KAaroma 14:1-23
14 Taambeni omuntu, ngoka omunkundi meitaalo, ihe inamu mu pangula sho e na etaloko lya yooloka ko kulyeni.
2 Omuntu gumwe, eitaalo lye otali mu pitike a lye kehe shimwe, ihe ngoka omunkundi meitaalo oha li owala iikwamboga.
3 Ngoka ta li ina dhina ngoka itaa li, naangoka itaa li ina pangula ngoka ta li, oshoka Kalunga okwe mu taamba ko.
4 Ongoye lye, sho to pangula omupiya gwamukweni? Mwene gwe oye e na uuthemba wokutokola kutya shoka ta ningi oshi li mondjila, nenge osha puka. Odhoshili kutya molwaashoka Jehova ote mu kwathele, ota vulu okukala a hokiwa kuye.
5 Omuntu gumwe oha tala ko esiku lyontumba li vule lilwe; omanga gulwe ha tala ko esiku lyontumba lya faathana nomasiku galwe agehe. Kehe gumwe na kale a tompwa thiluthilu kutya shoka a itaala oshi li mondjila.
6 Ngoka ha dhimbulukwa esiku lyontumba ohe li dhimbulukwa a simaneke Jehova. Shimwe ishewe, ngoka ha li ohe shi ningi nelalakano lyokusimanekitha Jehova, oshoka ota pandula Kalunga. Naangoka itaa li naye ota simaneke Jehova, ihe nonando ongawo, naye oha pandula Kalunga.
7 Kapu na nando ogumwe gwomutse e li ko polwe mwene, nokapu na nando ogumwe ta vulu okwiisila ye mwene.
8 Oshoka ngele otu na omwenyo, otu na omwenyo tu longele Jehova, nongele otwa si, otatu sile Jehova. Onkee ano kutya nduno otu na omwenyo, nenge otwa sa, tse oyaJehova.
9 Oshoka Kristus okwa si, nokwa kala ishewe nomwenyo, opo a vule okuninga Omuwa gwaasi nosho wo gwaanamwenyo.
10 Ihe omolwashike to pangula omumwaho? Nenge omolwashike wo wa dhina omumwaho? Oshoka atuheni otatu ka holoka komeho goshipundi shokupangula shaKalunga.
11 Oshoka okwa nyolwa taku ti: “Jehova ota ti, ‘Oshili, ngaashi ndi na omwenyo, kehe omuntu oku na okutsila ndje oongolo, nomuntu* kehe ota ka hempulula montaneho kutya ongame Kalunga.’”
12 Onkee ano kehe gumwe gwomutse ota ka ihokolola ye mwene kuKalunga.
13 Onkee ano inatu pangulathaneni, ihe pehala lyaashono, natu kale twa tokola toko kaatu pundukithe omumwatate, nenge okuninga sha shoka tashi vulu oku mu pundukitha.
14 Ndi li omulanduli gwOmuwa Jesus, ondi shi shi nonda tompwa kutya kapu na oshinima sha nyata musho shene, ihe ohashi kala owala sha nyata pataloko lyopantu; ihe omuntu ngele okwa tala ko oshinima shontumba kutya osha nyata, nena momeho ge ohashi kala sha nyata.
15 Oshoka ngele omumwaho okwa pundukithwa kiikulya, mbyoka ho li, nena kungawo, ito ulike we ohole. Kristus okwa sila omuntu ngoka. Onkene ino teya po eitaalo lye omolwiikulya, mbyoka ho li.
16 Onkee ano ino etha uuwanawa, mboka ho longo, wu popilwe muuwinayi.
17 Oshoka opo omuntu a ye mo mUukwaniilwa waKalunga, inashi ikolelela kokulya nokunwa, ihe osha ikolelela kuuyuuki we, kombili ye nosho wo kenyanyu lye, ano iinima mbyoka hayi etithwa kombepo ondjapuki.
18 Oshoka kehe ngoka ta longele Kristus momukalo nguka ota kala a hokiwa kuKalunga nokaantu.
19 Onkee ano natu lalakaneneni iinima, mbyoka tayi kaleke po ombili nosho wo okutungathana.
20 Ethii po okuningitha aantu,* mboka Kalunga ta kwathele ya ninge aapiya ye, ya punduke omolwiikulya. Odhoshili kutya iikulya ayihe oya yogoka, ihe osha puka komuntu okulya iikulya, mbyoka tayi pundukitha yalwe.
21 Oshi li hwepo kuu lye onyama, nenge kuu nwe omaviinu, nenge kuu ninge sha shoka tashi pundukitha omumwaho.
22 Shoka wa itaala nashi kale pokati koye naKalunga. Omuntu ngoka ihaa ipangula ye mwene, oshoka oku shi kutya shoka a ninga oshi li mondjila, ota kala a nyanyukwa.
23 Ihe ngele oku na omalimbililo, okwa pangulwa nale, ngele okwa li, molwaashoka ina lya sha ikolelela keitaalo. Odhoshili kutya kehe shoka inaashi ikolelela keitaalo osho uulunde.
