanduli ye pethimbo lyo opala. —  Mika 5:5.

16. (a) Aakuluntugongalo oye na oshinakugwanithwa shini? (b) Aakonakoni yOmbiimbeli oya li ya tala ko ngiini elombwelo lyaJesus li nasha ‘nokulitha oonzi’?

¹⁶ Okuza pethimbo lyAakonakoni yOmbiimbeli, aakuluntugongalo oya kala nale ye shi kutya oshinakugwanithwa shawo okukwathela ooitaali ooyakwawo ya kale aadhiginini kuKalunga. (Lesha Aagalati 6:10.) Mo 1908, mOshungolangelo omwa kundathanenwe oohapu dhaJesus ndhoka tadhi ti: “Litha oonzi dhandje.” (Joh. 21:15-17) Moshileshwa moka aakuluntugongalo oya lombwelwa kutya: “Osha simana tu kale twa pititha komeho elombwelo ndika lyOmuwa gwetu, nokukala twa lenga oshinakugwanithwa shika shokupalutha nokusila oshimpwiyu aalanduli ye.” Mo 1925, Oshungolangelo oya tsu natango omuthindo edhiladhilo ndyoka, sho ya dhimbulukitha aakuluntugongalo ya ti: “Egongalo olyaKalunga mwene, . . . naamboka ye na oshinakugwanithwa shokuyakula ooitaali ooyakwawo otaye ki ihokolola kuye.”

17. Ongiini aakuluntugongalo ya kwathelwa ya ninge aasita ya pyokoka?

¹⁷ Ongiini ehangano lyaJehova lya kwathele aakuluntugongalo ya ninge aasita ya pyokoka, shoka tashi faathanithwa nokulongitha “oshisiliveli peha lyiiyela iiluudhe”? Ehangano olye ya dheula. Mo 1959, omwa ningwa Osikola yUukalele wUukwaniilwa yotango yokudheula aakuluntugongalo. Oshilongwa shimwe osha li shi na oshipalanyolo “Ulika kutya owu na ko nasha nayo.” Aamwatate mboka oya kumagidhwa “ya tule po elandulathano lyokutalela po aauvithi momagumbo gawo.” Kosikola ndjoka okwa kundathanwa omikalo dhi ili nodhi ili nkene omatalelopo taga vulu okuningwa. Mo 1966, omwa tamekwa Osikola yUukalele wUukwaniilwa ya pepalekwa. Omwa li mwa kundathanwa oshipalanyolo “Omatalelopo gUusita oga simana.” Oshike sha li tashi dhana onkandangala moonkundathana ndhoka? Osho kutya mboka taya kwatele komeho momagongalo  “oye na okusila nawa oshigunda shaKalunga oshimpwiyu, ihe oye na wo okusila aanegumbo lyawo oshimpwiyu nokuya muukalele.” Oomvula opo dha piti, opwa kala hapu ningwa oosikola odhindji dhaakuluntugongalo. Omadheulo ngaka ehangano lyaJehova lya kala hali gandja oge eta iizemo yini? Nena momagongalo gopaKriste omu na aamwatate omayovi ya pyokoka taya litha oshigunda.

18. (a) Aakuluntugongalo oye na oshinakugwanithwa shini sha simana? (b) Omolwashike Jehova naJesus ye hole aakuluntugongalo mboka haya longo nuudhiginini?

¹⁸ Aakuluntugongalo oya langekwa po kuJehova okupitila mOmukwaniilwa gwetu Jesus ya longe oshilonga sha simana. Oshilonga shoka oshini? Oshokuwilika oonzi dhaKalunga momasiku ngaka omadhigu mondjokonona ayihe yaantu. (Ef. 4:11, 12; 2 Tim. 3:1) Jehova naJesus oye hole aakuluntugongalo mboka haya longo nuudhiginini, molwashoka ohaya vulika kelombwelo ndyoka tali ti: ‘Kaleni aasita yoshigunda shoka mwe shi pewa kuKalunga, mu shi tonatele nehalo ewanawa, hakethiminiko, ihe onehalo tali zi momwenyo. Kaleni mu shi kuholelwa kegongalo.’ (1 Pet. 5:2, 3) Natu taleni kumbali dhomomikalo ndhoka aakuluntugongalo ye li oshiholelwa koshigunda nankene haya humitha komeho ombili nenyanyu megongalo.

19. Ohatu kala tu uvitile ngiini aakuluntugongalo mboka haya longo pamwe natse muukalele?

¹⁹ Shotango, aakuluntugongalo ohaya longo pamwe niilyo yegongalo. Lukas, omunyoli gwevaangeli, okwa popile kombinga yaJesus a ti: ‘Methimbo lya landula Jesus okwe ende miilando nomomikunda noku uvitha elaka etoye lyOshilongo shaKalunga. Aalongwa ye omulongo nayaali oye ende pamwe naye.’ (Luk. 8:1) Ngaashi naanaa Jesus a longo pamwe naayapostoli ye,  naakuluntugongalo mboka ye li oshiholelwa oshiwanawa kunena, ohaya longo pamwe nooitaali ooyakwawo momapya. Oya koneka kutya ngele oye shi ningi, otashi ka humitha komeho ombepo ombwanawa megongalo. Iilyo yegongalo oyu uvitile ngiini aakuluntugongalo ya tya ngaaka? Jeannine, omumwameme e na omimvo 80 nasha, ota ti: “Ohashi kala ompito ombwanawa yokupopya nomukuluntugongalo noku mu tseya nawa sho tatu longo pamwe momapya.” Steven, omumwatate ngoka e na omimvo 30 nasha, ota ti: “Ohandi kala ndi wete kutya omukuluntugongalo okwa hala okukwathela ndje, uuna ta longo pamwe nangame egumbo negumbo. Ekwatho lya tya ngeyika ohali nyanyudha ndje noonkondo.”

20, 21. Aakuluntugongalo otaya vulu ngiini okuholela omusita gwomeyele lyaJesus? Gandja oshiholelwa. (Tala wo oshimpungu “ Omatalelopo gokoshiwike oge eta iizemo iiwanawa.”)

²⁰ Oshitiyali, ehangano lyaJehova olya dheula aakuluntugongalo ya kale ye na ko nasha naamboka ihaaye ya we kokugongala. (Heb. 12:12) Omolwashike, nongiini aakuluntugongalo ye na okukwathela aantu mbaka ya nkundipala pambepo? Eyele lyaJesus lyonzi ya kana otali tu pe eyamukulo. (Lesha Lukas 15:4-7.) Sho omusita gwomeyele lyaJesus a mono kutya opu na onzi yimwe ya kana, okwa tameke oku yi konga ya fa oyo owala e na. Aakuluntugongalo nena ohaya holele ngiini omusita gwoonzi? Ngaashi naanaa onzi ndjiyaka ya kana ya li yi na ondilo komusita gwoonzi, mboka ihaaye ya we kokugongala oye na natango ondilo kaakuluntugongalo. Inaya tala ko okukonga nokukwathela omuntu ngoka ihee ya we kokugongala sha fa emanopo lyethimbo. Oshikwawo, ngaashi naanaa omusita gwoonzi a “ka konga ndjiyaka ya kana, sigo te yi mono,” aakuluntugongalo nayo ohaya ka konga nokukwathela mboka ya nkundipala pambepo.

²¹ Omusita gwoonzi gwomeyele lyaJesus okwa ningi po shike sho a mono onzi ndjoka ya kana? Okwe yi yambula po ‘e te yi humbata komapepe ge,’ e yi fale koonkwawo. Sha faathana, oohapu oombwanawa dhaakuluntugongalo ohadhi talaleke ngoka a nkundipala pambepo nohadhi mu kwathele a galukile kegongalo. Shika osho sha li sha ningilwa Victor, omumwatate a kala muAfrika, ngoka a li e etha po okuya kokugongala. Ota ti: “Muule woomvula adhihe hetatu moka nda kala nda talala, aakuluntugongalo oya kala taya kambadhala okukwathela ndje.” Oshike unene she mu gumu? Okwa ti: “Esiku limwe, John, omukuluntugongalo ngoka twa li pamwe kOsikola yOkudheula Aakokolindjila, okwi ile a talele ndje po e tu ulukile ndje omathano ngoka twa thanekelwe sho twa li kosikola ndjoka. Oga dhimbulukitha ndje nkene nda li handi kala nda nyanyukwa sho tandi longele Jehova e te tameke okukala nde shi yuulukwa.” Okathimbo okashona konima sho a talelwa po kuJohn, Victor okwa shuna kegongalo. Nena okwa shuna muukokolindjila. Odhoshili kutya aakuluntugongalo ohaye tu kwathele tu kale twa nyanyukwa. —  2 Kor. 1:24. b

22. Uuyuuki nombili ohayi koleke ngiini uukumwe megongalo lyopaKriste? (Tala wo okampungu “ Otwa li twa kumwa shili.”)

²² Ngaashi sha popiwa metetekelo, Jehova okwa hunganeke kutya uuyuuki nombili moshigwana shaKalunga otayi ki indjipala kashona nakashona. (Jes. 60:17) Uukwatya mbuka uyali ohawu tu hanganitha lela momagongalo. Ngiini? Ngele tashi ya puuyuuki, natu dhimbulukwe kutya ‘Kalunga ketu oye awike Kalunga.’ (Deut. 6:4) Oku na owala omusindalandu gumwe ngoka hagu landulwa momagongalo agehe muuyuni. Ano omithikampango dhe dhi na ko nasha naashoka sha puka naashoka shi li mondjila odha faathana “momagongalo agehe gaantu yaKalunga.” (1 Kor. 14:33) Onkee ano egongalo otali ke shi enditha owala nawa, ngele otali tula miilonga omithikampango dhaKalunga. Kombinga yombili, Omukwaniilwa gwetu ina hala owala tu kale tu na ombili megongalo, ihe okwa hala wo tu kale “aakondjeli yombili.” (Mat. 5:9) Onkee ano otu na “okulalakanena aluhe mbyoka tayi tu kaleke tu na ombili nooyakwetu.” Tashi ti, otse tu na okukatuka tango tu kandule po okwaauvathana hoka tashi vulika ku holoke omathimbo gamwe mokati ketu. (Rom. 14:19) Kungeyi, otatu humitha komeho ombili nuukumwe megongalo lyetu. —  Jes. 60:18.

23. Tu li aapiya yaJehova, ohatu nyanyukilwa shike kunena?

²³ MuNovomba 1895 sho Oshungolangelo ya tseyitha kombinga yelangekopo lyaakuluntugongalo, aamwatate mboka taya kwatele komeho oya li wo yu ulike shoka ya halelela. Oya li ya halelela shike? Oya galikana noya li ya halelela elongekidho ndika epe li kwathele oshigwana shaKalunga shi “hanganithwe mbala meitaalo.” Sho tatu tala koomvula dha piti, otwa nyanyukwa noonkondo okumona shoka Jehova a kala ta ningi okupitila mOmukwaniilwa gwetu, e ete po omikalo omipe dhokuwilika oshigwana she, ndhoka dha koleke uukumwe wetu. (Eps. 99:4) Oshizemo: Nena tu li oshigwana shaJehova muuyuni awuhe, otwa nyanyukwa sho tu na ‘ombepo yimwe,’ twa landula “oshinkoti shimwe” notatu longele “Kalunga, ngoka te tu pe ombili,” ‘tu na elalakano limwe alike.’ —  2 Kor. 12:18, OB-1954; Lesha Aafilippi 1:27.