Komuuvithi omukwetu gwUukwaniilwa:

KALA ando wa fa wu iwete wa kuutumba mpoka ho kuutumba shito moshililo moBetele yaBrooklyn ongula yEtitano mu 2 Kotoba 1914 wa tegelela omumwatate C. T. Russell. Ohaluka omweelo gwoshililo ogwe eguluka nomumwatate Russell okwe ya mo. Okwa thikama po manga ngaashi e hole ku ninga e ta popitha ayehe nohamu ta ti: “Mwa lala po amuhe!” Ihe manga inaa ka kuutumba, okwa hakele e ta ningi etseyitho lituntula: “Ethimbo lyAapagani lya hulu po; ethimbo lyaakwaniilwa yawo lyokupangela lya pu ko!” Owa li wa nyanyukwa noonkondo, molwaashoka owa kala nale wa tegelela esiku ndika. Amuhe omwa tameke okuhakela mwa mana mo, sho mu uvu onkundana ndjika yinyanyudha.

Opwa pita oomvula odhindji okuza sho omumwatate Russell a ningile etseyitho ndyoka. Okuza kesiku ndyoka Uukwaniilwa owa tompola  po shike? Owa tompola po lela oshindji. Jehova okwa kala ta yogola nokudheula oshigwana she kashona nakashona ta longitha Uukwaniilwa. Mo 1914, omwaalu gwoshigwana shika ogwa li owala tagu yalulwa, ihe nena ogwa konda poomiliyona heyali netata. Ngoye owa mona mo uuwanawa washike medheulo ndyoka?

Ohatu uvu olundji aamwatate taya ti, “etemba lyaJehova nenge ehangano lyaJehova otali pula komeho.” Lyo otali pula tuu komeho shili. Ihe sho to lesha embo ndika nuukeka oto ka mona kutya etemba lyaJehova nenge ehangano lye megulu olya kala tali endelele, unene tuu okuza mo 1914. Aauvithi yUukwaniilwa oya kala taya longitha omikalo dhi ili nodhi ili, opo ya taandelithe onkundana ombwanawa muuyuni awuhe. Oya longitha iinima ngaashi: iifokundaneki, omapulakata, omathano, uukalata wokugandja uunzapo, oongalamathona, oradio nointaneta nokuli.

Molwaashoka Jehova ota yambeke iilonga yetu, iinyolomwa yOmbiimbeli otayi nyanyangidhwa ngashingeyi momalaka ge vulithe 670, nakehe gumwe ota vulu oku yi pewa oshali. Aaiyambi ohaya kwathele okutunga Iinyanga yUukwaniilwa, Iinyanga yIigongi niitayimbelewa momavi omayamba nomwaangoka ga hepa. Nongele pwa holoka oshiponga, aamwatate naamwameme ohaya tondoka onkugo yaamboka ya adhika koshiponga, naashika ohashi ulike kutya yo ‘aamwayina ya valwa, ya kwathe moluhepo.’ —  Omayel. 17:17.

Omathimbo gamwe opo aasita naatondi yetu ye tu hepeke, ohaya ningi “ehangano naapanguli aadhudhu,” ihe ohashi koleke eitaalo lyetu okumona nkene oonkambadhala dhawo hadhi ponyo ethimbo kehe nohadhi kwathele nokuli “mokutaandelitha evaangeli.” —  Eps. 94:20; Fil. 1:12.

Oshi li uuthembahenda okulonga pamwe nane, oshoka atuheni “aamati” nenge aapiya yaJesus, omukwaniilwa gwetu. Otwa hala oku mu lombwela kutya otu mu hole noonkondo. Otatu galikana opo uuyelele mboka wu li membo ndika wu mu kwathele mu kale mwa lenga uuthiga weni wopambepo shi vulithe nale. —  Mat. 24:45.

Otatu mu kundile po

Aamwaho

Olutuwiliki lwOonzapo dhaJehova