KAaroma 12:1-21
12 Onkee ano, aamwatate, molwaashoka Kalunga okwe mú ulukila olukeno, otandi mú indile mú gandje omalutu geni ge li eyambo eyapuki, li na omwenyo, nolya opalela Kalunga, sho tamu mu longele iilonga iiyapuki, nokukala hamu dhiladhila pandunge.
2 Ethii po okunwethwa mo* kuuyuni mbuka,* ihe lundululeni okudhiladhila kweni ku ninge okupe, opo mú shi imonene ne yene kutya ehalo lyaKalunga olya gwanenena, ewanawa, nolye mú opalela.
3 Omolwuuwanawahenda, mboka nda ulukilwa, otandi lombwele kehe gumwe gwomune kaa idhiladhilile pombanda inaashi pumbiwa, ihe oku kale ha dhiladhila pandjele sha ikolelela pamuthika gweitaalo lye, ndyoka Kalunga e mu pa.
4 Oshoka ngaashi owala tu na olutu lumwe lu na iilyo oyindji, ihe iilyo ayihe mbyoka ihayi longo iilonga ya faathana,
5 natse nonando otundji, otu li olutu lumwe muukumwe naKristus, ihe pauhandimwe, otu li iilyo yolutu lumwe.
6 Molwaashoka otu na omagano ga yoolokathana sha ikolelela kuuwanawahenda, mboka twa ulukilwa, ngele ogokuhunganeka, natu hunganekeni sha ikolelela keitaalo lyetu;
7 nenge ngele ogokuyakula, natu yakule; nenge ngoka e na gokulonga aantu na longe aantu;
8 nenge ngoka e na gokutsa omukumo na tse omukumo;* ngoka e na gokugandja na gandje nehalo ewanawa; ngoka e na gokukwatela komeho* ne shi ninge nuudhiginini;* ngoka e na gokuulukila yalwe ohenda ne shi ninge nenyanyu.
9 Inamu kala mú na ohole yuufudhime. Tondeni shoka oshiwinayi; dhiginineni shoka oshiwanawa.
10 Kaleni mú holathane nohole yomuule, ngaashi aamwayinathana. Kaleni one hamu katuka tango mú ulukile yalwe esimaneko.
11 Kaleni hamu longo nuudhiginini,* ihe inamu kala aananyalo.* Kaleni mwa udhilila ombepo ondjapuki. Longeleni Jehova nuudhiginini.*
12 Kaleni mwa nyanyukwa, sho mú na etegameno. Idhidhimikileni uudhigu. Dhiginineni okugalikana.
13 Kaleni hamu topolelathana shoka mu na naayapuki, mboka ye na ompumbwe. Kaleni hamu yakula yalwe.
14 Tsikileni okuyambeka mboka taye mú hepeke; ya yambekeni, noinamu ya thinga.
15 Nyanyukweni pamwe naamboka ya nyanyukwa; lileni pamwe naamboka taya lili.
16 Kala wa tala ko yakweni ngaashi wa itala ko ngoye mwene. Ino ihalela iinima yopombanda,* ihe ihalela yopevi. Inamu kala mwa itala ko aanandunge momeho geni.
17 Inamu shunithila nando ogumwe uuwinayi. Ningeni shoka sha talika ko kutya oshiwanawa kaantu ayehe.
18 Ngele otashi vulika, ne, kombinga yeni, ningeni ashihe shoka tamu vulu, mú kale mú na ombili naantu ayehe.
19 Aaholike, inamu kwatela omuntu onkone, ihe etheni Kalunga oye e mu geele. Oshoka okwa nyolwa taku ti: “‘Egeelo olyandje; ongame mwene tandi ka gandja egeelo,’ Jehova osho ta ti.”
20 Ihe “ngele omutondi gwoye okwa sa ondjala, mu pa a lye; ngele okwa sa enota, mu pa sha a nwe; oshoka ngele owe shi ningi, kungawo, oto gongele omakala ga hanya komutse gwe.”*
21 Ino etha wu sindwe kuuwinayi, ihe tsikila okusinda uuwinayi nuuwanawa.
Omanyolo gopevi
^ Nenge “okuzulwa. ”
^ Nenge “konkalelo yiinima yuuyuni mbuka.” Tala Omafatululo giitya.
^ Nenge “kumagidha.”
^ Nenge “gokuwilika.”
^ Nenge “a mana mo.”
^ Nenge “nuulaadhi.”
^ Nenge “aanye.”
^ Nenge “ongaapika.”
^ Nenge “ino kokeka mungoye omadhiladhilo guuntsa.”
^ sha hala okutya, okunengeneka omutima gwe.
