KAaroma 11:1-36
11 Onkee ano otandi pula: Mbela Kalunga okwa ekelahi oshigwana she? Hasho nando! Oshoka nangame wo Omuisraeli, oluvalo* lwaAbraham, nda za mezimo lyaBenjamin.
2 Kalunga ina ekelahi oshigwana she, shoka a hogolola tango. Mbela kamu shi shoka omanyolo taga ti shi na ko nasha naElia, sho a li a galikana kuKalunga a yemata kombinga yaIsraeli ta ti:
3 “Jehova, oya dhipaga aahunganeki yoye, oya hanagula po iiyambelo yoye, na ongame awike nda hupa po, nongashingeyi otaya kambadhala okudhipaga ndje.”
4 Ihe Kalunga okwe mu yamukula ta ti ngiini? Okwa ti: “Onda ihupithila po aalumentu 7 000, mboka inaaya tsila oongolo Baal.”
5 Onkee ano osho wo shi li ngaaka nongashingeyi, opu na owala omwaalu omushona gwa hogololwa omolwuuwanawahenda waKalunga.
6 Ihe ngashingeyi, ngele okwe ya ulukile uuwanawahenda, kashi shi we molwiilonga, molwaashoka andola okwa li e ya hogolola omolwiilonga, ando uuwanawahenda mboka e ya ulukila kawu shi we uuwanawahenda.
7 Natu tye nduno shike? Shoka Israeli a li ta kongo a mana mo ine shi mona, ihe osha monika kwaamboka ya hogololwa. Yalwe oya tindi okupulakena,
8 ngaashi owala kwa nyolwa taku ti: “Kalunga okwe ya pe ombepo yoomposi oondhigu, omeho, ngoka kaage wete ko, nomakutsi ngoka kaage uvite ko, sigo okesiku ndika.”
9 David naye okwa ti: “Omatelekela* gawo naga ninge omwigo gwoku ya yula nosho wo epundukitho negeelo lyawo.
10 Omeho gawo naga kwidhidhikwe, opo kaaya mone ko, nokuningitha onkalamwenyo yawo yi kale aluhe ondhigu.”*
11 Onkee ano otandi pula: Mbela oya punduka e taya gu thiluthilu? Hasho nando! Ihe oonkatu dhawo dha puka odha etele aantu yomiigwana ehupitho, noshinima shoka oshe ya ningitha ye ya tsile ondumbo.
12 Ihe ngele oonkatu dhawo dha puka odha etele uuyuni omayambeko, nongele okushonopala kwawo okwa etela aantu yomiigwana omayambeko, andola omwaalu gwawo ogwa li gwa ihwa po, ando omayambeko gawo kage shi tuu ogendji noonkondo!
13 Ngashingeyi, otandi popi nane, ne, aantu yomiigwana. Molwaashoka ondi li omuyapostoli a tuminwa kiigwana, onda lenga* noonkondo iilonga yandje yokuuvitha,
14 opo ndi tale ngele otandi vulu okuningitha aantu yomoshigwana shetu* ye mú tsile ondumbo, nondi hupithe yamwe yomuyo.
15 Oshoka ngele okweekelwahi kwawo otaku ningitha uuyuni wu hanganithwe naKalunga, mbela onkalo yawo otayi ka kala ya tya ngiini, ngele okwe ya taamba ko? Otaya ka kala ya fa ya yumudhwa kuusi.
16 Shimwe ishewe, ngele oshitopolwa shimwe, shoka wa kutha mondombo, shoka sha gandjwa shi li iiyimati yotango, oshiyapuki, nena ondombo ayihe ondjapuki wo; nongele omidhi omiyapuki, niitayi iiyapuki wo.
17 Nokuli ngele iitayi yimwe oya teywa ko e to tsikinikwa mokati kiitayi, mbyoka ya thigala ko, nonando ngoye owu li omuti gwomuholivi gwomiihwa, e to mono mo uuwanawa momidhi dhomuholivi ngoka gwomoshikunino,
18 ino dhina iitayi mbyoka. Ihe ngele owe yi dhini, dhimbulukwa kutya hangoye wa humbata omidhi, ihe omidhi odho dhe ku humbata.
19 Opo nduno oto ka tya: “Iitayi oya teywa ko, opo ndi vule okutsikinikwa ko.”
20 Shoka oshoshili. Oshoka omolwokwaaneitaalo kwayo, oya teywa ko, ihe ngoye owu li ko omolweitaalo. Onkene ino kala wu na uuntsa, ihe kala wa tila.
21 Oshoka ngele Kalunga ina hupitha iitayi yomuholivi gwo gwene,* nangoye wo ite ku hupitha.
22 Onkee ano kaleni mú shi shi kutya Kalunga oha sile ohenda, noha vulu okugeela. Iitayi, mbyoka ya gwa ko, otayi ka geelwa, ihe ngoye oto ka silwa ohenda kuKalunga, shampa owala to tsikile okukala mohenda ye; ihe ngele hasho wa ningi, nangoye oto ka pomponwa* ko.
23 Shimwe ishewe, ngele oya etha okwaaneitaalo kwayo, otayi ka tsikinikwa ko, oshoka Kalunga ota vulu oku yi tsikinika ko ishewe.
24 Oshoka ngele ngoye owa tetelwe komuti gwomuholivi gwomiihwa, e to tsikinikwa komuti gwomuholivi gwomoshikunino, mbela itashi ka kala tuu oshipu kiitayi yomuholivi gwo gwene* yi tsikinikwe komuti gwomuholivi, hoka ya zile!
25 Aamwatate, inandi hala mú kale inaamu tseya oshiholekwa shika oshiyapuki, opo kaamu kale mwa itala ko aanandunge momeho geni yene. Kombinga yimwe, Israeli ota ka kukutika omutima gwe, sigo oosho omwaalu gwaantu yomiigwana, mboka ya hogololwa kuKalunga, gwa gwana,
26 nokungawo, Israeli ashihe otashi ka hupithwa. Ngaashi owala kwa nyolwa taku ti: “Omuhupithi ota ka za muSion, nota ka kwathela oluvalo lwaJakob lu ethe po iilonga iiwinayi,
27 naandika olyo ehangano nda ninga nayo, sho nda dhimi po oondjo dhawo.”
28 Odhoshili kutya oye* li aatondi yonkundana ombwanawa, noshe mú etela uuwanawa; ihe Kalunga okwe ya hogolola, noku ya hole omolwoohekulululwa.
29 Oshoka Kalunga ita ka ipa uusama omolwomagano, ngoka a gandja, naasho a hogolola yamwe.
30 Oshoka ngaashi owala ne mwa li ihaamu vulika kuKalunga, ihe ngashingeyi, omwa silwa ohenda omolwokwaavulika kwawo.
31 Onkee ano okwe mú sile wo ohenda omolwokwaavulika kwAajuda, naashono otashi ke mu ningitha wo a sile ohenda Aajuda.
32 Oshoka Kalunga okwe ya etha ayehe ya kale muupika wokwaavulika, opo e ya sile ohenda ayehe.
33 Uuyamba waKalunga, uunongo nontseyo oyi thike peni! Kapu na ngoka ta vulu okuuva ko omatokolo ge noondjila dhe.
34 Oshoka “olye ta vulu okutseya omadhiladhilo gaJehova, nenge olye ta vulu okuninga omugandjimayele gwe?”
35 Nenge, “olye e mu pa sha tango, opo e shi mu galulile?”
36 Molwaashoka iinima ayihe oya za kuye, oye e yi shita noyi li po omolwe. Kalunga na simanekwe sigo aluhe. Amen.
Omanyolo gopevi
^ Eln., “ombuto.”
^ Eln., “iitaafula.”
^ Eln., “ya kale aluhe taya petama.”
^ Nenge “simaneka.”
^ Eln., “yomonyama yandje.”
^ Eln., “iitayi yopaunshitwe.”
^ Nenge “teywa.”
^ Eln., “iitayi yopaunshitwe.”
^ Nenge “yamwe yomAajuda.”
