KAaroma 13:1-14
13 Omuntu* kehe na vulike kepangelo, oshoka omapangelo itaga vulu okukala po, ngele Kalunga ine shi pitika, nokwe ga pitika wo ga kale ge na oondondo ndhoka ge na.
2 Onkee ano kehe ngoka e li ompinge nepangelo oku li ompinge nelongekidho lyaKalunga, naamboka ye li ompinge nalyo otaya ka pangulwa.
3 Oshoka aapangeli kaye lile po okutilitha mboka haya longo uuwanawa, ihe oomboka haya longo uuwinayi. Mbela owa hala okukala ihoo tila aapangeli? Tsikila okulonga uuwanawa, notaye ke ku pandula.
4 Oshoka oye li aayakuli yaKalunga omoluuwanawa woye. Ihe ngele oto longo shoka oshiwinayi, owu na etompelo lyokukala wa tila, oshoka egongamwele lyawo inaye li humbatela osima yowala. Oye li aayakuli yaKalunga, ye lile po okugeela mboka taya longo shoka oshiwinayi.
5 Onkee ano ndyoka oli li etompelo kune lyokuvulika kuyo, hamolwaashoka owala mwa tila okugeelwa, ihe omolweiyuvo lyeni wo;
6 nomolwaashoka nane wo hamu futu iifendela; oshoka oye li aayakuli yaKalunga, mboka aluhe haya yakula aantu ayehe nelalakano ndika.
7 Peni ayehe shoka mú na oku shi ya pa: gandjeni iifendela kwaamboka ye na okupewa iifendela; gandjeni oofuto* kwaamboka ye na okupewa oofuto;* mboka ye na okutilika, ya tileni; mboka ye na okusimanekwa, ya simanekeni.
8 Inamu kala mú na oongunga dhomuntu, kakele kongunga yokuholathana; oshoka kehe ngoka e hole omuntu omukwawo ota gwanitha po ompango.
9 Oshoka ompango otayi ti: “Ino hondela, ino dhipaga, ino yaka, ino kala wu na okahalu,” niipango ayihe yilwe oya kankamena koshipango, shika tashi ti: “Hola mukweni, ngaashi wu ihole mwene.”
10 Omuntu, ngoka e na ohole, iha longele yakwawo uuwinayi; onkee ano ohole oyo egwanitho lyompango.
11 Shi ningeni, molwaashoka omu shi kutya ndika olyo ethimbo lyokupenduka mo moomposi, oshoka ehupitho lyeni olya hedha popepyeelela, shi vulithe pethimbo sho twa ningi ooitaali.
12 Masiku otaku shi ; esiku olya hedha popepi. Onkee ano natu etheni po iilonga yomomilema e tatu ihomatekeni iikondjitho yuuyelele.
13 Natu ihumbateni nawa ethimbo alihe; inatu kutha ombinga miituthi yi na eihumbato lya nyata, natu yandeni uunkolwi, omilalo dha nyata, okuyona kaatu na uuhwenge,* oontamanana nosho wo ondumbo.
14 Ihe landuleni oshiholelwa shOmuwa Jesus Kristus, noinamu pangela oompangela mú gwanithe po omahalo gopanyama.
Omanyolo gopevi
^ Nenge “omwenyo.”
^ Nenge “oofuto dhepangelo.”
^ Nenge “oofuto dhepangelo.”
^ Nenge “okuyona nopwaa na okusa ohoni.” MOshigreka aslegeia. Tala Omafatululo giitya.
