KAaroma 10:1-21
10 Aamwatate, onda hala nohandi galikana kuKalunga nomutima aguhe, Aaisraeli ya hupithwe.
2 Oshoka onda mona kutya oye na uulaadhi wokulongela Kalunga, ihe ihaye mu longele sha ikolelela kontseyo yashili.
3 Molwaashoka inaya tseya uuyuuki waKalunga, ohaya tokola kuyo yene shoka sha uka, nokungawo, ihaya longo shoka sha uka koshipala shaKalunga.
4 Oshoka Ompango oya hulile muKristus, opo kehe ngoka ta ulike kutya oku na eitaalo muye a kale omuyuuki.
5 Oshoka Moses okwa nyola kombinga yuuyuuki, mboka wu li mOmpango, a ti: “Omuntu ngoka ta longo iinima mbika ota kala nomwenyo omolwayo.”
6 Ihe kombinga yuuyuuki, mboka hawu zi mokuulika eitaalo, okwa tiwa: “Ino ipopila momwenyo gwoye to ti: ‘Olye ta londo, a ye megulu?’ sha hala okutya, a ka ete Kristus,
7 nenge ‘Olye ta kulukile molumbogo? sha hala okutya, a ka tale mo Kristus muusi.”
8 Ihe oohapu dhaKalunga otadhi ti ngiini? Otadhi ti: “Ohapu oyi li popepi nangoye, mokana koye nomomutima gwoye,” sha hala okutya, “ohapu” yeitaalo, ndjoka tatu uvitha.
9 Oshoka ngele owa tseyitha montaneho nokana koye kutya Jesus oye Omuwa, nowa itaala momutima gwoye kutya Kalunga okwe mu yumudha kuusi, oto ka hupithwa.
10 Oshoka opo omuntu a kale omuyuuki oku na okukala e na eitaalo momutima gwe, ihe opo a hupithwe, oku na oku shi hempulula montaneho nokana ke.
11 Oshoka omanyolo otaga ti: “Kapu na nando ogumwe, ngoka e na eitaalo muye, ta ka yematekwa.”
12 Oshoka kapu na nando eyooloko pokati kOmujuda nOmugreka. Ayehe oye na Omuwa gumwe, ngoka ha yambeke* ayehe mboka taye mu ithana.
13 Oshoka “kehe ngoka ta ithana edhina Jehova ota ka hupithwa.”
14 Ihe otaye mu ithana ngiini, ngele inaye mu itaala? Ongiini taya vulu okukala ye na eitaalo muye, ngele inaya uva sha kombinga ye? Shimwe ishewe, otaya uvu ngiini kombinga ye, ngele kapu na ngoka te ya uvithile?
15 Yo otaya vulu ngiini okuuvitha, ngele inaya tumwa ya ka uvithe? Ngaashi owala kwa nyolwa taku ti: “Oompadhi dhaamboka taya uvitha onkundana ombwanawa yi na ko nasha niinima iiwanawa inadhi opala tuu!”
16 Ihe haayehe ya taamba ko onkundana ombwanawa. Oshoka Jesaja ota ti: “Jehova, olye a itaale shoka a uva kutse?”*
17 Onkee ano omuntu oha itaale shoka a uva. Shimwe ishewe, omuntu oha uvu owala kombinga yaKristus, uuna a uvithilwa kugumwe.
18 Ihe otandi pula, Mbela inaya uva etumwalaka ndyoka? Oye li uva. “Etumwalaka ndyoka olya uvika kombanda yevi alihe, nokuli nokwaamboka haya zi komahala gokokule.”
19 Ihe otandi pula wo kutya, yo Aaisraeli inaye shi tseya? Tango, Moses okwa popi a ti: “Otandi mu ningitha mu tsile ondumbo aantu yomiigwana; otandi mu geyitha okupitila moshigwana shaa na oondunge.”
20 Ihe Jesaja okwa popi nuulaadhi ta ti: “Onda monika kwaamboka kaaya li taya kongo ndje; onda tseyika kumboka kaaya li taya pula ndje.”
21 Ihe okwa popi kombinga yaIsraeli a ti: “Esiku kehe, ohandi hiya aantu, mboka ihaaya vulika, noya tangalala, ya galukile kungame.”
