1, 2. Jehova okwe ende ta holola ngiini elalakano lye li na ko nasha naantu?

 AAVALI aanahole ohaya kundathana noyana kombinga yiinima yomegumbo. Ihe ohaya tala kutya iinima yini taye ke ya lombwela nohaye ya lombwele owala iinima mbyoka taya vulu okuuva ko pethimbo mpoka.

² Sha faathana, Jehova okwe ende ta holola elalakano lye li na ko nasha naantu kashona nakashona. Ihe ohe shi ningi owala pethimbo lyo opala. Natu taleni nkene Jehova a kala ta holola oshili kombinga yUukwaniilwa monakuziwa.

3, 4. Mbela Jehova okwa kala e shi nale kutya onakuyiwa yaantu otayi ka kala ya tya ngiini? Shi yelitha.

³ Petameko Jehova ka li e na elalakano lyokudhika po Uukwaniilwa wopaMesiasa. Omolwashike mbela? Omolwashoka aantu okwe ya shiti ye na emanguluko lyokuninga omatokolo, noka li e shi nale kutya onakuyiwa yaantu otayi ka kala ya tya ngiini. Nomolwashono a lombwele Adam naEva elalakano lye li na sha naantu a ti: “Valathaneni, ne mu indjipale nokuudha evi alihe. Li tuleni mepangelo lyeni.” (Gen. 1:28) Jehova okwa li wo a hala ya kale haya vulika koompango dhe dhi na ko nasha nokulonga uuwanawa nuuwinayi. (Gen. 2:16, 17) Adam naEva oya li taya vulu okukala aadhiginini kuKalunga. Andola yo noyana oya vulikile, ando inatu pumbwa Uukwaniilwa wopaMesiasa wu gwanithe po elalakano lyaKalunga. Ando ngashingeyi evi olyu udha aantu ya gwanenena taya longele Jehova.

⁴ Uunashipotha waSatana nowaAdam naEva inawu ningitha Jehova e ethe po elalakano lye lyokuudhitha evi naantu ya gwanenena. Pehala lyaashono, Jehova okwa lundulula owala omukalo gwe gwoku li gwanitha po. Elalakano lye inali fa eshina lyokolutenda ndyoka li na okweenda owala kolutenda, opo li ka thike hoka lyu uka, noihali yiwa moshipala. Ngele Jehova okwa popi shoka ta ka ninga, kapu na sha tashi vulu oku mu keelela kee shi gwanithe po. (Lesha Jesaja 55:11.) Ngele oshinima shontumba osha yi moshipala omukalo ngoka ta longitha okugwanitha po elalakano lye, oha vulu okulongitha  omukalo gulwe. a (Eks. 3:14, 15) Ngele oku wete tashi opalele, oha tseyithile aapiya ye aadhiginini omukalo ngoka omupe ta ka longitha oku li gwanitha po.

5. Jehova okwa li a ningi po shike okuza sho muEden mwa tukuka oshipotha?

⁵ Konima sho moshikunino shaEden mwa tukuka oshipotha, Jehova okwa tokola okudhika po Uukwaniilwa. (Mat. 25:34) Pethimbo mpoka Jehova okwa li a tseyithile aantu omukalo ngoka ta ka longitha okugalulila aantu megwaneneno nokukombolola po iilanduliko mbyoka ye etwa po kuSatana. (Gen. 3:14-19) Ihe Jehova ina gandja uuyelele awuhe kombinga yUukwaniilwa pethimbo limwe.

6. Jehova okwa li u uvaneke shike, ihe oshike a li inaa holola?

⁶ Mehunganeko ndyoka lyahunganekwa tango mOmbiimbeli, Jehova oku uvaneke kutya “oluvalo” olwa li talu ka nyanyula omutse gweyoka. (Lesha Genesis 3:15.) Ihe pethimbo mpoka Jehova ina holola kutya oluvalo lwomukiintu nenge lweyoka olye. Nokuli okwa ka holola owala oshindji kombinga yoluvalo ndoka konima yoomvula 2 000. b

7. Omolwashike Jehova a hogolola Abraham, noshiilongomwa shini sha simana tatu ilongo mwaashika?

⁷ Konima Jehova okwa hogolola Abraham opo oluvalo ndoka lu uvanekwa lu ka ze mezimo lye. Jehova okwa hogolola Abraham oshoka ‘okwa vulika kelombwelo lye.’ (Gen. 22:18) Mpaka otatu ilongo oshiilongomwa sha simana kutya Jehova oha hololele owala mboka haa vulika kuye elalakano lye. — Lesha Episalomi 25:14.

8, 9. Jehova okwa li a hololele Abraham naJakob shike shi na sha noluvalo ndoka lu uvanekwa?

⁸ Jehova okwa li a holola lwotango oshinima sha simana kombinga yoluvalo, sho a popi nakuume ke Abraham okupitila momuyengeli kutya oluvalo otalu ka kala omuntu. (Gen. 22:15-17; Jak. 2:23) Ihe mbela omuntu nguka okwa li ta ka nyanyula ngiini omutse gweyoka? Eyoka olya li tali thaneke lye? Omapulo ngaka oga li taga ka yamukulwa monakuyiwa.

⁹ Jehova okwa holola kutya oluvalo nduka otalu ka za momutekulu gwaAbraham, Jakob, omulumentu ngoka a li e na eitaalo lya kola muKalunga. (Gen. 28:13-22) Jehova okwa hololele Jakob kutya oluvalo ndoka lu uvanekwa otalu ka za momwana, Juda. Jakob okwa li a hunganeke kutya omutekulu gwaJuda ota ka pewa “ondhimbo yuukwaniilwa,” ndjoka tayi thaneke oonkondopangelo, nonokutya ‘iigwana otayi ka vulika kuye.’ (Gen. 49:1, 10) Okupitila moohapu ndhika Jehova okwa li u ulike kutya ngoka u uvanekwa ota ka ninga omuleli nenge omukwaniilwa.

10, 11. Omolwashike Jehova a hololele David naDaniel elalakano lye?

¹⁰ Konima yoomvula 650 lwaampono, Jehova okwa hololele omukwaniilwa David, ngoka a za moluvalo lwaJuda, oshindji kombinga yelalakano lye. Jehova okwa popi David kutya ye “omulumentu e mu opalela.” (1 Sam. 13:14; 17:12; Iil. 13:22) Molwashoka David okwa li ha tila Jehova, Jehova okwa  ningi euvathano naye, opo moluvalo lwe mu ka ze ngoka ta ka pangela sigo aluhe. —  2 Sam. 7:8, 12-16.

¹¹ Konima yoomvula 500 lwaampono, okupitila momupolofeti Daniel, Jehova okwa holola omvula yokondandalunde moka omugwayekwa nenge Mesiasa te ke ya kombanda yevi. (Dan. 9:25) Jehova okwa ti wo kutya ‘oku hole’ Daniel. Omolwashike? Omolwashoka Daniel okwa li he mu simaneke nohe mu longele nuudhiginini. —  Dan. 6:16; 9:22, 23.

12. Daniel okwa lombwelwa a ninge shike, nomolwashike?

¹² Nonando Jehova okwa longitha aapolofeti ngaashi Daniel okunyola oshindji kombinga yoluvalo lwu uvanekwa, ano Mesiasa, kalya li natango ethimbo lye lyokuyelithila aapiya ye shoka e ya nwetha mo ya nyole. Pashiholelwa, konima sho Daniel a mono emoniko li na sha nokudhikwa po kUukwaniilwa waKalunga, okwa li a lombwelwa a siikile embo sigo opeuthwathimbo lyaJehova. Pethimbo ndyoka ontseyo yashili oya li ‘tayi ka indjipala.’ —  Dan. 12:4.

13. (a) Olye oluvalo ndoka lwu uvanekwa? (b) Jesus okwa gandja uuyelele wuni kombinga yehunganeko ndyoka li li muGenesis 3:15?

¹³ Jehova okwa holola kutya Jesus oye oluvalo ndoka lwu uvanekwa, omwana gwaDavid ngoka a li ta ka ninga Omukwaniilwa. (Luk. 1:30-33; 3:21, 22) Sho Jesus a tameke okuuvitha, elalakano lyaKalunga olya li lye ende tali yelele aantu lya fa eluwa tali tende. (Mat. 4:13-17) Pashiholelwa, sho Jesus a popi kutya Ondiapoli oyo ‘omudhipagi nahe yiifundja ayihe’ okwa li ta yelitha kutya “eyoka” ndyoka lya popiwa muGenesis 3:14, 15 oSatana. (Joh. 8:44) Memoniko ndyoka Jesus u ulukile Johannes, Jesus okwa popi kutya ‘oshikoko oshinene osho eyoka ekulu ndyoka hali ithanwa omuhindadhi nenge Satana.’ c (Lesha Ehololo 1:1; 12:9.) Memoniko omo tuu moka Jesus, oluvalo ndoka lwu uvanekwa, okwa li u ulike nkene ta ka hanagula po Satana metsokumwe nehunganeko ndyoka lya popilwe moshikunino shaEden. —  Eh. 20:7-10.

14-16. Mbela aalongwa yaJesus yomethelemumvo lyotango oya kala ngaa aluhe yu uvite ko oshili ndjoka Jesus a holola? Shi yelitha.

¹⁴ Ngaashi twe shi mono mOntopolwa 1 yembo ndika, Jesus okwa li a popi oshindji kombinga yUukwaniilwa. Ihe kali aluhe a lombwele aalongwa ye ashihe shoka ya li ya hala okutseya. Nonando okwa li e ya pe uuyelele wokondandalunde, oya li owala ye wu uvu ko konima yethimbo ele, omathimbo gamwe okonima yoomvula omathele. Natu taleni kiiholelwa yontumba.

¹⁵ Mo 33 E.N., Jesus okwa li a yelitha kutya mboka taya ka pangela pamwe nOmukwaniilwa gwUukwaniilwa waKalunga, otaya ka za kombanda yevi e taya yi megulu ye li iishitwa yopambepo. Ihe petameko aalongwa ye kaya li yu uvite ko oshinima shika. (Dan. 7:18; Joh. 14:2-5) Momumvo ogwo tuu ngoka, Jesus okwa longitha omayele u ulike kutya Uukwaniilwa  itawu ka dhikwa po nziya konima ngele a yi megulu. (Mat. 25:14, 19; Luk. 19:11, 12) Aalongwa ye kaya li yu uvite ko oshinima shika sha simana, shaashi konima sho Jesus a yumuka oye mu pula ya ti: “Uunake ano to ka pa Aaisraeli Oshilongo” nenge Uukwaniilwa? Ihe pethimbo mpoka Jesus okwa tokola kee ya pe we uuyelele wa gwedhwa po. (Iil. 1:6, 7) Jesus okwa li wo a longo aantu kutya opu na ‘oonzi dhilwe’ ndhoka inaadhi kwatelwa mo ‘moshigunda oshishona’ shaapangeli pamwe naye. (Joh. 10:16; Luk. 12:32) Aalanduli yaKristus oya li yu uvu ko owala kutya oongundu ndhoka otadhi thaneke oolye konima sho Uukwaniilwa wa ka dhikwa po mo 1914.

¹⁶ Sho Jesus a li kombanda yevi okwa li e na oshindji okulombwela aalongwa ye, ihe okwa li e shi shi kutya kaya li taye ke shi uva ko. (Joh. 16:12) Kapu na omalimbililo kutya ontseyo oyindji kombinga yUukwaniilwa oya li ya hololwa methelemumvo lyotango. Ihe oshili kaya li natango yi indjipala pethimbo mpoka.

17. Otu na okuninga shike opo tu uve ko oshili yOmbiimbeli, ihe otwa pumbwa wo shike?

¹⁷ Jehova oku uvanekele Daniel kutya ‘pehulilo lyuuyuni’ embo ndyoka a nyola, aantu oyendji otaye ke li ‘konakona nontseyo yashili’ kombinga yelalakano lyaKalunga otayi ki indjipala. (Dan. 12:4) Mboka ya hala okumona ontseyo ndjoka oye na okulonga nuudhiginini. Embo limwe olya ti kutya oshityalonga shOshihebeli shoka sha tolokwa “konakona” otashi gandja edhiladhilo lyomuntu ta konakona embo nuukeka. Ihe nando otu konakone Ombiimbeli twa mana mo, itatu vulu okuuva ko oshili kombinga yUukwaniilwa, ngele Jehova ine tu kwathela tu yi uve ko. —  Lesha Mateus 13:11.

18. Mboka haya tila Jehova oya li yu ulike ngiini eitaalo neifupipiko?

¹⁸ Ngaashi naanaa Jehova e endele ta holola oshili kombinga yUukwaniilwa moomvula dha tetekele 1914, onkee ngaa  ta tsikile oku yi holola momasiku ngaka gahugunina. Oshigwana shaKalunga osha kala nokulundulula euvoko lyasho uule woomvula 100, ngaashi Ontopolwa 4 no 5 yembo ndika tayi ku ulika. Mbela shika otashi ti kutya Jehova ite shi yambidhidha? Hasho nando. Ote shi yambidhidha. Omolwashike tatu tile ngaaka? Omolwashoka mboka haya tila Jehova oye na uukwatya uyali mboka e hole: eitaalo neifupipiko. (Heb. 11:6; Jak. 4:6) Aapiya yaJehova oyi itaala kutya omauvaneko agehe ngoka ga popiwa mOohapu dhe otaga ka gwanithwa. Ohaya ulike eifupipiko sho haya zimine kutya kaya li yu uvite ko nawa nkene omauvaneko ngoka taga ka gwanithwa po. Eifupipiko ndyoka oli iwetikile mOshungolangelo ye 1 Maalitsa 1925, ndjoka ya tile: “Otu shi kutya Omuwa oye mwene ta fatululile aantu Ohapu ye momukalo gwe omwaanawa nopethimbo lye lyo opala.”

19. Ngashingeyi Jehova okwe tu kwathela tu uve ko shike, nomolwashike?

¹⁹ Sho Uukwaniilwa wa dhikwa po mo 1914, oshigwana shaKalunga osha li shi na owala ontseyo onshona kombinga yegwanithopo lyomahunganeko ge na sha nUukwaniilwa. (1 Kor. 13:9, 10, 12) Molwashoka otu na uulaadhi wokumona omauvaneko gaKalunga taga gwanithwa po, omathimbo gamwe otwa thiki pehulithodhiladhilo lya puka. Mokweendela ko kwethimbo, otwa li twa mono uushili womayele galwe ngoka ga holokele mOshungolangelo ndjoka ya popiwa mokatendo ka zi ko. Oya tile: “Otwa fa tu na oku shi tala ko ngeyi kutya omahunganeko itaga vulu okuuviwa ko sigo ga gwanithwa po nenge sho taga gwanithwa po.” Ngashingeyi sho tu li pethimbo lyehulilo, omahunganeko ogendji kombinga yUukwaniilwa oga gwanithwa notaga tsikile okugwanithwa. Molwashoka oshigwana shaKalunga oshi ifupipika nohashi taamba ko epukululo, Jehova okwe shi kwathela shi uve ko omalalakano ge. Ngashingeyi ontseyo yashili oyi indjipala!

20, 21. Elunduluko meuvoko olya li lya gumu Aakriste yomethelemumvo lyotango momukalo guni?

²⁰ Sho Jehova te tu yelithile oshili kombinga yOmbiimbeli, ohashi tu kwathele tu konakone omitima dhetu. Mbela otatu ka kala ngaa tu na eitaalo neifupipiko tu taambe ko omalunduluko ngoka taga ningwa? Aakriste mboka ya li ko methelemumvo lyotango oya li ya taalela eyeleko ndyoka. Pashiholelwa, dhiladhila ando owa li Omukriste Omujuda pethimbo ndyoka. Owa simaneka noonkondo ompango yaMoses nowi iyuvitile uuntsa sho wu li Omuisraeli. Natu tye ando egongalo lyeni olya yakula ontumwafo ya za kuPaulus tayi popi kutya Ompango kayi na we ongushu yasha notayi popi wo kutya Jehova okwe ekelahi oshigwana shaIsraeli nota gongele oshigwana shaIsraeli shopambepo shoka sha thikama po mAajuda nomaapagani. (Rom. 10:12; 11:17-24; Gal. 6:15, 16; Kol. 2:13, 14) Ando owi inyenge ngiini?

²¹ Aakriste aaifupipiki oya taamba ko omayele gaPaulus ga nwethwa mo, Jehova nokwe ya yambeke. (Iil. 13:48) Ihe yamwe oya tindi omalunduluko ngoka e tayi inekele moondunge dhawo yene. (Gal. 5:7-12) Ngele aantu mboka inaya ka lundulula iikala yawo, osha yela kutya oya li ya hunutha ompito yokupangela pamwe naKristus. —  2 Pet. 2:1.

22. Omalunduluko meuvoko kombinga yelalakano lyaKalunga oge ku inyengitha ngiini?

²² Jehova okwa kala noku tu kwathela tu uve ko nawa Uukwaniilwa we moomvula opo dha piti. Pashiholelwa, okwe tu kwathele tu uve ko kutya aalelwa yUukwaniilwa otaya ka yoololwa mo uunake mwaamboka inaaya hala okupulakena, ngaashi oonzi tadhi yoololwa miikombo. Okwe tu yelithile wo kutya omwaalu gwaantu 144 000 otagu ka gwanithwa po uunake nonokutya omayele ngoka Jesus a popi kombinga yUukwaniilwa otaga ti shike, nosho wo kutya omugwayekwa gwahugunina ota ka pewa ondjambi ye uunake megulu. d Omalunduluko ngaka ohage ku inyengitha ngiini? Mbela oga koleka ngaa eitaalo lyoye? Oge ku kwathela ngaa wu mone kutya Jehova ota nongeke oshigwana she oshiifupipiki? Oontopolwa ndhoka tadhi landula ko otadhi ke ku kwathela wu koleke ishewe eitaalo lyoye kutya Jehova natango ote ende ta hololele mboka haye mu tila elalakano lye.