KAaroma 1:1-32
1 Ongame Paulus, omupiya gwaKristus Jesus, nda ithanwa, ndi ninge omuyapostoli, nondi uvithe onkundana ombwanawa yaKalunga,
2 ndjoka Kalunga a kala a uvaneka komeho yethimbo, okupitila maahunganeki ye mOmanyolo omayapuki,
3 yi na ko nasha nOmwana, ngoka a za moluvalo* lwaDavid panyama,
4 ihe okwa yumudhwa kuusi okupitila moonkondo dhombepo ondjapuki, naashoka osha ulike kutya ye Omuna gwaKalunga. Eeno, nguka oJesus Kristus, Omuwa gwetu.
5 Okupitila muye, otwa silwa ohenda, notwa langekwa po tu li aayapostoli, opo aantu yomiigwana ayihe ya ulike eitaalo muye, ya vulike kuye, noya simaneke edhina lye
6 mokati kiigwana, moka nane wo mwa ithanwa mo, mú ninge yaJesus Kristus—
7 Otandi mú nyolele amuhe, mboka mú li muRoma, mboka mwa hokiwa kuKalunga, nomwa hogololwa, mú kale aayapuki:
Kalunga, Tate yetu, nOmuwa Jesus Kristus, naye mú sile ohenda, nombili yawo nayi kale pamwe nane.
8 Komeho gaayihe, ohandi pandula Kalunga kandje okupitila muJesus Kristus omolweni amuhe, molwaashoka eitaalo lyeni otali popiwa kehe pamwe muuyuni.
9 Oshoka Kalunga, ngoka handi longele iilonga iiyapuki nomutima gwandje aguhe,* mokutaandelitha onkundana ombwanawa kombinga yOmwana, oku li ombangi yandje kutya ohandi mú tumbula aluhe momagalikano gandje,
10 tandi mu indile, ngele otashi wapa, nongele oshi li ehalo lye, ndi vule okuya kune.
11 Oshoka onda halelela oku mú mona, opo ndi mú pe omagano ga za kuKalunga, ge mú kwathele, mú kale mú na eitaalo lya kola;
12 nenge ndi tye, opo tu vule okutsaathana omukumo okupitila meitaalo lyeni nolyandje.
13 Ihe onda hala mú tseye kutya onda kambadhala okuya kune iikando oyindji, opo ndi likole wo yamwe mokati keni, ngaashi nda ningi mokati kiigwana yilwe, ihe opwa kala pu na omaimbo.
14 Ondi na ongunga kAagreka nokaakwiilongo,* kaanandunge nokwaamboka kaaye na oondunge.
15 Onkee ano nane mboka mú li muRoma, onda halelela oku mú uvithila onkundana ombwanawa.
16 Oshoka ngame inandi sa ohoni onkundana ombwanawa; oshoka Kalunga oyo ta longitha, a hupithe kehe ngoka ta ulike kutya oku na eitaalo. Tango, ota tameke nAajuda, taku landula Aagreka.
17 Oshoka okupitila monkundana ombwanawa, uuyuuki waKalunga otawu hololelwa mboka taya ulike kutya oye na eitaalo, naashono ohashi koleke eitaalo lyawo, ngaashi kwa nyolwa taku ti: “Omuyuuki ota kala nomwenyo omolweitaalo.”
18 Oshoka ondjahi yaKalunga otayi hololelwa aakaanakalunga naakaanuuyuuki, okuza megulu, mboka taya imbi aantu kaaya tseye oshili.
19 Oya ulukilwa sha yela shoka ye na okutseya kombinga yaKalunga; Kalunga okwe shi ya hololela sha yela.
20 Okuza sho Kalunga a shiti uuyuni, nonando iha monika, okwa holola puuyelele omaukwatya ge okupitila miinima, mbyoka a shita, nokuli noonkondo dhe dhaaluhe nuukalunga we. Onkee ano aantu itaya vulu okwiipopila.
21 Nonando oya tseya Kalunga, inaye mu simaneka e li Kalunga, nenge ye mu pandule, oshoka itaya dhiladhila iinima yi na oshilonga, nomitima dhawo odha udha omilema.
22 Nonando otaya ti kutya yo aanandunge, oya ningi omagoya,
23 nopehala lyokusimaneka Kalunga, ngoka ihaa si, oya simaneke oshiyelekela shomuntu, ngoka ha si, oshiyelekela shoondhila, shiinamwenyo yomagulu gane nosho wo shaambyoka hayi ipwedha.
24 Onkee ano Kalunga okwe ya etha ya gwanithe po omahalo ga nyata gomomitima dhawo, nokungawo ohaya ningi iinima tayi sitha ohoni omalutu gawo.
25 Oya pingakanitha oshili yaKalunga niifundja, noya simaneke* nokulongela eshito iilonga iiyapuki, pehala lyOmushiti, ngoka e na okusimanekwa sigo aluhe. Amen;
26 nomolwaashono, Kalunga e ya ethele muuhalu wawo wopamilalo tawu sitha ohoni. Aakiintu yawo oya lundulula omukalo gwopaunshitwe gwokukalathana nomulumentu.
27 Sha faathana, aalumentu nayo oya etha omukalo gwopaunshitwe gwokukalathana nomukiintu, noya iyethele momahalo gokuya momilalo naalumentu ooyakwawo. Onkee ano otaya ka mona egeelo lya ihwa po, ndyoka ya ilongela, omolwiilonga yawo iiwinayi.
28 Ngaashi owala ye wete inaashi simana okutaamba ko Kalunga,* naye okwe ya etha wo ya kale nomadhiladhilo gawo guugoya, nokulonga iihuna.
29 Aantu ya tya ngawo oya udhilila uugoyoki woludhi kehe, uukolokoshi, olwiho, uuwinayi, ya udha efupa, edhipago, oontamanana, iifundja, uutondwe, oluhoko,
30 ondjego, uutondwe wokutonda Kalunga, ondhino, uuntsa, okwiitanga, okupangela oompangela oombwinayi,* okwaavulika kaakuluntu,
31 okwaanontseyo, okwaadhiginina omauvathano, okwaanohole nokwaanohenda.
32 Nonando aantu mboka oye shi thiluthilu iipango yaKalunga, ano ye shi kutya mboka haya longo iilonga ya tya ngaaka oya ilongela eso, ihaya tsikile owala oku yi longa, ihe ohaya ambidhidha wo mboka haye yi longo.
Omanyolo gopevi
^ Nenge “mombuto.”
^ Eln., “nombepo yandje.”
^ Nenge “nokwaamboka kaaye shi Aagreka.” Eln., “kAababali.”
^ Nenge “galikana.”
^ Nenge “ya dhina ontseyo yashili yokutseya Kalunga.”
^ Nenge “aatoti yuuwinayi.”
